ETENYI 4
Ndjaɛndja onongo—‘Ɔmbɛdia oma lo pɛkato kami’
“Olimu ami w’oyoyo wakakimanyiya dia nkotsha ehomba wa nkumbo kaso, koko vɔ wakayokonya dia nsala weho w’awui tshɛ wa kɔlɔ. Lakayotatɛ nsala fɛtɛ y’apanganu, ndjasha l’awui wa pɔlitikɛ ndo mbɔtɔ l’ɛtɛmwɛlɔ wa kashi. Lakayonga Ɔmɛnyi wa Jehowa wambɔla lo nyuma l’edja k’ɛnɔnyi 40. Lo yɛdikɔ yakatetaka nshi, mbakamatalekaka mfɔnya ɔnɛ Jehowa hayokoka dimanyiyami. Lakayaoke oko handjokoka dimanyiyama. Laadiko dia laasɔ, lakeye akambo wa mɛtɛ la ntondo ka dimi ndjasha lo akambo wa kɔlɔ asɔ.”—Martha.
NDJAƐNDJA onongo koka monga oko wotsho wa wolo mɛmba. Nkumekanga Davidɛ akafunde ate: ‘Munga yami yambombahema l’ɔtɛ, oko oshikɔ wa wotsho, wahamakoke mɛmba.’ (Osambu 38:4) Akristo amɔtshi wakonge la lonyangu lambotamba olelo lo mfɔnya dia Jehowa hakokaki mbadimanyiya pondjo. (2 Kɔrɛtɔ 2:7) Onde kanyi shɔ yekɔ dimɛna? Kaanga naka wɛ ambosalaka pɛkato ya weke, onde wɛ ambangana etale oma le Jehowa woho wele nde hakokaki kodimanyiya pondjo? Ndooko, aha ngasɔ.
‘Nyɛsɔ todje akambo l’ɔnɔngɔ lam’asaso’
Jehowa hakoke nsɛka atshi wa pɛkato wayatshumoya. Koko nde mbayangaka. Lo wɛɛla w’ɔna la lotshito, Yeso akɛdika Jehowa l’ombutshi wa ngandji lele ɔnande akatshike nkumbo kawɔ, ko ntshɔ dihole dikina dia tɔsɛna lɔsɛnɔ la mindo. L’ɔkɔngɔ w’etena kɛmɔtshi, ɔnakɔ akɔshi yɛdikɔ ya nkalola lakawɔ. Ɔkɔndɔ akɔ mbutaka ɔnɛ: “Lam’akawɛnyi she oma lo tshalola, nde akawoke kɛtshi, akalawɔ otsha le nde, akookumbatɛ ndo akanɔnana la nde efula.” (Luka 15:11-20) Onde wɛ nangaka ndjasukanya la Jehowa, koko fɔnyaka ɔnɛ wɛ mangana la nde “tshalola”? L’ɛnyɛlɔ k’ombutshi wa lo wɛɛla wa Yeso, Jehowa kookaka kɛtshi. Nde ekɔ suke dia kolongola naka wɛ nkalola.
Ko kayotota naka wɛ ekɔ lo mɛna ɔnɛ wɛ akasale pɛkato yamboleka weke kana efula dia Jehowa kodimanyiya? Lam’alangɛ, sɛdingola leeta laki Jehowa lele lo Isaya 1:18. Jehowa mbutaka ɔnɛ: ‘Nyɛsɔ todje akambo l’ɔnɔngɔ lam’asaso. Kaanga pɛkato yanyu yaya beela oko dikila, yɔ yayoyala wɛma oko pɛmbɛ.’ Lo mɛtɛ, kaanga pɛkato yɛnama oko hayokoke mimɔ l’ɛnyɛlɔ ka dikila diambɔtɔ lo dihɔndɔ dia wɛma, Jehowa kokaka ndjidimanyiya.
Jehowa halange dia wɛ ntetemala monga la nkum’otema kakɛndja onongo. Ko laasɔ, akokayɛ nsala dia Nzambi kodimanyiya munga yayɛ dia wɛ monga la nkum’otema ka pudipudi? Enda akambo ahende wakasale nkumekanga Davidɛ. Dui dia ntondo, nde akate ate: ‘Layoshola kɔlɔ yami le Jehowa.’ (Osambu 32:5) Ohɔ dia, Jehowa akashidi kɔlɔmba dia wɛ ndjasukanya la nde lo dɔmbɛlɔ ndo ‘mbidja akambo l’ɔnɔngɔ’ wɛ la nde. Kitanyiya dui sɔ. Sholɛ Jehowa pɛkato yayɛ ndo kɛnɛmɔlɛnde tokanyi tayɛ. Lo menda kɛnɛ kakookomɛ, Davidɛ akakoke nɔmba l’eshikikelo tshɛ ɔnɛ: ‘Ɔmbɛdia oma lo pɛkato kami. . . . Otema wambatɛ ndo wambatshatshema, Nzambi le, wɛ hatotona.’—Osambu 51:2, 17.
Dui dia hende, Davidɛ akakondja ekimanyielo lo tshimbo ya omvutshi Natana laki onyimpala wa Nzambi. (2 Samuele 12:13) Ɛlɔ kɛnɛ, Jehowa akakitsha dikumanyi dia l’etshumanelo diakalowanyema dia nkimanyiya atshi wa pɛkato wayatshumoya dia vɔ nɔngɔsɔla diɔtɔnganelo diasawɔ la Jehowa. Etena kayoyotɛ dikumanyi pɛkato yayɛ, vɔ wayokamba l’Afundelo ndo wayosala alɔmbɛlɔ w’oma k’ɛse otema dia kotutsha asolo, nkitshakitsha kana minya tokanyi ta kɔlɔ tele la yɛ ndo kokimanyiya dia wɛ nkɔnɔ lo nyuma.—Jakɔba 5:14-16.
Jehowa nangaka dia wɛ monga la nkum’otema ka pudipudi
‘Ɔngɛnɔngɛnɔ le ɔnɛ lele kɔlɔ kande kambodimanyiyama’
Aha la taamu, wɛ koka ndjɔfɔnya dia mbisholɛ Jehowa Nzambi pɛkato yayɛ ndo mbutɛ dikumanyi ekɔ l’atei w’awui woleki wolo nsala. Mɛnamaka dia ndo Davidɛ mbakonge la tokanyi ta ngasɔ. Nde ‘akalɛmbɔhala’ l’edja k’etena kɛmɔtshi. (Osambu 32:3) Koko l’ɔkɔngɔ wa laasɔ, nde akayokondja wahɔ lo mbishola pɛkato yande ndo lo ndowanya lɔkɛwɔ lande.
Wahɔ woleki woke wakayokondja Davidɛ ele, nyomonga l’ɔngɛnɔngɛnɔ. Nde akafunde ate: ‘Ɔngɛnɔngɛnɔ le ɔnɛ lele kɔlɔ kande kambodimanyiyama, ɔnɛ lele pɛkato kande kambokombama.’ (Osambu 32:1) Nde akalɔmbɛ nto ate: ‘Jehowa le, odihole ɛlɔmɔ ami, kele onyɔ ami wewoya lotombo layɛ.’ (Osambu 51:15) Ɔngɛnɔngɛnɔ waki la Davidɛ dia monga la nkum’otema kahayowɛndja onongo ndo lowando laki la nde l’ɔtɛ wakoodimanyiya Nzambi, akootshutshuya dia mbutɛ anto akina awui wendana la Jehowa.
Jehowa nangaka dia wɛ monga la nkum’otema ka pudipudi. Nde nangaka wɛ mbutɛ anto akina awui wendana la nde ndo l’asangwelo ande la losembwe ndo l’ɔngɛnɔngɛnɔ w’efula, koko aha la nkum’otema kakɛndja onongo. (Osambu 65:1-4) Ohɔ dia Bible mbutaka ɔnɛ ‘naka pɛkato yanyu nimɔ, kete tena di’ekeketshelo diayoya oma le Jehowa.’—Etsha 3:19.
Kɛsɔ mbakakomɛ Martha. Nde mbutaka ate: “Ɔnami akatomɛka Tshoto y’Etangelo la Réveillez-vous ! mbala la mbala. Yema yema, lakayokaloya diɔtɔnganelo diasami la Jehowa. Dui diakaleke wolo dia dimi nkalola l’etshumanelo ele, nɔmba edimanyielo ka pɛkato tshɛ yakamasale. Koko l’ekomelo, lakayasukanya la Nzambi lo dɔmbɛlɔ ndo lakɔɔlɔmbɛ dia nde dimanyiyami. Dui dia diambo ko, l’ɔkɔngɔ w’ɛnɔnyi 40 lakayokalola le Jehowa. Ɛnyɛlɔ kami mɛnyaka dia kaanga l’ɔkɔngɔ w’ɛnɔnyi efula, onto koka mbisha onto okina diɛsɛ dia kambɛ Nzambi ndo nkalola lo ngandji kande.”
