EKIYANU komɛka onto tshɛ, kaanga ekambi waki Nzambi. Omembi w’esambo akafunde ate: ‘Lɔsɛnɔ lami lambolola l’ekiyanu.’ (Osambu 94:19) Ndo Yeso akatatshi dia lo nshi y’ekomelo, “ekiyanu wa lo lɔsɛnɔ” wayoleka mbidjɛ anto wekamu dia kambɛ Jehowa. (Luka 21:34) Kayotota lo dikambo diayɛ? Onde ndo wɛ mbayaoka dia lɔsɛnɔ layɛ lambolola l’ekakatanu wendana la ekondjelo, la nkumbo kana l’ekiyanu wendana la yoonge? Ngande wakoka Jehowa kokimanyiya dia wɛ mbatondoya?

Hatokoke ndɔshana l’ekiyanu aso la wolo aso hita. Ɔpɔstɔlɔ Pɔɔlɔ akafunde ate: “Tekɔ lo soyama wolo lo toho tshɛ. Tekɔ l’okandokando . . . tekɔ lo kɔshama la nkɛtɛ.” Koko, nde akate nto ɔnɛ: “Aha woho wahatakoke nsukasuka,” “aha woho wele hatoyeya kɛnɛ ka nsala,” ndo ɔnɛ “tatalanyema.” Kakɔna katokimanyiya dia mbikikɛ? Ekɔ “wolo woleki wɔnɛ wokongaka l’onto,” mbuta ate wolo w’oma le Jehowa Nzambi Kanga-Wolo-Tshɛ.—2 Kɔrɛtɔ 4:7-9.

Kana yimba lo woho wakayakondja “wolo woleki wɔnɛ wokongaka l’onto” lo nshi yakete. Onde wɛ hayoohɔ woho wakakokimanyiya sawo dimɔtshi dia mfudia lowando layɛ lo ngandji ka kɔlamelo ka Jehowa? Onde mbetawɔ kayɛ lo alaka wa Jehowa kookeketala etena kakayetsha anto akina awui wendana la elongamelo ka Paradiso? Etena katshɔso lo nsanganya y’Akristo ndo kewoyaso anto akina awui wendana la mbetawɔ kaso, sho kondjaka wolo wa mbikikɛ ekiyanu wa lo lɔsɛnɔ ndo sho mongaka la ki ka lo yimba dia kambɛ Jehowa l’ɔngɛnɔngɛnɔ.

Lo mɛtɛ, yimba yayɛ koka kotoma dia nsala akambo efula mbala kakɔ ɔtɔi. Ɛnyɛlɔ, Jehowa tɔlɔmbaka dia sho nyanga ntondo Diolelo ndo ntetemala nsala akambo wa lo nyuma. (Mateo 6:33; Luka 13:24) Ko kayotota naka ɔlɔshamelo w’oma le ase nkumbo kana asekayɛ, hemɔ kana ekakatanu wendana la nkumbo wekɔ lo koshimba dia nsala awui amɔtshi? Kana kayotota naka olimu ayɛ wa lo demba kɔlɛndjaka ndo kɔɔsɛka wenya efula wakokayɛ mbetsha kaamɛ la ase etshumanelo? Naka wɛ ndjasha lo akambo efula wa ngasɔ wakɔsɛ wenya ndo wakɔlɛndja, kete wɛ koka ndjaoka dia wɛ aya l’akambo efula. Ondo wɛ koka ndjɔfɔnya ɔnɛ Jehowa ekɔ lo kɔlɔmba akambo wamboleka efula.

Jehowa mbeyaka ndjadja lo dihole di’onto. Nde hakoke pondjo tɔlɔmba akambo efula oleki kɛnɛ kakokaso nsala. Nde mbeyaka ɔnɛ l’ɔkɔngɔ w’ekiyanu wa wolo, nɔmbamaka di’etena k’otale mbeta dia sho ndjonga woho watotongaka.—Osambu 103:13, 14.

Ɛnyɛlɔ, tende woho wakayakiyanya Jehowa lo dikambo di’omvutshi Elidja. Etena kakakɔmɔ omvutshi Elidja efula ndo kakandoke wɔma ko ndawɔ etale l’oswe, onde Jehowa akoohangwɛ ndo akawodjangɛ dia nde nkalola tokamba olimu ande? Ndooko. Jehowa akatome ondjelo ɔmɔtshi mbala hiende dia ndjemula Elidja la ngandji tshɛ ndo dia ndjowosha yangɔ ya ndɛ. Kaanga mbakidiɔ ngasɔ, nshi 40  l’ɔkɔngɔ, Elidja akatetemala ndjakiyanya ndo monga la wɔma. Kakɔna kakasale Jehowa nto dia mbookimanyiya? Dui dia ntondo: Jehowa akɛnya dia nde kokaka mbokokɛ. Dui dia hende: Jehowa akakeketsha Elidja la “diui di’okoke dia yoyo.” Dui di’ekomelo: Jehowa akayowɛnya dia aki anto akina nunu wakatɛmɔlaka Nzambi la kɔlamelo tshɛ. Yema tshitshɛ l’ɔkɔngɔ, Elidja akanyomoyonga omvutshi wele l’ohetoheto. (1 Khumi ya Dikanga 19:1-19) Wetshelo akɔna wakondjaso? Etena kakonge Elidja la ekiyanu, Jehowa akoosalɛ akambo la solo dia lotutsha ndo la kɛtshi. Jehowa atatshikitana. Nde ndjakiyanyaka woho akɔ waamɛ lo dikambo diaso.

Etena kakanyiyayɛ kɛnɛ kakokayɛ salɛ Jehowa, enda akambo wakokayɛ mbosalɛ. Tɛdikake kɛnɛ kakokayɛ nsala nshi nyɛ la kɛnɛ kakayasalaka. Tɔshi ɛnyɛlɔ kɛnɛ: Ondawi wa lowango ɔmɔtshi wakatshike ndawɔ l’edja ka ngɔndɔ kana ɛnɔnyi efula hokoka nyomosala dui sɔ mbala kakɔ ɔtɔi. Koko, nde ndjotatɛka ndjadjɛ eyango wa totshitshɛ wayowokimanyiya dia monga la wolo ndo la ekikelo. Akristo wekɔ oko andawi wa lowango. Vɔ ndjaekiyaka lo monga la oyango wa shikaa. (1 Kɔrɛtɔ 9:24-27) Shi wɛ koka ndjadjɛ oyango ɔmɔtshi wa lo nyuma wakokayɛ nkotsha l’etena kɛnɛ? Ɛnyɛlɔ, wɛ koka ndjadjɛ oyango wa tshɔɔka lo losanganya lɔmɔtshi la l’etshumanelo. Lɔmba Jehowa dia nde kokimanyiya dia wɛ nkotsha oyango ɔsɔ. Dia wɛ nkondja wolo wa lo nyuma nto, ‘lɛta ko wɛ ayɛna dia Jehowa ekɔ ɔlɔlɔ.’ (Osambu 34:8) Ohɔ dia, dui tshɛ diakokayɛ nsala dia mɛnya Jehowa ngandji kawokayɛ, oyadi tshitshɛ mbediɔ, diɔ diekɔ la nɛmɔ le nde.—Luka 21:1-4.

Ngande wakasha Jehowa June wolo wa nde nkalola le nde. Kadiyɛso kɛsɔ mbutaka ate: “Lakatetemala nɔmba Jehowa dia nde kimanyiyami. Oma laasɔ, okilo ami wa womoto akayombutɛ dia losanganya la woke layosalema l’osomba aso. Lakɔshi yɛdikɔ ya ntshɔ lushi lɔmɔtshi dia toyela losanganya lɔsɔ. Lakatonga l’ɔngɛnɔngɛnɔ efula dia nyomonga kaamɛ la ekambi wa Jehowa! Losanganya la woke lɔsɔ mbakambisha ekeketshelo kakimi la tɔ ohomba. Kakianɛ, lookambɛ Jehowa nto l’ɔngɛnɔngɛnɔ tshɛ. Lɔsɛnɔ lamboleka monga la kitshimudi le mi. Kɛnɛ koleki tshɛ ele, lekɔ l’ohomba w’anangɛmi l’akadiyɛmi ndo dimi pombaka mbetawɔ dia vɔ kimanyiyami. Ɔnkɔnɛ, lekɔ la lowando l’efula l’ɔtɛ wakamayokondja diaaso dia nkalola le Jehowa.”