Osekaso ombetawudi wa ngandji:

Oko wadieyayɛ, Bible ekɔ dibuku diatɛkɛta lo yɛdikɔ y’efula awui wendana l’anto. Efula l’atei awɔ waki apami ndo wamato waki la kɔlamelo wakahomana l’ekakatanu wele oko watokomɛ. Vɔ waki ‘la nsaki yele oko yaso.’ (Jakɔba 5:17) Amɔtshi wakakɔmɔ l’ɔtɛ w’ekakatanu ndo w’ekiyanu. Akina wakasoyama efula oma le ase nkumbo yawɔ kana asekawɔ atɛmɔdi. Ndo akina efula wakayaɛndja onongo l’ɔtɛ wa munga yawɔ.

Onde anto asɔ wakɛkɔ Jehowa tshɛ lo tshɛ? Ndooko. Efula kawɔ waki oko omembi w’esambo lakalɔmbɛ ate: ‘Dimi lakanganɛ oko ɔkɔkɔ wamboshishɔ. Yanga okambi ayɛ, nɛ dia dimi halohɛ wadjango ayɛ.’ (Osambu 119:176) Onde wɛ lawɔ koka nkɛnɛmɔla nsaki ya ngasɔ?

Jehowa hohɛ pondjo atɛmɔdi ande wambotomba oma lo lokoto. Koko, nde mbayangaka ndo mbala efula nde salaka dui sɔ lo tshimbo y’asekaso ambetawudi. Tɔshi ɛnyɛlɔ ka woho wakakimanyiya Jehowa okambi ande Jɔbɔ, lakadiɛnɛ la mpokoso efula, mbidja ndo oshishwelo w’ekondjelo kande, w’anande ndo lakonge la hemɔ ka wolo ka lo demba. Ndo nto, Jɔbɔ akakikɛ ɛtɛkɛta wa kɔlɔ wakawotɛ wanɛ wakahombaka mbokeketsha. Koko, nde komboka Jehowa ɔkɔngɔ kaanga yema, kaanga mbakandayolanga minganɛ lo tokanyi l’etena kɛmɔtshi. (Jobo 1:22; 2:10) Ngande wakakimanyiya Jehowa Jɔbɔ dia nde nyomonga l’ekanelo k’ɔlɔlɔ?

Yoho mɔtshi yakakimanyiya Jehowa Jɔbɔ ele, lo tshimbo ya Elihu, osekande ombetawudi. Etena kakatɛkɛtaka Jɔbɔ, Elihu akoohokamɛka ndo oma laasɔ nde akayɔtɛkɛta. Kakɔna kakandahombe mbuta? Onde nde akahombe mɔnyɔla Jɔbɔ lo mbɛɛndja onongo kana mbosha sɔnyi? Onde Elihu akayaɔshi dia nde ndeka Jɔbɔ? Ndooko kaanga yema. Oko wakandatshutshuyama la nyuma kaki Nzambi, Elihu akate ɔnɛ: ‘Enda, dimi lekɔ paka oko wɛ la ntondo ka Nzambi ka mɛtɛ. Dimi lawɔ lakasalema oma lo diwomba.’ Oma laasɔ nde akashikikɛ Jɔbɔ ɔnɛ: ‘Wɔma ami hawohombe kosatsha lokomba, ndo ndooko shɛngiya y’oma le mi yahomba kokonya ewo.’ (Jobo 33:6, 7) Lo dihole dia mbahatanyɛ Jɔbɔ wotsho laadiko dia tshuka, la ngandji tshɛ Elihu akasha Jɔbɔ alako ndo ekeketshelo kakinde la tɔ ohomba.

Lam’alangɛ, eya dia takalɔngɔsɔla biukubuku nyɛ la kanyi yakɔ yaamɛ shɔ. Dui dia ntondo diakatasale ele, takahokamɛ la yaambalo tshɛ anto efula wakatombe oma lo lokoto, takasɛdingola dimɛna akambo wakaakomɛ. (Tukedi 18:13) Oma laasɔ, takasɛdingola Afundelo ndo takasɛdingola nto lo dɔmbɛlɔ ɛkɔndɔ wɛnya woho wakakimanyiya Jehowa ekambi ande wa lo nshi y’edjedja etena kakawahomana l’akambo akɔ waamɛ. L’ekomelo, takasanganya ɛkɔndɔ akɔ w’oma l’Afundelo la akambo wakomɛ ekambi waki Nzambi wa nshi nyɛ dia ntondja biukubuku nyɛ. Tambokɔlɔmba la wangasanu tshɛ dia nsɛdingola biukubuku nyɛ dimɛna. Lam’alangɛ, eya dia sho kookaka ngandji ka mɛtɛ.

Olui-walɔmbɔla w’Ɛmɛnyi wa Jehowa