Le wanɛ walanga Jehowa la Ɔtɛkɛta ande Bible

Yeso akate ate: “Nyayeya akambo wa mɛtɛ, ko akambo wa mɛtɛ wayonyotshungola.” (Joani 8:32) Ohokanyiya woho wakayayaoke etena kakayashola akambo wa mɛtɛ wa lo Bible mbala ka ntondo! Aki dui di’ɔngɛnɔngɛnɔ dia mbeya ɔnɛ l’andja ɔnɛ wambolola la kashi, sho koka mbeka akambo wa mɛtɛ.​—2 Timɔte 3:1.

Jehowa Nzambi nangaka dia sho mbeya akambo wa mɛtɛ. Ndo lam’ele sho nangaka anto, sho nangaka mbatɛwɔ. Koko kambɛ Nzambi hakomɛ tsho laasɔ. Sho pombaka nsala tshɛ kakokaso nsala dia nsɛna oko Akristo nɛ dia tekɔ la dilɛmiɛlɔ di’efula l’atɔndɔ wa Jehowa. Yeso akalembetshiya yoho ya dimɛna yakokaso mɛnya dia sho mbolangaka. Nde akate ate: “Naka nyu nkitanyiya wadjango ami, kete nyayotshikala lo ngandji kami, oko wakitanyiyami wadjango wa Papa ndo watshikalami lo ngandji kande.”​—Joani 15:10.

Yeso nangaka mɛtɛ She ndo nde salaka oseka dikambo tshɛ di’ɔlɔmba She dia nsala. Naka sho mbokoya Yeso lo yoho yaso ya lɔsɛnɔ, kete Jehowa ayotolanga ndo tayonga mɛtɛ l’ɔngɛnɔngɛnɔ. Oko wakate Yeso ate “naka nyu mbeyaka akambo asɔ, ɔngɛnɔngɛnɔ le nyu naka nyayowasala.”​—Joani 13:17.

Tekɔ l’elongamelo dia dibuku nɛ diayokokimanyiya dia mbeka woho wa nsɛna lo yoho yɔtɔnɛ l’akambo wa mɛtɛ wa lo Bible ndo monga ɔngɛnyi wa Nzambi. Tekɔ lo nɔmba dia wɛ mpamia ngandji kokayɛ Nzambi ndo ntshikala ‘lo ngandji ka Nzambi ele l’elongamelo ka lɔsɛnɔ la pondjo.’​—Judɛ 21.