Awui wa kɔlɔ wakatatɛ lanɛ la nkɛtɛ etena kakate Satana kashi kande ka ntondo. Satana aki ntondo ondjelo wa kokele, koko ‘nde koshikimala l’akambo wa mɛtɛ.’ (Joani 8:44) Nde akakombola di’anto mbɔtɛmɔla etena kɛnɛ kele paka Nzambi oto mbahomba tɛmɔma. Satana akakese Eva, womoto la ntondo ndo akawetawoya dia nde mbôkitanyiya lo dihole dia nde nkitanyiya Nzambi. Adama akayele lokoko laki Eva lo mɔnyɔla awui waki Nzambi. Yɛdikɔ yakɔshi Adama mbakayokonya lo asui ndo lo nyɔi.—Adia Etatelu 3:1-6, 19.

Etena kakatɛ Satana Eva dia nde tɔmbɔkwɛ Nzambi, mbakatatɛ Satana tɔmbɔkwɛ lowandji laki Nzambi, kana mɔnyɔla lotshungɔ lele la Nzambi la nɔmbɔla. Anto efula wakayele lokolo laki Satana lo ntona ɛlɔmbwɛlɔ kaki Nzambi. Lo nsala ngasɔ, Satana akakome ‘ɔnɔmbɔdi w’andja ɔnɛ.’—Adia Joani 14:30; 1 Joani 5:19.

Elimu waki Nzambi tshɛ wekɔ kokele. Anto ndo andjelo wakatongama oma le Nzambi ndo vɔ waki l’akoka wa nkitanyiya awui waki Nzambi lo yoho ya kokele. (Euhwelu k’Elembe 32:4, 5) Nzambi akatotonge la lotshungɔ la nsɔna dia nsala kɛnɛ kele ɔlɔlɔ kana kɛnɛ kele kɔlɔ. Lotshungɔ lɔsɔ toshaka diaaso dia sho mɛnya ngandji kawokaso.—Adia Jakoba 1:13-15; 1 Joani 5:3.

Jehowa ambotshika lo tshanda mɔtshi di’anto tɔmbɔkwɛ lowandji lande? Lande na? Ele dia nde mɛnya ɔnɛ anto hawokoke nkondja ndoko wahɔ lo ndjâlɔmbɔla aha l’ekimanyielo kande. (Undaki 7:29; 8:9) Dui sɔ diambɛnama hwe lo  ɛnɔnyi 6 000 wamboyalɔmbɔla ana w’anto. Mandji y’ana w’anto yambohekɔ dia minya ata, awui wa kɔlɔ, wɛngiya kana hemɔ.—Adia Jeremiya 10:23; Romo 9:17.

Otshikitanyi l’ɛlɔmbwɛlɔ k’ana w’anto, wanɛ wakitanyiya Nzambi kondjaka wahɔ oma l’ɛlɔmbwɛlɔ kande. (Isaya 48:17, 18) Kem’edja, Jehowa ayanga ndanya mandji tshɛ y’ana w’anto. Paka wanɛ wakasɔnɛ dia nɔmbwama oma le Nzambi mbayotshikala la nkɛtɛ.—Isaya 11:9.—Adia Danyele 2:44.

Satana akate dia ndooko onto layokambɛ Jehowa la ngandji tshɛ. Onde wɛ kokaka mɛnya dia kɛnɛ kakandate kɛsɔ kekɔ kashi? Eelo! Solo dia lotutsha diaki Nzambi toshaka diaaso dia sho mɛnya dia kana sho nangaka nɔmbwama oma le Nzambi ko kana oma le anto. Sho mɛnyaka ɔsɔnwɛlɔ aso oma lo yoho yaso ya lɔsɛnɔ.—Adia Jobo 1:8-12; Tukedi 27:11.

Sho kokaka nsɔna Nzambi oko Ɔnɔmbɔdi aso lo nyanga ɔtɛmwɛlɔ wa mɛtɛ l’oyango wa mbɔtɛmɔla lo yoho yetawɔ Ɔtɛkɛta ande, Bible. (Joani 4:23) Sho kokaka ntona dia Satana monga ɔnɔmbɔdi aso lo mbewɔ dia ndjâtambiya l’awui wa pɔlitikɛ ndo w’ata oko wakasale Yeso.—Adia Joani 17:14.

Satana kambaka la wolo ande dia ntshutshuya anto dia vɔ ndjakimɔ lo ditshelo dia kɔlɔ. Etena katonaso ditshelo dia kɔlɔ sɔ, angɛnyi ndo ewotɔ aso amɔtshi mbeyaka tɔnyɔla kana tɔlɔsha. (1 Petero 4:3, 4) Ɔnkɔnɛ, sho pombaka nsala ɔsɔnwɛlɔ ɔmɔtshi. Onde tayekesanɛ l’anto woka Nzambi ngandji? Onde tayokitanyiya ɛlɛmbɛ ande wa lomba ndo woludi la ngandji? Naka eelo, kete tayɛnya dia Satana ekɔ kanga kashi lo woho wakandate dia ndoko onto lakoka nkitanyiya Nzambi l’atei w’ekakatanu.—Adia 1 Koreto 6:9, 10; 15:33.

Ngandji koka Nzambi anto mbatoshikikɛ dia nde ayonya awui wa kɔlɔ ndo asui. Wanɛ wetawɔ dia Nzambi mbâlɔmbɔla mbayɔsɛna pondjo pondjo la nkɛtɛ.—Adia Joani 3:16.