Diolelo diaki Nzambi kɛdikɛdi lowandji la l’olongo. Diɔ diayɔhɛna mandji nkina tshɛ ndo diayosala dia lolango laki Nzambi salema la nkɛtɛ oko wasalemalɔ l’olongo. Losango lendana la Diolelo diaki Nzambi lekɔ mɛtɛ lokumu l’ɔlɔlɔ. Anto wekɔ l’ohomba wa lowandji l’ɔlɔlɔ, ɔnkɔnɛ, kem’edja Diolelo diaki Nzambi diayanga nkotsha ohomba awɔ ɔsɔ. Diɔ diayosala di’anto tshɛ wa la nkɛtɛ monga kâmɛ.—Adia Danyele 2:44; Mateu 6:9, 10; 24:14.

Diolelo pombaka monga la nkumekanga kadiɔ. Jehowa akasɔnɛ Ɔnande, Yeso Kristo dia monga Nkumekanga ka lo Diolelo Diande.—Adia Enyelo 11:15.

Ɔnaki Nzambi ekɔ Nkumekanga koleki dimɛna nɛ dia nde ekɔ ɔlɔlɔ ndo nde sukɛka la wolo tshɛ awui w’ɔlɔlɔ. (Joani 1:14) Ndo nto, nde ekɔ la wolo wahombama dia nkimanyiya anto nɛ dia nde ayolɛ oma l’olongo lâdiko dia nkɛtɛ k’otondo. L’ɔkɔngɔ wa nde mbolwama, nde akadɛ l’olongo ndo akatodjasɛ lo lonya l’omi laki Jehowa akongɛ dia nde mbosha lowandji. (Heberu 10:12, 13) L’ekomelo, Nzambi akawosha wolo wa nde ntatɛ mbolɛ.—Adia Danyele 7:13, 14.

Djui ya tshitshɛ yelamɛ ɔnɛ ‘ekilami’ mbayolɛ kâmɛ la Yeso l’olongo. (Danyele 7:27) Ekilami wa ntondo wakasɔnama aki apɔstɔlɔ waki Yeso. Polo ndo ɛlɔ kɛnɛ Jehowa âkatatetemala nsɔna apami ndo wamato wele la kɔlamelo oko ekilami. L’ɛnyɛlɔ ka Yeso vɔ mbolwamaka la demba dia lo nyuma.—Adia Joani 14:1-3; 1 Koreto 15:42-44.

 Anto angana wayotshɔ l’olongo? Yeso akawaelɛ ɔnɛ ‘lemba la tshitshɛ l’ɛkɔkɔ. (Luka 12:32) Vɔ wayonga tshɛtshɛ oko anto 144 000 ndo wayolɛ lâdiko dia nkɛtɛ kâmɛ la Yeso.—Adia Enyelo 14:1.

Diolelo diaki Nzambi diakatatɛ mbolɛ lo 1914. * Dui dia ntondo diakasale Yeso oko Nkumekanga aki mbitshanya Satana la ɛdiɛngɛ ande oma l’olongo oya la nkɛtɛ. Satana akoke nkɛlɛ ndo akatatɛ mbidja ofukutanu lo nkɛtɛ k’otondo. (Enyelo 12:7-10, 12) Ntatɛ oma l’etena kɛsɔ, ekakatanu wakafulanɛ lo yoho ya kɔlɔ efula. Ata, ndjala, hemɔ, ndo adidimu wa nkɛtɛ wekɔ l’atei wa ‘djembetelo’ yɛnya ɔnɛ kem’edja Diolelo diayanga nɔmbɔla akambo wa la nkɛtɛ.—Adia Luka 21:7, 10, 11, 31.

L’ekimanyielo k’olimu w’esambishelo wasalema ɛlɔ kɛnɛ l’andja w’otondo, Diolelo diaki Nzambi diekɔ lo nsala di’olui a woke w’anto w’oma lo wedja tshɛ monga kâmɛ. Miliyɔ y’anto wele la memakana wekɔ lo nɔmbwama oma le Yeso lele Nkumekanga ka Diolelo diaki Nzambi. Diolelo diaki Nzambi diayowakokɛ etena kayodiolanya dikongɛ nɛ di’akambo dia kɔlɔ. Ɔnkɔnɛ, onto tshɛ lakombola ndjokondja wahɔ oma lo Diolelo diaki Nzambi pombaka mbeka dia nkitanyiya Yeso.—Adia Enyelo 7:9, 14, 16, 17.

L’edja k’ɛnɔnyi 1 000, Diolelo diayokotsha sangwelo diaki Nzambi dia l’etatelo diendana l’anto. Nkɛtɛ k’otondo kayokadimɔ paradiso. Ndo l’ekomelo, Yeso ayokaloya Diolelo le She. (1 Koreto 15:24-26) Onde wɛ mbeyaka onto ɔmɔtshi lakombolayɛ mbutɛ akambo wendana la Diolelo diaki Nzambi?—Adia Osambu 37:10, 11, 29.