Nzambi ka mɛtɛ mbele Otungi wa diangɔ tshɛ. Nde komonga la etatelo ndo hongaki la ekomelo. (Osambu 90:2) Nde mbele Kiɔkɔ ya lokumu l’ɔlɔlɔ latanema lo Bible. (1 Timote 1:11) Lam’ele Nzambi mbakatosha lɔsɛnɔ, sho pombaka mbɔtɛmɔla paka ndamɛ.—Adia Enyelo 4:11.

Ndoko onto lambɛnaka Nzambi nɛ dia nde ekɔ nyuma. Ndo nde ekɔ la yoho ya lɔsɛnɔ yoleki ya ditongami diasɛna lanɛ la nkɛtɛ. (Joani 1:18; 4:24) Koko sho kokaka nsɛdingola lonto laki Nzambi oma lo diangɔ diakandatonge. Ɛnyɛlɔ, weho w’elowa ndo w’alɛmbɔlɛmbɔ wakandatonge tɛnyaka ngandji ndo lomba lande. Lâdiko dia lâsɔ, woke woke w’andja ɔnɛ tɛnyaka wolo ande.—Adia Romo 1:20.

Sho kokaka mbeka akambo efula wendana la lonto laki Nzambi lo mbadia Bible. Ɛnyɛlɔ, tɔ tɛnyaka kɛnɛ kalanga Nzambi ndo kɛnɛ kahandalange, woho wasalɛnde anto akambo ndo kɛnɛ kasalande la ntondo k’akambo amɔtshi.—Adia Osambu 103:7-10.

Yeso akate ate: ‘Shɛso lele l’olongo, lokombo layɛ lakidiame.’ (Mateu 6:9) Kânga mbele Nzambi ekɔ la nkombo efula ya lɔtɛtɛmɔla, nde ekɔ la lokombo ɔtɔi l’oshika. Ɔtɛkɛta l’ɔtɛkɛta wekɔ la yoho yelɛwɔ lokombo lɔsɔ. L’Ɔtɛtɛla vɔ lielɛka ɔnɛ “Jehowa.” Koko anto amɔtshi lielɛka ɔnɛ “Yawe.”—Adia Osambu 83:18, NW.

Lo Bible efula, lokombo laki Nzambi lakanyɛma ko wakalihɛnya la nkombo ya lɔtɛtɛmɔla yele oko Nkumadiɔndjo kana Nzambi. Koko etena kakafundamaka Bible, lokombo laki Nzambi lakatanemaka lɔkɔ mbala ndekana 7 000. Yeso akeyanya  lokombo laki Nzambi etena kakandetshaka anto akambo wendana la Nzambi.—Adia Joani 17:26.

Onde woho wambokokanɛ asui mɛnyaka dia Jehowa ekɔ Nzambi kahayakiyanya dikambo diaso? Anto amɔtshi mbutaka dia nde tosoyaka dia tohemba, koko teye dia dui sɔ bu mɛtɛ.—Adia Jakoba 1:13.

Nzambi akasha onto lotshungɔ la nsɔna dia nsala kɛnɛ kalangande. Onde sho mɛnyaka lowando laso lo lotshungɔ lele la so la nsɔna dia kambɛ Nzambi? (Jashua 24:15) Anto efula sɔnaka dia salɛ anto akina kɔlɔ, diɔ diakɔ diambofulanɛ asui. Jehowa mongaka la lonyangu etena kɛnande awui wa kɔlɔ.—Adia Etatelu 6:5, 6.

Jehowa ekɔ Nzambi kayakiyanya dikambo diaso. Nde kombolaka dia sho ngɛnangɛna la lɔsɛnɔ. Kem’edja, nde ayanga minya asui tshɛ ndo kɛnɛ kasala di’asui asɔ tokomɛ. Koko l’etena kɛnɛ, nde ekɔ l’ɔkɔkɔ w’oshika watshikande asui lo tshanda mɔtshi. Lo wekelo 8, tayeya ɔkɔkɔ ɔsɔ.—Adia 2 Petero 2:9; 3:7, 13.

Jehowa tɔlɔmbaka dia sho ndjasukanya la nde lo dɔmbɛlɔ. Nde ndjashaka le ɔmɔmɔ la l’atei aso. (Osambu 65:2; 145:18) Nde mbetawɔka todimanyiya. Nde mbeyaka welo wadjaso dia mbɔngɛnyangɛnya, kânga mbele tena dimɔtshi sho mbodjɛka. Ɔnkɔnɛ, kânga mbeso kema kokele, sho kokaka mɛtɛ monga la diɔtɔnganelo di’ɔlɔlɔ lam’asaso la Nzambi.—Adia Osambu 103:12-14; Jakoba 4:8.

Lam’ele Jehowa mbakatosha lɔsɛnɔ, sho pombaka mbôlanga oleki onto akɔna tshɛ. (Mako 12:30) Naka wɛ mɛnya Nzambi ngandji kawokayɛ lo mbeka awui wendana la nde ndo lo nsala kɛnɛ kakɔlɔmbande, kete wɛ ayoyasukanya la nde.—Adia 1 Timote 2:4; 1 Joani 5:3.