WEKELO 6
Elongamelo kakɔna kele la wanɛ wavɔ?
1. Lokumu l’ɔlɔlɔ lakɔna lendana la wanɛ wavɔ?
Etena kakakome Yeso la Bɛtaniya, osomba waki suke la Jerusalɛma, nde akatane ɔngɛnyi ande Lazaro ambovɔ aya nshi nyɛi. Yeso akatshu la Mata ndo la Mariya otsha lo diombo di’ɔnangɛwɔ Lazaro. Oshimu kele edja, olui w’anto wakatshumana la wɔ. Shi Mata nde la Mariya wakonge l’ɔngɛnɔngɛnɔ w’efula etena kakawɛnyi Yeso ambolola Lazaro?
Mata akeyaka oma k’edjedja lokumu l’ɔlɔlɔ lendana la wanɛ wakavu. Nde akeyaka dia Jehowa ayolola wanɛ wakavu dia vɔ ndjɔsɛna nto la nkɛtɛ.
2. Ngande wele wanɛ wavɔ?
Nzambi akatɛ Adama ate: ‘Wɛ ekɔ ditshu, ɔnkɔnɛ wɛ ayokalola otsha lo ditshu.’
Anto wakatongama oma lo ditshu dia nkɛtɛ. (Etatelu 2:7; 3:19) Sho kema l’ɛngɔ kɛmɔtshi kahɛnama ndo kahavu lo demba diaso. Sho tekɔ ditongami dia lo demba ndo ndoko etenyi kɛmɔtshi ka lo demba diaso katetemala la nsɛna l’ɔkɔngɔ wa nyɔi. Etena kavɔso, wɔɔngɔ ndo tokanyi taso mvɔka. Diakɔ diele etena kakolɔ Lazaro, nde kombuta ndoko dikambo diendana la nyɔi kande nɛ dia nde aki odo ndo kombeyaka ndoko dikambo.
Onde Nzambi ekɔ lo nsoya anto lo dja l’ɔkɔngɔ wa nyɔi kawɔ? Lam’ele Bible mɛnyaka dia wanɛ wavɔ haweye ndoko dui, mbokɛmaka hwe dia wetshelo wendana l’ifɛrnɔ wa dja wekɔ kashi ndo vɔ mɛndjaka Nzambi onongo wa wɛnyɛndja. Kanyi yɔnɛ nde soyaka anto lo dja yekɔ wɔnɔnyi le nde.
3. Onde wanɛ wambovɔ kokaka ntɛkɛta la so?
Wanɛ wambovɔ hawokoke ntɛkɛtaka kana mboka. (Osambu 115:17) Koko andjelo amɔtshi wekɔ kɔlɔ ndo vɔ kokaka ntɛkɛta l’anto lo mbɔsa dihole dia wanɛ wakavu. (2 Petero 2:4) Jehowa toshimbaka dia sho mpemba ntɛkɛta la wanɛ wakavu.
4. Waa na wayolwama?
Miliyɔ y’anto wakavu wele lo waombo wayolwama dia ndjɔsɛna nto la nkɛtɛ. Mbidja ndo anto amɔtshi wakavu waki kombeyaka Nzambi ndo wakasalaka akambo wa kɔlɔ wayolwama.
Wanɛ wayolwama wayonga l’akoka wa mbeka akambo wa mɛtɛ wendana la Nzambi ndo mɛnya mbetawɔ kawɔ le Yeso lo mbôkitanyiya. (Enyelo 20:11-13) Wanɛ wayolwama ndo wayotetemala nsala akambo w’ɔlɔlɔ wayɔsɛna pondjo pondjo lanɛ la nkɛtɛ.
5. Kakɔna katɛnya eolwelo lo kɛnɛ kendana la Jehowa?
Wanɛ wavɔ wekɔ l’elongamelo k’eolwelo nɛ dia Nzambi akatome Ɔnande dia ndjotovwɛ. Ɔnkɔnɛ, eolwelo tɛnyaka ngandji ndo kɛtshi katoka Jehowa. Etena kayolwama wanɛ wakavu, onto akɔna akombolayɛ lo yoho ya lânde dia ndjowɛna?
