Jehowa akatotongɛ nkɛtɛ dia sho mbidjasɛka lɔkɔ. Ɔnkɔnɛ, atshukanyi wa ntondo, mbuta ate Adama la Eva, kotongama dia ndodia olongo, nɛ dia Nzambi akashile la ntonga andjelo dia vɔ mbidjasɛka lɛkɔ. (Jobo 38:4, 7) Koko Nzambi akakitsha pami ka ntondo lo paradiso kakelamɛka ɔnɛ ekambɔ k’Ɛdɛna. (Etatelo 2:15-17) Jehowa akawosha nde l’anande elongamelo ka nsɛna pondjo pondjo la nkɛtɛ.—Adia Osambu 37:29; 115:16.

L’etatelo, paka ekambɔ k’Ɛdɛna keto mbaki paradiso. Atshukanyi wa ntondo asɔ wakahombe ndodia nkɛtɛ l’ana wakawahombe mbota. Vɔ wakahombe mbolɛ lâdiko dia nkɛtɛ k’otondo ndo kikonya paradiso. (Etatelu 1:28) Nkɛtɛ halanyemaki pondjo. Anto wayodjasɛka lɔkɔ pondjo pondjo.—Adia Osambu 104:5.

Adama la Eva wakɔnyɔla ɔlɛmbɛ waki Nzambi, ɔnkɔnɛ Jehowa akâtondja oma l’ekambɔ. Vɔ wakashisha paradiso ndo ndoko onto lakakoke kikaloya nto. Bible mbutaka ɔnɛ: ‘Nkɛtɛ yakakimwama l’anya w’anto wa kɔlɔ.’—Jobo 9:24.—Adia Etatelu 3:23, 24.

Onde Jehowa ambohekɔ dia nkotsha sangwelo diande di’oma l’etatelo diendana l’anto? Ndooko! Nde ekɔ kanga-wolo-tshɛ ndo nde hakokaki nkita tatala pondjo. (Isaya 45:18) Nde ayosala di’anto monga la eongelo kaki lawɔ ntondo.—Adia Osambu 37:11, 34.

Nkɛtɛ kayokoma paradiso nto etena kayolɛ Yeso oko Nkumekanga kakasɔnama oma le Nzambi. Lo ta dielamɛ ɔnɛ Aramangɛdɔna, Yeso ayɔlɔmbɔla andjelo waki Nzambi dia  vɔ ndanya wanɛ tshɛ wahakitanyiya awui waki Nzambi. Oma lâsɔ, Yeso ayodja Satana lo lokanu l’edja k’ɛnɔnyi 1 000. Ekambi waki Nzambi wayohanda oma l’elanyelo kɛsɔ nɛ dia Yeso ayowalɔmbɔla ndo ayowakokɛ. Vɔ wayokondja lɔsɛnɔ la pondjo lo Paradiso ka lanɛ la nkɛtɛ.—Adia Enyelo 20:1-3; 21:3, 4.

Etena kakɔna kayonya Nzambi awui wa kɔlɔ oma lanɛ la nkɛtɛ? Yeso akasha ‘djembetelo’ mɔtshi dia mɛnya dia ekomelo kaya suke. Akambo weta ɛlɔ kɛnɛ mbidjaka nsɛnɔ y’anto lo wâle ndo mɛnyaka dia tekɔ lo nsɛna ‘l’ekomelo ka dikongɛ nɛ di’akambo.’—Adia Mateu 24:3, 7-14, 21, 22.

Etena kayɔlɔmbɔla Yeso nkɛtɛ oma l’olongo l’edja k’ɛnɔnyi 1 000, nde ayonya asui tshɛ. (Isaya 9:6, 7; 11:9) Yeso hatokamba tsho oko Nkumekanga, koko oko wende Ɔlɔmbɛdi a Lâdiko, nde ayonya pɛkato ya wanɛ woka Nzambi ngandji. Ɔnkɔnɛ, lo tshimbo yaki Yeso, Nzambi ayonya hemɔ, lotshundu l’osombe ndo nyɔi.—Adia Isaya 25:8; 33:24.

Anto wakitanyiya awui waki Nzambi mbayɔsɛna lo Paradiso. (1 Joani 2:17) Yeso akatome ambeki ande dia nyanga anto wele la memakana ndo dia mbaetsha kɛnɛ kahombawɔ nsala dia vɔ mbetawɔma le Nzambi. Ɛlɔ kɛnɛ, Jehowa ekɔ lo nɔngɔsɔla miliyɔ y’anto dia vɔ ndjonga la lɔsɛnɔ lo Paradiso ka la nkɛtɛ. (Zefaniya 2:3) Lo Mbalasa ya Diolelo y’Ɛmɛnyi wa Jehowa, anto mbekaka woho wakokawɔ nkoma waomi, waa wadi ndo ambutshi w’eshika. Ana ndo ambutshi tɛmɔlaka kâmɛ ndo vɔ mbekaka woho wakokawɔ nkondja wahɔ oma lo lokumu l’ɔlɔlɔ.—Adia Mika 4:1-4.