WEKELO 12
Ngande wakokayɛ ndjasukanya la Nzambi?
1. Onde Nzambi mpokamɛka alɔmbɛlɔ tshɛ?
Nzambi nɔmbaka anto wa lo wedja tshɛ dia vɔ ndjasukanya la nde lo dɔmbɛlɔ. (Osambu 65:2) Koko nde hahokamɛ ndo hetawɔ alɔmbɛlɔ tshɛ, ɛnyɛlɔ, alɔmbɛlɔ wa pami kahɛnyahɛnya wadɛnde. (1 Petero 3:7) Ndo nto, etena kakatetemala ase Isariyele l’akambo wa kɔlɔ, Nzambi akatone dia mboka alɔmbɛlɔ awɔ. Mbokɛmaka hwe dia dɔmbɛlɔ diekɔ diɛsɛ dia woke. Ɔnkɔnɛ, Nzambi ayetawɔ alɔmbɛlɔ kânga w’atshi wa pɛkato ya weke, naka vɔ ndjatshumoya.
2. Ngande wahombaso nɔmbaka?
Lam’ele dɔmbɛlɔ diekɔ etenyi kɛmɔtshi k’ɔtɛmwɛlɔ aso, sho pombaka nɔmbaka paka Jehowa lele Otungi aso. (Mateu 4:10; 6:9) Ndo nto, oko weso bu kokele, sho pombaka nɔmbaka lo lokombo la Yeso nɛ dia nde akavu dikambo dia pɛkato yaso. (Joani 14:6) Jehowa hetawɔ dia sho kakatshiya alɔmbɛlɔ aso lo timba kana mbâfunda lofunda ko mbakalolɛka mbala la mbala. Nde nangaka di’alɔmbɛlɔ aso ndja oma k’ɛse otema.
Otungi aso kokaka mboka kânga alɔmbɛlɔ wa l’etei k’otema. (1 Samuele 1:12, 13) Nde tɔlɔmbaka dia sho nɔmbaka lo diaaso tshɛ, ɛnyɛlɔ la pindju, la dikɔlɔ, la ntondo ka ndɛ ndo etena keso l’ekakatanu.
3. Lande na kasangana Akristo kâmɛ?
Ndjasukanya la Nzambi bu dui dia tshitshɛ nɛ dia tekɔ lo nsɛna l’atei w’anto wele bu la mbetawɔ le Nzambi ndo wɔnyɔla daka diande diendana la wɔladi wa la nkɛtɛ. (2 Timote 3:1, 4; 2 Petero 3:3, 13) Diakɔ dieso l’ohomba wa sanganaka kâmɛ l’asekaso ambetawudi dia keketshana lam’asaso.
Sanganaka kâmɛ la wanɛ woka Nzambi ngandji tokimanyiaka dia sho ndjasukanya la Nzambi. Nsanganya y’Ɛmɛnyi wa Jehowa yekɔ waaso w’amɛna wakeketshamaso oma lo mbetawɔ k’anto akina.
4. Ngande wakokayɛ ndjasukanya la Nzambi?
Wɛ kokaka ndjasukanya la Jehowa lo kanaka yimba la kɛnɛ kekayɛ oma l’Ɔtɛkɛta ande. Kana yimba lo wetshelo wakokayɛ nkondja oma l’elimu waki Jehowa, oma l’alako ndo oma lo alaka ande. Dɔmbɛlɔ ndo ekanelo ka yimba tokimanyiyaka dia sho nshihodia nɛmɔ diele la ngandji ndo lomba laki Nzambi.
Wɛ kokaka ndjasukanya la Nzambi paka naka wɛ ndjaɛkɛka le nde ndo ekɔ la mbetawɔ le nde. Koko mbetawɔ kekɔ oko ɛngɔ kele la lɔsɛnɔ ndo kele l’ohomba wa mbo ya ndɛ. Wɛ pombaka ndeshaka mbetawɔ kayɛ mbala la mbala lo kanaka yimba lo ɛkɔkɔ wakakotshutshuya dia monga la dietawɔ diele la yɛ.
5. Wahɔ akɔna wayoyokondja lo ndjasukanya la Nzambi?
Jehowa ndjakiyanyaka dikambo dia wanɛ wawoka ngandji. Nde kokaka mbâkokɛ oma lo dui tshɛ diakoka mbidja mbetawɔ ndo elongamelo kawɔ ka lɔsɛnɔ la pondjo lo wâle. (Osambu 91:1, 2, 7-10) Nde tewolaka oma lo yoho ya lɔsɛnɔ yakoka mbidja yônge yaso lo wâle ndo toshishɛ ɔngɛnɔngɛnɔ. Jehowa ekɔ lo têtsha yoho ya lɔsɛnɔ yoleki tshɛ dimɛna.