Lokumu l’ɔlɔlɔ ndja oma le Jehowa, Nzambi k’ɔngɛnɔngɛnɔ, lalanga dia nkumbo monga la ɔngɛnɔngɛnɔ. (1 Timote 1:11) Nde kele otungi wa diwala. Mbidja diwala lo buku dia lɛɛta ekɔ dui di’ohomba dia nkumbo monga la ɔngɛnɔngɛnɔ nɛ dia dui sɔ kimanyiyaka di’ana mbodiama lo dihole dia dimɛna.

Ngande wɔsa Nzambi diwala? Nde nangaka dia diwala monga dimama dia pondjo lam’asa pami la womoto. Akristo pombaka nkitanyiya ɛlɛmbɛ wa l’ahole wodjashiwɔ wendana la wodjelo wa diwala lo buku dia lɛɛta. (Luka 2:1, 4, 5) Jehowa nangaka dia omi la wadi monga la kɔlamelo lam’asawɔ. (Heberu 13:4) Nde petshaka odiakelo wa diwala. (Malaki 2:16) Koko nde akasha Akristo lotshungɔ la ndjaka diwala ko tshukana nto, naka olonganyi ɔmɔtshi ambosala loseka.—Adia Mateu 19:3-6, 9.

Jehowa akatonge pami la womoto di’onto l’onto nkotsha ehomba w’osekande. (Etatelu 2:18) Oko wende ɔtɛ wa nkumbo, omi pombaka kotshaka ehomba wa l’emunyi w’ase nkumbo kande ndo mbaetshaka awui wendana la Nzambi. Nde pombaka monga la ngandji ka ndjahombia otsha le wadɛnde. Wadi la omi pombaka mbokana ngandji ndo nɛmiyana lam’asawɔ. Lam’ele wadi la omi kema kokele, dia diwala diawɔ monga la ɔngɛnɔngɛnɔ vɔ pombaka mbeka dia dimanyiyanaka.—Adia Efeso 4:31, 32; 5:22-25, 33; 1 Petero 3:7.

Naka nyekɔ l’ekakatanu lo diwala dianyu, kete nyu akɔ ahende pombaka salanɛ akambo la ngandji. (1 Koreto 13:4, 5)  Ɔtɛkɛta wa Nzambi hawɛnya ɔnɛ dia wadi la omi nkandola ekakatanu wa lo diwala, paka vɔ nkakitɔna.—Adia 1 Koreto 7:10-13.

Jehowa nangaka dia wɛ monga la ɔngɛnɔngɛnɔ. Nde koshaka alako woleki amɛna dia wɛ monga la ɔngɛnɔngɛnɔ lo nshi yayɛ y’ɔlɔngɔlɔngɔ kana y’osekaseka. Nde nangaka dia wɛ nkondja wahɔ oma lo lomba ndo oma lo diewo diele l’ambutshi wakiyɛ. (Kolosai 3:20) Jehowa nangaka nto dia wɛ monga la ɔngɛnɔngɛnɔ lo nsala awui walanga Otungi ayɛ ndo Ɔnande.—Adia Undaki 11:9–12:1; Mateu 19:13-15; 21:15, 16.

Nyu pombaka nsala la wolo dia mbatanɛ mbo ya ndɛ, dihole dia mbidjasɛ ndo ahɔndɔ wa ndɔta. (1 Timote 5:8) Koko di’ananyu monga la ɔngɛnɔngɛnɔ, nyu pombaka nto mbaetsha dia vɔ mboka Nzambi ngandji ndo dia mbeka awui wendana la nde. (Efeso 6:4) Ngandji kokanyu Nzambi kayonga la shɛngiya ya wolo le ananyu. Naka wetshelo anyu wayotombaka oma l’Ɔtɛkɛta wa Nzambi, kete dui sɔ diayokimanyiya ananyu dia vɔ monga l’ekanelo k’ɔlɔlɔ.—Adia Euhwelu k’Elembe 6:4-7; Tukedi 22:6.

Ana kondjaka wahɔ etena kâkeketshanyu ndo kawandolanyu. Vɔ wekɔ nto l’ohomba wa engwelo ndo wa ohokwelo. Akambo asɔ mbakimanyiyaka diaha vɔ monga la lɔkɛwɔ lakoka mbashishɛ ɔngɛnɔngɛnɔ awɔ. (Tukedi 22:15) Koko, ohokwelo hawohombe pondjo mbishama la ngala ndo l’esehe.—Adia Kolosai 3:21.

Ɛmɛnyi wa Jehowa wambotondja abuku efula wele l’oyango wa lânde wa nkimanyiya ambutshi la ana. Awui wa l’abuku asɔ ntomba oma lo Bible.—Adia Osambu 19:7, 11.