WEKELO 14
Lande na kele Nzambi ekɔ la okongamelo ɔmɔtshi?
1. Ngande wakakongɛ Nzambi Isariyɛlɛ w’edjedja?
Nzambi akakongɛ tokanula taki owandji wa nkumbo Abrahama dia tɔ nkoma wodja ndo nde akawasha ɛlɛmbɛ. Nde akelɛ wodja ɔsɔ ɔnɛ ‘Isariyɛlɛ’ ndo akawetɛ okokedi w’ɔtɛmwɛlɔ wa mɛtɛ ndo w’ɔtɛkɛta ande. (Osambu 147:19, 20) Ɔnkɔnɛ, anto w’oma lo wedja tshɛ wakakoke nkondja ɛlɔlɔ oma le wodja w’Isariyɛlɛ.
Nzambi akasɔnɛ as’Isariyɛlɛ dia vɔ monga ɛmɛnyi ande. Ɔkɔndɔ w’Isariyɛlɛ w’edjedja mɛnyaka woho wakoka anto nkondja wahɔ lo nkitanyiya ɛlɛmbɛ wa Nzambi. (Euhwelu k’Elembe 4:6) Ɔnkɔnɛ, anto akina wakakoke mbeya Nzambi ka mɛtɛ oma lo tshimbo y’ase Isariyɛlɛ.
2. Ngande wambokongɛma Akristo wa mɛtɛ?
L’ɔkɔngɔ diko, wodja w’Isariyɛlɛ kondjetawɔma nto le Nzambi ndo Jehowa akayokambaka l’etshumanelo k’Akristo lo dihole dia wodja ɔsɔ. (Mateu 21:43; 23:37, 38) Ɛlɔ kɛnɛ, lo dihole di’ase Isariyɛlɛ, Akristo wa mɛtɛ wekɔ lo kambɛ Jehowa oko ɛmɛnyi ande.
Yeso akakongɛ woho w’ambeki ande nsambisha ndo mbetɛ anto wa lo wedja tshɛ ambeki. (Mateu 10:7, 11; 24:14; 28:19, 20) Olimu ɔsɔ wambokoma lo kondoko yawɔ ɛlɔ kɛnɛ, mbuta ate l’ekomelo ka dikongɛ nɛ di’akambo. Ɔsɔ mbaki mbala ka ntondo l’ɔkɔndɔ w’ana w’anto ka Jehowa ntshumanya miliyɔ y’anto w’oma lo wedja tshɛ l’ɔtɛmwɛlɔ wa mɛtɛ. (Enyelo 7:9, 10) Akristo wa mɛtɛ wamboyakongɛ dia keketshanaka ndo kimanyiyanaka. L’andja w’otondo, vɔ wekɔ l’ekongelo ka woho ɔtɔi ka nongola wetshelo w’oma lo Bible lo nsanganya yawɔ.
3. Ngande wakatatɛ okongamelo wa nshi nyɛ w’Ɛmɛnyi wa Jehowa?
L’ɛnɔnyi wa 1870, djui y’Ambeki wa Bible wakatatɛ mbishola akambo wa mɛtɛ w’oma lo Bible wakashishɔ l’etena k’otale. Vɔ wakashihodia dia Yeso akakongɛ etshumanelo k’Akristo dia tɔ sambishaka. Ɔnkɔnɛ vɔ wakatatɛ l’olimu w’esambishelo ka Diolelo lo wedja efula. Lo 1931, mbakawayotatɛka mbelamɛ ɔnɛ Ɛmɛnyi wa Jehowa.
4. Ngande wokongɛmi Ɛmɛnyi wa Jehowa?
Lo ntambe ka ntondo, tshumanelo di’Akristo dia lo wedja efula diakakondja ɛlɔlɔ lo woho wakawalɔmbwamaka oma le olui-walɔmbɔla waketawɔka Yeso oko Ɔtɛ w’etshumanelo. (Etsha 16:4, 5) Ndo ɛlɔ kɛnɛ, Ɛmɛnyi wa Jehowa wa l’andja w’otondo wekɔ lo nkondja wahɔ oma le Olui-walɔmbɔla wokengami la dikumanyi diambohokɔ akambo. Vɔ mbalɔmbɔla Bɛtɛlɛ tshɛ y’Ɛmɛnyi wa Jehowa yakadimola, yafunda, ndo yakahanya ekanda akɔ l’ɛtɛkɛta ndekana 600. Ekanda ɛsɔ mbakamba la so dia mbeka l’anto Bible. Ɔnkɔnɛ, Olui-walɔmbɔla kokaka mbisha tshumanelo ndekana 100 000 dia l’andja w’otondo ekeketshelo ndo ɛlɔmbwɛlɔ kotumbi oma l’Afundelo. L’etshumanelo tshɛ, apami wakotsha awui amɔtshi walɔmbama wekɔ lo nkamba oko dikumanyi kana emendji. Apami asɔ namaka ɛkɔkɔ waki Nzambi la ngandji tshɛ.
Ɛmɛnyi wa Jehowa wamboyakongɛ dia nsambisha lokumu l’ɔlɔlɔ ndo dia mbetɛ anto ambeki. L’ɛnyɛlɔ k’apɔstɔlɔ, sho sambishaka lo luudu la luudu. (Etsha 20:20) Sho lawɔ nɔmbaka anto walanga akambo wa mɛtɛ dia mbeka la wɔ Bible. Koko Ɛmɛnyi wa Jehowa bu tsho okongamelo. Sho tekɔ nkumbo kele la Ombutshi wa ngandji. Sho tekɔ onto l’ɔnango ndo sho kimanyiyanaka lam’asaso. (2 Tesalonika 1:3) Lam’ele ekambi waki Jehowa wamboyakongɛ dia ngɛnyangɛnya Nzambi ndo dia nkimanyiya anto akina, vɔ wekɔ nkumbo koleki monga l’ɔngɛnɔngɛnɔ lo nkɛtɛ k’otondo.