Otungi aso toleka lomba. Oko wende Ombutshi wa ngandji, nde ndjakiyanyaka dikambo diaso. Ndo nto, nde kototonga dia sho ndjalɔmbɔlaka shamɛ. (Jeremiya 10:23) Ɔnkɔnɛ, oko wonga ɔna dikɛnda l’ohomba w’ɛlɔmbwɛlɔ k’ambutshi ande, mbele sho tshɛ tekɔ l’ohomba w’ɛlɔmbwɛlɔ kaki Nzambi. (Isaya 48:17, 18) Atɔndɔ wa lo Bible toshaka ɛlɔmbwɛlɔ. Ndo ɛlɔmbwɛlɔ kɛsɔ kekɔ woshasha w’oma le Nzambi.—Adia 2 Timote 3:16.

Ɛlɛmbɛ ndo atɔndɔ waki Jehowa tetshaka dia sho monga la yoho ya lɔsɛnɔ yoleki dimɛna oma ko kakianɛ ndo tɛnyaka woho wakokaso ndjokondja ɛtshɔkɔ wa pondjo lo nshi yayaye. Lam’ele takatongama oma le Nzambi, sho pombaka mbetawɔ ɛlɔmbwɛlɔ kande la lowando tshɛ.—Adia Osambu 19:7, 11; Enyelo 4:11.

Atɔndɔ wa lo Bible nembetshiyaka akambo wa mɛtɛ w’ohomba efula wele lo Bible. Koko ɛlɛmbɛ kokaka mendana l’awui amɔtshi shikaa. (Euhwelu k’Elembe 22:8) Sho pombaka nkamba la dikoka diaso di’ekanelo ka yimba dia nshihodia woho wendana tɔndɔ dimɔtshi la dikambo dimɔtshi dia lânde. (Tukedi 2:10-12) Ɛnyɛlɔ, Bible tetshaka dia lɔsɛnɔ lekɔ woshasha w’oma le Nzambi. Tɔndɔ sɔ kokaka tɔlɔmbɔla l’olimu, la ngelo ndo lam’eso lo lɔkɛndɔ. Diɔ tewolaka diaha sho mbidja nsɛnɔ yaso kana y’anto akina lo wâle.—Adia Etsha 17:28.

Yeso akatɛkɛta di’atɔndɔ ahende woleki weke. Tɔndɔ dia ntondo mendanaka l’oyango wa lɔsɛnɔ l’onto. Oyango akɔ ko: Mbeya Nzambi, mbôlanga ndo  mbôkambɛ la kɔlamelo tshɛ. Sho pombaka nkana yimba la tɔndɔ dia ntondo sɔ lo tɛdikɔ tshɛ tɔsaso. (Tukedi 3:6) Wanɛ wakitanyiya tɔndɔ sɔ mongaka la diɔtɔnganelo di’ɔlɔlɔ lam’asawɔ la Nzambi, vɔ mongaka la ɔngɛnɔngɛnɔ wa mɛtɛ ndo wayoyokondja lɔsɛnɔ la pondjo.—Adia Mateu 22:36-38.

Tɔndɔ dia hende kokaka tokimanyiya dia sho monga la diɔtɔnganelo dia dimɛna lam’asaso l’anto akina. (1 Koreto 13:4-7) Nkamba la tɔndɔ dia hende sɔ nembetshiyaka mbokoya Nzambi lo yoho yasalɛnde anto akambo.—Adia Mateu 7:12; 22:39, 40.

Atɔndɔ wa lo Bible mbetshaka ase nkumbo dia vɔ monga kâmɛ lo mbokanaka ngandji. (Kolosai 3:12-14) Ɔtɛkɛta wa Nzambi kokɛka ase nkumbo lo mbaetsha tɔndɔ dikina diɛnya dia diwala pombaka ntshikala pondjo.—Adia Etatelu 2:24.

Lo nkamba l’atɔndɔ wa lo Bible, sho kokaka nkotsha ehomba wa l’emunyi ndo wa longandji w’ase nkumbo kaso. Ɛnyɛlɔ, mbala efula ewandji w’olimu kombolaka monga l’ase olimu wakitanyiya atɔndɔ wa lo Bible wendana la losembwe ndo la etete. (Tukedi 10:4, 26; Heberu 13:18) Ɔtɛkɛta wa Nzambi tetshaka nto dia sho ngɛnangɛna la diangɔ diele ohomba ndo mbeya ɔnɛ diɔtɔnganelo diele lam’asaso la Nzambi ndeka diangɔ dia l’emunyi ohomba.—Adia Mateu 6:24, 25, 33; 1 Timote 6:8-10.

Nkamba l’atɔndɔ wa lo Bible kokaka nkokɛ yônge yaso. (Tukedi 14:30; 22:24, 25) Ɛnyɛlɔ, nkitanyiya ɛlɛmbɛ wa lo Bible watoshimba dia mbidjɔ wanu tokokɛka oma lo wâle ndo oma lo hemɔ yakoka tokonya lo nyɔi. (Tukedi 23:20) Jehowa toshaka lotshungɔ la nnɔ wanu, koko sho pombaka nsala dui sɔ la wɛdimo. (Osambu 104:15; 1 Koreto 6:10) Atɔndɔ waki Nzambi tokimanyiyaka dia mbewɔ ditshelo ndo tokanyi ta kɔlɔ. (Osambu 119:97-100) Ɔnkɔnɛ, Akristo wa mɛtɛ hawokitanyiya atɔndɔ waki Nzambi paka dia wahɔ awɔ, koko vɔ salaka dui sɔ dia mbisha Jehowa lotombo.—Adia Mateu 5:14-16.