1. Lande na kakalole osomba wa Shilo l’ɔkɛi ndo l’etanda?

SAMUƐLƐ akakoke monga la paa k’efula l’asolo etena kakinde la Shilo. Suke l’anto tshɛ wa l’osomba waki lo ndela. Wamato l’ana angana wakalelaka ambutshi awɔ, waomɛwɔ, anawɔ w’apami ndo anangɛwɔ wakatovɔ lo ta? Sho mbeyaka tsho dia Isariyɛlɛ akashisha asɔlayi 30 000 lo ta etena kakaalɛndja ase Filistiya l’ɔkɔngɔ wa vɔ nshisha anto 4 000 lo ta dikina.—1 Sam. 4:1, 2, 10.

2, 3. Mpokoso yakɔna ya wolo yakayokonya osomba wa Shilo dia nshisha lotombo ndo mbotshama nsɔnyi?

² Ɔsɔ aki tsho mpokoso kɛmɔ l’atei wa nyɛ yakahombe mbakomɛ. Hɔfɛni la Finehasi, ana ahende wa kɔlɔ efula waki Eliya laki ɔlɔmbɛdi a laadiko wakɛmbɛ ɔshɛtɛ wa sheke w’ekila oma la Shilo. Wakakitshaka Ɔshɛtɛ ɔsɔ lo dihole di’ekila dia lo tabɛrnakɛlɛ kaki oko tɛmpɛlɔ ka tshombotombo ndo vɔ waki didjidji dia woongelo wa Jehowa. Ase Isariyɛlɛ wakatshu l’ɔshɛtɛ ɔsɔ otsha lo ta lo mfɔnya ɔnɛ ɔshɛtɛ ɔsɔ wayowakokɛ lo dihindo ndo mbakimanyiya dia mbidja otshumba. Koko, ase Filistiya wakataahɔtɔlawɔ ndo wakadiake Hɔfɛni la Finehasi.—1 Sam. 4:3-11.

³ Tabɛrnakɛlɛ ka la Shilo kaki la nɛmɔ l’ɔtɛ w’Ɔshɛtɛ wa sheke waki lɔkɔ l’edja ka ntambe efula. Kakianɛ Ɔshɛtɛ akɔ waya bu. Etena kakandoke losango lɔsɔ, Eliya laki aya l’ɛnɔnyi 98 akakɔ oma lo dihole diakandadjashi ko akavu. Wadi ɔnande ɔmɔtshi akavu lushi lakɔ laamɛ laambota. La ntondo ka nde mvɔ, nde akate ate: “Lutumbu lambumo uma le Isariyele.” Oma ko etena kɛsɔ, Shilo komonga nto woho wakiyɔ.—1 Sam. 4:12-22.

4. Kakɔna kayangaso nsɛdingola lo tshapita nyɛ?

⁴ Ngande wakakoke Samuɛlɛ mbikikɛ mpokoso ya wolo shɔ? Onde mbetawɔ kande kakatshikala nge dia nde nkimanyiya anto wakashisha ekokelo ndo ngandji ka Jehowa? Ɛlɔ kɛnɛ, sho tshɛ onto l’onto kokaka mpomana l’ekakatanu ndo l’ɔkɔmwɛlɔ wadja mbetawɔ kaso l’ohemba lo tena dimɔtshi. Nyɛsɔ tende wetshelo wakokaso nkondja oma le Samuɛlɛ.

5, 6. Kakɔna kakɔndɔla Bible lo kɛnɛ kendana l’ɛnɔnyi 20 wakete, ndo kakɔna kakasalaka Samuɛlɛ l’etena kɛsɔ?

⁵ Kakianɛ, Bible ambotokotshika ntɛkɛta dikambo dia Samuɛlɛ, ko oleka ntɛkɛta di’ɔshɛtɛ wa sheke lo tɛnya woho wakasowe ase Filistiya l’ɔtɛ wakawɔshi ɔshɛtɛ akɔ ndo wakawayotshutshuyamaka dia mbokaloya. Bible kakayɔtɛkɛtaka dikambo diaki Samuɛlɛ nto ambeta ɛnɔnyi oko 20. (1 Sam. 7:2) Kakɔna kakandasalaka l’ɛnɔnyi ɛsɔ? Bible totɛka kɛnɛ kakandasalaka.

⁶ Sho mbeyaka dia la ntondo k’etena kɛsɔ ntatɛ, ‘ɔtɛkɛta waki Samuɛlɛ wakatetemala diangana l’Isariyɛlɛ tshɛ.’ (1 Sam. 4:1) Ɔkɔndɔ tɛnyaka dia l’ɔkɔngɔ w’etena kɛsɔ, Samuɛlɛ aki la mbekelo ka membolaka esomba esato wa Isariyɛlɛ ɔnɔnyi tshɛ dia takandolaka ekakatanu ndo ambola waki la wɔ. Oma laasɔ, ko nde nkalola la Rama, osomba ande wa lootɔ. (1 Sam. 7:15-17) Mbokɛmaka dia Samuɛlɛ aki l’akambo efula wa nsala l’edja k’ɛnɔnyi 20 ɛsɔ.

7, 8. a) Losango lakɔna lakatɛ Samuɛlɛ ase Isariyɛlɛ l’ɔkɔngɔ wa nde nkamba olimu wa w’efula l’edja k’ɛnɔnyi 20? b) Kakɔna kakasale wodja etena kakawoke ɔhɛmwɛlɔ waki Samuɛlɛ?

⁷ Lɔkɛwɔ la mindo laki l’ana waki Eliya ndo woho wakawetawɔka kɔta mishiko akakɔmɔla mbetawɔ k’anto. Mɛnamaka dia anto efula wakayotatɛka ntɛmɔla dikishi. Koko l’ɔkɔngɔ wa nde nkamba olimu w’efula l’edja k’ɛnɔnyi 20, Samuɛlɛ akewoya anto losango lɔnɛ: “Naka la etema anyu tshe mbamunyukalula le [Jehowa], nyunya ditemolatemola di’asi wedja la waa Ashetarota weli l’atei anyu. Nyediya etema anyu le [Jehowa], nyotemolaki ndi ndame. Ku ndi ayunyutshungula uma l’anya w’asi Filistiya.”—1 Sam. 7:3.

⁸ “Anya w’asi Filistiya” wakayala wotsho le ase Isariyɛlɛ. L’ɔtɛ wakalɛndjama alembe w’ase Isariyɛlɛ lo ta, ase Filistiya wakafɔnya dia vɔ kokaka nsoya wodja waki Nzambi aha la nongola dilanya. Koko, Samuɛlɛ akashikikɛ ase Isariyɛlɛ di’akambo wayotshikitana naka vɔ nkalolɛ Jehowa. Onde vɔ waketawɔ dui sɔ? Samuɛlɛ aki l’ɔngɛnɔngɛnɔ dia mɛna woho wakawatshike ntɛmɔla dikishi ko ‘ntatɛ ntɛmɔla Jehowa ndamɛ.’ Samuɛlɛ akasale losanganya la Mizipa, osomba ɔmɔtshi wa lo lɛkɛ l’akona la lo nɔrdɛ ka Jerusalɛma. Anto wakatshumana wakakile mbo ya ndɛ ndo wakayatshumoya oma lo pɛkato yakawasale lo ntɛmɔla dikishi.—Adia 1 Samuele 7:4-6.

9. Diaaso diakɔna diaki la ase Filistiya, ndo kakɔna kakasale ekambi waki Nzambi la ntondo ka waale ɔsɔ?

 ⁹ Koko, etena kakoke ase Filistiya lokumu la losanganya la woke lɔsɔ, vɔ wakatome alembe awɔ la Mizipa dia todiaka atɛmɔdi wa Jehowa ɛsɔ. Ɔnkɔnɛ, ase Isariyɛlɛ wakoke losango la waale lɔsɔ. Vɔ wakoke wɔma, ko wakasɛngasɛnga Samuɛlɛ dia nde mbalɔmbɛ, ko nde akaalɔmbɛ ndo akalambola olambo. Etena kakandasalaka dikambo di’ekila sɔ, alembe w’ase Filistiya wakaye dia ndjaalɔsha la Mizipa. Ɔnkɔnɛ, Jehowa akɛnya nkɛlɛ kande. Nde “akakhunguya dikhungula diandi wulu le asi Filistiya lushi lako.”—1 Sam. 7:7-10.

10, 11. a) Lande na kele dui dimɔ dia laande diakasalema etena kakatomɛ Jehowa alembe w’ase Filistiya akungola? b) Etombelo akɔna wakonge la ta diakalɔma la Mizipa?

¹⁰ Ko onde sho koka mfɔnya di’ase Filistiya asɔ wakakoke monga oko ana w’akɛnda watalawɔ la wɔma dia toyashɛ l’ɔkɔngɔ w’anyangɛwɔ etena kakawoke akungola asɔ? Keema, nɛ dia vɔ waki l’andɔshi wa tomanamana. Akungola asɔ komonga akungola k’akungola. Ko onde ɔsɔ aki tsho woho ɔmɔtshi wa ‘londjo la wolo’? Onde wakayaka oma l’olongo kana oma laadiko di’akona? Oyadi oma lende akayaka akungola asɔ, vɔ wakasotshasotsha ndo wakokiya ase Filistiya wɔma w’efula. Vɔ wakɔtɔ lo lofunge ndo wakatatɛ mundama esadi eto oma le alembe w’ase Isariyɛlɛ. Apami w’ase Isariyɛlɛ wakakungusɔ oma la Mizipa, wakaalɛndja ndo wakawatshanya kilɔmɛtrɛ efula lo sidɛ-owɛstɛ ka Jerusalɛma.—1 Sam. 7:11.

¹¹ Ta sɔ diakakimanyiya dia etshikitanu wa wolo salema. Ase Filistiya kɔndɔsha ase Isariyɛlɛ nto lo nshi tshɛ yaki Samuɛlɛ shushi. Ekambi waki Nzambi wakayotatɛka mpɔtɔla atunyi awɔ esomba wakawaahɔtɔla ntondo.—1 Sam. 7:13, 14.

12. Etelo k’ɔnɛ Samuɛlɛ ‘akasale kɛnɛ kele ɔlɔlɔ’ alembetshiyatɔ, ndo waonga akɔna wakookimanyiya dia nde nsala dui sɔ?

¹² Ntambe efula l’ɔkɔngɔ, ɔpɔstɔlɔ Pɔɔlɔ akayoshilaka Samuɛlɛ l’ɔnɔngɔ wa toshushi taki la kɔlamelo ndo amvutshi “wakasale kɛnɛ kele ɔlɔlɔ.” (Hɛb. 11:32, 33) Lo mɛtɛ, Samuɛlɛ akakimanyiya ase Isariyɛlɛ dia vɔ nsala kɛnɛ kele ɔlɔlɔ lo washo wa Nzambi. Nde akasale dui sɔ nɛ dia nde akendɛka la solo dia lotutsha tshɛ le Jehowa ndo akasalaka olimu ande la kɔlamelo, kaanga mbakandahomana l’awui washa ɔkɔmwɛlɔ. Nde aki nto la lowando. L’ɔkɔngɔ wa vɔ mbidja otshumba la Mizipa, Samuɛlɛ akake mɔnima dia mbohɔka yoho yakakimanyiya Jehowa ekambi ande.—1 Sam. 7:12.

13. a) Waonga akɔna wahombaso monga la wɔ naka talanga mbokoya Samuɛlɛ? b) Oko le yɛ, etena kakɔna kele dimɛna monga la waonga wele oko waki la Samuɛlɛ?

 ¹³ Onde wɛ kombolaka ‘nsala kɛnɛ kele ɔlɔlɔ’? Naka eelo, kete ayonga dimɛna wɛ nkondja wetshelo oma lo solo dia lotutsha, okitshakitsha ndo lowando laki la Samuɛlɛ. (Adia 1 Petero 5:6.) Akɔna l’atei aso lele keema l’ohomba wa waonga asɔ? Aki ohomba le Samuɛlɛ dia nde monga la waonga asɔ ndo mbakɛnɛmɔla omako dikɛnda, nɛ dia nde akayohomana l’awui efula wakakoke mbɔkɔmɔla.

14, 15. a) Dui diakɔna diakɔmɔla diakahomana la Samuɛlɛ “lam’aka[nda]yala usumbi”? b) Onde Samuɛlɛ aki oko Eliya lakasukɛka anande lo kɔlɔ? Lembetshiya.

¹⁴ Etena kekina kakayɔtɛkɛtaka Bible dikambo dia Samuɛlɛ, ko nde “aya usumbi.” L’etena kɛsɔ, Samuɛlɛ aki l’ana ahende w’epalanga, Jɔɛlɛ la Abidja. Nde akawasha ɔkɛndɛ wa mbokimanyiya dia nomboshaka anto. Lonyangu ko anande kokamba olimu ɔsɔ dimɛna. Kaanga mbaki Samuɛlɛ la losembwe ndo la kɔlamelo, anande wakakambe la yema ya lowandji lɔsɔ la lokaki tshɛ, lo nsala akambo aha la losembwe ndo lo nongola kɔta mishiko.—1 Sam. 8:1-3.

¹⁵ Lushi lɔmɔtshi, dikumanyi dia l’Isariyɛlɛ diakaye le Samuɛlɛ dia ndjowɛnya lonyangu lawɔ lo mbotɛ ɔnɛ: “An’aye hawuyeli  lukulu laye.” (1 Sam. 8:4, 5) Onde Samuɛlɛ akeyaka dikambo diakɔ? Bible hate ndooko dui. Koko, otshikitanyi la Eliya, Samuɛlɛ kosukɛka anande lo kɔlɔ. Jehowa akomala ndo akasha Eliya dilanya lo woho wakinde komingola anande waki la lɔkɛwɔ la kɔlɔ ndo lo woho wakandaalɛmiyaka oleki Nzambi. (1 Sam. 2:27-29) Koko, Jehowa kotana Samuɛlɛ la woho wa munga ka ngasɔ.

16. Ngande wayaoka ambutshi wele l’ana wambɔtɔmbɔkɔ, ndo esambelo kakɔna kakokawɔ nkondja oma l’ɛnyɛlɔ ka Samuɛlɛ?

¹⁶ Ɔkɔndɔ hawɛnya sɔnyi, lonyangu ndo ɔkɔmwɛlɔ waki la Samuɛlɛ etena kakandeye ɔnɛ anande wekɔ la lɔkɛwɔ la kɔlɔ. Koko, ambutshi efula kokaka mbeya woho wakandayaoke. Lo nshi y’ekomelo nyɛ mbamboleka ana tɔmbɔkwɛ lowandji l’ambutshi awɔ ndo ntona engwelo. (Adia 2 Timɔte 3:1-5.) Ambutshi wadiɛnɛ l’ekiyanu wa ngasɔ koka nkondja esambelo ndo ɛlɔmbwɛlɔ oma l’ɛnyɛlɔ kaki Samuɛlɛ. Nde kombetawɔ dia woho wakashisha anande mbetawɔ mbotakoya mboka. Tatohɛke dia kaanga ana wɔnyɔla ɛtɛkɛta kana ohokwelo w’ambutshi awɔ, ɛnyɛlɔ ka dimɛna k’ambutshi koka minanda etema w’ana. Ndo ambutshi wekɔ nshi tshɛ la waaso wa ngɛnyangɛnya Jehowa Nzambi lele Shɛwɔ oko wakasale Samuɛlɛ.

17. Kakɔna kakalɔmbɛ dikumanyi dia l’Isariyɛlɛ Samuɛlɛ, ndo akandasale?

¹⁷ Lɔkɛwɔ laki l’ana wa Samuɛlɛ lakayongaka l’etombelo wa kɔlɔ wakiwɔ kɔfɔnyaka. Dikumanyi dia l’Isariyɛlɛ wakatshu dia totɛ Samuɛlɛ ɔnɛ: “Kakiane utosonwele khum’ekanga dia ndi ntûlela, uku eli lu wedja tshe.” Onde Samuɛlɛ akafɔnya dia wambootona? Nde akalombosha anto asɔ lo lokombo la Jehowa l’edja k’ɛnɔnyi akumi. Koko l’etena kɛsɔ, vɔ komonga nto l’ohomba w’omvutshi wele oko Samuɛlɛ, koko nkumekanga ka mbalomboshaka. Lam’ele wedja wakaadinge waki la nkumi ya dikanga, ase Isariyɛlɛ vɔ la wɔ wakayonga l’ohomba wa nkumekanga. Ko kakɔna kakasale Samuɛlɛ? Bible mbutaka ɔnɛ: Samuɛlɛ “kongenangena” dui sɔ.—1 Sam. 8:5, 6.

18. Ngande wakasambe Jehowa Samuɛlɛ ko nde mɛnya woke woke wa pɛkato kakasale ase Isariyɛlɛ?

¹⁸ Etena kakatɛ Samuɛlɛ Jehowa dikambo sɔ lo dɔmbɛlɔ, nde akokadimola ate: “Ulungi aui wa wudja lu dikambu ne diakutelawo. Vo hawukutuni we, dimi katunawo, diaha dimi ndjala khum’ekanga kawo.” Samuɛlɛ akakondja esambelo, koko ɔsɔ aki tshondo ya lɔtɛngɔ le Nzambi Kanga-Wolo-Tshɛ! Jehowa akatɛ omvutshi ande dia mbutɛ ase Isariyɛlɛ etombelo wa kɔlɔ wayonga la wɔ lo nyanga nkumekanga k’onto. Etena kakandawatɛ dui sɔ, vɔ wakatetemala mbuta ɔnɛ: “Kema, paka shu ndjala la khum’ekanga.” Dia nkitanyiya Nzambi kande, Samuɛlɛ akatshu dia tokita nkumekanga kakasɔnama oma le Jehowa esɔ.—1 Sam. 8:7-19.

19, 20. a) Ngande wakakitanyiya Samuɛlɛ ɛlɔmbwɛlɔ ka Jehowa etena kakasɔnama Saulo nkumekanga ka l’Isariyɛlɛ? b) Ngande wakatetemala Samuɛlɛ nkimanyiya wodja waki Nzambi?

 ¹⁹ Ko ngande wakakitanyiya Samuɛlɛ? Onde l’etema ehende? Onde nde aketawɔ dia ɔkɔmwɛlɔ mfukutanya otema ande lo nama tokumbɛkumbɛ? Anto efula kokaka nsala ngasɔ, koko Samuɛlɛ kosala. Nde akakite Saulo esɔ ndo akawɔshi oko onto lambɔsɔnama oma le Jehowa. Nde akookumbatɛ dia mboyayola ndo mɛnya dilɛmiɛlɔ diande otsha le nkumekanga. Ndo nde akatɛ wodja ate: “Nyu hanyenyi one lakanyosonwela [Jehowa]? Nduku untu l’atei a wedja tshe ledimi la ndi.”—1 Sam. 10:1, 24.

²⁰ Samuɛlɛ kombika washo lo wandja, koko l’akambo w’ɛlɔlɔ waki la onto lakasɔnama oma le Jehowa. Nde akaleke ndjasha l’olowanyi ande otsha le Nzambi lo dihole dia nyanga dia mbetawɔma le wodja w’atɔmbɔki. (1 Sam. 12:1-4) Ndo nto, nde akakotshaka ɔkɛndɛ ande la kɔlamelo tshɛ, akalakaka wodja waki Nzambi lo waale wa lo nyuma waki la ntondo kawɔ ndo akaakeketsha dia vɔ ntshikala la kɔlamelo le Jehowa. Alako ande wakananda etema awɔ ko wodja wakasɛngasɛnga Samuɛlɛ dia nde mbalɔmbɛ. Nde akaakadimola ate: “Kanyi ya dimi ntshela [Jehowa] kolo dia nkimo nyolombela yeko etali uma le mi! Ndu dimi layunyetshaka mbuka k’ololo ndu k’usimbwi.”—1 Sam. 12:21-24.

21. Ngande wakoka ɛnyɛlɔ ka Samuɛlɛ kokimanyiya diaha wɛ nkɔmɔ etena kalongola onto ɔmɔtshi diɛsɛ dimɔtshi?

²¹ Onde wɛ atakɔmɔka etena kasɔnama onto ɔmɔtshi kana kalongolande diɛsɛ dimɔtshi? Ɛnyɛlɔ kaki Samuɛlɛ toholaka dia hatohombe pondjo monga la kandjema kana nama kumbɛkumbɛ l’etema aso. (Adia Tukedi 14:30.) Nzambi tshɔkɔlaka olimu w’ekambi ande wele la kɔlamelo lo yɛdikɔ y’efula.

22. Lande na kaki Samuɛlɛ la shadiya ya mbika washo lo waonga w’amɛna waki la Saulo?

²² Samuɛlɛ aki la shadiya ya mbika washo lo waonga w’amɛna waki la Saulo nɛ dia nde aki pami la lokombo. Saulo aki otale, dikongote, aki la dihonga, tokanyi t’amɛna, akeyaka elelo ande ndo aki l’okitshakitsha l’etatelo. (1 Sam. 10:22, 23, 27) Laadiko dia waonga asɔ, nde aki nto la lotshungɔ la nsɔna kɛnɛ kalangande ndo la dikoka dia  ndjaɔsɛ tɛdikɔ tande hita. (Euh. 30:19) Onde nde akakambe la losha lɔsɔ lo yoho ya dimɛna?

23. Dionga diakɔna diakashisha Saulo ntondo, ndo ngande wakandɛnya otako ande?

²³ Lonyangu ko, mbala efula etena kakondja onto lowandji kana diɛsɛ dimɔtshi, okitshakitsha mbele dionga dia ntondo diashishande. Kombeta edja, Saulo akatatɛ monga l’otako. Nde akatone nkitanyiya wadjango waki Jehowa wakawotɛ Samuɛlɛ. Mbala kɛmɔ, Saulo akatone nkonga ko akalambola olambo lo dihole dia Samuɛlɛ. Samuɛlɛ akawosha engwelo ka wolo ndo akawotɛ dia lowandji hatotshikala lo nkumbo kande. Lo dihole dia nde nkondja wetshelo oma l’engwelo kɛsɔ, Saulo akatetemala nsala akambo woleki tshɛ kɔlɔ wɛnya dia nde komonga l’okitanyiya.—1 Sam. 13:8, 9, 13, 14.

24. a) Ngande waki Saulo kokitanyiya Jehowa lo ta diakandalɔ l’ase Amalɛka? b) Kakɔna kakasale Saulo etena kakawongola Samuɛlɛ, ndo yɛdikɔ yakɔna yakɔshi Jehowa?

²⁴ Jehowa akatɛ Saulo lo tshimbo ya Samuɛlɛ dia tɔlɔsha ase Amalɛka. Jehowa akawodjangɛ dia ndjaka Anganga, nkumekanga k’ase Amalɛka. Koko, Saulo akatshike Anganga la lɔsɛnɔ kaamɛ la nyama yakaleke amɛna yakahombe ndanyema. Etena kakaye Samuɛlɛ dia ndjowongola, Saulo akɛnya dia nde ambotshikitana. Lo dihole dia nde mbetawɔ engwelo l’okitshakitsha tshɛ, nde akatatɛ ndjaswɛ lo mbisha tɛkɛ nɛndɛ ndo mɛndja wodja onongo. Etena kakahembe Saulo mɔnyɔla ndo ntona engwelo lo mɛnya dia nde akela diangɔ dimɔtshi dia dimbo dia ndjolambola Jehowa, Samuɛlɛ akawotɛ ate: “Ulungi, ukitanyia ndeka ulambu ololo.” La dihonga tshɛ, nde akahangwɛ Saulo ndo akawɛnya yɛdikɔ yakɔshi Jehowa ɔnɛ: Lowandji layomɔ oma le Saulo ndo wayolisha onto okina lele la dionga dia dimɛna. *—1 Sam. 15:1-33.

25, 26. a) Lande na kakalele Samuɛlɛ lo dikambo dia Saulo, ndo ngande wakawongola Jehowa la ngandji tshɛ? b) Wetshelo akɔna wakakondja Samuɛlɛ etena kakandatshu lo luudu laki Jɛse?

²⁵ Samuɛlɛ aki la lonyangu l’efula l’ɔtɛ w’akambo wakasale Saulo. Nde akalelɛ Jehowa otsho w’otondo lo dikambo sɔ. Nde akakome polo lo ndela dikambo dia Saulo. Samuɛlɛ akɛnyi akoka  ndo akambo w’amɛna waki la Saulo, koko kɛnɛ kakandalongamɛka oma le nde kokotshama. Saulo lakandeyaka dimɛna akatshikitana, mbuta ate nde akashisha waonga ande w’amɛna ndo akoke Jehowa ɔkɔngɔ. Samuɛlɛ akatone dia mɛnana la Saulo nto. Ɔnkɔnɛ, la ngandji tshɛ Jehowa akangola ekanelo ka yimba kaki Samuɛlɛ lo mbotɛ ɔnɛ: “Edja ndu kaandi ayuyukimo ndela lu dikambu dia Saulu? Dimi lambûtuna dia ndi mbulela Isariyele ntu. Uludia iso too lu luseki laye. Uneli, layukutuma le Jese, usi Betelehema. Dimi lambuyasonwela khum’ekanga uma l’atei wa an’andi w’apami.”—1 Sam. 15:34, 35; 16:1.

²⁶ Sangwelo dia Jehowa hashimbama l’ɔtɛ washisha anto wele bu kokele kɔlamelo. Naka onto ɔmɔtshi aya bu la kɔlamelo, Jehowa ayotana onto okina layokotsha lolango Lande. Diakɔ diakatshike, Samuɛlɛ ndjakiyanya lo dikambo dia Saulo. L’ɛlɔmbwɛlɔ ka Jehowa, Samuɛlɛ akatshu laka Jɛse la Bɛtɛlɛhɛma lɛnɛ akandatotana ana w’apami waki tɔkɔmba efula waki Jɛse. Koko, Jehowa akatate Samuɛlɛ diaha nde menda diema kana dimɛna dia demba. (Adia 1 Samuele 16:7.) L’ekomelo, Samuɛlɛ akɛnana la Davidi laki eke dikɛnda lakasɔnama oma le Jehowa.

27. a) Kakɔna kakakimanyiya Samuɛlɛ dia ntshikala la mbetawɔ ka nge? b) L’ɔkɔngɔ wa nsɛdingola ɛnyɛlɔ kakatotshikɛ Samuɛlɛ, yɛdikɔ yakɔna yamboyɔsa?

²⁷ Otsha l’ekomelo ka lɔsɛnɔ lande, Samuɛlɛ akɛnyi ɛlɔlɔ waki la yɛdikɔ yakɔshi Jehowa ya mpɛnya Davidi lo dihole dia Saulo. Saulo akayonga la kandjema ndo akayokoma ɔpɔsta. Koko, Davidi akɛnya waonga w’amɛna waki la nde wele oko dihonga, olowanyi, mbetawɔ ndo kɔlamelo. Otsha l’ekomelo ka lɔsɛnɔ laki Samuɛlɛ, mbetawɔ kande kakaleke nkeketala. Nde akɛnyi dia ndooko ɔkɔmwɛlɔ wahakoke Jehowa nshidiya, nkandola kana nkadimola ɔtshɔkɔ. L’ekomelo, Samuɛlɛ akavu ndo akatshike ɔkɔndɔ wa lɔsɛnɔ la diambo lakatshikala edja lo timba t’anto. Aha la taamu, ase Isariyɛlɛ tshɛ wakalele etena kakavu pami ka kɔlamelo kɛsɔ! Ɛlɔ kɛnɛ, ekambi wa Jehowa pombaka ndjambola onto l’onto ɔnɛ: ‘Onde dimi layokoya mbetawɔ kaki la Samuɛlɛ?’