1. Lushi lakɔna ondo lakaleke kɔlɔ efula lo lɔsɛnɔ laki Petero?

PETERO hohɛki pondjo etena ka kɔlɔ efula kakandahomanya washo nde la Owandji ande. Onde nde akɛnyi dia Yeso akawende la washo wa lonyangu kana wa kɔlɔ? Sho keema l’eshikikelo nɛ dia ɔkɔndɔ wakasambiyama totɛka tsho ɔnɛ: “Nkumadiɔndjɔ akakadimɔ ndo akende Petero.” (Luka 22:61) Koko lo mbala ɔtɔi kakawende Yeso kɛsɔ, Petero akashihodia dia nde ambosala munga ka woke. Nde akeye dia nde ambosala kɛnɛ kakawotɛ Yeso, kakandate dia nde hakisalaki pondjo, mbuta ate nde akanguna Owandji ande wa ngandji. Ɔsɔ aki munga ka woke le Petero, ondo lushi lakaleke kɔlɔ efula lo lɔsɛnɔ lande.

2. Wetshelo akɔna wakahombe Petero ndjokondja, ndo ngande wakokaso nkondja wahɔ oma l’ɔkɔndɔ ande?

² Koko laasɔ tshɛ, ko eke mpɛtsha ko ndɛ. Lam’ele Petero aki pami kaki la mbetawɔ ka wolo, nde aki eke la diaaso dia ndjatshumoya oma lo munga yande ndo ndjokondja wetshelo woleki ohomba oma le Yeso. Wetshelo ɔsɔ wakendanaka la edimanyielo. Sho tshɛ tekɔ l’ohomba wa nkondja wetshelo ɔsɔ. Ɔnkɔnɛ, nyɛsɔ tɔsɛdingole woho wakakondja Petero wetshelo w’ohomba ɔsɔ.

3, 4. a) Dimbola diakɔna diakoke Petero Yeso, ndo kakɔna ondo kakafɔnyaka Petero? b) Ngande wakɛnya Yeso dia Petero akasɛngiyama la yimba yaki l’anto wa lo nshi shɔ?

³ Ngɔndɔ oko shamalo la ntondo, l’osomba wa Kapɛrnauma wakandotɔ, Petero akatshu le Yeso ndo akawombola ate: “Nkumadiɔndjɔ, mbala ngana yahomba onto salɛmi kɔlɔ ko dimi mbodimanyiya? Onde polo mbala esambele?” Ondo Petero akɔshi dia nde akadimanyiyanaka efula. Laadiko dia laasɔ, ewandji w’ɛtɛmwɛlɔ waketshaka dia onto akahombaka dimanyiya onyande mbala shato tsho. Yeso akokadimola ate: “Lambokotɛ nte: Aha polo mbala esambele, koko polo mbala akumi esambele la esambele.”—Mat. 18:21, 22.

 ⁴ Onde laasɔ Yeso akatɛka Petero dia nde fundaka munga yakawahombaka mbosalɛ? Ndooko, koko lo mbuta ɔnɛ aha mbala 7 koko edja ndo mbala 77, nde akɛnya dia ngandji totshutshuyaka dia dimanyiya anto kɔlɔ tshɛ yatosalɛwɔ. (1 Kɔr. 13:4, 5) Yeso akɛnya dia Petero akasɛngiyama la yimba y’otema wolo ndo yaha dimanyiyana yaki l’anto wa lo nshi shɔ wakafundaka kɔlɔ tshɛ yakaasalɛka anto. Koko edimanyielo kaki Nzambi keema l’elelo.—Adia 1 Joani 1:7-9.

5. L’etena kakɔna kakokaso nkondja wetshelo woleki tshɛ wendana la edimanyielo?

⁵ Petero kombidjana la Yeso taamu. Ko onde wetshelo waki Yeso wakananda otema ande? Mbala mɔtshi, sho ndjokondjaka wetshelo woleki tshɛ wendana l’edimanyielo etena keyaso dia shoamɛ tekɔ l’ohomba w’efula wa dimanyiyama. Ɔnkɔnɛ, nyɛsɔ tɔsɛdingole akambo wakayokonyaka lo nyɔi ka Yeso. Lo etena ka wolo kɛsɔ, Petero akasale munga efula yakalɔmbɛ dia Owandji ande mbodimanyiya.

6. Kakɔna kakasale Petero etena kakasha Yeso apɔstɔlɔ ande wetshelo wendana la okitshakitsha, ko Yeso ngande wakandawɔshi?

⁶ Otsho w’ekomelo wa lɔsɛnɔ laki Yeso la lanɛ la nkɛtɛ aki otsho wa diambo efula. Yeso aki eke l’awui efula wa mbetsha apɔstɔlɔ ande, ɛnyɛlɔ lo kɛnɛ kendana l’okitshakitsha. Yeso akawasha ɛnyɛlɔ lo mbasola ekolo l’okitshakitsha tshɛ, olimu wakasalemaka oma le abɔyi. Ntondotondo, Petero akambola Yeso dia kana nde ayowosola ekolo. Oma laasɔ, nde akatone dia Yeso mbosola ekolo. Ndo nto, nde akate dia Yeso mbosola aha ekolo eto, koko ndo anya la ɔtɛ. Yeso komomala, koko la lotutsha tshɛ nde akoolembetshiya kitshimudi ya kɛnɛ kakandasalaka.—Jni. 13:1-17.

7, 8. a) Lo toho tokina takɔna takadje Petero solo dia lotutsha diaki Yeso l’ohemba? b) Ngande wakatetemala Yeso nkɛnɛmɔla yimba ya ngandji ndo ya dimanyiyana?

⁷ Yema tshitshɛ oma laasɔ, Petero akadje nto solo dia lotutsha diaki Yeso l’ohemba. Apɔstɔlɔ wakawane dia mbeya akɔna oleki woke l’atei awɔ ndo Petero mbaki mɛtɛ l’atei w’owanu ɔsɔ wakakɛnɛmɔlaka otako wele l’anto. Koko la ngandji tshɛ Yeso akawangola ndo akawawandola lo woho wakawatshikala la kɔlamelo otsha le nde. Nde akawatɛ dia vɔ tshɛ wayowolawɔ. Petero akate dia nde hatolawɔ Yeso kaanga la ntondo ka nyɔi. Koko Yeso akate dia Petero ayowanguna mbala shato l’otsho akɔ la ntondo ka nkɔkɔ mbeka mbala hiende. Petero kombidja tsho Yeso taamu, koko nde akafune dia nde ayotshikala la kɔlamelo le nde oleki apɔstɔlɔ akina tshɛ.—Mat. 26:31-35; Makɔ 14:27-31; Luka 22:24-28; Jni. 13:36-38.

⁸ Onde Yeso aki suke la momalɛ Petero? L’etena ka wolo kɛsɔ, Yeso akake washo ande lo akambo w’ɔlɔlɔ wakasalaka apɔstɔlɔ ande waki komonga kokele. Nde akeyaka ɔnɛ Petero ayowanguna, koko Nde akawotɛ ate: “Lakalɔmbi dikambo diayɛ, diaha wɛ nshisha  mbetawɔ kayɛ ndo lam’ayoyoyatshumoya, kokeketsha ananyɔ.” (Luka 22:32) Ɔnkɔnɛ, Yeso akɛnya dia nde akeyaka dia Petero ayoyatshumoya oma lo munga yande ndo ayoyokamba olimu la kɔlamelo tshɛ. Nde mɛtɛ akoodimanyiya!

9, 10. a) L’ekambɔ ka Ngɛtɛsɛmanɛ, wongwelo akɔna wakahombe Petero nongola? b) Kɛnɛ kakakomɛ Petero toholaka na?

⁹ L’ɔkɔngɔ diko, l’ekambɔ ka Ngɛtɛsɛmanɛ, Petero akahombe mingɔma nto mbala efula. Yeso akɔɔlɔmbɛ nde la Jakɔba la Joani dia vɔ ntetemala nsɛna etena kakandalɔmbaka. Yeso aki la lonyangu efula ndo nde aki l’ohomba w’osukɔ, koko Petero nde la asekande wakalale djɔ mbala efula. Yeso akashihodia lande na kakasale apɔstɔlɔ ande ngasɔ ndo nde akaadimanyiya. Diakɔ diakandate ate: “Otema nangaka, koko demba mbele wɔdu.”—Makɔ 14:32-41.

¹⁰ Yema tshitshɛ oma laasɔ, olui w’anto wakakome wokime ewa, tokuwa la tohembe. Ɔsɔ aki etena ka nsala akambo la yewo ndo la kɛsɔ. Koko, Petero akasɔmɔla yɔɔmbɔ yande ko akahembola tui diaki Malako, ose olimu w’ɔlɔmbɛdi a laadiko. Yeso akangola Petero la wɔlamu tshɛ, akakɔnɔya tui diakandahembola onto ndo akalembetshiya tɔndɔ dialɔmba diaha nsala akambo la ngala dialɔmbɔla ambeki ande polo ndo ɛlɔ kɛnɛ. (Mat. 26:47-55; Luka 22:47-51; Jni. 18:10, 11) Petero akasalɛ Owandji ande munga efula yakalɔmbɛ dia nde mbodimanyiya. Kɛnɛ kakokomɛ mbeyaka tohola dia sho tshɛ takanaka mbala efula. (Adia Jakɔba 3:2.) Akɔna l’atei aso ele bu l’ohomba w’edimanyielo kaki Nzambi lushi tshɛ? Koko, awui efula wakahombe komɛ Petero l’otsho ɔsɔ. Awui woleki kɔlɔ waki lo mbokongɛ.

11, 12. a) Ngande wakɛnya Petero yema ya dihonga l’ɔkɔngɔ wa vɔ munda Yeso? b) Lande na kele Petero kosala kɛnɛ kakandate ɔnɛ ayokisala?

¹¹ Yeso akatɛ olui w’anto wakaye ndjowonda dia naka nde mbakawayangaka, kete watshike apɔstɔlɔ ande dia vɔ ntshɔ. Petero akendaka olui w’anto wakeleka Yeso, heye ka nsala. Oma laasɔ, Petero akalawɔ woho wakalawɔ apɔstɔlɔ w’asekande.

¹² Petero nde la Joani wakatemalaka, ondo suke la luudu laki Anasi laki ntondo ɔlɔmbɛdi a laadiko lɛnɛ akawatshu la Yeso ntondo dia toolombosha. Etena kakawatetaka la Yeso, Petero nde la Joani wakatawoyelaka lo “tshalola.” (Mat. 26:58; Jni. 18:12, 13) Petero komonga y’ɔmɔma. Di’onto ntshɔ lɛnɛ akawatatshɔka la Yeso, nde akahombe monga la dihonga. Olui w’anto waki la tɔɔmbɔ ndo Petero akahomuya ɔmɔtshi la l’atei awɔ. Koko, kɛnɛ kakasale Petero mɛnyaka dia nde komonga la woho wa ngandji ka kɔlamelo kakandataka dia nde ekɔ la tɔ, mbuta ate mvɔ kaamɛ la Owandji ande naka ekɔ ohomba.—Makɔ 14:31.

13. Naa yoho tshɔi ya dimɛna ya ndjela Kristo?

¹³ L’ɛnyɛlɔ ka Petero, ɛlɔ kɛnɛ anto efula monaka dia ndjela Kristo lo “tshalola,” diaha anto mbaɛna. Koko, oko wakayofundaka  Petero l’ɔkɔngɔ diko, yoho yaamɛ yakokaso ndjela Kristo dimɛna ele lo mbomamema lo yɛdikɔ yɛdimi l’akoka aso ndo lo mbokoya ɛnyɛlɔ Kande l’awui tshɛ, oyadi etombelo wakoka monga.—Adia 1 Petero 2:21.

14. Ngande waketsha Petero wenya wa l’otsho etena kakawalomboshaka Yeso?

¹⁴ Petero akatayelaka wanɛ wakatatshɔka la Yeso la yewo polo ndo etena kakandatokomaka lo lokuke la luudu lɔmɔtshi lakaleke woke la Jɛrusalɛma. Ɔsɔ aki luudu laki Kayifasi, ɔlɔmbɛdi a laadiko w’ɔngɔnyi waki la shɛngiya y’efula. Mvudu ya ngasɔ yakadingamaka mbala efula la nkombo yaki la lokuke la la sɛkɛ. Petero akakome polo lo lokuke, koko vɔ kombetawɔ dia nde mbɔtɔ l’etei. Joani, ɔnɛ lakashile mbɔtɔ l’etei akayoyaka ndo akayɔlɔmbaka olami wa soko dia nde mbɔtshiya Petero. Mɛnamaka dia Petero nde la Joani komonga suke suke ndo nde kopemba dia mbɔtɔ lo luudu dia temala suke la Owandji ande. Nde akatshikala lo sɛkɛ lɛnɛ aketetaka ekambi la ɛhɔmbɔ wonya wa tshitshi l’osase wa dja enda woho wakataka anto akambo wa kashi lo dikambo dia Yeso ndo woho wakatetaka kilombo.—Makɔ 14:54-57; Jni. 18:15, 16, 18.

15, 16. Lembetshiya woho wakakotshama prɔfɛsiya kaki Yeso kakandate dia Petero ayowanguna mbala shato.

¹⁵ Oma l’osase wa dja yakahɛtaka, osekaseka waketawɔ dia Petero mbɔtɔ l’etei akawɛnyi dimɛna. Nde akaweye, ko akɔsɔngwɛ ate: “Ndo wɛ lawɔ mbaki la Yeso y’ose Ngalileya!” Aha la nde nongamɛ ɔnɛ dui dia ngasɔ diayowokomɛ, Petero akanguna Yeso ndo akate dia nde heye kɛnɛ kata osekaseka ɔsɔ. Nde akatshu dia temala suke la soko asala diaha anto mbeeya, koko osekaseka okina akawɛnyi ndo akate ɛtɛkɛta akɔ waamɛ ate: “Pami kɛnɛ aki la Yeso y’ose Nazarɛtɛ.” Petero akatshibe ate: “Dimi haleyi onto ɔsɔ.” (Mat. 26:69-72; Makɔ 14:66-68) Ondo aki l’ɔkɔngɔ wa nde manguna mbala ka hende mbakoke Petero lekeka leka, koko nde kombidja yimba dia nshihodia kɛnɛ kakawotɛ Yeso wenya ɛmɔtshi la ntondo.

¹⁶ Yema tshitshɛ l’ɔkɔngɔ, Petero akasale tshɛ diaha anto mbeeya. Koko olui ɔmɔtshi w’anto wakemala lo sɛkɛ wakasukana suke la nde. Ɔmɔtshi l’atei awɔ akotɔka la Malako, ose olimu lele Petero akohembola tui. Nde akatɛ Petero ate: “Shi ndo wɛ mbakamɛnyi kaamɛ la nde l’ekambɔ?” Petero akasale dia mbaetawoya dia kɛnɛ katawɔ kekɔ kashi. Ɔnkɔnɛ, nde akayadje etshi, ondo lo mbuta ɔnɛ nde kokaka mbidjama mananu naka kashi mbatande. Ɔsɔ mbaki mbala ka sato ka Petero manguna Yeso. Oshimu kele edja, lekeka lakeke. Ɔsɔ aki mbala ka hende ka Petero mboka lekeka leeka l’otsho ɔsɔ.—Jni. 18:26, 27; Makɔ 14:71, 72.

17, 18. a) Kakɔna kakasale Petero l’ɔkɔngɔ wa nde nshihodia dia nde ambosalɛ Owandji ande munga ka woke? b) Kakɔna ondo kakayambola Petero?

¹⁷ L’etena kɛsɔ, wakaye la Yeso oya lo dɛfu diakɛlɛnganɛ la sɛkɛ  dia mbalasa. L’etena kakɔ oko wakataditshi oma l’etatelo ka tshapita nyɛ, washo ande wakahomana la waki Petero. Petero akashihodia l’etena kɛsɔ dia nde ambosalɛ Owandji ande munga ka woke. Nde akatombe oma lo sɛkɛ, kunya la lonyangu l’ɔtɛ w’onongo wakandakongola. Nde akekekɔ lo toshinga t’osomba, laasɔ ko wɛdi wele kasaa. Nde akakɛlɔya asɔi, akasongotɔ ndo akasekuma la delo.—Makɔ 14:72; Luka 22:61, 62.

¹⁸ L’ɔkɔngɔ w’onto nshihodia dia nde ambosala munga ka woke ka ngasɔ, nde koka mfɔnya esadi eto dia nde hakokaki dimanyiyama. Ondo ndo Petero mbakafɔnyaka ngasɔ. Ko onde nde mɛtɛ akakoke dimanyiyama?

19. Ngande wakayaoke Petero lo kɛnɛ kakandasale ndo ngande weyaso dia nde koshisha elongamelo?

¹⁹ Ekɔ dui dia wolo dia nkanyiya paa kakonge la Petero la pindju ndo woho wakatetaka akambo. Nde mɛtɛ akahombe monga la lonyangu l’efula etena kakavu Yeso la dikɔlɔ sɔ l’ɔkɔngɔ wa nde mpɛnyahɛnyama wolo l’edja ka wenya efula. Weho akɔ tshɛ, Petero akanyangaka wonya tshɛ wakandakanyiyaka woho wakandanyangiya Owandji ande l’otsho w’ekomelo wa lɔsɛnɔ lande la la nkɛtɛ. Kaanga mbakinde la lɔkɔnyɔ l’efula, Petero koshisha elongamelo. Sho mbeyaka dikambo sɔ nɛ dia ɔkɔndɔ totɛka ɔnɛ yema tshitshɛ oma laasɔ, nde akatshu otsha le anango. (Luka 24:33) Aha la taamu, apɔstɔlɔ tshɛ waki la lonyangu lo kɛnɛ kakawasale l’otsho ɔsɔ ndo vɔ wakakeketshana lam’asawɔ.

20. Wetshelo akɔna wakokaso nkondja oma lo awui wakasale Petero lo etena kɛmɔtshi kakaleke dimɛna le nde?

²⁰ Mbala kɛnɛ, Petero ambɔsa yɛdikɔ mɔtshi yoleki dimɛna. Naka okambi waki Nzambi ambɔkɔ, aha lonyangu lande mboleki ohomba, koko woho wayashikikɛnde dia mbetɔ ndo nɔngɔsɔla akambo. (Adia Tukedi 24:16.) Petero akɛnya dia nde ekɔ la mbetawɔ ka mɛtɛ etena kakandatshu dia tosangana kaamɛ l’anango kaanga mbakandakɔmɔ. Naka onto ambɔkɔmɔ kana ekɔ la lonyangu, nde koka pembama dia ndjanganya l’anto, koko dui sɔ koka monga waale le nde. (Tuk. 18:1) Ayonga dui dia lomba ntshikala ma ma l’asekaso ambetawudi dia nyomokondja wolo wa lo nyuma.—Hɛb. 10:24, 25.

21. Lam’akinde kaamɛ l’anango wa lo nyuma, lokumu lakɔna lakoke Petero?

²¹ Lam’ele nde aki kaamɛ l’anango wa lo nyuma, ndo Petero  mbakoke lokumu la kandji l’ɔnɛ odo wa Yeso waya bu lo diombo. Petero nde la Joani wakalawɔ otsha lo diombo diakawakundɛ Yeso ndo diombo diakɔ diakafamɛ. Joani laki oko dikɛnda mbakakome ntondo lo diombo. Nde akatane diombo diaya hwe ko nde akengenga, koko Petero komengenga. Kaanga mbakinde la dowe, nde akɔtɔ l’etei ka diombo, koko ndooko ɛngɔ kaki lɔkɔ.—Jni. 20: 3-9.

22. Kakɔna kakasale dia lonyangu ndo taamu taki la Petero nshila?

²² Onde Petero aketawɔ ɔnɛ Yeso ambolɔ? Nde kombetawɔ mbala kakɔ ɔtɔi, kaanga mbele wamato wa kɔlamelo wakate dia andjelo wakɛnama le wɔ dia mbatɛ ɔnɛ Yeso ambolɔ. (Luka 23:55–24:11) Koko, la dikɔlɔ dia lushi lɔsɔ, lonyangu ndo taamu tshɛ taki la Petero takashile. Yeso aki la lɔsɛnɔ oko etongami ka lo nyuma kele la nkudu. Nde akɛnama le apɔstɔlɔ ande tshɛ. Koko, la ntondo ka laasɔ nde akatasadi dikambo dimɔtshi lo woshɛshɛ. Apɔstɔlɔ wakate lushi lɔsɔ vɔate: “Lo mɛtɛ, Nkumadiɔndjɔ ambolɔ ndo nde akɛnami le Simɔna!” (Luka 24:34) Woho akɔ waamɛ mbele, l’ɔkɔngɔ diko ɔpɔstɔlɔ Pɔɔlɔ akayofundaka lo dikambo dia lushi la laande lɔsɔ ɔnɛ Yeso “akɛnama le Kɛfasi, ko oma laasɔ le apɔstɔlɔ ande dikumi l’ahende.” (1 Kɔr. 15:5) Kɛfasi la Simɔna ekɔ nkombo nkina yaki Petero. Yeso akɛnama le nde ndamɛ lushi lɔsɔ ndo mɛnamaka dia Petero aki ndamɛ.

23. Lande na kahomba Akristo wasala pɛkato ɛlɔ kɛnɛ mbohɔ kɛnɛ kakakomɛ Petero?

²³ Bible hatotɛ kɛnɛ kakete etena kakɛnama Yeso le Petero lo yoho ya laande shɔ. Tokanyiya yema woho wakayaoke Petero etena kakandɛnyi nto Yeso lakandokaka ngandji ambolɔ ndo diaaso diakandakondja dia mɛnya lonyangu ndo ndjatshumoya kaki la nde. Ndooko ɛngɔ kekina l’andja ɔnɛ kakakombola Petero laadiko di’edimanyielo. Akɔna akoka mbidja taamu ɔnɛ Yeso kodimanyiya Petero tshɛ lo tshɛ na? Akristo wasala pɛkato ɛlɔ kɛnɛ pombaka mbohɔ kɛnɛ kakakomɛ Petero. Tatɔfɔnyake pondjo ɔnɛ Nzambi hakokaki todimanyiya. Yeso akokoya She, Ɔnɛ ‘ladimanyiyana efula,’ tshɛ lo tshɛ.—Is. 55:7.

24, 25. a) Kɔndɔla woho wakete otsho waketsha Petero lo mbidja ɛtɛyi l’odowa wa Ngalileya. b) Kakɔna kakasale Petero la ntondo ka dihindo diakasale Yeso la wedi a pindju okina?

²⁴ Yeso akatɛ apɔstɔlɔ ande dia vɔ ntshɔ otsha la Ngalileya lɛnɛ akawahombe tohomana la nde nto. Etena kakawakome lɛkɔ, Petero akɔshi yɛdikɔ ya ntshɔ otsha lo oduwa ka Ngalileya dia nde toka ɛtɛyi. Ambeki akina efula wakooyele. Mbala kɛnɛ nto, Petero akatshu l’oduwa lɛnɛ akandetsha ɛnɔnyi efula wa lɔsɛnɔ lande la ntondo. Woho wakasukasukaka waato, wakambɔmbɔka asuku ndo woho wakandakimɛka ɛtɛyi l’anya ande akookeketsha. Onde nde akayambola l’otsho ɔsɔ woho wakandahombe nkamba la lɔsɛnɔ lande  etena kakakomɛ olimu waki Yeso wa la nkɛtɛ? Onde nde akakombolaka nsɛna lɔsɛnɔ l’ɔsɛlɛngɛ l’omundji wa nse? Lo weho akɔ tshɛ, vɔ komunda ndooko lose otsho w’otondo.—Mat. 26:32; Jni. 21:1-3.

²⁵ Koko la yosose, onto ɔmɔtshi akawaelɛ oma l’omamu w’ashi ndo akawatɛ dia vɔ ntambiya ɛtɛyi awɔ lo wedi okina wa waato. Vɔ wakakitanyiya ndo wakande nse 153. Petero akeye aki onto ɔsɔ. Petero akafumbɔ oma lo waato ko akasanula oya l’okongo. Etena kakawakome l’omamu, Yeso akawasha nse yakandafumbe laadiko di’akalanga. Nde akaleke ndjasha le Petero.—Jni. 21:4-14.

26, 27. a) Diaaso diakɔna diakasha Yeso Petero tena sato di’etondo? b) Djembetelo yakɔna yakasha Yeso Petero yakɛnyaka dia nde amboodimanyɛ tshɛ?

 ²⁶ Yeso akambola Petero dia kana nde mbookaka ngandji ‘oleki diangɔ nɛ,’ mbuta ate lemba la woke la nse lakawande. Onde Petero akokaka olimu wa wondelo wa nse ngandji koleki kɛnɛ kakandokaka Yeso? Oko wakanguna Petero Nkumadiɔndjɔ mbala shato y’etondo, Yeso akawosha diaaso dia nde nshikikɛ dia kana nde mbookaka ngandji lo mbombola mbala shato y’etondo la ntondo k’ambeki ande. Lam’ele Petero akakadimola ɔnɛ eelo, Yeso akawotɛ ɔnɛ dia nde nkɛnɛmɔla woho wa ngandji kɛsɔ, nde akahombe mbetsha olimu w’ekila lo dihole dia ntondo lo ndeshaka ɛkɔkɔ waki Kristo, mbuta ate ambeki ande wa kɔlamelo.—Luka 22:32; Jni. 21:15-17.

²⁷ Ngasɔ mbakashikikɛ Yeso dia Petero aki eke ohomba le nde ndo le She. Petero akahombe ndjonga l’ɔkɛndɛ w’ohomba l’etshumanelo kakalɔmbwamaka oma le Kristo. Ɔsɔ aki djembetelo ya shikaa yɛnya dia Yeso akoodimanyiya tshɛ lo tshɛ. Lo mɛtɛ, kɛtshi kɛsɔ kakananda otema waki Petero ndo tɔ kakonge la shɛngiya ya wolo le nde.

28. Ngande wakayɔsɛnaka Petero lo yoho yɔtɔnɛ la lokombo lande?

²⁸ Petero akɛmbɛ ɔkɛndɛ ɔsɔ la kɔlamelo tshɛ l’edja k’ɛnɔnyi efula. Nde akakeketsha anango oko wakawodjangɛ Yeso l’otsho wa la ntondo ka nyɔi kande. Petero akalamaka ndo akaleshaka ambeki waki Kristo la ngandji tshɛ ndo la solo dia lotutsha. Pami kakawelɛka Simɔna akayɔsɛnaka lo yoho yɔtɔnɛ la lokombo lakawosha Yeso la Petero kana Dive lo monga ekundji kele la shɛngiya y’ɔlɔlɔ l’etshumanelo. Tolembetelo efula tashikikɛ dikambo sɔ mɛnamaka oma lo mikanda ehende wakafunde Petero la ngandji tshɛ wakayadiemaka l’atei w’abuku w’ohomba efula wa lo Bible. Laadiko dia laasɔ, mikanda ɛsɔ mɛnyaka dia Petero hohɛki pondjo wetshelo wakandakondja oma le Yeso lo kɛnɛ kendana la dimanyiyana.—Adia 1 Petero 3:8, 9; 4:8.

29. Ngande wakokaso mbokoya mbetawɔ kaki la Petero ndo kɛtshi kaki la Owandji ande?

²⁹ Nyɛsɔ sho lawɔ tokondja wetshelo oma lo ɛnyɛlɔ kɛsɔ. Onde sho nɔmbaka Nzambi lushi la lushi dia nde todimanyiya lokema la munga yaso? Ndo nto, onde sho mbetawɔka edimanyielo kɛsɔ ndo mbetawɔka wolo wele la tɔ wa tɛdia? Ndo onde sho dimanyiyaka anto wotodingi? Naka eelo, kete tayokoya mbetawɔ kaki la Petero ndo kɛtshi kaki la Owandji ande.