1, 2. a) Woho w’olimu akɔna wakakambe Ruta? b) Yɛdikɔ yakɔna y’ɔlɔlɔ ya l’Ɛlɛmbɛ waki Nzambi yendana la wodja ande yakandayoshihodiaka?

RUTA ekɔ lo ndjɛmbɛ dikanda di’eponga wakandatɔngɔnyi lushi l’otondo. Wodjima wambotatɛ monga lo dikambɔ diele suke la Bɛtɛlɛhɛma ndo akambi wekɔ lo ndjadɛ oma l’ekongo wakadinge soko di’osomba wa tshitshɛ ɔsɔ. Ruta ambɔlɛmba efula l’ɔtɛ w’olimu wakandakambi lushi l’otondo ntatɛ oma ko pindju. Koko, nde ekɔ lo tatetemala nkɛndakɛnda atɛmbɛ wotsho ande okime otamba diaha nde nkɔ ko eponga mpandjɔ. Kaanga mbakandakambi olimu lushi l’otondo, ɔsɔ aki lushi l’ɔlɔlɔ le nde, mbuta ate lushi la dimɛna efula lo yɛdikɔ yahandalongamɛki.

² Ntatɛ l’etena kakɔna kakayotatɛka akambo ndowana lo lɔsɛnɔ laki osekaseka waki wada aki odo ɔsɔ? Oko wakatadiɛnyi lo tshapita yetshi, nde akɔshi yɛdikɔ ya ntshikala kaamɛ la Naɔmi k’okilande, lo ntshika dɔkɔlɔkɔ di’ɔnɛ Jehowa Nzambi kayɛ ayoyala Nzambi kami. Wadi waki edo ahende asɔ wakakome la Bɛtɛlɛhɛma oma la Mɔaba, ndo Ruta w’ose Mɔaba akayeyaka esadi eto di’Ɛlɛmbɛ wakasha Jehowa ase Isariyɛlɛ waki la yɛdikɔ y’ohomba efula lo dikambo di’ase wola wa l’Isariyɛlɛ, mbidja ndo angɛndangɛnda. Nde akayoshihodiaka di’ekambi ɛmɔtshi waki Jehowa wakakitanyiyaka Ɛlɛmbɛ ɛsɔ ndo wakasalɛka anto akambo lo yoho yɔtɔnɛ la wɔ wakɛnyaka dia wekɔ la lonyuma la dimɛna. Dui sɔ diakosambe oma l’ɔkɛi waki lande.

3, 4. a) Ngande wakakeketsha Bɔaza Ruta? b) Ngande wakoka ɛnyɛlɔ kaki Ruta tokimanyiya lo nshi nyɛ yele ekondjelo kaya edika w’edika?

³ Bɔaza aki ɔmɔtshi l’atei w’anto asɔ nde aki pami kaki l’ɔngɔnyi, ndo l’ekambɔ kande mbakatɔtɔngɔnaka Ruta washa w’eponga. Lushi lɔsɔ nde akoosalɛ akambo oko ombutshi. Nde aki l’ɔmɔnɔmɔnɔ oma l’ɛtɛkɛta wa lowando wakandoke l’ɔtɛ wakandakokɛ Naɔmi ndo lo woho wakandasɔnɛ dia nyanga eshamelo le Jehowa, Nzambi ka mɛtɛ.—Adia Ruta 2:11-14.

⁴ Koko, ondo Ruta akayambolaka lo kɛnɛ kendana la nshi yande yayaye. Oko wakinde ɔngɛndangɛnda ndo ose wola laki komonga  l’omi kana l’ɔna, ngande wakandakoke ndjakotshɛ ehomba ande la waki Naɔmi lo nshi y’otsha la ntondo? Onde paka oma l’eponga wa lɔtɔngɔna eto? Ndo onto akɔna lakakoke ndjookokɛ lo nshi yande y’osombe? Awui asɔ mɛtɛ wakakoke mbotshindja wɔɔngɔ. Lo nshi nyɛ yele ekondjelo kaya edika w’edika, anto efula ndjakiyanyaka woho akɔ waamɛ. Oko wangaso mɛna woho wakakimanyiyama Ruta oma lo mbetawɔ kaki lande l’atei w’ekakatanu wa ngasɔ, ayonga dui dia lomba dia sho mbookoya.

5, 6. a) Etombelo akɔna w’ɛlɔlɔ wakakondja Ruta lushi la ntondo lakandatɔtɔngɔnaka washa w’eponga l’ekambɔ kaki Bɔaza? b) Kakɔna kakasale Naɔmi etena kakandɛnyi Ruta?

⁵ Etena kakashidiya Ruta nsusola eponga ndo mbatɔngɔna, nde akɛnyi dia nde akatɔngɔnyi suke la saka ɔtɔi di’eponga. Ondo wotsho ɔsɔ waki kilɔ 14. Nde akotɛ eponga akɔ lo dihɔndɔ ndo akɛmbɛ otshumu akɔ l’ɔtɛ otsha la Bɛtɛlɛhɛma la tosho ta shimba.—Ruta 2:17.

⁶ Naɔmi akangɛnangɛna etena kakandɛnyi okilo ande lakandokaka ngandji, ndo nde akambe l’ɔtɛ wakandawɛnyi ayɛmbɛ otshumu w’eponga wa wotsho ɔsɔ. Nde akela nto yangɔ ya ndɛ yakandombe oma lo mbo ya ndɛ yakasha Bɔaza ase olimu ande, ko vɔ ahende wakayile. Naɔmi akawombola ate: “Lendi akayatukamba, akayatotongona washa elo? One lakaketawi, atshokwami!” (Ruta 2:19) Naɔmi akadjaka yimba lo kɛnɛ tshɛ kakasalaka Ruta, diakɔ diele nde akɛnyi dia onto ɔmɔtshi akatowoka kɛtshi.

7, 8. a) Naɔmi akɛnyi dia lɔsɛngɔ la Bɔaza lakaye oma le na, ndo lande na? b) Lo yoho yakɔna nto yakɛnya Ruta ngandji ka kɔlamelo otsha le okilande?

⁷ Vɔ akɔ ahende wakasawola ndo Ruta akatɛ Naɔmi woho wakɔkɛnɛmɔlɛ Bɔaza lɔsɛngɔ. Naɔmi akangɛnangɛna ndo akate ate: “Untu one latutshelaka wasena ndu wakavu ololo atshokwami le [Jehowa]!” (Ruta 2:20) Nde akashihodia dia lɔsɛngɔ la Bɔaza lakaye oma le Jehowa, ɔnɛ lakeketsha ekambi ande dia monga la lokaho ndo laalaka dia ndjafuta l’ɔtɛ wa lɔsɛngɔ lakɛnɛmɔlawɔ. *—Adia Tukedi 19:17.

⁸ Naɔmi akakeketsha Ruta dia mbetawɔ kɛnɛ kakawotɛ Bɔaza, dia ntetemala tɔngɔnaka washa w’eponga l’ekambɔ kande ndo tshikalaka suke l’esekaseka wakakambaka olimu lo luudu lande, diaha as’olimu w’apami ndjɔkɛnya la nde. Ruta akakitanyiya dako  sɔ. Ndo nto, “ndi akadjaseka kame la ukilu andi.” (Ruta 2:22, 23) Sho mɛnaka nto oma l’ɛtɛkɛta ɛsɔ dionga di’ohomba efula diaki lande, mbuta ate ngandji ka kɔlamelo. Ɛnyɛlɔ kaki Ruta kokaka totshutshuya dia sho ndjambola dia kana sho nɛmiyaka dimama dia nkumbo, lo sukɛ la kɔlamelo tshɛ ase nkumbo kaso ndo mbakimanyiya l’ehomba awɔ. Jehowa hohɛ pondjo ngandji ka kɔlamelo ka ngasɔ.

9. Wetshelo akɔna wakokaso nkondja lo kɛnɛ kendana la nkumbo oma le Ruta nde la Naɔmi?

⁹ Onde Ruta nde la Naɔmi kokenga mɛtɛ tshondo ya nkumbo? Amɔtshi mbutaka ɔnɛ dia nkumbo “kengama” pombaka monga anto wakotsha ɛkɛndɛ tshɛ, mbuta ate omi, wadi, ɔna, osekaseka ndo tshɛwɔ. Koko, ɛnyɛlɔ kaki Ruta nde la Naɔmi toholaka ɔnɛ ekambi waki Jehowa kokaka ndjihwanɛ etema kaanga l’akambo woleki totshitshɛ, ndo wanɛ wele bu la nkumbo kokaka ndjaoka dia wekɔ lo nangema ndo wekɔ lo mbokama kɛtshi. Onde sho mbɔsaka nkumbo yaso la nɛmɔ? Yeso akohola ambeki ande di’ase etshumanelo k’Akristo kokaka monga oko ase nkumbo kaso hita.—Makɔ 10:29, 30.

10. Lo yoho yakɔna yakalange Naɔmi nkimanyiya Ruta?

¹⁰ Ntatɛ lo ngɔndɔ ka nɛi polo lo ngɔndɔ ka samalo ka dinela di’eponga, Ruta akatetemala ntɔngɔna washa w’eponga l’ekambɔ kaki Bɔaza. Aha la taamu, oko wakatetaka mingu, Naɔmi akaleke ndjakiyanya lo kɛnɛ kakandakoke salɛ okilo ande wa ngandji. Etena kakiwɔ la Mɔaba, Naɔmi akashikikɛ Ruta lo mbotɛ ɔnɛ nde hatokoka mbokimanyiya dia nde nkondja omi okina. (Ruta 1:11-13) Koko, kakianɛ kanyi yande yambotshikitana. Nde akatɛ Ruta ate: “On’ami, dimi nangaka nkuyangela dihuli dia ki.” (Ruta 3:1) Lo ndjela mbekelo kaki nshi shɔ l’Isariyɛlɛ, ambutshi mbakayangɛka anawɔ elonganyi ndo Ruta akakome ɔna la mɛtɛ mɛtɛ le Naɔmi. Nde akakombola dia tanɛ Ruta “dihuli dia ki,” mbuta ate dihole dia lotui tshitshi, di’ekokelo diakoka womoto lotshukami nkondja. Ko kakɔna kakakoke Naɔmi nsala?

11, 12. a) Dia yɛdikɔ yakɔna yoludi la ngandji yakataka Naɔmi etena kakandate dia Bɔaza ɔnɛ: “Ndu ndi keli l’ului a waku wukuki nkitana la ye?” b) Ruta akandasale la dako diakawosha okilo ande?

¹¹ Mbala ka ntondo kakatɛkɛta Ruta dikambo dia Bɔaza, Naɔmi  akate ate: “Untu one mbutoka la su. Ndu ndi keli l’ului a waku wukuki nkitana la ye.” (Ruta 2:20) Kakɔna kakalembetshiyaka dui sɔ? Ɛlɛmbɛ wakasha Nzambi ase Isariyɛlɛ wakendanaka ndo la yɛdikɔ yoludi la ngandji ya mboka ase wola kana wadi waki edo wakadiɛnɛka kɛtshi. Naka womoto ambovusha omi etena kekende osekaseka, nde akongaka l’ɔkɛi w’efula l’ɔtɛ wa lokombo l’omɛnde, ndo okitɔ ande nɛ dia nde hateyama nto lo nshi yayaye. Koko, Ɛlɛmbɛ waki Nzambi waketawɔka dia wadi aki odo nkitana l’ɔnango omɛnde dia nde mbota la nde, diaha lokombo l’omɛnde lakavu nshishɔ ndo dia nkita okitɔ ande. *—Euh. 25:5-7.

¹² Naɔmi akalembetshiya Ruta woho wakandahombe nsala dia mbɔtɔ lo diwala sɔ. Sho kokaka nkanyiya woho wakambe osekaseka ɔsɔ, etena kakawotɛka okilo ande dikambo sɔ. Ruta koshihodiaka Ɛlɛmbɛ w’ase Isariyɛlɛ ndo mbekelo yawɔ. Kaanga mbakidiɔ ngasɔ, nde akakitanyiya kɛnɛ tshɛ kakawotɛ Naɔmi. Kɛnɛ kakawotɛ Naɔmi dia nde nsala akɔsamaka oko dui dia sɔnyi efula, mbuta ate diadja onto l’okandokando, koko Ruta aketawɔ. L’okitshakitsha tshɛ nde akawotɛ ate: “Dimi layutsha tshe uku ambuyumvutela.”—Ruta 3:5.

13. Wetshelo akɔna wakokaso nkondja oma le Ruta lo kɛnɛ kendana la nkitanyiya dako di’oma le epalanga? (Enda ndo Jobo 12:12.)

¹³ Lo tena dimɔtshi, ɛlɔngɔlɔngɔ l’esekaseka ɛmɔtshi wekɔ l’okakatanu dia nkitanyiya alako w’oma le epalanga, wanɛ  wambohokɔ akambo. Ekɔ dui dia wɔdu dia mfɔnya ɔnɛ epalanga w’anto hawoshihodia ekakatanu ndo awui wahomana l’ɛlɔngɔlɔngɔ l’esekaseka. Ɛnyɛlɔ k’okitshakitsha kaki Ruta toholaka dia naka sho mpokamɛ kɛnɛ katotɛ wadi waki edo w’epalanga watoka ngandji ndo watokombolɛ kɛnɛ kele ɔlɔlɔ, kete tayohomɔ lokolo l’ɔlɔ. (Adia Osambu 71:17, 18.) Ko dako diakɔna diakawosha Naɔmi ndo onde Ruta akatshɔkwama lo nkitanyiya dako diakɔ?

14. Elɛwɔ dihole di’esuswelo, ndo ngande wakawakambaka olimu lɛkɔ?

¹⁴ La dikɔlɔ sɔ, Ruta akatshu lo dihole di’esuswelo, mbuta ate lɛnɛ atosusolaka akambi wa dikambɔ eponga. Wakasalaka olimu ɔsɔ l’ɔkɔngɔ a midi kana la kiɔlɔkɔlɔ lo dihole dia hiolola diele nkɛtɛ wolo. Dia nde nkakitola tɔngɔ la fufodi okambi wa dikambɔ akakambaka l’ɛngɔ kele oko lɛɛdi dia mfufola.

15, 16. a) Ɛnya kɛnɛ kakasalema lo dihole di’esuswelo k’eponga etena kakashidiya Bɔaza olimu la dikɔlɔ. b) Ngande wakayeyaka Bɔaza dia Ruta akaladi l’ekolo ande?

¹⁵ Ruta akasɛdingolaka la yambalo tshɛ polo l’etena kakawashidiya olimu la dikɔlɔ. Bɔaza akendaka woho wakandasusolaka eponga, nɛ dia ɔsɔ aki olimu wa wolo efula. L’ɔkɔngɔ wa nde ndɛ dimɛna, nde akalale l’omamu w’eponga wakasusɔma. Ɔsɔ aki mbekelo kakasalaka anto tshɛ dia nkokɛ eponga wakawanaka oma le ase wevi. Ruta akɛnyi dihole diakalale Bɔaza. Etena kakakoke ka nde nsala kɛnɛ kakawotɛ Naɔmi.

¹⁶ La sase dia wɔma, Ruta akatasukanaka ɔkɔkɛ ɔkɔkɛ otsha lo dihole diakandalale. Nde akafɔnya ɔnɛ Bɔaza ekɔ lo djɔ ya baku. Ndo nde akatetamaka l’ekolo waki Bɔaza oko wakawotɛ Naɔmi.  Oma laasɔ, nde akakongɛ etena k’otale. Ruta akɛnyi dia etena kɛsɔ kamboviya edja efula. L’ekomelo, l’atei wa deke, Bɔaza akatatɛ nsambasamba. Oko waki tshitshi efula, nde akanyomoyakomba dihɔndɔ l’ekolo. Nde akoke dia onto ɔmɔtshi aki l’ekolo ande. Ɔkɔndɔ mbutaka ɔnɛ: “Uki ku umuntu l’ekulu andi.”—Ruta 3:8.

17. Akambo akɔna ahende w’ohomba wahashihodia wanɛ wafɔnya ɔnɛ Ruta akasale tshelo ya monanyi?

¹⁷ Nde akawombola ate: “We na?” Ruta akokadimola ondo asaka lokomba ate: “Dimi Ruta, ukambi aye a umuntu. Kakiane unami, dimi ukambi aye, ne dia we eli omotshi l’atei a wane wukuki nkitana la mi.” (Ruta 3:9) Anto amɔtshi fɔnyaka ɔnɛ Ruta akasale tshelo ya monanyi, koko vɔ haweye awui ahende w’ohomba efula. Ntondotondo, Ruta akasale akambo lo ndjela mbekelo ya lo nshi shɔ, yele hatoshihodia efula ka l’atei ayɔ. Ɔnkɔnɛ, ayonga tshondo ya munga naka sho mbɛdika kɛnɛ kakandasale la woho wambolana lɔkɛwɔ nshi nyɛ. Dui dia hende ele, Bɔaza akosalɛ akambo lo yoho yakɛnya dia Ruta aki la lɔkɛwɔ la pudipudi lakandɔmaka efula.

18. Kakɔna kakatɛ Bɔaza Ruta dia mbosamba, ndo l’akambo akɔna ahende wakakɛnɛmɔla Ruta ngandji ka lɔsɛngɔ?

¹⁸ Aha la taamu, Bɔaza akatɛ Ruta ɛtɛkɛta w’amɛna wakosambe. Nde akawotɛ ate: “On’ami, [Jehowa] akotshokole! Wuhu wambuyutsha elo, ambuleka wuhu wakayatshi ntundu ololo, ne dia we hayangi elongo w’apami a wulu, kana akanga w’engonyi.” (Ruta 3:10) “Wuhu wakayatshi ntundu,” mendanaka la ngandji ka kɔlamelo kaki la Ruta ka ndja l’okilo ande wa womoto oya l’Isariyɛlɛ ndo woho wakandokokɛ. “Wuhu wambuyutsha elo,” mendanaka la kɛnɛ kakandasale lo diaaso sɔ. Bɔaza akalembetɛ dia osekaseka wa womoto wele oko Ruta akakoke nsɔna omi esadi eto l’atei w’ɛlɔngɔlɔngɔ, oyadi kanga ɔngɔnyi kana ose wola. Koko, nde akakombola nsala akambo w’ɛlɔlɔ aha tsho otsha le Naɔmi koko ndo le tokanula t’omaki Naɔmi lakavu, dia nama lokombo lande lo wodja ande wa lootɔ. Kema dui dia wolo dia mɛna lande na kakasalɛ Bɔaza osekaseka wa womoto ɔsɔ akambo aha la lokaki.

19, 20. a) Lande na kaki Bɔaza kotshuka Ruta mbala kakɔ ɔtɔi? b) Lo yoho yakɔna yakakɛnɛmɔla Bɔaza lɔsɛngɔ otsha le Ruta ndo lo kɛnɛ kendana la lokumu lande?

¹⁹ Bɔaza akatetemala mbotɛ ate: “Kakiane on’ami tukaki woma. Dimi layukutshela akambu tshe wutshiye, ne dia wudja asu tshe mbeyaka vati: Umuntu l’ololo keye.” (Ruta 3:11) Nde  akangɛnangɛna dia ntshuka Ruta, ndo nde kokashimɔ dia nde mbɔlɔmba dia nkitana la nde. Koko, Bɔaza aki pami ka losembwe, ndo aha la taamu nde konanga nkitana la nde lo ndjela lolango la nde hita. Nde akatɛ Ruta dia aki onto ɔmɔtshi lakahombe nkitana la nde nɛ dia nde aki owotɔ wa ka suke w’omaki Naɔmi lakavu. Bɔaza akakombola dia nde ntshɔ le pami kɛsɔ ntondo ndo mbosha diaaso dia nde monga omaki Ruta.

²⁰ Bɔaza akakeketsha Ruta dia nde ntetemala ndala l’ekolo ande edja ndo la yoosose, ko oma laasɔ nde nkalola aha l’onto mbɛna. Nde akalange nkokɛ lokumu laki Ruta ndo lande ndamɛ, lam’ele anto wakakoke mfɔnya di’ɔnɛ vɔ wambosala monanyi. Ruta akatetemala ndala l’ekolo waki Bɔaza, ondo l’asolo walomɔlomɔ ele l’elongamelo k’ɔnɛ nde ayetawɔ kɛnɛ kamondɔlɔmba. Oma laasɔ, la yosose Bɔaza akawosha eponga ko nde akakalola otsha la Bɛtɛlɛhɛma.—Adia Ruta 3:13-15.

21. Kakɔna kakakimanyiya Ruta dia nde mbeyama oko “umuntu l’ololo,” ndo ngande wakokaso mbokoya ɛnyɛlɔ kande?

²¹ Tokanyiya yema woho wakayaoke Ruta etena kakawotɛ Bɔaza ɛtɛkɛta ɛsɔ, mbuta ate anto tshɛ wakeyaka ɔnɛ nde ekɔ “umuntu l’ololo”! Aha la taamu, nde akonge la lokumu l’ɔlɔlɔ lo woho wakandalomɔlomɔ dia mbeya Jehowa ndo mbokambɛ. Nde akakɛnɛmɔla nto lɔsɛngɔ l’efula lo woho wakandayasha le Naɔmi ndo le wodja ande, mbuta ate nde aketawɔ dia ndjaekesanyiya la yoho yawɔ ya lɔsɛnɔ ndo mbekelo yakinde kombeyaka. Naka sho mbokoya mbetawɔ ka Ruta, kete tayoyanga dia nsalɛ anto akina akambo w’ɛlɔlɔ ndo tayɔlɛmiya mbekelo yawɔ. Naka sho nsala ngasɔ, kete tayonga la lokumu l’ɔlɔlɔ.

22, 23. a) Kitshimudi yakɔna yakakoke monga la woshasha wakasha Bɔaza Ruta? (Enda ndo nɔtɛ ka l’ɛse ka dikatshi.) b) Naɔmi akakeketsha Ruta dia nde nsala na?

²² Etena kakakome Ruta la ngelo, Naɔmi akawombola ate: “On’ami, we ambuya?” Ondo l’ɔtɛ waki wonya atahotɔ dimɛna mbakandawombola ngasɔ, koko Naɔmi akalange mbeya nto dia kana Ruta eke paka wadi aki odo lahasadi dui dia kɔlɔ. Esadi eto, Ruta akatɛ okilande akambo tshɛ wakete lam’asande la Bɔaza. Nde akawɛnya nto eponga wakawosha Bɔaza dia nde ndjowosha. *—Ruta 3:16, 17.

 ²³ La lomba tshɛ, Naɔmi akakeketsha Ruta dia nde ntshikala la ngelo lushi lɔsɔ, lo dihole dia nde ntshɔ dia tɔtɔngɔna washa w’eponga lo dikambɔ. Nde akashikikɛ Ruta ate: “Pami kene hutshikala ki elo, tshikima ndi ambushidiya dikambu ne.”—Ruta 3:18.

24, 25. a) Ngande wakɛnya Bɔaza dia nde aki onto ɔlɔlɔ ndo pami kaki komonga la lokaki? b) Lo yoho yakɔna yakatshɔkwama Ruta?

²⁴ Naɔmi akikɔ l’elongamelo le Bɔaza. Nde akatshu otsha lo soko di’osomba lɛnɛ akemalaka dihangamende, ndo akatokonga edja ndo etena kakaye owotɔ wa ka suke wakahombe nkitana la Ruta. La ntondo k’ɛmɛnyi, Bɔaza akasha pami kɛsɔ diaaso dia nde nkitana la Ruta. Koko, pami kakɔ akatone ata dia dui sɔ diayofukutanya okitɔ ande. Oma laasɔ, la ntondo ka dihangamende la soko di’osomba, Bɔaza akate dia nde ayanga nkitana la Ruta dia mbolola lokombo laki Elimɛlɛkɛ w’omaki Naɔmi lakavu, ndo ntshukana la Ruta, wadi aki Malɔna ɔnaki Elimɛlɛkɛ lakavu. Bɔaza akɛnya elongamelo kaki lande k’ɔnɛ lo nsala ngasɔ nde akahombe “mbulula luhanga landi, ne dia lukumbu la one lakavu latukushisho.” (Ruta 4:1-10) Bɔaza aki mɛtɛ onto ɔlɔlɔ ndo pami kaki komonga la lokaki.

²⁵ Bɔaza akatshuke Ruta. Diakɔ diadiaso ɔnɛ: “Ku [Jehowa] akasha Ruta diwutshi. Ndi akuti ona pami.” Wamato wa la Bɛtɛlɛhɛma wakatshɔkɔla Naɔmi ndo wakatombola Ruta lo woho wakandasalɛ Naɔmi akambo w’ɔlɔlɔ oleki kɛnɛ kotosala ana w’apami esambele. L’ɔkɔngɔ diko, sho mbeyaka dia ɔnaki Ruta la pami mbakayokomaka tshɛnde la nkumekanga Davidi. (Ruta 4:11-22) Davidi lo wedi ande, akayokomaka tshɛnde la Yeso Kristo.—Mat. 1:1. *

26. Ɛnyɛlɔ kaki Ruta nde la Naɔmi toholaka dui diakɔna?

²⁶ Lo mɛtɛ, Ruta akatshɔkwama oko Naɔmi lakokimanyiya dia mbodia ɔna oko ɔnande hita. Lɔsɛnɔ la wamato ahende asɔ toholaka dia Jehowa Nzambi mɛnaka wanɛ tshɛ wakimanyiya anto awɔ l’okitshakitsha ndo wokambɛ la kɔlamelo kaamɛ la wodja ande wakandasɔnɛ. Nde hohɛki pondjo dia mfuta ekambi ande wele la kɔlamelo, l’ɛnyɛlɔ kaki Bɔaza, Naɔmi ndo Ruta.