WEKELO 09
Yasukanya la Nzambi lo dɔmbɛlɔ
Onde wɛ ambongaka l’ohomba w’ɛlɔmbwɛlɔ lo lɔsɛnɔ layɛ? Onde wɛ ekɔ la ambola amɔtshi w’ohomba weyɛ l’ohomba w’ekadimwelo? Onde wɛ ekɔ l’ohomba w’esambelo? Onde wɛ nangaka ndjaoka suke suke la Jehowa? Dɔmbɛlɔ koka kokimanyiya l’akambo asɔ tshɛ. Naa yoho ya dimɛna ya nɔmba? Onde Nzambi mpokamɛka alɔmbɛlɔ tshɛ? Ahombayɛ nsala dia ndjashikikɛ dia nde ayoka alɔmbɛlɔ ayɛ? Ɛsɔ teende.
1. Onto akɔna ahombaso nɔmbaka ndo akambo akɔna wakokaso nɔmbaka?
Yeso aketsha dia sho pombaka nɔmbaka paka Shɛso lele l’olongo. Yeso ndamɛ akalɔmbɛ Jehowa. Nde akate ate: “Kanyɔlɔmbake ɔnkɔnɛ nyate: ‘Shɛso lele l’olongo . . .’” (Mateo 6:9) Etena kalɔmbaso Jehowa, sho keketshaka lɔngɛnyi lasaso la nde.
Sho kokaka nɔmba lo kɛnɛ kendana l’oseka dikambo tshɛ. Ɔnkɔnɛ, dia Nzambi nkadimola alɔmbɛlɔ aso, vɔ pombaka mbɔtɔnɛ la lolango lande. ‘Kɛnɛ tshɛ kalɔmbaso kɔtɔnɛ la lolango la Nzambi, nde tokɛka.’ (1 Joani 5:14) Yeso akasha bɛnyɛlɔ diendana l’akambo wakokaso nɔmbaka (Adia Mateo 6:9-13.) Laadiko dia sho nɔmba dikambo di’ehomba aso, hatohombe mbohɛ mbisha Nzambi losaka lo kɛnɛ tshɛ kamondotosalɛ ndo mbɔlɔmba dia nde nkimanyiya anto akina.
2. Ngande wahombaso nɔmbaka?
Bible tokeketshaka dia sho ‘dihola etema aso la ntondo ka Nzambi.’ (Osambo 62:8) Ɔnkɔnɛ, alɔmbɛlɔ aso pombaka monga w’oma k’ɛse otema. Sho koka nɔmba la dui dia wolo kana l’etei k’otema ndo la kiongamu tshɛ yɛnya dilɛmiɛlɔ. Sho koka nɔmba wonya tshɛ ndo dihole tshɛ.
3. Ngande wakadimola Nzambi alɔmbɛso aso?
Nde salaka dui sɔ lo toho totshikitanyi. Jehowa akatosha Ɔtɛkɛta ande, Bible, lɛnɛ atanaso mbala efula ekadimwelo lo ambola aso. Wadielo w’Ɔtɛkɛta wa Nzambi “koka [mbisha] ɔnɛ lahatahokɔ akambo lomba.” (Osambo 19:7; adia Jakɔba 1:5.) Nde koka tosha wɔladi wa lo yimba etena keso l’ekakatanu. Nde koka ntshutshuya ekambi ande ɛmɔtshi dia tokimanyiya mɛtɛ etena keso lo dihombo.
NYOMOTSHIMOLA
Sɛdingola woho wakokayɛ nɔmba lo yoho yangɛnyangɛnya Nzambi, ndo shola woho wakoka dɔmbɛlɔ kokimanyiya.
4. Kɛnɛ kalɔmba Nzambi lo kɛnɛ kendana la dɔmbɛlɔ
Awui akɔna washikikɛ dia kana Nzambi ayetawɔ alɔmbɛlɔ aso kana bu? Nyende VIDƐO.
Jehowa nangaka dia sho mbɔlɔmbaka. Nyadia Osambo 65:2, ndo oma laasɔ, nyɔkɛtshanya ambola anɛ:
-
Onde wɛ fɔnyaka dia “Ɔnɛ loka dɔmbɛlɔ” nangaka dia wɛ mbɔlɔmba? Lande na?
Sho pombaka nsala la wolo dia nsɛna lo yoho yɔtɔnɛ l’ɛlɛmbɛ wa Nzambi naka sho nangaka dia nde mboka alɔmbɛlɔ aso. Nyadia Mika 3:4 ndo 1 Petero 3:12, ndo oma laasɔ, nyɔkɛtshanya dimbola nɛ:
-
Ngande wakokaso ndjashikikɛ dia Jehowa ayohokamɛ alɔmbɛlɔ aso?
L’etena kalɔma ta dimɔtshi, wedi akɔ ehende nɔmbaka dia mbidja otshumba. Onde sho koka nongamɛ dia Nzambi ayokadimola woho w’alɔmbɛlɔ wa ngasɔ?
5. Alɔmbɛlɔ aso pombaka ndja oma k’ɛse otema
Anto amɔtshi waketshama dia kalolɛka alɔmbɛlɔ amɔtshi wakawakimɛ. Ko onde yoho shɔ mbalanga Nzambi dia sho mbɔlɔmba? Nyadia Mateo 6:7, ndo oma laasɔ, nyɔkɛtshanya dimbola nɛ:
-
Ngande wakokayɛ mbewɔ dia kalolɛka “akambo akɔ waamɛ” etena kalɔmbayɛ?
Lushi tshɛ wɛ koka nkanyiya dikambo dimɔtshi dia shikaa dia mbisha Jehowa losaka. Naka lushi tshɛ wɛ kanyiya dikambo dimɔtshi dia mbisha Jehowa losaka, kete lo lomingu wɛ ayonga l’akambo esambele wa mbisha Jehowa losaka.
Ombutshi wa dimɛna nangaka dia ɔnande nsawola la nde oma ka tshina diande di’otema. Woho akɔ waamɛ mbele, Jehowa nangaka dia sho mbɔlɔmba oma k’ɛse otema
6. Dɔmbɛlɔ ekɔ woshasha ɔmɔtshi w’oma le Nzambi
Ngande wakoka dɔmbɛlɔ tokeketsha lo tena di’ɔlɔlɔ kana lo tena dia kɔlɔ? Nyende VIDƐO.
Bible ndakaka dia dɔmbɛlɔ koka tokimanyiya dia monga la wɔladi wa mɛtɛ wa lo yimba. Nyadia Filipɛ 4:6, 7, ndo oma laasɔ, nyɔkɛtshanya ambola anɛ:
-
Kaanga mbele dɔmbɛlɔ hatonyɛ mbala tshɛ ekakatanu aso, ngande watokimanyiyadɔ?
-
Naa awui amɔtshi walangayɛ nɔmba?
Onde wɛ akeyaka?
Tshɛkɛta “aamɛɛ” nembetshiyaka “ayale ɔsɔku” kana “mɛtɛ mɛtɛ.” Ntatɛ oma lo nshi yakafundamaka Bible, anto wokotaka “aamɛɛ” l’ekomelo k’alɔmbɛlɔ.—1 Ɛkɔndɔ 16:36.
7. Yatshungolɛka etena ka nɔmbaka
Tena dimɔtshi sho koka monga l’awui efula wa nsala ko mbohɛ nɔmba. Ohomba wa ngande waki la dɔmbɛlɔ le Yeso? Nyadia Mateo 14:23 ndo Makɔ 1:35, ndo oma laasɔ, nyɔkɛtshanya ambola anɛ:
-
Kakɔna kakasale Yeso dia ndjatshungolɛ etena dia nɔmba?
-
Etena kakɔna kakokayɛ ntana etena ka nɔmba?
ANTO AMƆTSHI MBUTAKA ƆNƐ: “Dɔmbɛlɔ ekɔ tsho wetshelo a wenya dikambo ndooko onto lahokamɛ.”
-
Kakɔna kayoyota?
LO TSHENA PE
Dɔmbɛlɔ dia l’otema ɔtɔi tosukanyaka la Nzambi, toshaka wɔladi wa lo yimba, ndo toshaka wolo weso l’ohomba dia ngɛnyangɛnya Jehowa.
Ovuswelo
-
Onto akɔna ahombaso nɔmbaka?
-
Ngande wahombaso nɔmbaka?
-
Naa wahɔ ɛmɔtshi wayotokondja lo nɔmbaka?
SALA EYANGELO
Tana ekadimwelo lo ambola wayambola anto efula lo kɛnɛ kendana la dɔmbɛlɔ.
“Awui esambele wahombaso mbeya lo dikambo dia dɔmbɛlɔ” (Tshoto y’Etangelo, Ngɔndɔ ka dikumi 1, 2010)
Eka woho wahombayɛ nɔmbaka ndo woho wakokayɛ ndowanya alɔmbɛlɔ ayɛ.
Tende kɛnɛ ketsha Bible lo kɛnɛ kendana la onto akɔna lahombaso nɔmbaka.
Lo mishiki wele la tovidɛo ɛnɛ, tende kana dihole ndo etena kalɔmbaso kekɔ ohomba.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
