WEKELO 10
Ngande wakokayɛ nkondja wahɔ oma lo nsanganya y’Ɛmɛnyi wa Jehowa?
Onde wɛ ambɔtɔka lo losanganya lɔmɔtshi l’Ɛmɛnyi wa Jehowa? Naka wɛ atɔtɔka, kete wɛ koka monga la yema y’okandokando dia mbɔtɔ mbala ka ntondo. Wɛ koka ndjambola wate: ‘Kakɔna keta lo nsanganya shɔ? Lande na keyɔ ohomba? Lande na kahombami ndjiɔtɔ?’ Lo wekelo ɔnɛ, wɛ ayeka woho wele nsangana l’anto akina koka ndeka kosukanya la Nzambi ndo kokimanyiya.
1. Naa ɔkɔkɔ woleki ohomba wasanganaso kaamɛ?
Tende woho wakɛnya ofundji ɔmɔtshi wa Bible ɔkɔkɔ woleki ohomba wasanganaso l’anto akina. Nde akate ate: “Dimi layotombolaka Jehowa lo etshumanelo ka woke.” (Osambo 26:12) Woho akɔ waamɛ mbele, Ɛmɛnyi wa Jehowa ngɛnangɛnaka efula dia nsangana kaamɛ. L’andja w’otondo, vɔ sanganaka lomingu tshɛ dia ntombola Nzambi, dia memba ndo dia nɔmba. Mbala mɔtshi ngana lo ɔnɔnyi, vɔ sanganaka lo nsanganya ya weke dia ntɛmɔla.
2. Kakɔna kayoyoteka lo nsanganya yaso?
Lo nsanganya, sho mbetshaka Ɔtɛkɛta wa Nzambi ‘lo mbolembetshiya hwe ndo lo mbishaka kitshimudi yawɔ.’ (Adia Nɛhɛmiya 8:8.) Lo mbɔtɔ lo nsanganya, wɛ ayoteka akambo wendana la Jehowa ndo la waonga ande wa diambo. Lam’ayotalekaka mbeya awui efula wendana la ngandji kakokande, mbayoyotalekaka ndjasukanya la nde. Wɛ ayeka nto woho wakokande kokimanyiya dia wɛ monga la lɔsɛnɔ l’ɔngɛnɔngɛnɔ.—Isaya 48:17, 18.
3. Wahɔ akɔna wakokayɛ nkondja lo sanganaka kaamɛ l’anto akina lo nsanganya yaso?
Jehowa tɔlɔmbaka dia ‘mbidjanaka yimba, dia tshutshuyana lo ngandji ndo lo etsha w’ɛlɔlɔ ndo diaha ntshika sanganaka kaamɛ.’ (Hɛbɛru 10:24, 25) Lo nsanganya yaso, wɛ ayohomana l’anto wadjana mɛtɛ yimba lam’asawɔ, ndo walanga mbeka akambo efula wendana la Nzambi oko wɛ. Ndo wɛ ayoka woho wakeketshanawɔ la tokanyi t’oma lo Bible. (Adia Rɔmɔ 1:11, 12.) Wɛ ayonga nto l’akoka wa mpomana l’anto akina, atshukanyi kana enyemba wele la ɔngɛnɔngɛnɔ kaanga mbahomanawɔ la ekakatanu. Ɔsɔ ekɔ tsho ɛkɔkɔ ɛmɔtshi wɛnya lande na kalanga Jehowa dia sho sanganaka mbala la mbala!
NYOMOTSHIMOLA
Eka kɛnɛ kasalema lo nsanganya y’Ɛmɛnyi wa Jehowa ndo lande na ekɔ ohomba mbidja welo dia mbɔtɔ lo nsanganya shɔ.
4. Nsanganya y’Ɛmɛnyi wa Jehowa
Akristo wa lo ntambe ka ntondo, wakasanganaka mbala la mbala dia ntɛmɔla Jehowa. (Rɔmɔ 16:3-5) Nyadia Kɔlɔsayi 3:16, ndo oma laasɔ, nyɔkɛtshanya dimbola nɛ:
-
Ngande wakatɛmɔlaka Akristo wa ntondo Jehowa?
Ɛlɔ kɛnɛ, Ɛmɛnyi wa Jehowa vɔ lawɔ sanganaka mbala la mbala kaamɛ lo ahole awɔ w’ɔtɛmwɛlɔ. Dia mɛna woho weta nsanganya yawɔ, nyende VIDƐO. Ndo oma laasɔ, nyende osato wa losanganya lɔmɔtshi la l’etshumanelo ndo nyɔkɛtshanya ambola wayela anɛ:
-
Diɔtɔnganelo diakɔna diele lam’asa kɛnɛ kasalema lo Mbalasa ka Diolelo la kɛnɛ kadishayɛ lo Kɔlɔsayi 3:16?
-
Lo vidɛo kana l’osato ɔnɛ, onde ekɔ ɛngɔ kekina kakɔngɛnyangɛnya lo dikambo dia nsanganya?
Nyadia 2 Kɔrɛtɔ 9:7, ndo oma laasɔ, nyɔkɛtshanya dimbola nɛ:
-
Lande na kele nsanganya y’Ɛmɛnyi wa Jehowa yekɔ ofele?
Kaamɛ la ombetsha ayɛ, nyende kɛnɛ kayɔkɛtshanyema lo losanganya layela.
-
Oko le yɛ, etenyi kakɔna ka losanganya kayoleka kɔngɛnyangɛnya kana monga ohomba le yɛ?
Onde wɛ akeyaka?
Lo jw.org, wɛ koka ntana dihole kana etena kasalema nsanganya l’andja w’otondo.
-
Nsanganya yaso mongaka l’asawo, wɛnyɛlɔ ndo la tovidɛo. Nsanganya yaso tatɛka ndo komɛka la osambo ndo la dɔmbɛlɔ
-
Lo tenyi dimɔtshi dia nsanganya yaso, ampokami mbishaka kɔmatɛrɛ
-
Onto tshɛ nongɔmaka, mbuta ate oyadi nkumbo, enyemba, epalanga kana akɛnda
-
Nsanganya yaso yekɔ ofele. Ɛmɛnyi wa Jehowa hawɔkɔngɔla ɛkɔngɔ
5. Nɔmbamaka mbidja welo dia mbɔtɔ lo nsanganya
Tɔsɛdingole ɛnyɛlɔ ka nkumbo kaki Yeso. Dia mbɔtɔ lo losanganya lakasalemaka ɔnɔnyi tshɛ, vɔ wakandaka lɔkɛndɔ la kilɔmɛtrɛ 100 lo ɛtshi ka nkɛtɛ k’akona, oma la Nazarɛtɛ polo la Jɛrusalɛma. Nyadia Luka 2:39-42, ndo oma laasɔ, nyɔkɛtshanya ambola anɛ:
-
Onde wɛ fɔnyaka dia lɔkɛndɔ l’otsha la Jɛrusalɛma lɔsɔ, lakalɔmbaka dia mbidja welo?
-
Lande na kahombayɛ mbidja welo dia mbɔtɔ lo nsanganya?
-
Onde wɛ fɔnyaka dia sunganaka mbidja welo dia mbɔtɔ lo nsanganya? Lande na?
Bible mbutaka dia nsangana kaamɛ dia ntɛmɔla ekɔ dui di’ohomba efula. Nyadia Hɛbɛru 10:24, 25, ndo oma laasɔ, nyɔkɛtshanya dimbola nɛ:
-
Lande na kahombaso mbɔtɔka lo nsanganya mbala la mbala?
ANTO AMƆTSHI MBUTAKA ƆNƐ: “Wɛ bu la ohomba wa nsangana l’anto akina. Wɛ mbeka Bible la ngelo tsho kete ambokoka.”
-
Naa divɛsa kana ɛnyɛlɔ ka lo Bible kɛnya kɛnɛ kalanga Jehowa?
LO TSHENA PE
Wɔtwɛlɔ wa nsanganya ayokokimanyiya dia mbeka akambo efula wendana la Jehowa, dia nkeketsha lɔngɛnyi lasayɛ la nde ndo dia mbɔtɛmɔla kaamɛ l’anto akina.
Ovuswelo
-
Lande na katokeketsha Jehowa dia sanganaka kaamɛ?
-
Kakɔna kayoyoteka lo nsanganya y’Ɛmɛnyi wa Jehowa?
-
Onde wɛ fɔnyaka dia nsanganya koka kokimanyiya lo yoho kina?
SALA EYANGELO
Ko kakɔna kayoyosala naka wɛ kandakandaka dia mbɔtɔ lo losanganya lɔmɔtshi? Enda woho wakakandakandaka pami kɛmɔtshi dia mbɔtɔ lo nsanganya ndo woho wakandayokoma lo nanga nsanganya.
Enda woho wakangɛnangɛna ɔlɔngɔ ɔmɔtshi nsanganya ndo kɛnɛ kakandasale dia ntetemala ndjiɔtɔ.
Eka woho wayaoka anto akina lo kɛnɛ kendana la wɔtwɛlɔ wa nsanganya.
“Lande na mbɔtɔ nsanganya lo Mbalasa ka Diolelo?” (Sawo dia l’Ɛtɛrnɛtɛ)
Enda woho wakatshikitana lɔsɛnɔ l’elengalenga kɛmɔtshi l’ɔkɔngɔ wa nde mbɔtɔ lo losanganya lɔmɔtshi l’Ɛmɛnyi wa Jehowa.
“Lakatshɔka la okoma ami dihole tshɛ” (Tshoto y’Etangelo, Ngɔndɔ k’esambele 1, 2014)
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
