WEKELO 11
Woho wakokayɛ nkondja wahɔ woleki oma lo wadielo ayɛ wa Bible?
Onde wɛ atongaka la wɔma wa ntatɛ olimu ɔmɔtshi wa wolo? Dia mbetɛ olimu ɔsɔ wɔdu, wɛ koka nkahanya olimu akɔ lo ntenyi ntenyi. Ngasɔ mbediɔ ndo lo dikambo dia wadielo wa Bible. Wɛ koka ndjambola wate: ‘Oma lende akokami ntatɛ?’ Lo wekelo ɔnɛ, tayɔsɛdingola akambo amɔtshi wa wɔdu wakokayɛ nsala dia wɛ ngɛnangɛna la wadielo ndo la wekelo ayɛ wa Bible.
1. Lande na kahombaso mbadiaka Bible mbala la mbala?
Onto ladia Bible kana “ɛlɛmbɛ wa Jehowa” mbala la mbala, ayonga l’ɔngɛnɔngɛnɔ ndo ayotondoya. (Adia Osambo 1:1-3.) Dia ntatɛ, adiaka kaanga minitɛ ngana tsho lushi tshɛ. Lam’ayoyotalekaka ndjaekesanyiya la Ɔtɛkɛta wa Nzambi, mbayoyotalekaka ngɛnangɛna wadielo ayɛ wa Bible.
2. Kakɔna kayokokimanyiya dia nkondja wahɔ oma lo wadielo wa Bible?
Dia ndeka nkondja wahɔ oma lo wadielo wa Bible, sho pombaka temadiaka wadielo ndo takanaka yimba la kɛnɛ katatadia. Sho pombaka mbadiaka Bible ndo ‘kanaka la tɔ yimba.’ (Jashua 1:8, nɔtɛ ka l’ɛse ka dikatshi) Etena katayadia, yambola ambola wele oko wanɛ: ‘Kakɔna kambetsha dui nɛ lo dikambo dia Jehowa Nzambi? Ngande wakokami nkamba la dui nɛ lo lɔsɛnɔ lami? Ngande wakokami nkamba l’avɛsa anɛ dia nkimanyiya anto akina?’
3. Ngande wakokayɛ ntana etena ka mbadiaka Bible?
Onde wɛ ekɔ l’okakatanu dia tanaka etena ka mbadiaka Bible? Anto efula wekɔ l’okakatanu ɔsɔ. Sala la wolo dia ‘kambaka la wenya ayɛ lo yoho yoleki dimɛna.’ (Ɛfɛsɔ 5:16) Wɛ koka nsala dui sɔ lo nsɔna wonya shikaa wayoyadiaka Bible lushi tshɛ. Anto amɔtshi tanaka etena ka mbadia Bible la pindju ka pɛɛ. Akina sɔnaka etena kɛmɔ l’ɔkɔngɔ, ondo etena kalɛwɔ yangɔ ya la midi. Akina nto mbadiaka Bible la dikɔlɔ la ntondo ka ndala. Ko etena kakɔna koleki dimɛna le yɛ?
NYOMOTSHIMOLA
Eka woho wakokayɛ mbetɛ wadielo ayɛ wa Bible dui dia dimɛna efula. Enda woho wakokayɛ ndjalɔngɔsɔla dimɛna dia ndeka nkondja wahɔ oma lo wekelo ayɛ wa Bible.
Oko wakokaso mbeka dia ngɛnangɛna ndɛ diangɔ diotshikitanyi, mbakokaso mbeka dia ngɛnangɛna la wadielo wa Bible
4. Eka dia ngɛnangɛna wadielo wa Bible
Bu dui dia wɔdu dia ntatɛ wadielo wa Bible. Koko, sho koka monga la “nsaki k’efula” ka nsala dui sɔ, oko watohembaka onto ɔmɔtshi ndɛ ɛngɔ kahandatalɛka. Nyadia 1 Petero 2:2, ndo oma laasɔ, nyɔkɛtshanya dimbola nɛ:
-
Naka wɛ mbadiaka Bible lushi tshɛ, onde wɛ fɔnyaka dia wɛ ayokilanga ndo ayolanga nyomoleka kiada?
Nyende VIDƐO dia mɛna woho wakatatɛ anto amɔtshi ngɛnangɛna wadielo wa Bible. Ndo oma laasɔ, nyɔkɛtshanya ambola wayela anɛ:
-
Lo vidɛo nyɛ, naa ekakatanu wakatondoya ɛlɔngɔlɔngɔ la esekaseka?
-
Kakɔna kakaakimanyiya dia nkotsha oyango awɔ wa mbadiaka Bible mbala la mbala?
-
Ngande wakawetɛ wadielo awɔ wa Bible dui dia dimɛna efula?
Alako wayokokimanyiya dia wɛ ntatɛ:
-
Sɔna ekadimwelo ka Bible kɛkɛyɛ otema ndo kele la tɔtɛkɛta ta nshi nyɛ. Sɔna Ekadimwelo k’andja w’oyoyo naka tɔ kekɔ l’ɔtɛkɛta anyu.
-
Ntondotondo, adia ntenyi dia lo Bible dialeka kɔngɛnyangɛnya. Dia nkondja kanyi, enda tablo kele l’ɔtɛ a dui ɔnɛ: “Tatɛ la wadielo wa Bible.”
-
Ɔsa nɔtɛ ya kɛnɛ katayadia. Kamba la tablo ka lo dibuku nɛ kata ɔnɛ: “Kamba la nɔtɛ ya wadielo ayɛ wa Bible.”
-
Kamba la JW Library®app. L’ekimanyielo katɔ, wɛ koka mbadia Bible kana mpokamɛ wadielo atɔ dihole tshɛ dieyɛ lo nkamba la smatɛfɔnɛ kana ehomɔ kekina.
-
Kamba la waa apandisɛ wele lo Ekadimwelo k’andja w’oyoyo. Vɔ wekɔ la waa kartɛ, waa tablo ndo elembetshielo wa tɔtɛkɛta ta lo Bible. Dihomo sɔ tshɛ koka mbetɛ wadielo ayɛ wa Bible dui dia dimɛna efula.
5. Yalɔngɔsɔla dia wekelo ayɛ wa Bible
Nyadia Osambo 119:34, ndo oma laasɔ, nyɔkɛtshanya dimbola nɛ:
-
Lande na kele ekɔ ohomba nɔmba la ntondo ka nsala wadielo ayɛ wa Bible ndo ka nɔngɔsɔla wekelo ayɛ wa Bible?
Ngande wakokayɛ nkondja wahɔ w’efula lo etenyi tshɛ ka wekelo? Etena kalɔngɔsɔlayɛ wekelo ɔmɔtshi, hemba nkamba la yoho nyɛ:
-
Adia edingɔ wa mbɔtwɛlɔ ka wekelo.
-
Yanga ndo adia avɛsa, ndo yanga dia nshihodia woho wɔtɔnɛwɔ l’awui wekayɛ.
-
Ekɛ eshidi lo tɔtɛkɛta kana lo ditelo di’ohomba dia nkadimola lo dimbola tshɛ. Kɛsɔ ayokokimanyiya dia wɛ ndjɔkɛtshanya wekelo wɛ la ombetsha ayɛ.
Onde wɛ akeyaka?
Ɛmɛnyi wa Jehowa wambokamba la dikadimwelo efula dia Bible. Koko, sho ngɛnangɛnaka lo yoho ya laande Bible—Ekadimwelo k’andja w’oyoyo dikambo tɔ kekɔ mɛtɛ, mbokɛmaka hwe ndo tɔ kambaka la lokombo la Nzambi.—Enda sawo dia l’Ɛtɛrnɛtɛ diata ɔnɛ: “Onde Ɛmɛnyi wa Jehowa wekɔ la Bible kawɔ hita?”
ANTO AMƆTSHI MBUTAKA ƆNƐ: “Wekelo wa Bible ekɔ dikambo dia wolo efula. Dimi bu l’etena ndo la wolo.”
-
Naa kanyi yayɛ lo dikambo sɔ?
LO TSHENA PE
Dia nkondja wahɔ w’efula oma lo wadielo wa Bible, kongɛ etena ka kiadaka, lɔmba dia nshihodia kɛnɛ kadiayɛ, ndo yalɔngɔsɔlaka dikambo dia wekelo ayɛ wa Bible.
Ovuswelo
-
Kakɔna kayokokimanyiya dia nkondja wahɔ woleki oma lo Bible?
-
Etena kakɔna kakokayɛ mbadiaka ndo mbekaka Bible?
-
Lande na kele ekɔ ohomba dia wɛ ndjalɔngɔsɔlaka dikambo dia wekelo ayɛ wa Bible?
SALA EYANGELO
Vusola tokanyi tɔmɔtshi takoka kokimanyiya dia nkondja wahɔ w’efula oma lo wadielo ayɛ wa Bible.
“Woho wa ndeka nkondja wahɔ oma lo wadielo wa Bible”(Tshoto y’Etangelo No. 1 2017)
Eka toho tosato ta mbadiaka Bible.
“Ngande wakoka Bible kimanyiyami?—Etenyi 1: Yaekesanyiya la Bible kayɛ” (Sawo dia l’Ɛtɛrnɛtɛ)
Shola woho wakokayɛ ngɛnangɛna wadielo wa Bible.
Kondja alako amɔtshi wendena la wekelo oma le anto wambadiaka Bible edja efula.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
