WEKELO 13
Woho wɔnyɔla ɛtɛmwɛlɔ wa kashi Nzambi
Naka Nzambi ekɔ ngandji, lande na kasalema awui efula wa kɔlɔ oma le ɛtɛmwɛlɔ wayata dia wekɔ enyimpala ande? Lo tshena pe, ɛtɛmwɛlɔ ɛsɔ wekɔ wa kashi, dikambo vɔ mɔnyɔlaka Nzambi. Lo toho takɔna tawɔnyɔlawɔ? Ngande wayaokande lo dikambo sɔ? Kakɔna kayondosala lo kɛnɛ kendana la dikambo sɔ?
1. Ngande wɔnyɔla ɛtɛmwɛlɔ wa kashi Nzambi oma lo wetshelo awɔ?
Ɛtɛmwɛlɔ wa kashi ‘wakengɔnya akambo wa mɛtɛ waki Nzambi la kashi.’ (Rɔmɔ 1:25) Ɛnyɛlɔ, ɛtɛmwɛlɔ efula hawetsha ambetawudi awɔ lokombo la Nzambi. Koko Bible mbutaka di’anto pombaka nkamba la lokombo laki Nzambi. (Rɔmɔ 10:13, 14) Etena katomba dikambo dimɔtshi dia kɔlɔ, ewandji ɛmɔtshi w’ɛtɛmwɛlɔ mbutaka ɔnɛ ongo ekɔ lolango la Nzambi. Koko ɔsɔ ekɔ dui dia kashi. Nzambi bu pondjo kiɔkɔ y’akambo wa kɔlɔ. (Adia Jakɔba 1:13.) Lonyangu ko, awui wa kashi wetsha ɛtɛmwɛlɔ kakitolaka anto la Nzambi.
2. Ngande wɔnyɔla ɛtɛmwɛlɔ wa kashi Nzambi oma lo etsha awɔ?
Ɛtɛmwɛlɔ wa kashi hawosalɛ anto akambo woho waasalɛ Jehowa. Bible mbutaka lo dikambo di’ɛtɛmwɛlɔ wa kashi ɔnɛ “tota dia pɛkato [yawɔ] diambokoma polo l’olongo.” (Ɛnyɛlɔ 18:5) Aya ɛnɔnyi nkama wayatambiya ɛtɛmwɛlɔ l’awui wa pɔlitikɛ, kasukɛwɔ ata, ndo kambowonga lo kiɔkɔ ya nyɔi y’anto waheyama mbadia. Ewandji ɛmɔtshi w’ɛtɛmwɛlɔ nangaka monga ɛngɔnyi diakɔ diahikawɔ falanga oma le ambetawudi awɔ. Etsha ɛsɔ mɛnyaka dia vɔ haweye Nzambi ndo lam’ele vɔ haweye Nzambi, vɔ hawokoke monga enyimpala ande.—Adia 1 Joani 4:8.
3. Ngande wayaoka Nzambi lo dikambo di’ɛtɛmwɛlɔ wa kashi?
Naka awui wasala ɛtɛmwɛlɔ wa kashi komadiaka, ngande wafɔnyayɛ wahomba Jehowa ndjaoka? Nde nangaka anto, koko nde ekɔ la nkɛlɛ otsha le ewandji w’ɛtɛmwɛlɔ wawɔnyɔla ndo wasoya ambetawudi awɔ. Nde ndakaka di’ɛtɛmwɛlɔ wa kashi wayolanyema ndo ɔnɛ vɔ ‘hawɛnamaki nto pondjo.’ (Ɛnyɛlɔ 18:21) Keema edja, Nzambi ayanga nkomiya ɛtɛmwɛlɔ tshɛ wa kashi.—Ɛnyɛlɔ 18:8.
NYOMOTSHIMOLA
Nyomɔsɛdingola woho wayaoka Nzambi lo dikambo di’ɛtɛmwɛlɔ wa kashi. Eka akambo akina wendana la kɛnɛ kambondosala, koko eka nto lande na kahahombe dikambo sɔ koshimba dia mbeya Jehowa.
4. Nzambi hetawɔ ɛtɛmwɛlɔ tshɛ
Anto efula mbutaka di’ɛtɛmwɛlɔ wekɔ oko mboka yotshikitanyi yakonya yɔ tshɛ le Nzambi. Ko onde dui sɔ diekɔ mɛtɛ? Nyadia Mateo 7:13, 14, ndo oma laasɔ, nyɔkɛtshanya dimbola nɛ:
-
Kakɔna kata Bible lo kɛnɛ kendana la mboka kakonya lo lɔsɛnɔ?
Nyende VIDƐO, ndo oma laasɔ, nyɔkɛtshanya dimbola diayela nɛ:
-
Onde Bible mbutaka di’ekɔ ɛtɛmwɛlɔ efula wangɛnyangɛnya Nzambi?
5. Ɛtɛmwɛlɔ wa kashi hawɔkɛnɛmɔla ngandji ka Nzambi
Ɛtɛmwɛlɔ wa kashi mɔnyɔlaka Nzambi lo toho efula. Yoho yaleka mbeyama ele woho wayatambiyawɔ l’awui w’ata. Dia mɛna ɛnyɛlɔ kɛmɔtshi, nyende VIDƐO. Ndo ma laasɔ, nyɔkɛtshanya ambola wayela anɛ:
-
Yɛdikɔ yakɔna yakɔshi ɛtɛmwɛlɔ efula lo Ta dia hende dia l’andja w’otondo
-
Akanyiyayɛ lo kɛnɛ kendana la yɛdikɔ yakawɔshi shɔ?
Nyadia Joani 13:34, 35 ndo 17:16. Ndo oma laasɔ, nyɔkɛtshanya ambola anɛ:
-
Ngande wayaoka Jehowa etena kayatambiya ɛtɛmwɛlɔ l’ata?
-
Ɛtɛmwɛlɔ wa kashi wekɔ l’onongo w’awui efula wa kɔlɔ. Lo toho takɔna tɛnayɛ di’ɛtɛmwɛlɔ wa kashi hawɔkɛnɛmɔla ngandji ka Nzambi?
Ɛtɛmwɛlɔ wa kashi hawɔkɛnɛmɔla ngandji ka Nzambi
6. Nzambi nangaka ntshungola anto oma l’ɛtɛmwɛlɔ wa kashi
Nyadia Ɛnyɛlɔ 18:4, a ndo oma laasɔ, nyɔkɛtshanya dimbola nɛ:
-
Ngande wayaokayɛ lo mbeya dia Nzambi nangaka nshimbɛ anto wakanganyiyama oma le ɛtɛmwɛlɔ wa kashi?
7. Tetemala mbeka akambo wendana la Nzambi ka mɛtɛ
Onde awui wa kɔlɔ wata ndo wasala ɛtɛmwɛlɔ wa kashi pombaka monga la shɛngiya lo woho wɔsayɛ Nzambi? Ohɔsa di’ɔna pami latona nkitanyiya she, ambomɔ oma la ngelo, ndo otasale awui wa kɔlɔ efula. She hetawɔ awui wasala ɔnande asɔ. Lande na kele honga dui dia losembwe mbisha ombutshi ɔsɔ onongo lo yoho yasɛna ɔnande l’ɔtɔmbɔki?
-
Onde ayonga dui dia losembwe dia mbisha Jehowa onongo ndo ntshika mbeka awui wendana la nde l’ɔtɛ wasala ɛtɛmwɛlɔ wa kashi awui wa kɔlɔ?
ANTO AMƆTSHI MBUTAKA ƆNƐ: “Dimi hayasha le Nzambi dikambo ɛtɛmwɛlɔ wekɔ lo kiɔkɔ y’ekakatanu efula.”
-
Onde ndo wɛ mbata ngasɔ?
-
Lande na kele etsha w’ɛtɛmwɛlɔ wa kashi hawohombe monga la shɛngiya lo woho wɔsayɛ Jehowa?
LO TSHENA PE
Ɛtɛmwɛlɔ wa kashi mɔnyɔlaka Nzambi oma lo wetshelo awɔ wa kashi ndo oma l’etsha awɔ wa kɔlɔ efula. Nzambi ayolanya ɛtɛmwɛlɔ wa kashi.
Ovuswelo
-
Ngande wayaokayɛ lo kɛnɛ kendana l’awui wetsha ndo wasala ɛtɛmwɛlɔ wa kashi?
-
Ngande wayaoka Jehowa lo kɛnɛ kendana la ɛtɛmwɛlɔ wa kashi?
-
Kakɔna kayosalɛ Nzambi ɛtɛmwɛlɔ wa kashi?
SALA EYANGELO
Eka awui wendana la toho tohende tambonyangiya ɛtɛmwɛlɔ efula wa kashi Nzambi.
“Onde ɛtɛmwɛlɔ tshɛ wekɔ woho ɔtɔi? Onde vɔ tshɛ konyaka le Nzambi?” (Sawo dia l’Ɛtɛrnɛtɛ)
Lande na kalanga Jehowa dia sho mbɔtɛmɔla kaamɛ l’anto akina?
“Onde ekɔ ohomba monga l’ɔtɛmwɛlɔ ɔmɔtshi wokongɛmi?” (Sawo dia l’Ɛtɛrnɛtɛ)
Ɔlɔmbɛdi ɔmɔtshi akatshimbe wɔɔngɔ l’ɔtɛ w’ɔtɛmwɛlɔ ande. Koko dui sɔ komboshimba dia mbeka akambo wa mɛtɛ wendana la Nzambi.
“Ɔlɔmbɛdi ɔmɔtshi ambotomba oma l’ɔtɛmwɛlɔ ande” (Emɔ!, Ngɔndɔ ka hende 2015, lo Falase)
L’edja ka nɔnga efula, ɛtɛmwɛlɔ waketsha anto awui wa kashi ndo dui sɔ diambokonya anto dia mbɔsa dia Nzambi ekɔ etale la wɔ ndo ekɔ esehe. Eka akambo wa mɛtɛ wendana la kashi shato l’atei w’awui wa kashi asɔ.
a Dia mbeya lande na kɔsa dibuku di’Ɛnyɛlɔ ɛtɛmwɛlɔ wa kashi oko womoto lelamɛ Babilɔna ka Woke, enda Nɔtɛ ka la koma 1.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
