WEKELO 15
Ele Yeso?
Yeso ekɔ onto ɔmɔtshi lakaleke lokumu l’ɔkɔndɔ w’ana w’anto. Anto efula mbeyaka lokombo lande, koko haweye akambo efula wendana la nde ndo anto efula wekɔ la tokanyi totshikitanyi lo kɛnɛ kendana la woho w’onto wele mɛtɛ Yeso. Ko kakɔna kata Bible lo dikambo diande?
1. Ele Yeso?
Yeso ekɔ etongami kɛmɔtshi ka lo nyuma kele la wolo efula kasɛna l’olongo. Nde akatongama oma le Jehowa Nzambi la ntondo k’oseka ɛngɔ tshɛ. L’ɔtɛ w’ɔkɔkɔ ɔsɔ mbelamɛnde ɔnɛ “enondo wa diangɔ tshɛ diakatongama.” (Kɔlɔsayi 1:15) Bible mbelɛka Yeso nto ɔnɛ ‘ɔna ɛtɔi’ laki Nzambi dikambo Yeso ndamɛ oto mbakatongama mbala kakɔ ɔtɔi oma le Jehowa. (Joani 3:16) Yeso akakambe dihɛka lo dihɛka kaamɛ la Jehowa She, lo mbookimanyiya dia ntonga diangɔ dikina tshɛ. (Adia Tokedi 8:30.) Yeso ekɔ lo ntetemala ngɛnangɛna diɔtɔnganelo dia ma ma diele lam’asande la Jehowa. La kɔlamelo tshɛ, nde ekɔ lo nkamba oko yɛmb’awui yaki Nzambi, mbuta ate “Dui,” lo mbewoya anto nsango ndo awui wa She.—Joani 1:14.
2. Lande na kakaye Yeso la nkɛtɛ?
Ambeta ɛnɔnyi oko 2 000, Jehowa akakambe la nyuma kande k’ekila lo yoho ya dihindo dia nsangola lɔsɛnɔ la Yeso oma l’olongo ko lidja lo dikundju di’osekaseka w’emuma welɛwɔ Mariya. Lo yoho shɔ mbakotɔ Yeso oko onto. (Adia Luka 1:34, 35.) Yeso akaye la nkɛtɛ dia ndjonga Mɛsiya wakalakema, kana Kristo ndo dia ndjoshimbɛ anto. a Prɔfɛsiya tshɛ ya lo Bible yendana la Mɛsiya yakakotshama le nde, ndo yakakimanyiya anto dia mbeya dia Yeso mbele “Kristo, Ɔna Nzambi kasɛna.”—Mateo 16:16.
3. Lende ele Yeso wonya ɔnɛ?
L’ɔkɔngɔ wa Yeso mvɔ oko onto, Jehowa akawolola oko etongami ka lo nyuma ndo nde akakalola l’olongo. Lɛkɔ, “Nzambi akawodiya lo dihole dia laadiko.” (Filipɛ 2:9) Wonya ɔnɛ, Yeso aya owandji wa woke, mbuta ate onto la hende oma la le Jehowa.
NYOMOTSHIMOLA
Yanga dia mbeya awui efula wendana la woho w’onto wele mɛtɛ Yeso ndo lande na kele ekɔ ohomba efula mbeka awui wendana la nde.
4. Yeso bu Nzambi Kanga-Wolo-Tshɛ
Bible mbetshaka dia kaanga mbele Yeso etongami ka lo nyuma kele la wolo efula kasɛna l’olongo, nde kitanyiyaka Nzambi kande, lele She, mbuta ate Jehowa. Ko lande na kataso ngasɔ? Nyende VIDƐO dia mɛna kɛnɛ ketsha Bible lo kɛnɛ kendana la woho wotshikitanyi Yeso la Nzambi kanga-wolo-tshɛ.
Avɛsa wayela anɛ tokimanyiyaka dia nshihodia diɔtɔnganelo diele lam’asa Jehowa nde la Yeso. Nyadia divɛsa tshɛ, ndo oma laasɔ, nyɔkɛtshanya dimbola diayela anɛ:
Nyadia Luka 1:30-32.
-
Woho akɔna wakɔndɔla ondjelo diɔtɔnganelo diele lam’asa Yeso la Jehowa Nzambi, “Ɔnɛ-Laheme-Tshɛ”?
Nyadia Mateo 3:16, 17.
-
Lo batisimu kaki Yeso, kakɔna kakate dui dimɔtshi diakokɛma oma l’olongo?
-
Oko le yɛ, dui sɔ diaki di’onto akɔna?
Nyadia Joani 14:28.
-
Oleki opalanga ndo ele la lowandji loleki? Papa kana ɔna?
-
Kakɔna kakalange Yeso nembetshiya etena kakandelɛ Jehowa ɔnɛ She?
Nyadia Joani 12:49.
-
Onde Yeso akafɔnya dia nde la She wekɔ onto akɔ lamɛ? Naa kanyi yayɛ?
5. Yeso akɛnya dia nde mbaki Mɛsiya
Bible kekɔ la prɔfɛsiya efula yakoka nkimanyiya anto dia mbeya Mɛsiya, ɔnɛ lakasɔnama oma le Nzambi dia nshimbɛ anto. Nyende VIDƐO dia mbeya awui wendana la prɔfɛsiya mɔtshi yakakotsha Yeso etena kakandaye lanɛ la nkɛtɛ.
Nyadia prɔfɛsiya ya lo Bible nyɛ, ndo oma laasɔ, nyɔkɛtshanya ambola wayela anɛ:
Nyadia Mika 5:2 dia mbeya lɛnɛ akahombe Mɛsiya mbotɔ. b
-
Onde eotwelo ka Yeso kakakotsha prɔfɛsiya kɛnɛ?—Mateo 2:1.
Nyadia Osambo 34:20 ndo Zɛkariya 12:10 dia mbeya kɛnɛ kakatatshi Bible lo dikambo dia nyɔi ka Mɛsiya.
-
Onde prɔfɛsiya nyɛ yakakotshama?—Joani 19:33-37.
-
Onde wɛ fɔnyaka dia Yeso akakolonganya akambo lo kɛnɛ kendana la ekotshamelo ka prɔfɛsiya nyɛ?
-
Dikambo sɔ akɛnyadiɔ lo kɛnɛ kendana la Yeso?
6. Sho kondjaka wahɔ lo mbeka akambo wendana la Yeso
Bible mbutaka dia ekɔ ohomba mbeka akambo wendana la Yeso ndo kɛnɛ kalanga Nzambi dia Yeso nsala. Nyadia Joani 14:6 ndo 17:3, ndo oma laasɔ, nyɔkɛtshanya dimbola nɛ:
-
Lande na kele ekɔ ohomba efula mbeka awui wendana la Yeso?
Yeso akadiholɛ anto mboka dia vɔ nkoma angɛnyi wa Nzambi. Nde aketsha akambo wa mɛtɛ wendana la Jehowa, ndo lo tshimbo yande, sho koka nkondja lɔsɛnɔ la pondjo
ANTO AMƆTSHI MBUTAKA ƆNƐ: “Ɛmɛnyi wa Jehowa bu la mbetawɔ le Yeso.”
-
Ngande wayoyakadimola?
LO TSHENA PE
Yeso ekɔ etongami ka lo nyuma kele la wolo efula. Nde ekɔ Ɔna Nzambi ndo Mɛsiya.
Ovuswelo
-
Lande na kelamɛ Yeso ɔnɛ “enondo wa diangɔ tshɛ diakatongama”?
-
Kakɔna kakasale Yeso la ntondo ka nde ndja la nkɛtɛ?
-
Ngande weyaso dia Yeso ekɔ Mɛsiya?
SALA EYANGELO
Eka awui efula wendana la ɔkɛndɛ wele la Yeso oko wende Mɛsiya.
“Onde prɔfɛsiya yendana la Mɛsiya mɛnyaka dia Yeso mbaki Mɛsiya?” (Sawo dia l’Ɛtɛrnɛtɛ)
Yanga dia mbeya dia kana Bible mbetshaka dia Nzambi akote Yeso lo yoho yota anto ana.
“Lande na kelamɛ Yeso ɔnɛ Ɔna Nzambi?” (Sawo dia l’Ɛtɛrnɛtɛ)
Tɔsɛdingole lande na kele wetshelo wa Losanto l’osanto bu wetshelo wa lo Bible.
“Onde Yeso ekɔ Nzambi?” (Tshoto y’Etangelo, Ngɔndɔ ka nɛi 1, 2009 lo Falase)
Adia woho wakatshikitana lɔsɛnɔ la womoto ɔmɔtshi l’ɔkɔngɔ wa nde nsala eyangelo dia mbeya kɛnɛ kata Bible lo dikambo dia Yeso.
a Lo wekelo 26 ndo 27, tayɛna lande na kele anto waki l’ohomba wa shimbamɛ ndo woho watoshimbɛ Yeso.
b Enda Nɔtɛ ka la koma 2 dia mɛna prɔfɛsiya kɛmɔtshi kakatatshi shikaa etena kakahombe Yeso mɛnama la nkɛtɛ.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
