WEKELO 16
Kakɔna kakasale Yeso lam’akinde lanɛ la nkɛtɛ?
Anto efula mbɔsaka Yeso oko ɔn’ashashi laha l’ekimanyielo, oko omvutshi ɔmɔtshi wa lomba, kana oko pami kɛmɔtshi kasunyasunya lomu. Ko onde sho kokaka mbeka akambo efula wendana la nde lo nsɛdingola lɔsɛnɔ lande la lanɛ la nkɛtɛ? Lo wekelo ɔnɛ, tayɔsɛdingola akambo amɔtshi woleki ohomba wakasale Yeso ndo woho wakokawɔ kokimanyiya.
1. Naa olimu wakaleke ohomba le Yeso?
Olimu wakaleke ohomba le Yeso aki wa “mbewoya lokumu l’ɔlɔlɔ la Diolelo dia Nzambi.” (Adia Luka 4:43.) Nde akasambisha lokumu l’ɔlɔlɔ lɔɔnɛ Nzambi ayoshikikɛ Diolelo kana lowandji layokandola ekakatanu tshɛ w’anto. a L’edja k’ɛnɔnyi esato l’etenyi, Yeso akakambe la wolo dia mbewoya losango l’ekeketshelo lɔsɔ.—Mateo 9:35.
2. Oyango akɔna waki l’ahindo wa Yeso?
Bible tɛkɛtaka dia “ahindo, akambo wa diambo, akambo wa mamba la tolembetelo takasale Nzambi lo tshimbo [ya Yeso].” (Etsha 2:22) La wolo wa Nzambi, Yeso aki l’akoka wa mbɔladia lɔpɛpɛ, ndesha nunu di’anto, nkɔnɔla ase hemɔ ndo kaanga mbolola anto wakavu. (Mateo 8:23-27; 14:15-21; Makɔ 6:56; Luka 7:11-17) Ahindo wa Yeso wakɛnya hwe dia Nzambi mbakotome. Vɔ wakɛnya nto dia Jehowa ekɔ la wolo wa nkandola ekakatanu aso tshɛ.
3. Kakɔna kakokaso mbeka oma lo yoho yakasɛnɛ Yeso?
Yeso akakitanyiya Jehowa l’oseka dikambo tshɛ. (Adia Joani 8:29.) Kaanga l’atei w’ɔlɔshamelo, Yeso akasale la kɔlamelo tshɛ kɛnɛ tshɛ kakɔlɔmbɛ She dia nsala. Nde akɛnya di’anto kokaka kambɛ Nzambi, kaanga l’atei w’ekakatanu. Ɔnkɔnɛ, Yeso akatotshikɛ “ɛnyɛlɔ dia [sho] mboyela dimɛna dimɛna lo wanya ande.”—1 Petero 2:21.
NYOMOTSHIMOLA
Tɔsɛdingole woho wakasambisha Yeso lokumu l’ɔlɔlɔ ndo wakandasale ahindo.
4. Yeso akasambisha lokumu l’ɔlɔlɔ
Yeso akakɛndakɛnda nkama ya kilɔmɛtrɛ l’etadimbo wa watshu atasambisha anto efula lokumu l’ɔlɔlɔ. Nyadia Luka 8:1, ndo oma laasɔ, nyɔkɛtshanya ambola anɛ:
-
Onde Yeso akasambishaka paka anto wakatshumanaka dia mbohokamɛ?
-
Welo akɔna wakadjaka Yeso dia ntana anto?
Nzambi akatatshi dia Mɛsiya ayosambisha lokumu l’ɔlɔlɔ. Nyadia Isaya 61:1, 2, ndo oma laasɔ, nyɔkɛtshanya ambola anɛ:
-
Ngande wakakotsha Yeso prɔfɛsiya kɛnɛ?
-
Onde wɛ fɔnyaka di’ɛlɔ kɛnɛ anto nangaka mpokamɛ lokumu l’ɔlɔlɔ lɔsɔ?
5. Yeso aketsha anto akambo wa mɛtɛ wa nɛmɔ
Laadiko wa nde nsambisha lokumu l’ɔlɔlɔ lendana la Diolelo diaki Nzambi, Yeso aketsha anto awui w’ohomba. Tɔsɛdingole bɛnyɛlɔ dingana to oma lo Dako diande dia lɔɔka dia lo dikona. Nyadia Mateo 6:14, 34 ndo 7:12, ndo oma laasɔ, nyɔkɛtshanya ambola anɛ:
-
Naa alako w’eshika wakasha Yeso l’avɛsa anɛ?
-
Onde wɛ fɔnyaka di’alako asɔ weke ohomba polo ndo ɛlɔ kɛnɛ?
6. Yeso akasale ahindo
Jehowa akasha Yeso wolo wa nsala ahindo efula. Dia mɛna ɛnyɛlɔ kɛmɔtshi, nyadia Makɔ 5:25-34 kana nyende VIDƐO. Ndo oma laasɔ, nyɔkɛtshanya ambola wayela anɛ:
-
Kakɔna kaketawɔ womoto lɛnyiso lo vidɛo?
-
Kakɔna kakambiya lo kɛnɛ kendana la dihindo nɛ?
Nyadia Joani 5:36, ndo oma laasɔ, nyɔkɛtshanya dimbola nɛ:
-
Kakɔna ‘kakoshikikɛ’ ahindo wa Yeso ndo dikambo sɔ ɛnyadiɔ lo dikambo diande?
Onde wɛ akeyaka?
Akambo efula weyaso lo dikambo dia Yeso ntomba oma l’abuku anɛi wa lo Bible welɛwɔ Evanjiliɔ, mbuta ate Mateo, Makɔ, Luka, ndo Joani. Ofundji tshɛ w’Evanjiliɔ akafunde akambo amɔtshi wotshikitanyi wendana la Yeso. Etena kadiaso Evanjiliɔ akɔ ɛnɛi, sho shihodiaka lɔsɛnɔ lande dimɛna.
-
MATEO
mbakafunde Evanjiliɔ ande ntondo. Vɔ mbikaka epole ɔsɛkɛ lo wetshelo wa Yeso, djekoleko lo kɛnɛ kakandetsha lo dikambo dia Diolelo diaki Nzambi.
-
MAKƆ
akafunde Evanjiliɔ woleki mondo. Vɔ totɛka akambo efula w’amɛna.
-
LUKA
totɛka woho waki dɔmbɛlɔ ohomba efula le Yeso ndo woho wakandasalɛka wamato akambo.
-
JOANI
tosholɛka awui efula wendana la lonto laki Yeso ndo l’asawo efula wakasawola Yeso nde l’angɛnyi ande ndo nde l’anto akina.
ANTO AMƆTSHI MBUTAKA ƆNƐ: “Yeso aki tsho pami kɛmɔtshi k’ɔlɔlɔ, amboshila.”
-
Naa kanyi yayɛ?
LO TSHENA PE
Yeso akasambisha awui wendana la Diolelo diaki Nzambi, akasale ahindo, ndo akakitanyiya Jehowa l’oseka dikambo tshɛ.
Ovuswelo
-
Naa olimu wakaleke ohomba le Yeso lam’akinde lanɛ la nkɛtɛ?
-
Kakɔna kakɛnyaka ahindo waki Yeso?
-
Naa wetshelo w’ohomba waketsha Yeso?
SALA EYANGELO
Naa dui diakaleke Yeso ntɛkɛta?
Tende lande na kakokaso mbetawɔ di’ahindo waki Yeso waki mɛtɛ.
“Kakɔna kaketsha ahindo waki Yeso?” (Tshoto y’Etangelo, Ngɔndɔ k’esambele 15, 2004)
Tende woho wele ɛnyɛlɔ ka Yeso ka ndjahombia kakonge la shɛngiya le pami kɛmɔtshi.
“Lakayangaka paka wahɔ ami hita” (Tshoto y’Etangelo, Ngɔndɔ ka dikumi 1, 2014)
Enda listɛ l’akambo w’ohomba wakasale Yeso wɔlɔngami lo yoho yakandayawasalaka.
a Lo wekelo 31-33, tayɔkɛtshanya akambo efula wendana la Diolelo diaki Nzambi.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
