WEKELO 19
Onde Ɛmɛnyi wa Jehowa wekɔ Akristo wa mɛtɛ?
Oko weso Ɛmɛnyi wa Jehowa, sho mbetawɔka dia tekɔ Akristo wa mɛtɛ. Lande na? Tɔsɛdingole lɛnɛ ohikami dietawɔ diaso, lokombo latotshikitanya l’anto akina, ndo ngandji kele lam’asaso.
1. Lo na ohikami dietawɔ di’Ɛmɛnyi wa Jehowa?
Yeso akate ate: “Ɔtɛkɛta wa Nzambi wekɔ mɛtɛ.” (Joani 17:17) L’ɛnyɛlɔ ka Yeso, dietawɔ di’Ɛmɛnyi wa Jehowa pikamaka nshi tshɛ paka l’Ɔtɛkɛta wa Nzambi. Tɔsɛdingole ɔkɔndɔ aso wa nshi nyɛ. L’ekomelo ka ntambe ka 19, djui mɔtshi y’ambeki wa Bible wakatatɛ nsɛdingola Bible la yambalo tshɛ. Dietawɔ diawɔ diakahikama lo kɛnɛ kata Bible, oyadi dietawɔ sɔ diakatshikitana la waetawɔ w’ɛtɛmwɛlɔ ekina. Oma laasɔ, vɔ wakatatɛ mbewoya anto akina akambo wa mɛtɛ w’oma lo Bible asɔ. a
2. Lande na kayaelɛso Ɛmɛnyi wa Jehowa?
Jehowa mbelɛka atɛmɔdi ande ɔnɛ ɛmɛnyi ande nɛ dia vɔ mbewoyaka akambo wa mɛtɛ wendana la nde. (Hɛbɛru 11:4–12:1) Ɛnyɛlɔ, lo nshi y’edjedja, Nzambi akatɛ ekambi ande ɔnɛ: “Nyu nyekɔ ɛmɛnyi ami.” (Adia Isaya 43:10.) Yeso mbelamɛka ɔnɛ: “Ɔmɛnyi wa kɔlamelo.” (Ɛnyɛlɔ 1:5) Ɔnkɔnɛ, lo 1931 takɔshi lokombo l’Ɛmɛnyi wa Jehowa. Tekɔ l’ofunu dia mbelamɛ lo lokombo lɔsɔ.
3. Ngande wokoya Ɛmɛnyi wa Jehowa ngandji ka Yeso?
Yeso akokaka ambeki ande ngandji k’efula woho ɔnɛ wele vɔ wakayokoma oko ase nkumbo kande. (Adia Makɔ 3:35.) Woho akɔ wamɛ mbele, Ɛmɛnyi wa Jehowa wekɔ nkumbo ka l’andja w’otondo kele kaamɛ. Diɔ diakɔ dielanɛso ɔnɛ anangɛso ndo akadiyɛso. (Filɛmɔna 1, 2) Sho kitanyiyaka nto didjango diata ɔnɛ: “Nyoke nkumbo k’otondo k’anangɛso ngandji.” (1 Petero 2:17) Ɛmɛnyi wa Jehowa mɛnyaka ngandji kɛsɔ lo toho efula, ɛnyɛlɔ lo nkimanyiya asekawɔ ambetawudi wa l’andja w’otondo lo ntena diewɔ lo dihombo.
NYOMOTSHIMOLA
Eka akambo efula wendana l’ɔkɔndɔ w’Ɛmɛnyi wa Jehowa, ndo enda tolembetelo tokina tɛnya dia tekɔ Akristo wa mɛtɛ.
Akristo wa mɛtɛ mpika dietawɔ diawɔ lo Bible ndo vɔ diewoyaka anto akina
4. Dietawɔ diaso mpikama lo Bible
Jehowa akatatshi dia wayotosholɛ akambo wa mɛtɛ w’oma lo Bible. Nyadia Danyɛlɛ 12:4 ndo nɔtɛ ka l’ɛse ka dikatshi, ndo oma laasɔ, nyɔkɛtshanya dimbola nɛ:
-
Kakɔna kayoyala “efula l’atei” w’ekambi waki Nzambi, etena kayowotetemala nsɛdingola Bible?
Tɔsɛdingole woho wakekaka djui y’ambeki wa Bible, mbidja ndo ɔnangɛso Charles Russell, Ɔtɛkɛta wa Nzambi. Nyende VIDƐO, ndo oma laasɔ, nyɔkɛtshanya dimbola diayela nɛ:
-
Lo vidɛo yɛnyiso, ngande wakekaka ɔnangɛso Charles Russell nde l’ambeki wa Bible w’asekande Ɔtɛkɛta wa Nzambi?
Onde wɛ akeyaka?
Lo ntena dimɔtshi, takatshikitanya waetawɔ aso amɔtshi. Lande na? Oko wele etena kayatombe wonya, mbayɛnama diangɔ yema yema, mbele Nzambi toshaka eokelo k’Ɔtɛkɛta ande yema yema. (Adia Tokedi 4:18.) Laasɔ, kaanga mbele Bible hatshikitana, sho tshikitanyaka waetawɔ aso amɔtshi etena kahama eokelo kaso ka Bible.
5. Sho sɛnaka lo yoho yɔtɔnɛ la lokombo laso
Lande na kakatɔshi lokombo l’Ɛmɛnyi wa Jehowa? Nyende VIDƐO, ndo oma laasɔ, nyɔkɛtshanya dimbola diayela nɛ:
-
Lande na kasunganaso mbelamɛ lo lokombo l’Ɛmɛnyi wa Jehowa?
Lande na kakasɔnɛ Jehowa anto amɔtshi dia monga ɛmɛnyi ande? Nɛ dia vɔ mbakahombe mbeeyanya oko Nzambi ka mɛtɛ, nɛ dia awui wa kashi efula wakatama lo dikambo diande. Tɔsɛdingole kashi hiende l’atei w’awui wa kashi asɔ.
Ɛtɛmwɛlɔ ɛmɔtshi mbetshaka ambetawudi awɔ dia Nzambi nangaka dia vɔ nkamba l’esato l’ɛtɛmwɛlɔ awɔ. Koko, nyadia Akambo w’ase Lɛwi 26:1, ndo oma laasɔ, nyɔkɛtshanya ambola anɛ:
-
Akambo wa mɛtɛ kɛdikɛdi na? Naa kanyi yaki Nzambi lo kɛnɛ kendana la dikishi?
Ewandji ɛmɔtshi w’ɛtɛmwɛlɔ mbetshaka dia Yeso ekɔ Nzambi. Koko, nyadia Joani 20:17, ndo oma laasɔ, nyɔkɛtshanya ambola anɛ:
-
Akambo wa mɛtɛ kɛdikɛdi na? Onde Nzambi la Yeso wekɔ onto laamɛ?
-
Ngande wayaokayɛ lo mbeya dia Jehowa akatome Ɛmɛnyi ande dia nsambisha akambo wa mɛtɛ wendana la nde ndo wendana la Ɔnande?
6. Sho mbokanaka ngandji lam’asaso
Bible mbɛdikaka Akristo la ntenyi diotshikitanyi dia demba di’onto. Nyadia 1 Kɔrɛtɔ 12:25, 26, ndo oma laasɔ, nyɔkɛtshanya ambola anɛ:
-
Kakɔna kasala Akristo wa mɛtɛ etena kasowa Akristo akina?
-
Kakɔna kamboyɛna lo kɛnɛ kendana la ngandji kele lam’asa Ɛmɛnyi wa Jehowa?
Etena kasowa Ɛmɛnyi wa Jehowa wa lo dihole dimɔtshi, asekawɔ Ɛmɛnyi wa Jehowa wa l’andja w’otondo salaka la wolo dia mbaakimanyiya aha la ntshimbatshimba. Dia mɛna ɛnyɛlɔ kɛmɔtshi, nyende VIDƐO. Ndo oma laasɔ, nyɔkɛtshanya dimbola diayela nɛ:
-
Ngande wele welo wadja Ɛmɛnyi wa Jehowa dia nkimanyiya anto akina wekɔ djembetelo ya ngandji?
Akristo wa mɛtɛ mɛnyaka anto wele lo dihombo ngandji kawaokawɔ
ANTO AMƆTSHI MBUTAKA ƆNƐ: “Ɛmɛnyi wa Jehowa wekɔ ɔtɛmwɛlɔ w’oyoyo.”
-
Etena kakɔna kakatatɛ Jehowa mbelɛ atɛmɔdi ande ɔnɛ ɛmɛnyi?
LO TSHENA PE
Ɛmɛnyi wa Jehowa wekɔ Akristo wa mɛtɛ. Sho tekɔ nkumbo ka l’andja w’otondo k’atɛmɔdi. Dietawɔ diaso mpikama lo Bible ndo sho mbeyanyaka akambo wa mɛtɛ wendana la Jehowa.
Ovuswelo
-
Lande na kakatɔshi lokombo l’Ɛmɛnyi wa Jehowa?
-
Ngande wasalanɛso akambo?
-
Onde wɛ fɔnyaka di’Ɛmɛnyi wa Jehowa wekɔ Akristo wa mɛtɛ?
SALA EYANGELO
Eka akambo wendana l’ɔkɔndɔ aso.
Ɛmɛnyi wa Jehowa—Mbetawɔ kawɔ mɛnamaka l’etsha, Etenyi 1: Vɔ wambotomba oma lo wodjima (1:00:53)
Enda ɛnyɛlɔ kɛmɔtshi kɛnya woho wakatondja Ɛmɛnyi wa Jehowa wetshelo wa kashi sɛkɛ.
Kondja ekadimwelo lo ambola wakokayɛ monga la wɔ lo dikambo di’Ɛmɛnyi wa Jehowa.
“Ambola waleka anto ndjambola lo dikambo di’Ɛmɛnyi wa Jehowa” (lɛkɛ lɔmɔtshi la l’Ɛtɛrnɛtɛ)
Stephen akahetshaka anto wa lo waoho akina woho w’anyanya woho ɔnɛ wele nde akaalɔshaka. Enda kɛnɛ kakandɛnyi le Ɛmɛnyi wa Jehowa kakayotshutshuyaka dia nde ntshikitanya kanyi yande.
“Lɔsɛnɔ lami lakatalekaka ntshɔ otsha lo kɔlɔ” (Tshoto y’Etangelo, Ngɔndɔ k’esambele 1, 2015)
a Tshoto y’Etangelo, jurnalɛ yaleka nkamba la so, yakatatɛ ntondja akambo wa mɛtɛ w’oma lo Bible aha la memadja ntatɛ oma lo 1879.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
