WEKELO 22
Ngande wakokayɛ nsambisha lokumu l’ɔlɔlɔ?
Etena kekayɛ akambo wa mɛtɛ wa lo Bible, wɛ mbeyaka mbuta ɔnɛ: ‘Onto tshɛ pombaka mbeya akambo asɔ!’ Ekɔ ngasɔ, onto tshɛ pombaka mbaeya! Koko, wɛ mbeyaka mboka wɔma mbutɛ anto akina kɛnɛ kekayɛ. Tende woho wakokayɛ minya wɔma ɔsɔ ndo ntatɛ nsambisha lokumu l’ɔlɔlɔ la lo Bible l’ɔngɛnɔngɛnɔ.
1. Ngande wakokayɛ mbutɛ anto weyayɛ kɛnɛ kamboyeka?
Ambeki wa Yeso wakate ɔnɛ: “Sho hatototshika mbuta akambo wakatɛnyi ndo wakatoke.” (Etsha 4:20) Vɔ wakɔsaka akambo wa mɛtɛ la nɛmɔ di’efula diakɔ diakawalangaka mbutɛ onto tshɛ akambo akɔ. Onde wɛ ndjaokaka woho akɔ waamɛ? Naka ngasɔ, kete yanga waaso wakokayɛ mbutɛ ase nkumbo ndo angɛnyi ayɛ la dilɛmiɛlɔ tshɛ kɛnɛ kamboyeka.—Adia Kɔlɔsayi 4:6.
Toho tɔmɔtshi ta ntatɛ
-
Etena kasawolayɛ l’owotɔ ayɛ ɔmɔtshi, ɔtshiya dui dimɔtshi di’oma lo Bible lo mbuta ɔnɛ: “Lakeke dui dimɔtshi di’ohomba efula lomingu lɔnɛ.”
-
Keketsha ɔngɛnyi ayɛ ɔmɔtshi wele la hemɔ kana l’okiyanu la divɛsa dimɔtshi di’oma lo Bible.
-
Naka asekayɛ wa l’olimu wambokombola ɔnɛ nsango yakɔna? Tɛwɔ kɛnɛ kakayeke lo wekelo ayɛ wa Bible kana lo losanganya lɔmɔtshi la l’etshumanelo.
-
Ɛnya angɛnyi ayɛ sitɛ kaso k’Ɛtɛrnɛtɛ ka jw.org.
-
Lɔmba anto dia monga kaamɛ la yɛ etena kekayɛ Bible kana ɛnyawɔ woho wakokawɔ nɔmba di’onto ɔmɔtshi ndjowaetsha Bible lo ndodia dɛmandɛ dimɔtshi lo jw.org.
2. Lande na kele nsambisha kaamɛ la etshumanelo ekɔ oyango wa dimɛna wa ndjadjɛ?
Ambeki wa Yeso kokomɛ tsho lo nsambisha anto wakaweyaka lokumu l’ɔlɔlɔ. Yeso “akaatome ahende ahende la ntondo kande l’esomba tshɛ” dia tosambisha. (Luka 10:1) Olimu w’esambishelo wakakongɛma dimɛna ɔsɔ wakasha anto efula diaaso dia mboka lokumu l’ɔlɔlɔ. Ambeki wakonge nto l’ɔngɛnɔngɛnɔ w’efula lo nsambisha kaamɛ. (Luka 10:17) Onde wɛ hakoke ndjadjɛ oyango akɔ waamɛ dia nsambisha kaamɛ la etshumanelo?
NYOMOTSHIMOLA
Enda woho wakokayɛ minya wɔma ndo monga l’ɔngɛnɔngɛnɔ waya lo nsambisha lokumu l’ɔlɔlɔ.
3. Jehowa ayonga kaamɛ la yɛ
Anto amɔtshi walanga nsambisha koka mboka wɔma wendana la woho wayowaɔsa anto kana woho wayɔsa anto losango lawɔ.
-
Onde wɛ mbokaka wɔma mbutɛ anto akina kɛnɛ kekayɛ? Lande na?
Nyende VIDƐO, ndo oma laasɔ, nyɔkɛtshanya dimbola diayela nɛ:
-
Ngande wakanya Ɛmɛnyi wa Jehowa w’akɛnda ango wɔma awɔ?
Nyadia Isaya 41:10, ndo oma laasɔ, nyɔkɛtshanya dimbola nɛ:
-
Ngande wayokokimanyiya dɔmbɛlɔ naka wɛ mbokaka wɔma nsambisha?
Onde wɛ akeyaka?
Ɛmɛnyi wa Jehowa efula wakafɔnyaka dia hawokokaki pondjo nsambisha anto akina lokumu l’ɔlɔlɔ. Ɛnyɛlɔ, Sergey, akayaɔsaka oko onto l’anyanya ndo aki l’okakatanu dia nsawola l’anto akina. Koko oma laasɔ, nde akayekaka Bible. Nde mbutaka ɔnɛ: “Kaanga mbakimi la wɔma, lakatatɛ mbutɛ anto akina kɛnɛ kakamekaka. Dui dia diambo ko, mbewoya anto akina akambo wendana la Bible akanyomoleka mbishami dihonga. Ndo nto, dui sɔ diakakeketsha mbetawɔ kami.”
4. Onga la dilɛmiɛlɔ
Etena kasambishayɛ lokumu l’ɔlɔlɔ, dja yimba aha tsho lo kɛnɛ katayɛ, koko ndo lo woho wakitayɛ. Nyadia 2 Timɔte 2:24 ndo 1 Petero 3:15, ndo oma laasɔ, nyɔkɛtshanya ambola anɛ:
-
Ngande wakokayɛ nkamba l’avɛsa anɛ etena katɛyɛ anto akina awui wendana la Bible?
-
Mbeyaka monga ko ase nkumbo kana angɛnyi ayɛ amɔtshi hawetawɔ kɛnɛ kawatɛyɛ. Kakɔna kakokayɛ nsala? Ko kakɔna kahayahombe nsala?
-
Lande na kele ekɔ dimɛna efula nkamba la ambola wa l’ɔkɔmi tshɛ lo dihole dia ntshutshuya anto la wolo dia mbetawɔ kɛnɛ kataso?
5. Nsambisha lokumu l’ɔlɔlɔ mbishaka ɔngɛnɔngɛnɔ
Jehowa akasha Yeso olimu wa nsambisha anto lokumu l’ɔlɔlɔ. Ngande wakɔsaka Yeso olimu ɔsɔ? Nyadia Joani 4:34, ndo oma laasɔ, nyɔkɛtshanya ambola anɛ:
-
Ndɛ mbo y’amɛna tokimanyiyaka dia monga la lɔsɛnɔ ndo toshaka ɔngɛnɔngɛnɔ. Lande na kakɛdika Yeso nsala lolango la Nzambi, mbuta ate nsambisha lokumu l’ɔlɔlɔ la oleelo?
-
Oko le yɛ, ɔngɛnɔngɛnɔ akɔna wakokaso nkondja lo nsambisha lokumu l’ɔlɔlɔ?
Alako
-
Lo losanganya la l’atei wa lomingu, yanga toho takokayɛ ntatɛ asawo l’anto l’esambishelo.
-
Sawola l’ombetsha ayɛ wa Bible woho wakokayɛ ntatɛ mbisha asawo w’ombeki lo losanganya la l’atei wa lomingu. Asawo w’ambeki koka kokimanyiya dia wɛ ndeka ndjaoka dia wɛ aya suke dia mbutɛ anto akina kɛnɛ kekayɛ.
-
Kamba la etenyi kata ɔnɛ: “Anto amɔtshi mbutaka ɔnɛ” kana kata ɔnɛ: “Onto ɔmɔtshi mbeyaka kombola ɔnɛ” ka lo wekelo ɔnɛ dia wɛ mpemba nkadimola lo ambola waleka anto tooka kana dia mbekola wekamu waleka mpomana la so l’esambishelo.
ONTO ƆMƆTSHI MBEYAKA KOMBOLA ƆNƐ: “Nsango yakɔna?”
-
Ngande wakokayɛ nkamba la diaaso sɔ dia mbutɛ onto ɔsɔ kɛnɛ kamboyeka lo wekelo ayɛ wa Bible?
LO TSHENA PE
Nsambisha anto akina lokumu l’ɔlɔlɔ mbishaka ɔngɛnɔngɛnɔ, ndo ntatɛ dui sɔ bu wolo wamboleka oko wadifɔnyayɛ.
Ovuswelo
-
Lande na nsambisha anto akina lokumu l’ɔlɔlɔ?
-
Ngande wakokayɛ nsala dui sɔ la dilɛmiɛlɔ tshɛ?
-
Ngande wakokayɛ minya wɔma wakokayɛ monga la wɔ lo kɛnɛ kendana la esambishelo?
SALA EYANGELO
Tende toho tɔnɛi ta wɔdu takokaso nsambisha lokumu l’ɔlɔlɔ lo nkamba la kartɛ kɛnyaso anto woho wa mbɔtɔ lo jw.org.
Ɛnyɛlɔ ka mbɔtwɛlɔ ka Kartɛ ka woho wa mbɔtɔ lo JW.ORG (1:43)
Eka awui wendana la waonga anɛi wakoka kokimanyiya dia wɛ nsambisha lokumu l’ɔlɔlɔ.
“Onde wɛ ekɔ suke dia monga omundji w’anto?” (Tshoto y’Etangelo, Ngɔndɔ ka divwa 2020)
Enda ɛnyɛlɔ kɛmɔtshi ka lo Bible kakoka tosha dihonga dia nsambisha lokumu l’ɔlɔlɔ kaanga teke akɛnda.
Yanga woho wakokayɛ nsawola l’ase nkumbo kayɛ wahateke awui wendana la Jehowa wele lo Bible.
“Tonande etema w’ase nkumbo yaso wele bu ambetawudi” (Tshoto y’Etangelo, Ngɔndɔ ka sato 15, 2014)
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
