WEKELO 24
Kakɔna kele mɛtɛ lo dikambo di’andjelo?
Jehowa nangaka dia sho mbeya awui wendana la nkumbo kande ka l’olongo. Nkumbo kɛsɔ kekɔ l’andjelo welamɛ ɔnɛ: “Ana wa Nzambi.” (Jɔbɔ 38:7) Ko kakɔna kata Bible lo dikambo di’andjelo? Shɛngiya yakɔna yele la wɔ le anto? Onde andjelo tshɛ wekɔ ase nkumbo ka Nzambi?
1. Andjelo, waa na wewɔ?
Jehowa akatonge andjelo la ntondo ka nde ntonga nkɛtɛ. L’ɛnyɛlɔ kande, vɔ wekɔ l’alemba wahɛnama ndo vɔ wekɔ lo nsɛna l’olongo. (Hɛbɛru 1:14) Tekɔ la miliyɔ y’andjelo ndo ondjelo l’ondjelo ekɔ la lonto lande. (Ɛnyɛlɔ 5:11) Vɔ ‘kotshaka ɔtɛkɛta wa Jehowa lo nkitanyiya dui diande.’ (Osambo 103:20) Lo nshi y’edjedja, ntena dimɔtshi, Jehowa akatomaka andjelo dia tewoya nsango yande ndo dia tokimanyiya ndo dia tokokɛ ekambi ande. Ɛlɔ kɛnɛ, andjelo nɔmbɔlaka Akristo otsha le anto walanga mbeka akambo wendana la Nzambi.
2. Satana l’ɛdiɛngɛ ande, waa na wewɔ?
Andjelo amɔtshi kotshikala la kɔlamelo le Jehowa. Ondjelo wa ntondo wakatɔmbɔkɔ mbelamɛka ɔnɛ: “Diabolo ndo Satana, ɔnɛ langanyiya nkɛtɛ k’otondo.” (Ɛnyɛlɔ 12:9) Satana akalange nɔmbɔla anto akina, diakɔ diakandasɛngiya anto wa ntondo ndo l’ɔkɔngɔ diko andjelo akina dia vɔ tɔmbɔkɔ oko nde. Andjelo wakatɔmbɔkɔ asɔ mbelamɛka ɔnɛ ɛdiɛngɛ. Jehowa akawatshanya oma l’olongo oya la nkɛtɛ, ndo vɔ wayolanyema.—Adia Ɛnyɛlɔ 12:9, 12.
3. Ngande watokesa Satana l’ɛdiɛngɛ ande?
Satana l’ɛdiɛngɛ minganyiyaka anto efula lo tshimbo y’awui w’ɛdiɛngɛ. Ntɛkɛta la nyuma ya kɔlɔ ekɔ tshelo ya kɔlɔ. Ɛnyɛlɔ anto amɔtshi tshɔka le wanɛ wasala diedja dia tɔɔtɔ, waa wetshi, asaki w’awolo ndo le alɔka. Ndo akina nyangaka woho w’esakelo wele la losambi l’ɛdiɛngɛ. Anto akina nto kesamaka lo mbetawɔ dia vɔ kokaka ntɛkɛta l’anto wakavu. Koko Jehowa tɔhɛmɔlaka ɔnɛ: “Tanyotshɔke le wanɛ watɛkɛtsha dimu ndo tanyoyangake waa wetshi.” (Akambo w’ase Lɛwi 19:31) Nde toshaka ɔhɛmwɛlɔ ɔsɔ dia tokokɛ oma le Satana l’ɛdiɛngɛ. Vɔ wekɔ atunyi waki Nzambi ndo vɔ nangaka tosalɛ kɔlɔ.
NYOMOTSHIMOLA
Eka dia mbeya akambo w’amɛna wasala andjelo, waale wele l’awui w’ɛdiɛngɛ ndo woho wakokaso ndjakokɛ oma le Satana l’ɛdiɛngɛ.
4. Andjelo kimanyiyaka anto dia mbeka awui wendana la Jehowa
Andjelo wa Nzambi hawosambisha anto mbala kakɔ ɔtɔi. Koko vɔ mbeyaka nɔmbɔla ekambi wa Nzambi otsha le anto walanga mbeka akambo wendana la nde. Nyadia Ɛnyɛlɔ 14:6, 7, ndo oma laasɔ, nyɔkɛtshanya ambola anɛ:
-
Lande na keso l’ohomba w’ekimanyielo k’andjelo dia nsambisha?
-
Onde wɛ keketshamaka lo mbeya di’andjelo koka kɔlɔmbɔla otsha le anto wele l’ohomba wa mboka akambo wendana la Bible? Lande na?
5. Hembola diɔtɔnganelo l’ɛdiɛngɛ
Satana l’ɛdiɛngɛ wekɔ atunyi waki Jehowa. Vɔ wekɔ ndo atunyi aso. Nyadia Luka 9:38-42, ndo oma laasɔ, nyɔkɛtshanya dimbola nɛ:
-
Kakɔna kasalɛ ɛdiɛngɛ anto?
Tatetawɔke di’ɛdiɛngɛ monga la shɛngiya lo nsɛnɔ yaso. Nyadia Eohwelo k’Ɛlɛmbɛ 18:10-12, ndo oma laasɔ, nyɔkɛtshanya ambola anɛ:
-
Lo toho takɔna tahemba ɛdiɛngɛ dia tɔsɛngiya kana dia nsawola la so? Naa ditshelo diambokokanɛ lɛnɛ odjashiyɛ?
-
Oko le yɛ, onde ekɔ dui dia lomba dia Jehowa toshimba dia monga la diɔtɔnganelo l’ɛdiɛngɛ? Lande na?
Nyende VIDƐO, ndo oma laasɔ, nyɔkɛtshanya ambola wayela anɛ:
-
Onde wɛ fɔnyaka dia pako kakalɔtɛ ɔnaki Palesa la womoto kaki waale? Lande na?
-
Kakɔna kakahombe nsala Palesa dia kokamɛ oma le ɛdiɛngɛ?
Akristo wa mɛtɛ ndɔshanaka nshi tshɛ l’ɛdiɛngɛ. Nyadia Etsha 19:19 ndo 1 Kɔrɛtɔ 10:21, ndo oma laasɔ, nyɔkɛtshanya dimbola nɛ:
-
Lande na kele ekɔ ohomba ndanya ɛngɔ tshɛ kele layɛ kele la diɔtɔnganelo l’ɛdiɛngɛ?
6. Dja otshumba lo ta dialɔyɛ la Satana l’ɛdiɛngɛ ande
Ɛdiɛngɛ wekɔ lo nɔmbwama oma le Satana. Koko andjelo wa kɔlamelo wekɔ lo nɔmbwama oma le Mikayɛlɛ arkandjelo, lele lokombo lokina laki Yeso. Wolo wa ngande wele la Mikayɛlɛ? Nyadia Ɛnyɛlɔ 12:7-9, ndo oma laasɔ, nyɔkɛtshanya ambola anɛ:
-
Waa na woleki wolo? Mikayɛlɛ l’andjelo ande ko kana Satana l’ɛdiɛngɛ ande?
-
Onde wɛ fɔnyaka di’ambeki wa Yeso pombaka mboka Satana l’ɛdiɛngɛ ande wɔma?
Wɛ koka mbidja otshumba lo ta dialɔyɛ la Satana l’ɛdiɛngɛ ande. Nyadia Jakɔba 4:7, ndo oma laasɔ, nyɔkɛtshanya dimbola nɛ:
-
Ngande wakokayɛ ndjakokɛ oma le Satana l’ɛdiɛngɛ ande?
ANTO AMƆTSHI MBUTAKA ƆNƐ: “Ndooko kɔlɔ nkɛnya tɔkɛnyɔ kana menda filmɛ yendana l’awui w’ɛdiɛngɛ. Ekɔ tsho kɛnyɔ.”
-
Lande na kele kanyi shɔ yekɔ waale?
LO TSHENA PE
Andjelo wa kɔlamelo tokimanyiyaka. Satana l’ɛdiɛngɛ ande wekɔ atunyi waki Jehowa, ndo vɔ kambaka l’awui w’ɛdiɛngɛ dia minganyiya anto.
Ovuswelo
-
Ngande wakimanyiya andjelo wa Jehowa anto dia mbeka akambo wendana la nde?
-
Satana l’ɛdiɛngɛ ande, waa na wewɔ?
-
Lande na kahayalange monga la losambi l’awui w’ɛdiɛngɛ?
SALA EYANGELO
Eka dia mbeya lande na keyaso dia Yeso ekɔ Mikayɛlɛ arkandjelo.
Enda djembetelo yɛnya dia Diabolo ekɔ onto la mɛtɛ, koko aha kɔlɔ kɛmɔtshi kele l’otema aso.
Enda woho wakahembola womoto ɔmɔtshi losambi l’ɛdiɛngɛ.
“Nde akonge la lɔsɛnɔ lele l’oyango” (Tshoto y’Etangelo, Ngɔndɔ k’esambele 1, 1993 lo Falase)
Eka dia mbeya woho wakamba Satana l’awui w’ɛdiɛngɛ dia nkesa anto.
“Mɛtɛ lo kɛnɛ kendana la maji, dɔka ndo la wetshi” (Mboka katɔla otsha lo lɔsɛnɔ la pondjo, etenyi 5)
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
