WEKELO 34
Ngande wakokaso mɛnya dia sho mbokaka Jehowa ngandji?
Onde ngandji kokayɛ Nzambi nshi nyɛ ndeka kɛnɛ kakayawokaka etena kakayatatɛ mbeka Bible? Onde wɛ nangaka ntetemala nkeketsha lɔngɛnyi lele lam’asayɛ la nde? Naka eelo, kete ohɔ dia lo yɛdikɔ yayɛna Jehowa woho watahame ngandji kawokayɛ, mbayondoleka kooka ngandji ndo ndjakiyanya dikambo diayɛ. Ngande wakokayɛ mɛnya dia wɛ mbookaka ngandji?
1. Ngande wɛnyaso Jehowa dia sho mbookaka ngandji?
Sho mɛnyaka Jehowa dia sho mbookaka ngandji lo mbokitanyiya. (Adia 1 Joani 5:3.) Nde hatshutshuya ndooko onto dia mbokitanyiya. Koko nde mbishaka onto tshɛ la l’atei aso diaaso dia nsɔna dia kana nde ayowokitanyiya kana bu. Lande na? Nɛ dia Jehowa nangaka sho monga “la okitanyiya w’oma k’ɛse otema.” (Rɔmɔ 6:17) L’ɛtɛkɛta ekina, nde nangaka dia sho mbookitanyiya l’ɔtɛ wa ngandji kawokaso, koko aha l’ɔtɛ wahombaso nsala dui sɔ. Etenyi 3 ndo 4 kekɔ l’oyango wa kokimanyiya dia wɛ mɛnya Jehowa ngandji kawokayɛ lo nsala kɛnɛ kɔɔngɛnyangɛnya ndo lo mbewɔ kɛnɛ kahɔngɛnyangɛnya.
2. Lande na kakokaso monga l’okakatanu dia mɛnya Jehowa ngandji kawokaso?
“Asui w’onto ɔlɔlɔ mongaka efula.” (Osambo 34:19) Sho tshɛ tekɔ lo ndɔshana la eongelo kaso k’anto wele keema kokele. Ndo sho kokaka mpomana nto l’ekakatanu wendana l’ekondjelo, wɛngiya ndo l’ekakatanu ekina. Etena kahomanaso l’ekakatanu, sho mbeyaka mɛna dia ekɔ wolo nsala kɛnɛ katɔlɔmba Jehowa. Dikambo mbeyaka monga wɔdu ndjela mboka ka kɔlɔ. Koko naka wɛ nsala la kɔlamelo tshɛ kɛnɛ kakotɛ Jehowa, kete wɛ ayɛnya dia wɛ mbookaka ngandji oleki ɛngɔ kekina tshɛ. Ndo wɛ ayɛnya dia wɛ ekɔ la kɔlamelo le nde. Lo wedi ande, nde ayonga la kɔlamelo le yɛ. Nde hakotshikaki pondjo.—Adia Osambo 4:3.
NYOMOTSHIMOLA
Enda lande na kele kɔlamelo yayɛ le Jehowa yekɔ ohomba, ndo eka kɛnɛ kakoka kokimanyiya dia ntshikala la kɔlamelo le nde.
3. Dikambo diendana ndo la yɛ
Lo ndjela dibuku dia lo Bible dia Jɔbɔ, Satana akasɔngwɛ wanɛ tshɛ walanga kambɛ Jehowa, koko aha Jɔbɔ oto. Nyadia Jɔbɔ 1:1, 6–2:10, ndo oma laasɔ, nyɔkɛtshanya ambola anɛ:
-
Lo ndjela Satana, lande na kakakitanyiyaka Jɔbɔ awui wa Jehowa?—Enda Jɔbɔ 1:9-11.
-
Kakɔna kakate Satana lo dikambo di’anto tshɛ, mbidja ndo wɛ?—Enda Jɔbɔ 2:4.
Nyadia Jɔbɔ 27:5b, ndo oma laasɔ, nyɔkɛtshanya dimbola nɛ:
-
Ngande wakɛnya Jɔbɔ mɛtɛ dia nde akokaka Jehowa ngandji?
Jɔbɔ akɛnya ngandji kakandokaka Jehowa lo ntshikala la kɔlamelo le nde
Sho mɛnyaka ngandji kokaso Jehowa lo ntshikala la kɔlamelo le nde
4. Ngɛnyangɛnya otema wa Jehowa
Nyadia Tokedi 27:11, ndo oma laasɔ, nyɔkɛtshanya ambola anɛ:
-
Ngande wayaoka Jehowa etena kasalayɛ akambo la lomba ndo kokitanyiyayɛ? Lande na?
5. Wɛ koka monga la kɔlamelo le Jehowa
Ngandji kokaso Jehowa totshutshuyaka dia mbutɛ anto akina awui wendana la nde. Kɔlamelo yaso le nde totshutshuyaka dia nsala dui sɔ, kaanga etena kediɔ bu wɔdu. Nyende VIDƐO, ndo oma laasɔ, nyɔkɛtshanya ambola wayela anɛ:
-
Onde ndooko lushi lakayonge l’okakatanu dia mbewoya anto akina awui wendana la Jehowa?
-
Lo vidɛo yɛnyiso nyɛ, kakɔna kakakimanyiya Grayson dia minya wɔma ande?
Bu wolo monga la kɔlamelo le Jehowa, naka sho nanga kɛnɛ kalangande ndo mpetsha kɛnɛ kahetshande. Nyadia Osambo 97:10, ndo oma laasɔ, nyɔkɛtshanya ambola anɛ:
-
Lo ndjela kɛnɛ kamboyeka, naa awui amɔtshi walanga Jehowa? Naa awui amɔtshi wahetshande?
-
Ngande wakokayɛ mbeka dia nanga kɛnɛ kele ɔlɔlɔ ndo mpetsha kɛnɛ kele kɔlɔ?
6. Sho kondjaka wahɔ etena kakitanyiyaso Jehowa
Nkitanyiya Jehowa mongaka nshi tshɛ dui dioleki dimɛna. Nyadia Isaya 48:17, 18, ndo oma laasɔ, nyɔkɛtshanya ambola anɛ:
-
Onde wɛ fɔnyaka dia sho kokaka mbetawɔ dia Jehowa mbeyaka nshi tshɛ kɛnɛ koleki ɔlɔlɔ le so? Lande na?
-
Ngande wele wekelo ayɛ wa Bible ndo ewo kamboyokondja lo kɛnɛ kendana la Jehowa, Nzambi ka mɛtɛ amonga la wahɔ le yɛ?
ANTO AMƆTSHI MBUTAKA ƆNƐ: “Etsha ami bu mɛtɛ ohomba le Nzambi.”
-
Naa divɛsa diakoka nkamba la so dia mɛnya di’etsha aso koka ngɛnyangɛnya kana nyangiya Jehowa?
LO TSHENA PE
Wɛ koka mɛnya ngandji kokayɛ Jehowa lo mbookitanyiya ndo lo ntshikala la kɔlamelo le nde kaanga l’atei w’ekakatanu.
Ovuswelo
-
Wetshelo akɔna wamboyokondja oma l’ɛnyɛlɔ ka Jɔbɔ?
-
Ngande wayoyɛnya ngandji kokakayɛ Jehowa?
-
Kakɔna kayokokimanyiya dia ntshikala la kɔlamelo le Jehowa?
SALA EYANGELO
Enda woho wakokayɛ monga la kɔlamelo le Jehowa ndo le etshumanelo.
“Le kanga kɔlamelo, wɛ mbosalɛka akambo la kɔlamelo” (16:49)
Eka awui akina wendana la toho tasɔngwɛ Satana anto akambo.
“Jɔbɔ akalame olowanyi ande” (Bible: Naa losango lele lɔkɔ? etenyi 6)
Enda woho wakoka kaanga akɛnda mɛnya ngandji kokawɔ Jehowa.
Ngande wakoka ɔlɔngɔlɔngɔ kana osekaseka ndɔshana la tɔsɛngiya t’oma le asekawɔ dia vɔ ntshikala la kɔlamelo le Jehowa?
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
