WEKELO 36
Onga la losembwe l’akambo tshɛ
Onto tshɛ nangaka di’angɛnyi ande monga la losembwe. Ndo Jehowa nongamɛka di’angɛnyi ande monga la losembwe. Koko dui sɔ bu wɔdu l’andja ɔnɛ wele anto efula bu la losembwe. Wahɔ akɔna wakondjaso lo monga la losembwe l’akambo tshɛ?
1. Naa ɔkɔkɔ woleki ohomba wahombaso monga la losembwe?
Etena kasalɛso anto akina akambo la losembwe, sho mɛnyaka Jehowa dia sho mboolangaka ndo mbɔlɛmiyaka. Tokanyiya dui nɛ: Jehowa mbeyaka dui tshɛ diakanyiyaso ndo diasalaso. (Hɛbɛru 4:13) Nde mɛnaka etena kasalaso akambo la losembwe ndo nde ngɛnangɛnaka dui sɔ. Ɔtɛkɛta ande mbutaka ɔnɛ: “Jehowa petshaka kanga okadi, koko nde ekɔ ɔngɛnyi wa ma ma la anto wosembwe.”—Tokedi 3:32.
2. Naa toho tɔmɔtshi takokaso monga la losembwe lo lɔsɛnɔ laso la lushi la lushi?
Jehowa nangaka dia sho ‘mbutanɛka mɛtɛ onto l’onto.’ (Zɛkariya 8:16, 17) Kakɔna kalembetshiya dui sɔ? Oyadi tekɔ lo nsawola la nkumbo kaso, asekaso wa l’olimu, anangɛso l’akadiyɛso w’Akristo kana ewandji wa lɛɛta, hatohombe mbaakesa kana mbatɛ awui wa kashi. Anto wele la losembwe hawove anto akina kana mbaakesa. (Adia Tokedi 24:28 ndo Ɛfɛsɔ 4:28.) Ndo vɔ futaka elambo tshɛ wahombawɔ mfuta. (Rɔmɔ 13:5-7) L’akambo anɛ ndo l’akambo akina, sho pombaka “monga la losembwe loakambo tshɛ.”—Hɛbɛru 13:18.
3. Wahɔ akɔna wakokaso nkondja lo monga la losembwe?
Naka sho mbeyamaka oko anto wele la losembwe, kete anto akina wayɛkɛ etema awɔ le so. Tayokimanyiya dia nkumbo ndo etshumanelo monga lo ekokelo. Tayonga la nkum’otema ka pudipudi. Losembwe laso koka nto “nɛnga wetshelo wa Nzambi, Oshimbedi aso,” ndo nkotola anto wa l’andja w’etshumanelo oya l’ɔtɛmwɛlɔ wa mɛtɛ.—Tito 2:10.
NYOMOTSHIMOLA
Enda woho wakoka losembwe monga la shɛngiya le Jehowa ndo le yɛ, ndo eka woho wakokayɛ monga la losembwe l’awui wotshikitanyi wa lo lɔsɛnɔ.
4. Losembwe ngɛnyangɛnyaka Jehowa
Nyadia Osambo 44:21 ndo Malaki 3:16, ndo oma laasɔ, nyɔkɛtshanya ambola anɛ:
-
Lande na kafɔnyayɛ ɔnɛ bu dui dia lomba mfɔnya dia sho koka mbishɛ mɛtɛ?
-
Ngande wafɔnyayɛ wayaoka Jehowa etena kɔsayɛ yɛdikɔ ya mbuta mɛtɛ kaanga etena kele dui sɔ diekɔ wolo?
Etena kata ana mɛtɛ, vɔ ngɛnyangɛnyaka ambutshi awɔ. Etena kataso mɛtɛ, sho ngɛnyangɛnyaka Jehowa
5. Salaka akambo la losembwe ntena tshɛ
Anto efula mbetawɔka dia keema dui dia wɔdu monga la losembwe lo ntena tshɛ. Koko tɔsɛdingole lande na kahombaso monga la losembwe lo ntena tshɛ. Nyende VIDƐO.
Nyadia Hɛbɛru 13:18, ndo oma laasɔ, nyɔkɛtshanya woho wakokaso monga la losembwe . . .
-
lo nkumbo kaso.
-
l’olimu kana la kalasa.
-
ndo l’awui akina.
6. Sho kondjaka wahɔ lo monga la losembwe
Monga la losembwe mbeyaka tela ekakatanu ɛmɔtshi. Koko l’edjedja ka wonya, ndjɛnamaka dia ɔsɔ mboleki dui dia dimɛna nsala. Nyadia Osambo 34:12-16, ndo oma laasɔ, nyɔkɛtshanya dimbola nɛ:
-
Ngande wakoka losembwe mbetɛ lɔsɛnɔ layɛ dimɛna efula?
-
Waomi ndo waa wadi wele la losembwe keketshaka diwala diawɔ
-
As’olimu wele la losembwe, ewandji awɔ mbɛkɛka etema le wɔ
-
Ewandji wa lɛɛta ngɛnangɛnaka anto wele la losembwe
ANTO AMƆTSHI MBUTAKA ƆNƐ: “Kashi mɔtshi yekɔ totshitshɛ efula ndo yɔ bu kɔlɔ.”
-
Lande na ketawɔyɛ dia Jehowa petshaka kashi tshɛ?
LO TSHENA PE
Jehowa nangaka di’angɛnyi ande monga la losembwe lo kɛnɛ tshɛ katawɔ ndo kasalawɔ.
Ovuswelo
-
Naa toho tɔmɔtshi takokaso monga la losembwe?
-
Lande na kele keema dui dia lomba dia mfɔnya ɔnɛ sho kokaka mbishɛ mɛtɛ?
-
Lande na kalangayɛ mongaka la losembwe lo ntena tshɛ?
SALA EYANGELO
Ngande wakoka ambutshi mbetsha anawɔ dia monga la losembwe?
Wahɔ akɔna wakondjaso lo kotshaka alaka aso nshi tshɛ?
Tende dia kana sho pombaka mfuta elambo oyadi vɔ kambaka la wɔ lo yoho ya kɔlɔ.
“Elambo—Onde wɛ pombaka mfuta?” (Tshoto y’Etangelo, Ngɔndɔ ka dikumi 1, 2011)
Kakɔna kakatshutshuya pami kɛmɔtshi kaki komonga la losembwe dia ntshikitanya yoho yande ya lɔsɛnɔ ndo monga la losembwe?
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
