WEKELO 41
Kakɔna kata Bible lo dikambo dia dieyanelo?
Anto efula mbokaka sɔnyi ntɛkɛta di’awui wa dieyanelo. Koko, Bible tɛkɛtaka di’awui wa dieyanelo hwe hwe, koko lo yoho ya la dilɛmiɛlɔ. Kɛnɛ katatɔ kekɔ la wahɔ le so. Pombaka monga ngasɔ, nɛ dia Jehowa mbele Otungi aso. Ɔnkɔnɛ, nde mbeyaka kɛnɛ koleki ɔlɔlɔ le so. Nde tɛnyaka woho wakoka etsha aso mbɔɔngɛnyangɛnya ndo kɛnɛ kakoka tokimanyiya dia ngɛnangɛnaka la lɔsɛnɔ pondjo pondjo.
1. Naa kanyi yaki Jehowa lo dikambo dia dieyanelo?
Dieyanelo ekɔ woshasha ɔmɔtshi w’oma le Jehowa. Nde nangaka dia diɔ mbisha wadi l’omi ɔngɛnɔngɛnɔ. Woshasha ɔsɔ kimanyiyaka atshukanyi aha tsho dia monga l’ana, koko ndo dia mɛnyanya ngandji lo yoho yakalɔngɔsɔla Nzambi ndo yasha ɔngɛnɔngɛnɔ. Diakɔ diata Bible ɔnɛ: “Ɔngɛnangɛnake la wadi la lo nshi yayɛ y’ɔlɔngɔlɔngɔ.” (Tokedi 5:18, 19) Jehowa nongamɛka di’atshukanyi w’Akristo monga la kɔlamelo le elonganyi awɔ ndo naka vɔ nsala ngasɔ, kete hawosalaki loseka pondjo.—Adia Hɛbɛru 13:4.
2. Awui wa mindo wa dieyanelo kɛdikɛdi na?
Bible totɛka dia “wanɛ wasala awui wa mindo wa dieyanelo . . . hawotokita Diolelo dia Nzambi.” (1 Kɔrɛtɔ 6:9, 10) Wanɛ wakafunde Bible lo Grɛkɛ wakakambe la tshɛkɛta por·neiʹa dia ntɛkɛta dikambo di’awui wa mindo wa dieyanelo. Tshɛkɛta shɔ mendanaka ndo la 1) dieyanelo a dia lam’asa anto wele bu wadi l’omi, 2) dieyanelo dia lam’asa pami la pami kana womoto la womoto, ndo 3) dieyanelo dia lam’asa onto la nyama. Sho ngɛnyangɛnyaka Jehowa ndo ndjakondjiyɛka wahɔ lo “ntona awui wa mindo wa dieyanelo.”—1 Tɛsalɔnika 4:3.
NYOMOTSHIMOLA
Enda woho wakokayɛ mbewɔ awui wa mindo wa dieyanelo ndo wahɔ wayoyokondja naka wɛ ntetemala monga la lɔkɛwɔ la pudipudi.
3. Lawɔ awui wa mindo wa dieyanelo
Pami kɛmɔtshi ka kɔlamelo kakawelɛka Yɔsɛfu akalɔsha la wolo dia ntetemala monga la lɔkɛwɔ la pudipudi. Nyadia Etatelo 39:1-12, ndo oma laasɔ, nyɔkɛtshanya ambola anɛ:
-
Kakɔna kakatshutshuya Yɔsɛfu dia ndawɔ?—Enda divɛsa 9.
-
Onde wɛ fɔnyaka dia Yɔsɛfu akɔshi yɛdikɔ ya dimɛna? Lande na katayɛ ngasɔ?
Ngande wakoka ɛlɔngɔlɔngɔ l’esekaseka mbokoya Yɔsɛfu ndo ndawɔ awui wa mindo wa dieyanelo ɛlɔ kɛnɛ? Nyende VIDƐO.
Jehowa nangaka dia sho tshɛ ntona awui wa mindo. Nyadia 1 Kɔrɛtɔ 6:18, ndo oma laasɔ, nyɔkɛtshanya ambola anɛ:
-
Awui akɔna wakoka nkonya onto ɔmɔtshi l’awui wa mindo wa dieyanelo?
-
Ngande wakokayɛ ndawɔ awui wa mindo?
4. Wɛ koka nshika tanga la ntondo k’ohemba
Kakɔna kakoka nkonya wolo le onto dia nde nshika tanga l’awui wa mindo wa dieyanelo? Nyende VIDƐO, ndo oma laasɔ, nyɔkɛtshanya dimbola diayela nɛ:
-
Etena kakashihodia ɔnangɛso lɛnyiso lo vidɛo dia tokanyi ndo ditshelo diande kokaka mbokonya dia nde nshisha kɔlamelo yande otsha le wadɛnde, kakɔna kakandasale?
Kaanga Akristo wa kɔlamelo ndɔka ta dia ta ntena dimɔtshi dia nama tokanyi tawɔ pudipudi. Ngande wakokayɛ mbewɔ kanyiyaka awui wa mindo? Nyadia Filipɛ 4:8, ndo oma laasɔ, nyɔkɛtshanya ambola anɛ:
-
Weho akɔna w’akambo wahombaso kanaka yimba lɔkɔ?
-
Ngande wakoka wadielo wa Bible ndo ntetemala ndjasha l’olimu wa Jehowa tokimanyiya dia nshika tanga l’ohemba wa nsala pɛkato?
5. Ɛlɛmbɛ wa Jehowa tokondjiyɛka wahɔ
Jehowa mbeyaka kɛnɛ koleki ɔlɔlɔ le so. Nde totɛka woho wa ntshikala pudipudi lo lɔkɛwɔ ndo wahɔ wayotokondja naka sho nsala ngasɔ. Nyadia Tokedi 7:7-27 kana nyende VIDƐO, ndo oma laasɔ, nyɔkɛtshanya ambola wayela anɛ:
-
Ngande wakayadje ɔlɔngɔlɔngɔ ongo l’ohemba?—Enda Tokedi 7:8, 9.
-
Lo ndjela Tokedi 7:23, 26, awui wa mindo wa dieyanelo kokaka monga l’etombelo wa kɔlɔ efula. Naka sho ntetemala monga la lɔkɛwɔ la pudipudi, ekakatanu akɔna wakokaso mbewɔ?
-
Ngande wakoka pudipudi ka lo lɔkɛwɔ tokimanyiya dia ndjɔngɛnangɛna la lɔsɛnɔ pondjo pondjo?
Anto amɔtshi fɔnyaka dia kɛnɛ kata Bible lo dikambo dia dieyanelo dia lam’asa pami la pami kana womoto la womoto hɛnya dia Nzambi mbokaka anto ngandji. Koko Jehowa, Nzambi ka ngandji nangaka di’onto tshɛ nkondja lɔsɛnɔ la pondjo. Dia likondja, sho pombaka nsɛna lo yoho yɔtɔnɛ l’atɔndɔ ande. Nyadia 1 Kɔrɛtɔ 6:9-11, ndo oma laasɔ, nyɔkɛtshanya dimbola nɛ:
-
Lo ndjela kanyi ya Nzambi, onde nsaki yendana la dieyanelo dia lam’asa pami la pami kana womoto la womoto tsho mbele kɔlɔ?
Dia ngɛnyangɛnya Nzambi, sho tshɛ pombaka nsala etshikitanu. Ko onde ekɔ ohomba sho nsala etshikitanu? Nyadia Osambo 19:8, 11, ndo oma laasɔ, nyɔkɛtshanya ambola anɛ:
-
Onde wɛ fɔnyaka di’atɔndɔ wa Jehowa wendana la lɔkɛwɔ wekɔ ɔlɔlɔ? Lande na?
Jehowa ambokimanyiya anto efula dia nkitanyiya ɛlɛmbɛ ande wendana la lɔkɛwɔ. Nde koka kokimanyiya ndo wɛ lawɔ
ANTO AMƆTSHI MBUTAKA ƆNƐ: “Dieyanelo bu kɔlɔ lam’asa anto ahende oyadi waa na wewɔ, edja tshɛ kele vɔ mbokanaka ngandji lam’asawɔ.”
-
Kakɔna kayoyota?
LO TSHENA PE
Dieyanelo diekɔ woshasha w’oma le Jehowa le wadi l’omi wahombawɔ ngɛnangɛna la wɔ.
Ovuswelo
-
Awui wa mindo wa dieyanelo mendanaka ndo l’awui akɔna?
-
Kakɔna kayotokimanyiya dia mbewɔ awui wa mindo wa dieyanelo?
-
Wahɔ akɔna wakondjaso etena kayelaso atɔndɔ wa Jehowa wendana la lɔkɛwɔ?
SALA EYANGELO
Enda lande na kele pami la womoto walanga mbidjasɛ kaamɛ pombaka mbidja diwala diawɔ lo dibuku dia lɛɛta.
“Kakɔna kata Bible lo dikambo di’anto ahende wodjashi kaamɛ aha la ntshukana?” (Sawo dia l’Ɛtɛrnɛtɛ)
Enda woho wele atɔndɔ wa lo Bible wendana la dieyanelo dia lam’asa pami la pami hawotshutshuya anto dia mpetsha wanɛ wasala dikambo sɔ.
“Onde dieyanelo dia lam’asa pami la pami diekɔ kɔlɔ?” (Sawo dia l’Ɛtɛrnɛtɛ)
Enda woho watokokɛ ɛlɛmbɛ wa Nzambi oma lo weho w’awui tshɛ wendana la dieyanelo.
“Onde dieyanelo dia l’onyɔ diekɔ dieyanelo dia mɛtɛ?” (Sawo dia l’Ɛtɛrnɛtɛ)
Lo sawo diata ɔnɛ: “Vɔ wakasalɛ akambo la kɛnɛmɔ,” enda kɛnɛ kakatshutshuya onto ɔmɔtshi lakasalaka dieyanelo dia lam’asa pami la pami dia ntshikitanya yoho yande ya lɔsɛnɔ dia ngɛnyangɛnya Nzambi.
“Bible tshikitanyaka nsɛnɔ y’anto” (Tshoto y’Etangelo, Ngɔndɔ ka nɛi 1, 2011 lo Falase)
a L’atei wa weho wa waeyanelo asɔ mbele ndo dieyanelo dia l’onyɔ, dieyanelo dia l’odingi, ndo yoho ya dieyanelo yele onto nɔmaka etenyi ka demba ka diwutshi k’osekande.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
