WEKELO 42
Kakɔna kata Bible lo kɛnɛ kendana la lonyemba ndo diwala?
L’ahole amɔtshi, anto mbetawɔka di’onto hakoke monga l’ɔngɛnɔngɛnɔ naka nde hatshuki kana hatshukami. Koko aha anto tshɛ wambotshukana mbele l’ɔngɛnɔngɛnɔ ndo aha anto tshɛ wele enyemba mbele bu l’ɔngɛnɔngɛnɔ. Kɛnɛ kele mɛtɛ ele Bible mbutaka dia oyadi lonyemba kana diwala, tshɛ ekɔ weshasha w’oma le Nzambi.
1. Naa ɛlɔlɔ ɛmɔtshi wele la enyemba?
Bible mbutaka ɔnɛ: “Onto latshukana ambosala dimɛna, koko ɔnɛ lahatshukana ayoleka nsala dimɛna.” (Adia 1 Kɔrɛtɔ 7:32, 33, 38.) Lo toho takɔna takoka onyemba ‘ndeka nsala dimɛna’? Okristo w’onyemba bu l’olonganyi wahombande nkotsha ehomba ande. Laasɔ, nde ekɔ la lotshungɔ l’efula. Ɛnyɛlɔ, amɔtshi wekɔ l’akoka wa mpamia olimu awɔ lo toho t’amɛna, oko ntshɔ lo wodja okina dia tosambisha lokumu l’ɔlɔlɔ. Laadiko di’awui asɔ tshɛ, vɔ kokaka mbetsha wenya efula dia ndjasukanya la Jehowa.
2. Naa ɛlɔlɔ ɛmɔtshi waya lo ntshukana lo ndjela ɛlɛmbɛ wa lɛɛta?
L’ɛnyɛlɔ ka lonyemba, diwala diekɔ l’ɛlɔlɔ wa laande. Bible mbutaka dia “anto 2 ndeka onto 1.” (Ondaki 4:9) Dui sɔ diekɔ mɛtɛ, djekoleko le Akristo wa mɛtɛ wakamba l’atɔndɔ wa lo Bible lo diwala diawɔ. Atshukanyi watshukana lo ndjela ɛlɛmbɛ wa lɛɛta tshikaka dɔkɔlɔkɔ dia vɔ mbokana ngandji, dia vɔ nɛmiyana ndo dia vɔ ngɛnyangɛnyana lam’asawɔ. Etombelo wele la dui sɔ ele, mbala efula vɔ ndekaka ndjaoka l’ekokelo oleki anto wadjasɛ kaamɛ aha la vɔ ntshukana. Ndo anawɔ wayoyaoka l’ekokelo k’efula.
3. Ngande wɔsa Jehowa diwala?
Etena kakatshukanya Jehowa pami la womoto la ntondo, nde akate ate: “Pami ayotshika she la nyango ndo ayomamatana la wadɛnde.” (Etatelo 2:24) Jehowa nangaka di’omi la wadi mbokana ngandji ndo nstshikala kaamɛ edja tshɛ kekewɔ la lɔsɛnɔ. Nde mbetawɔka odiakelo wa diwala paka naka olonganyi ɔmɔtshi ambosala loseka. Etena kɛsɔ, Jehowa mbishaka olonganyi wosalewɔ kɔlɔ lotshungɔ la mbɔsa yɛdikɔ ya ndjaka diwala. a (Mateo 19:9) Jehowa hetawɔ ɔsɛngɛ l’atei w’Akristo.—1 Timɔte 3:2.
NYOMOTSHIMOLA
Enda woho wakokayɛ monga l’ɔngɛnɔngɛnɔ—ndo ngɛnyangɛnya Jehowa—oyadi onyemba kana otshukanyi mbeyɛ.
4. Kamba la woshasha wa lonyemba dimɛna
Yeso akɔsaka lonyemba oko woshasha. (Mateo 19:11, 12) Nyadia Mateo 4:23, ndo oma laasɔ, nyɔkɛtshanya dimbola nɛ:
-
Ngande wakakambe Yeso la woshasha wa lonyemba dia kambɛ She ndo anto akina?
Akristo koka ntana ɔngɛnɔngɛnɔ lo nkamba la lonyemba lawɔ lo yoho ya dimɛna oko wakasale Yeso. Nyende VIDƐO, ndo oma laasɔ, nyɔkɛtshanya dimbola diayela nɛ:
-
Lo toho takɔna t’amɛna takoka Akristo nkamba la lonyemba lawɔ?
Onde wɛ akeyaka?
Bible hashikikɛ lofulo l’ɛnɔnyi lele naka onto ambokotsha, kete nde koka ntshuka kana ntshukama. Koko, tɔ keketshaka onto dia nkonga edja ndo nde “ambolekanya ɛnɔnyi wa dikɛnda,” etena kele nsaki ya dieyanelo kokaka ndanya ekanelo k’ɔlɔngɔlɔngɔ kana k’osekaseka.—1 Kɔrɛtɔ 7:36.
5. Sɔna olonganyi ayɛ la lomba tshɛ
Ɔsɔnwɛlɔ w’olonganyi ekɔ yɛdikɔ mɔtshi yoleki ohomba yayoyɔsa. Nyadia Mateo 19:4-6, 9, ndo oma laasɔ, nyɔkɛtshanya dimbola nɛ:
-
Lande na kele Okristo hahombe nsasɛ dia ntshuka kana ntshukama?
Bible koka kokimanyiya dia mbeya waonga wahombayɛ nyanga le olonganyi. Kɛnɛ koleki ohomba ele, nyanga olonganyi woka Jehowa ngandji. b Nyadia 1 Kɔrɛtɔ 7:39 ndo 2 Kɔrɛtɔ 6:14. Ndo oma laasɔ, nyɔkɛtshanya ambola anɛ:
-
Lande na kahombaso ntshukana paka l’osekaso Okristo?
-
Oko le yɛ, ngande wayoyaoka Jehowa naka sho ntshukana l’onto ɔmɔtshi lahawoke ngandji?
Naka vɔ mamatanya kaamɛ nyama hiende yotshikitanyi efula, kete yɔ yayosowa. Woho akɔ waamɛ mbele, Okristo latshukana l’onto lele bu ombetawɔdi ayonga l’ekakatanu efula
6. Ɔsa diwala woho wadiɔsa Jehowa
L’Isariyɛlɛ w’edjedja, apami amɔtshi wakasɛkanaka la wadɛwɔ l’ɔtɛ w’ɛkɔkɔ wa lokaki. Nyadia Malaki 2:13, 14, 16, ndo oma laasɔ, nyɔkɛtshanya dimbola nɛ:
-
Lande na kahetsha Jehowa odiakelo wa diwala wosalemi l’ɔtɛ w’eyango wa lokaki?
Loseka ndo odiakelo wa diwala mbishaka olonganyi wosalewɔ kɔlɔ ndo ana paa efula l’asolo
Nyende VIDƐO, ndo oma laasɔ, nyɔkɛtshanya dimbola diayela nɛ:
-
Naka wɛ ambotshukana l’onto lele bu Okristo, ahombayɛ nsala dia monga la diwala di’ɔngɛnɔngɛnɔ?
7. Kamba l’atɔndɔ wa Jehowa wendana la diwala
Mbeyaka monga ohomba di’onto mbidja welo w’efula dia nkamba l’atɔndɔ wa Jehowa wendana la diwala. c Koko Jehowa tshɔkɔlaka wanɛ wasala ngasɔ. Nyende VIDƐO.
Nyadia Hɛbɛru 13:4, ndo oma laasɔ, nyɔkɛtshanya ambola anɛ:
-
Onde wɛ fɔnyaka di’atɔndɔ wa Jehowa wendana la diwala wekɔ ɔlɔlɔ? Lande na?
Jehowa nongamɛka di’Akristo mbidja diwala kana ndjaka diwala laka lɛɛta, nɛ dia lo wedja efula ewandji nɔmbaka dui sɔ. Nyadia Tito 3:1, ndo oma laasɔ, nyɔkɛtshanya dimbola nɛ:
-
Naka wɛ ambotshukana, onde wɛ ekɔ l’eshikikelo dia diwala dianyu mbetawɔmaka le lɛɛta?
ONTO ƆMƆTSHI MBEYAKA KOMBOLA ƆNƐ: “Lande na ntshukana? Onde pami la womoto hawokoke tsho mbidjasɛ kaamɛ?”
-
Ngande wayoyokadimola?
LO TSHENA PE
Lonyemba ndo diwala wekɔ weshasha w’oma le Jehowa. Onyemba kana otshukanyi koka monga l’ɔngɛnɔngɛnɔ naka vɔ nsɛna lo yoho yɔtɔnɛ la lolango laki Nzambi.
Ovuswelo
-
Ngande wakoka onto nkamba la lonyemba lande lo yoho ya dimɛna?
-
Lande na kata Bible dia ntshukana paka l’osekaso Okristo?
-
Naa ɔkɔkɔ ɔtɔi wetawɔ Afundelo dia ndjaka diwala?
SALA EYANGELO
Kakɔna kalembetshiya ntshukana “paka lo Nkumadiɔndjɔ”?
“Wembola w’oma le ambadi” (Tshoto y’Etangelo, Ngɔndɔ k’esambele 1, 2004)
Enda tovidɛo tosato ta tomondo takoka kokimanyiya dia mbɔsa tɛdikɔ t’amɛna lo dikambo dia diembwanelo ndo dia diwala.
Enda lande na kakate ɔnangɛso ɔmɔtshi dia kɛnɛ kambowosha Jehowa ndeka kɛnɛ tshɛ kakandatshike nɛmɔ.
Naa awui amɔtshi wahomba onto nsɛdingola la ntondo ka nde mbɔsa yɛdikɔ ya ndjaka diwala kana ya nkakitɔna l’olonganyi ande?
“Lɛmiya ‘kɛnɛ kakamamatanya Nzambi’” (Tshoto y’Etangelo, Ngɔndɔ ka dikumi l’ahende 2018)
a Enda Nɔtɛ ka la koma 4 kendana l’okakitwanelo naka loseka lambosalema.
b L’ahole amɔtshi, ambutshi mbasɔnɛ ɔnawɔ olonganyi. Etena kɛsɔ, ambutshi wa ngandji mendaka ntondo dia kana onto lalangawɔ sɔnɛ ɔnawɔ mbokaka Jehowa ngandji, lo dihole dia mbidja yimba lo falanga kana dihole diele l’onto akɔ lo tshunda.
c Naka wɛ mbidjasɛ l’onto ɔmɔtshi aha la nyu ntshukana, wɛmɛ mbahomba mbɔsa yɛdikɔ ya nkakitɔna la nde kana ya mbotshuka.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
