WEKELO 43
Woho wahomba Akristo mbɔsa ɔnwɛlɔ wa wanu?
L’andja w’otondo, anto wekɔ la tokanyi totshikitanyi lo kɛnɛ kendana l’ɔnwɛlɔ wa wanu. Amɔtshi ngɛnangɛnaka nkahana l’angɛnyi awɔ dikɔhɔ dia wanu etena kewɔ kaamɛ. Akina hawɔnɔ kaanga yema. Akina nto nɔka polo ndo lo mbidjɔ. Ko naa kanyi ya Bible lo dikambo di’ɔnwɛlɔ a wanu?
1. Onde ekɔ kɔlɔ nnɔ wanu?
Bible hashimbe ɔnwɛlɔ wa wanu. Lo wedi okina, etena kashilatɔ weshasha w’efula wakatosha Nzambi, Bible mbidjaka ndo “wanu watɔngɛnyangɛnyaka otema w’onto.” (Osambo 104:14, 15) Apami ndo wamato amɔtshi wa kɔlamelo wɔtɛkɛtami lo Bible wakanɔka wanu.—1 Timɔte 5:23.
2. Dako diakɔna diasha Bible wanɛ wanɔ wanu?
Jehowa tonaka ɔnwɛlɔ wa wanu wa tshambandeko ndo wodjwelo wa wanu. (Ngalatiya 5:21) Ɔtɛkɛta ande mbutaka ɔnɛ: “Tongake l’atei wa wanɛ wanɔ wanu efula.” (Tokedi 23:20) Laasɔ, naka tambɔsa yɛdikɔ ya nnɔ, oyadi lo shwamɛ, hatohombe nnɔ wanu efula polo ndo hatoyokoka nkanyiya dimɛna, hatoyokoka nama ɛtɛkɛta la ditshelo diaso kana nkokɛ yoonge yaso ya demba. Ko naka hatokoke nnɔ la wɛdimo, kete sho pombaka ntshika diaha nnɔ kaanga dipɔpɔ.
3. Ngande wakokaso nɛmiya yɛdikɔ y’anto akina lo kɛnɛ kendana la wanu?
Onto tshɛ pombaka mbɔsa yɛdikɔ ya kana nde ayɔnɔ wanu. Hatohombe nombosha onto lɔsa yɛdikɔ ya nnɔ wanu la wɛdimo ndo hatohombe ntshutshuya onto ɔmɔtshi dia nde nnɔ wanu, naka nde halange. (Rɔmɔ 14:10) Sho mbɔsaka yɛdikɔ yaha nnɔ naka ɔnwɛlɔ aso wa wanu takanyaka anto akina. (Adia Rɔmɔ 14:21.) Sho ‘nyangaka wahɔ w’onto okina, koko aha waso hita.’—Adia 1 Kɔrɛtɔ 10:23, 24.
NYOMOTSHIMOLA
Sɛdingola atɔndɔ wa lo Bible wayokokimanyiya dia kana wɛ kokaka nnɔ wanu ndo polo lo yɛdikɔ yakɔna yahombayɛ nnɔ naka wɛ ambɔsa yɛdikɔ ya nnɔ. Ndo nto enda kɛnɛ kakokayɛ nsala naka wɛ ekɔ l’okakatanu lo kɛnɛ kendana l’ɔnwɛlɔ wa wanu.
4. Ɔsa yɛdikɔ ya kana wɛ ayɔnɔ wanu
Ngande wakɔsaka Yeso ɔnwɛlɔ wa wanu? Dia mbeya okadimwelo, enda dihindo dia ntondo diakasale Yeso. Nyadia Joani 2:1-11, ndo nyɔkɛtshanya ambola anɛ:
-
Oma lo dihindo nɛ, wetshelo akɔna wakondjami oma lo kanyi yaki la Yeso lo dikambo dia wanu ndo lo dikambo dia wanɛ wanɔ wanu?
-
Lam’ele Yeso kotona ɔnwɛlɔ wa wanu, ngande wahomba Akristo mbɔsa onto lanɔ wanu?
Koko, aha naka Okristo ekɔ la lotshungɔ la nnɔ wanu, kete laasɔ nde pombaka mbanɔka wonya tshɛ. Nyadia Tokedi 22:3, ndo oma laasɔ, nyɔsɛdingole woho wahomba awui wayela anɛ kokimanyiya dia mbeya kana wɛ ayɔnɔ wanu:
-
Wɛ ayanga nkɛndjakɛndja kana nkamba la mashinyi ɔmɔtshi.
-
Wɛ ekɔ la diemi.
-
Dɔkɔtɛlɛ akakoshimbe dia nnɔ wanu.
-
Wɛ ekɔ l’okakatanu dia nnɔ la wɛdimo.
-
Ɛlɛmbɛ hawokosha lotshungɔ la nnɔ wanu.
-
Wɛ ekɔ kaamɛ l’onto ɔmɔtshi lahanɔ wanu, nɛ dia lo nshi yakete nde aki l’okakatanu dia nnɔ wanu la wɛdimo.
Onde wɛ pombaka mbisha anto wanu lo fɛtɛ ka diwala kana kekina? Dia mbeya kɛnɛ kakoka kokimanyiya dia mbɔsa yɛdikɔ, nyende VIDƐO.
Nyadia Rɔmɔ 13:13 ndo 1 Kɔrɛtɔ 10:31, 32. L’ɔkɔngɔ wa wadielo wa divɛsa tshɛ, nyɔkɛtshanya dimbola nɛ:
-
Ngande wele nkamba la tɔndɔ nɛ koka kokimanyiya dia mbɔsa yɛdikɔ yayɔngɛnyangɛnya Jehowa?
Okristo tshɛ pombaka mbɔsa yɛdikɔ ya kana nde ayɔnɔ wanu kana bu. Oyadi lo ntena dimɔtshi nde nɔka wanu, lo ntena dikina nde mbeyaka mbɔsa yɛdikɔ yaha nnɔ wanu
5. Shikikɛ yɛdikɔ ya wanu yayoyɔnɔ
Naka wɛ ambɔsa yɛdikɔ ya nnɔ wanu, kete ohɔ dikambo nɛ: Kaanga mbele Jehowa hashimbe anto dia nnɔ wanu, nde tonaka ɔnwɛlɔ wa wanu wa tshambandeko. Lande na? Nyadia Hɔsea 4:11, 18, ndo oma laasɔ, nyɔkɛtshanya dimbola nɛ:
-
Kakɔna kakoka ntomba naka onto nnɔ wanu wamboleka?
Ngande wakokaso mbewɔ dia nnɔ wanu wamboleka? Sho pombaka monga la wɛdimo, ndo mbeya elelo aso. Nyadia Tokedi 11:2, ndo oma laasɔ, nyɔkɛtshanya dimbola nɛ:
-
Lande na kele ekɔ kanyi ya dimɛna nshikikɛ yɛdikɔ ya wanu yayoyɔnɔka?
6. Kɛnɛ kakoka nkimanyiya onto dia ntshika ɔnwɛlɔ wa wanu wa tshambandeko
Enda kɛnɛ kakakimanyiya pami kɛmɔtshi dia ntshika nnɔ wanu wamboleka. Nyende VIDƐO, ndo oma laasɔ, nyɔkɛtshanya ambola wayela anɛ:
-
Lo vidɛo yɛnyiso, shɛngiya yakɔna yakonge la wanu lo kɛnɛ kakasalaka Dmitry?
-
Onde nde aki l’akoka wa ntshika nnɔ wanu mbala kakɔ ɔtɔi?
-
Ngande wakandayo ntshika dia monga fumbe ka wanu?
Nyadia 1 Kɔrɛtɔ 6:10, 11, ndo oma laasɔ, nyɔkɛtshanya ambola anɛ:
-
Lande na kele wodjwelo wa wanu wekɔ kɔlɔ efula?
-
Kakɔna kɛnya di’onto lanɔ wanu wa tshambandeko koka ntshikitanya yoho yande ya lɔsɛnɔ?
Nyadia Mateo 5:30, ndo oma laasɔ, nyɔkɛtshanya dimbola nɛ:
-
Pembola lonya nembetshiyaka ndjahondja ɛngɔ kɛmɔtshi l’oyango wa ngɛnyangɛnya Jehowa. Akokayɛ nsala naka wɛ ekɔ lo nsala la wolo dia ntshika ɔnwɛlɔ wa wanu wa tshambandeko? a
Nyadia 1 Kɔrɛtɔ 15:33, ndo oma laasɔ, nyɔkɛtshanya dimbola nɛ:
-
Shɛngiya yakɔna yakoka monga l’angɛnyi ayɛ le yɛ lo kɛnɛ kendana la yɛdikɔ ya wanu yanɔyɛ?
ONTO ƆMƆTSHI MBEYAKA KOMBOLA ƆNƐ: “Onde ekɔ kɔlɔ nnɔ wanu?”
-
Ngande wayoyokadimola?
LO TSHENA PE
Jehowa akatosha wanu dikambo di’ɔngɛnɔngɛnɔ aso, koko nde tonaka ɔnwɛlɔ wa wanu wa tshambandeko ndo wodjwelo wa wanu.
Ovuswelo
-
Naa kanyi ya Bible lo dikambo di’ɔnwɛlɔ wa wanu?
-
Naa waale wele l’ɔnwɛlɔ wa wanu wa tshambandeko?
-
Ngande wakokaso nɛmiya yɛdikɔ y’anto akina lo dikambo di’ɔnwɛlɔ wa wanu?
SALA EYANGELO
Ngande wakoka ana wele l’ɛnɔnyi dikumi l’ɛmɔtshi nsala ɛsɔnwɛlɔ w’amɛna lo dikambo dia wanu?
Eya wanya wakokayɛ ntakola dia ntondoya okakatanu wendana l’ɔnwɛlɔ wa wanu.
“Kitsha wanu lo dihole diawɔ” (Tshoto y’Etangelo, Ngɔndɔ k’esambele 1, 2010)
Onde Okristo koka mbutɛ onto ɔnɛ à la santé?
“Ambola w’oma le ambadi” (Tshoto y’Etangelo, Ngɔndɔ ka hende 15, 2007)
L’ɔkɔndɔ wata ɔnɛ: “J’étais une barrique sans fond,” enda woho wakayotshikaka pami kɛmɔtshi ɔnwɛlɔ wa wanu wa tshambandeko.
“Bible tshikitanyaka nsɛnɔ y’anto” (Tshoto y’Etangelo, Ngɔndɔ ka tanu 1, 2012 lo Falase)
a Wanɛ waya fumbe ka wanu koka monga l’ohomba w’ekimanyielo k’aseka enganga dia vɔ ntshika ɔnwɛlɔ wa wanu. Adɔkɔtɛlɛ efula mbutaka dia wanɛ wele l’okakatanu wendana l’ɔnwɛlɔ wa wanu pombaka mbɔsa yɛdikɔ yaha nnɔ kaanga dipɔpɔ dia wanu.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
