WEKELO 44
Onde fɛtɛ tshɛ ngɛnyangɛnyaka Nzambi?
Jehowa nangaka sho ngɛnangɛna la lɔsɛnɔ ndo kaanga salaka fɛtɛ ntena dimɔtshi. Ko onde fɛtɛ kana afɛstɔ tshɛ mbɔɔngɛnyangɛnyaka? Ngande wakokaso mɛnya ngandji kokaso Jehowa lo dikambo sɔ?
1. Lande na kele fɛtɛ efula hayɔngɛnyangɛnya Jehowa?
Wɛ mbeyaka mamba dia mboka dia fɛtɛ efula hayoki edio oma lo Bible kana yakaye oma le apanganu. Fɛtɛ ya ngasɔ mbeyaka monga la losambi la ɛtɛmwɛlɔ wa kashi. Yɔ mbeyaka monga la losambi l’awui w’ɛdiɛngɛ kana mpikama lo kanyi y’ɔnɛ anima havu. Fɛtɛ mɔtshi mbika edio l’awui wa dikanyiyakanyiya kana nyanga lokolo l’ɔlɔ. (Isaya 65:11) Jehowa mbewolaka atɛmɔdi ande ɔnɛ: “Nyokakitɔne . . . ndo nyotshike minanda ɛngɔ ka mindo.”—2 Kɔrɛtɔ 6:17. a
2. Ngande wayaoka Jehowa lo dikambo dia fɛtɛ yashawɔ anto kɛnɛ kahawahombe nongola?
Jehowa tewolaka diaha sho nkitsha “wɛkamu [aso] le anto w’anyanya.” (Adia Jɛrɛmiya 17:5.) Fɛtɛ mɔtshi tombolaka emboledi kana asɔlayi. Akina salaka fɛtɛ ka dipanda kana katombolawɔ ɛngɔ kɛmɔtshi ka wodja. (1 Joani 5:21) Akina nto keketshaka fɛtɛ y’awui wa pɔlitikɛ kana y’atshunda amɔtshi. Ngande wayoyaoka Jehowa naka sho mbisha onto kana tshunda dimɔtshi kɛnɛmɔ kahawahombe nongola, djekoleko fɛtɛ kakeketsha tokanyi totshikitanyi la sangwelo Diande?
3. Naa ditshelo diakoka mbetɛ fɛtɛ kɔlɔ?
Bible tonaka “ɔnwɛlɔ wa wanu wa tshambandeko, . . . fɛtɛ yele l’awui wa tshambandeko, . . . [la] wodjwelo wa wanu.” (1 Petero 4:3) Lo fɛtɛ mɔtshi anto hawonge la ndjakimɛ ndo vɔ salaka awui wa mindo. Dia ntshikala angɛnyi wa Jehowa, sho pombaka ndjanganya l’awui wakoka tondja mindo lo lɔkɛwɔ.
NYOMOTSHIMOLA
Enda woho wakokayɛ ngɛnyangɛnya Jehowa lo mbɔsa tɛdikɔ ta lomba lo kɛnɛ kendana la waa fɛtɛ.
4. Tona fɛtɛ yahangɛnyangɛnya Jehowa
Nyadia Ɛfɛsɔ 5:10, ndo oma laasɔ, nyɔkɛtshanya ambola anɛ:
-
Kakɔna kahombaso ndjashikikɛ etena kɔsaso yɛdikɔ ya nsala fɛtɛ?
-
Fɛtɛ yakɔna yaleka salema lo dihole diodjashiyɛ?
-
Onde wɛ fɔnyaka dia fɛtɛ shɔ ngɛnyangɛnyaka Jehowa?
Ɛnyɛlɔ, onde wɛ amboyambolaka lushi lɔmɔtshi kɛnɛ kakanyiya Nzambi lo dikambo dia fɛtɛ ya eotwelo? Ndooko dihole diatɛkɛta Bible dia ɔtɛmɔdi wa Jehowa ɔmɔtshi akasale fɛtɛ ka eotwelo, koko tɔ tɛkɛtaka dia fɛtɛ hiende ya eotwelo yakasalema oma le anto waki kombokambɛka. Nyadia Etatelo 40:20-22 ndo Mateo 14:6-10. Ndo oma laasɔ, nyɔkɛtshanya ambola anɛ:
-
Naa dui dimɔtshi diakasalema lo fɛtɛ yakɔ hiende?
-
Oko le yɛ, lo ndjela ɛkɔndɔ wa lo Bible ɛsɔ, ngande wɔsa Jehowa fɛtɛ ya eotwelo?
Koko, wɛ mbeyaka ndjambola ɔnɛ: ‘Ngande wayoyaoka Jehowa naka dimi ntshɔ lo fɛtɛ kɛmɔtshi ka eotwelo kana fɛtɛ kɛmɔtshi kahetawɔ Afundelo?’ Nyadia Etombelo 32:1-8. Ndo oma laasɔ, nyende VIDƐO ndo nyɔkɛtshanya ambola wayela anɛ:
-
Lande na kahombaso ndjashikikɛ ɔnɛ dui kapanda mbetawɔmaka le Jehowa?
-
Ngande wakokaso nsala dui sɔ?
Woho wakokaso mbeya fɛtɛ kahangɛnyangɛnya Nzambi
-
Onde tɔ mpikama lo wetshelo wahatumbi oma l’Afundelo? Dia mbeya dui sɔ, nsala eyangelo dia mbeya oma lɛnɛ akatɔngɔ fɛtɛ kakɔ.
-
Onde tɔ mbishaka anto, atshunda, kana diangɔ dimɔtshi dia lo wodja kɛnɛmɔ kahawahombe nongola? Sho mbishaka Jehowa kɛnɛmɔ koleki tshɛ ndo ndjaɛkɛka le nde dia nkandola ekakatanu wa l’andja ɔnɛ.
-
Onde mbekelo yatɔ ndo ditshelo diatɔ ndɔshanaka l’atɔndɔ wa lo Bible? Sho pombaka ntshikala pudipudi lo lɔkɛwɔ.
5. Kimanyiya anto akina dia vɔ nɛnya dietawɔ diayɛ
Mbeyaka monga wolo dia ntona, etena kakotshutshuya anto akina dia ntshɔ lo fɛtɛ yahangɛnyangɛnya Jehowa. Lembetshiyawɔ yɛdikɔ yayɛ la solo dia lotutsha ndo l’ɔkɔmi tshɛ. Dia mɛna ɛnyɛlɔ kɛmɔtshi ka woho wakokayɛ nsala dui sɔ, nyende VIDƐO.
Nyadia Mateo 7:12, ndo oma laasɔ, nyɔkɛtshanya ambola anɛ:
-
Lo ndjela divɛsa nɛ, onde wɛ pombaka mbutɛ ase nkumbo kayɛ wele bu ambetawudi dia vɔ hawohombe nsala fɛtɛ kapanda?
-
Kakɔna kakokayɛ nsala dia nshikikɛ nkumbo kayɛ dia wɛ mbalangaka ndo mbaɔsaka la nɛmɔ kaanga mbahayasale la wɔ fɛtɛ yasalawɔ?
6. Jehowa nangaka dia sho monga l’ɔngɛnɔngɛnɔ
Jehowa nangaka dia sho mbetsha ntena di’ɔngɛnɔngɛnɔ kaamɛ l’ase nkumbo ndo angɛnyi aso. Nyadia Ondaki 8:15, ndo oma laasɔ, nyɔkɛtshanya dimbola nɛ:
-
Ngande wɛnya divɛsa nɛ dia Jehowa nangaka dia sho monga l’ɔngɛnɔngɛnɔ?
Jehowa nangaka di’ekambi ande monga l’ɔngɛnɔngɛnɔ ndo dia vɔ mbetsha ntena di’amɛna kaamɛ. Nyende VIDƐO dia mɛna woho wɛnama dikambo sɔ hwe lo nsanganya yaso ya wedja efula.
Nyadia Ngalatiya 6:10, ndo oma laasɔ, nyɔkɛtshanya ambola anɛ:
-
Onde sho pombaka nsala fɛtɛ yasala anto efula dia ‘ngɛnyangɛnya’ anto akina?
-
Naa woho wa woshasha wayoleka kosha ɔngɛnɛngɛnɔ, onde wɔnɛ wakotshutshuyawɔ dia nkimɔ dikambo dia fɛtɛ kɛmɔtshi, ko kana wɔnɛ wakimɔyɛ la lolango?
-
Ɛmɛnyi wa Jehowa efula kongɛka ntena dimɔtshi dia laande dikambo di’anawɔ ndo vɔ mbakashimolaka la weshasha ɛmɔtshi. Naka wɛ ekɔ l’ana, naa awui amɔtshi wa laande wakokayɛ nsala lo dikambo diawɔ?
ANTO AMƆTSHI MBUTAKA ƆNƐ: “Bu ohomba mbeya oma lɛnɛ akatɔngɔ fɛtɛ. Kɛnɛ kele ohomba ele mbetsha wenya kaamɛ la nkumbo ndo l’angɛnyi.”
-
Ngande wayoyokadimola?
LO TSHENA PE
Jehowa nangaka dia sho mbetsha ntena di’ɔngɛnɔngɛnɔ sho la nkumbo ndo angɛnyi aso. Koko nde nangaka nto dia sho mbewɔ fɛtɛ yahɔngɛnyangɛnya.
Ovuswelo
-
Ambola akɔna wakokaso ndjaoka dia nshikikɛ kana fɛtɛ kɛmɔtshi hangɛnyangɛnya Jehowa?
-
Ngande wakokaso nkimanyiya nkumbo ndo angɛnyi aso dia vɔ nshihodia tɛdikɔ taso lo kɛnɛ kendana la fɛtɛ?
-
Ngande weyayɛ dia Jehowa nangaka dia sho monga l’ɔngɛnɔngɛnɔ?
SALA EYANGELO
Enda fɛtɛ mɔtshi shikaa yahasale Akristo.
“Lande na kahasale Ɛmɛnyi wa Jehowa fɛtɛ mɔtshi?” (Sawo dia l’Ɛtɛrnɛtɛ)
Enda ɛkɔkɔ ɛnɛi watetawoya dia fɛtɛ ya eotwelo hayɔngɛnyangɛnya Nzambi.
“Lande na kahasale Ɛmɛnyi wa Jehowa fɛtɛ ya eotwelo?” (Sawo dia l’Ɛtɛrnɛtɛ)
Enda kɛnɛ kakasale ɔlɔngɔlɔngɔ ɔmɔtshi l’ɔkɔmi tshɛ etena kakɔsɔkɛ asekande wa la kalasa l’ɔtɛ wa dietawɔ diande lo kɛnɛ kendana la fɛtɛ ka Nɔɛlɛ.
Miliyɔ y’Akristo wakɔshi yɛdikɔ yaha nsala fɛtɛ ka Nɔɛlɛ. Ngande wayaokawɔ lo dikambo dia yɛdikɔ yawɔ shɔ?
a Enda Nɔtɛ ka la koma 5 dia mbeya kɛnɛ kahombayɛ nsala lo dikambo dia weho ɛmɔtshi wa fɛtɛ.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
