Atshukanyi w’eyoyo nongamɛka di’ɔngɛnɔngɛnɔ wakonge lawɔ lushi la diwala wayotshikalaka pondjo. Dui sɔ koka salema. Akristo wambotshukana edja ndo wasala la wolo dia nkamba l’alako wa lo Bible mbeyaka dia dui sɔ diekɔ mɛtɛ.

1. Alako akɔna washa Bible waomi?

Jehowa akasɔnɛ omi dia monga owandji wa nkumbo. (Adia Ɛfɛsɔ 5:23.) Jehowa nongamɛka dia nde mbɔsa tɛdikɔ tayonga la wahɔ le nkumbo. Bible ndakaka waomi ɔnɛ: “Nyotetemale nanga wadiɛnyu.” (Ɛfɛsɔ 5:25) Kakɔna kalembetshiya dui sɔ? Omi lalanga wadɛnde mbosalɛka akambo la ngandji, oyadi lo luudu kana la ntondo k’anto. Nde mbokokɛka oma lo waale ndo salaka tshɛ dia nkotsha ehomba ande wa lo demba ndo wa longandji. (1 Timɔte 5:8) Kɛnɛ koleki ohomba ele, nde kotshaka ehomba ande wa lo nyuma. (Mateo 4:4) Ɛnyɛlɔ, nde koka nɔmba ndo mbadia Bible kaamɛ la wadɛnde. Naka omi nkotsha ehomba wa wadɛnde la ngandji tshɛ, kete nde ayokokɛ diɔtɔnganelo diele lam’asande la Jehowa.​—Adia 1 Petero 3:7.

2. Alako akɔna washa Bible waa wadi?

Ɔtɛkɛta wa Nzambi mbutaka dia wadi “pombaka monga la dilɛmiɛlɔ di’efula otsha le omɛnde.” (Ɛfɛsɔ 5:33) Ngande wakokande nsala dui sɔ? Nde koka nkana yimba lo waonga w’amɛna wele l’omɛnde ndo lo welo wadjande dia nkotsha ehomba ande ndo w’anawɔ. Nde koka nto mɛnya dilɛmiɛlɔ diande lo nsukɛ tɛdikɔ tɔsa omɛnde ndo lo tɛkɛtaka la dilɛmiɛlɔ tshɛ otsha le nde ndo lo dikambo diande, oyadi nde bu ombetawudi.

3. Ngande wakoka atshukanyi nkeketsha diwala diawɔ?

Bible mbutaka lo dikambo di’atshukanyi ɔnɛ: “Vɔ 2 wayoyala demba 1.” (Mateo 19:5) Kɛsɔ nembetshiyaka dia vɔ pombaka ndɔshana la dui tshɛ diakoka nkitshakitsha ngandji kokanawɔ. Vɔ salaka dui sɔ lo mbetshaka wenya kaamɛ mbala la mbala ndo lo kɛnɛmwanɛka tokanyi tawɔ, ngandji kawɔ ndo woho wayaokawɔ. Vɔ hawetawɔ di’ɛngɔ kana onto ɔmɔtshi ndeka olonganyi awɔ ohomba, paka Jehowa. Lo yoho ya laande, vɔ mbewɔka dia monga la diɔtɔnganelo dia ma ma l’onto okina lele bu olonganyi ande.

 NYOMOTSHIMOLA

4. Waomi le, nyolange ndo nyokoke wadɛnyu

5. Waa wadi le, nyolange ndo nyɔlɛmiya waomɛnyu

Bible keketshaka wadi dia nɛmiya omɛnde oyadi nde kambɛka Jehowa kana bu. Nyadia 1 Petero 3:1, 2, ndo oma laasɔ, nyɔkɛtshanya ambola anɛ:

• Naka wɛ ekɔ l’omi lele bu ombetawudi, kete aha la taamu wɛ nangaka dia nde ntɛmɔla Jehowa. Oko le yɛ, naa yoho yoleki dimɛna ya mbokimanyiya? Onde mbosambishaka mbala la mbala, ko kana monga la lɔkɛwɔ la dimɛna ndo la dilɛmiɛlɔ? Lande na?

Waomi la waa wadi kokaka mbɔsa tɛdikɔ t’amɛna kaamɛ. Koko, lo ntena dimɔtshi, mbeyaka monga ko wadi bu l’omɛnde kanyi ɔtɔi. Etena kɛsɔ nde pombaka mbewoya omɛnde tokanyi tande la dilɛmiɛlɔ. Koko nde pombaka mbeya dia Jehowa akasha omi ɔkɛndɛ wa nshikikɛ kɛnɛ koleki dimɛna le nkumbo.  Nde pombaka nsala tshɛ dia nsukɛ yɛdikɔ yambɔsa omɛnde. Lo nsala ngasɔ, nde mbishaka lonya di’ɔngɛnɔngɛnɔ monga lo nkumbo. Nyadia 1 Petero 3:3-5, ndo oma laasɔ, nyɔkɛtshanya dimbola nɛ:

• Ngande wayaoka Jehowa etena kalɛmiya wadi omɛnde?

6. Nyu koka ntondoya ekakatanu wa lo diwala dianyu

 LO TSHENA PE

Wadi l’omi koka monga l’ɔngɛnɔngɛnɔ naka vɔ mbokana ngandji, nɛmiyana ndo nkamba l’atɔndɔ wa lo Bible.

Ovuswelo

• Ngande wakoka omi mbisha lonya dia diwala monga l’ɔngɛnɔngɛnɔ?

• Ngande wakoka wadi mbisha lonya dia diwala monga l’ɔngɛnɔngɛnɔ?

• Naka wɛ ekɔ otshukanyi, tɔndɔ diakɔna dia lo Bible diakoka kokimanyiya dia nkeketsha diwala diayɛ?