WEKELO 50
Ngande wakoka nkumbo kayɛ monga l’ɔngɔnɔngɛnɔ?—Etenyi 2
Ana wekɔ woshasha ɔmɔtshi w’oma le Jehowa. Nde nongamɛka dia ambutshi nkokɛ dimɛna woshasha ɔsɔ. Jehowa mbishaka alako wa lomba wakoka nkimanyiya ambutshi dia nsala dikambo sɔ. Alako ande koka nto nkimanyiya ana dia vɔ mbisha lonya dia nkumbo monga l’ɔngɛnɔngɛnɔ.
1. Alako akɔna washa Jehowa ambutshi?
Jehowa nongamɛka di’ambutshi nanga anawɔ ndo mbetshaka wenya efula la wɔ. Nde nangaka nto di’ambutshi nkokɛ anawɔ oma lo waale ndo nkamba la atɔndɔ wa lo Bible dia mbaetsha. (Tokedi 1:8) Nde mbutɛka ambutshi w’apami ate: ‘Nyotetemale mbodia ananyu lo alako wa Jehowa.’ (Adia Ɛfɛsɔ 6:4.) Jehowa ayɔngɛnangɛna naka ambutshi ndjela ɛlɔmbwɛlɔ kande etena kodiawɔ anawɔ ndo naka hawosha onto okina ɔkɛndɛ ɔsɔ.
2. Alako akɔna washa Jehowa ana?
Jehowa mbutɛka ana ɔnɛ: “Nyokitanyiya ambutshi anyu.” (Adia Kɔlɔsayi 3:20.) Etena kalɛmiya ndo kakitanyiya ana ambutshi awɔ, vɔ ngɛnyangɛnyaka Jehowa ndo ambutshi awɔ mongaka l’ɔngɛnɔngɛnɔ. (Tokedi 23:22-25) Yeso akasha ɛnyɛlɔ ka dimɛna etena kakinde ɔna. Kaanga mbakinde kokele, nde akakitanyiyaka ndo akalɛmiyaka ambutshi ande.—Luka 2:51, 52.
3. Oko nkumbo, ngande wakokanyu ndeka ndjasukanya la Nzambi?
Naka wɛ ekɔ ombutshi, kete aha la taamu wɛ nangaka dia anayɛ mboka Jehowa ngandji efula oko wawokayɛ. Ngande wakokayɛ nkotsha oyango ɔsɔ? Lo nsala kɛnɛ kata Bible ɔnɛ: ‘Kɔkɔkɔmiyake anayɛ ɛtɛkɛta wa Jehowa ndo kowatɛkewɔ lam’odjashiyɛ lo luudu layɛ ndo lam’atayakɛndakɛnda lo mboka.’ (Eohwelo k’Ɛlɛmbɛ 6:7) “Kɔkɔmiya” kɛdikɛdi mbetsha lo kalolɛka dui dimɔtshi mbala la mbala. Diakɔ diele, wɛ pombaka kalolɛka dui dimɔtshi mbala la mbala dia kimanyiya anayɛ dia vɔ ndjodiohɔka. Divɛsa nɛ nembetshiyaka dia wɛ pombaka nyangaka mbala la mbala waaso wa sawolaka l’anayɛ awui wendana la Jehowa. Ekɔ dui dia dimɛna dia ndjaombɛka yema y’etena lomingu tshɛ dia nsala ɔtɛmwɛlɔ wa lo nkumbo. Naka wɛ bu l’ana, kete wɛ ayoleka ntetemala nkondja wahɔ lo tshungolaka etena lomingu tshɛ dia mbeka Ɔtɛkɛta wa Nzambi.
NYOMOTSHIMOLA
Enda alako w’eshika wayokimanyiya dia nkumbo monga l’ɔngɛnɔngɛnɔ ndo la lotui tshitshi.
4. Etshaka anayɛ la ngandji
Mbetsha ɔna koka monga dui dia wolo. Ngande wakoka Bible kokimanyiya? Nyadia Jakɔba 1:19, 20, ndo oma laasɔ, nyɔkɛtshanya ambola anɛ:
-
Ngande wakoka ambutshi nkɛnɛmɔla ngandji etena kasawolawɔ la anawɔ?
-
Lande na kele ombutshi hahombe pondjo mpokola anande etena kende la nkɛlɛ? a
5. Kokɛka anayɛ
Dia nkokɛ anayɛ, ekɔ ohomba wɛ sawolaka la ɔna tshɛ awui wendana la dieyanelo. Wɛ koka mboka onyɔ wotsho dia nsawola la wɔ awui asɔ. Nyende VIDƐO, ndo oma laasɔ nyɔkɛtshanya ambola wayela anɛ:
-
Lande na kele ekɔ dui dia wolo le ambutshi amɔtshi dia nsawola la anawɔ awui wendana la dieyanelo?
-
Lo yoho yakɔna yakalembetshiya ambutshi anawɔ awui wendana la dieyanelo?
Oko wakadiatama, andja wa Satana wekɔ lo taleke monga kɔlɔ. Nyadia 2 Timɔte 3:1, 13, ndo oma laasɔ, nyɔkɛtshanya dimbola nɛ:
-
Anto amɔtshi wa kɔlɔ wɔtɛkɛtshiwɔ lo divɛsa 13 mbeyanaka l’ana la wolo. Laasɔ, lande na kele ekɔ ohomba dia ambutshi mbetsha anawɔ awui wendana la dieyanelo, ndo ngande wakokawɔ nkokɛ anawɔ oma le anto asɔ?
Onde wɛ akeyaka?
Ɛmɛnyi wa Jehowa todjaka dihomɔ efula diakimanyiya ambutshi dia mbetsha anawɔ awui wendana la dieyanelo ndo mbakokɛ oma le wanɛ wayanga mbeyana la wɔ la wolo. Ɛnyɛlɔ, enda:
-
Nyokoke ananyu (vidɛo)
-
Etshama oma le Ombetsha a Woke, tshapita 10 ndo 32
-
“Nyetshake ananyu awui wendana la dieyanelo” (Emɔ! No. 5 2016 lo Falase)
6. Nyɔlɛmiyake ambutshi anyu
Ana wa totshitshɛ ndo waya tomangase koka mɛnya dia vɔ nɛmiyaka ambutshi awɔ oma lo woho watɛkɛtawɔ la wɔ. Nyende VIDƐO, ndo oma laasɔ, nyɔkɛtshanya ambola wayela anɛ:
-
Lande na kele ekɔ dui l’ɔlɔlɔ dia ɔlɔngɔlɔngɔ kana osekaseka sawolaka l’ambutshi ande la dilɛmiɛlɔ tshɛ?
-
Ngande wakoka ɔlɔngɔlɔngɔ kana osekaseka nsawola la ambutshi ande lo yoho yɛnya dia nde mbashaka kɛnɛmɔ?
Nyadia Tokedi 1:8, ndo oma laasɔ, nyɔkɛtshanya dimbola nɛ:
-
Kakɔna kahomba ɔlɔngɔlɔngɔ kana osekaseka nsala etena kawosha ambutshi ande ɛlɔmbwɛlɔ?
7. Nyɔtɛmɔlake Jehowa oko nkumbo
Nkumbo y’Ɛmɛnyi wa Jehowa ndjaombɛka etena lomingu tshɛ dia ntɛmɔla Jehowa kaamɛ. Ngande wahomba monga ɔtɛmwɛlɔ wa lo nkumbo ɔsɔ? Nyende VIDƐO, ndo oma laasɔ, nyɔkɛtshanya ambola wayela anɛ:
-
Ngande wakoka nkumbo salaka ɔtɛmwɛlɔ wa lo nkumbo mbala la mbala?
-
Kakɔna kakoka ombutshi ɔmɔtshi nsala dia mbetɛ ɔtɛmwɛlɔ wa lo nkumbo dui di’ɔngɛnɔngɛnɔ?—Enda osato wele l’etatelo ka wekelo ɔnɛ.
-
Kakɔna kakoka monga okakatanu le nkumbo kayɛ dia nyu mbekaka kaamɛ?
L’Isariyɛlɛ w’edjedja, Jehowa akalongamɛka di’ase nkumbo sawolaka mbala la mbala awui wendana l’Afundelo. Nyadia Eohwelo k’Ɛlɛmbɛ 6:6, 7, ndo oma laasɔ, nyɔkɛtshanya dimbola nɛ:
-
Ngande wakokayɛ nkamba la tɔndɔ nɛ?
Tokanyi tendana la wekelo wa nkumbo:
-
Nyɔlɔngɔsɔlake nsanganya ya l’etshumanelo.
-
Nyadia ndo nyɔkɛtshanya ɔkɔndɔ ɔmɔtshi wa lo Bible wayɔngɛnyangɛnya nkumbo kayɛ.
-
Naka nyekɔ l’ana wa totshitshɛ, kete telesharjɛ kana ɛprimɛ olimu ɔmɔtshi wendana l’ana oma lo jw.org.
-
Naka nyekɔ l’ana wele l’ɛnɔnyi dikumi l’ɛmɔtshi, nyɔkɛtshanya sawo dimɔtshi di’oma l’asawo wendana la ɛlɔngɔlɔngɔ oma lo jw.org.
-
Nyɔkɛnya l’ananyu kɛnyɔ y’ɔkɔndɔ ɔmɔtshi wa lo Bible.
-
Nyende ndo nyɔkɛtshanya vidɛo mɔtshi y’oma lo jw.org.
ANTO AMƆTSHI MBUTAKA ƆNƐ: “Bible kekɔ wolo nshihodia le ana.”
-
Ngande wayoyokadimola?
LO TSHENA PE
Jehowa nangaka di’ambutshi nanga, mbetsha, ndo nkokɛ anawɔ; nde nangaka di’ana nɛmiya ndo nkitanyiya ambutshi awɔ; ndo dia nkumbo mbɔtɛmɔla kaamɛ.
Ovuswelo
-
Ngande wakoka ambutshi mbetsha ndo nkokɛ anawɔ?
-
Ngande wakoka ana mɛnya dia vɔ nɛmiyaka ambutshi awɔ?
-
Ɛlɔlɔ akɔna waya lo ndjaombɛka etena lomingu tshɛ dikambo dia ɔtɛmwɛlɔ wa lo nkumbo?
SALA EYANGELO
Wetshelo akɔna wayokimanyiya ɔnayɛ dia ndjokoma opalanga weya mɛmba ɛkɛndɛ?
Enda alako w’eshika washa Bible wanɛ wakokɛ ambutshi awɔ waya esombe.
“Kakɔna kata Bible lo dikambo dia wanɛ wakokɛ ambutshi awɔ waya esombe?” (Sawo dia l’Ɛtɛrnɛtɛ)
Enda woho wakakome pami kɛmɔtshi kaki kombeyaka woho wa mbodia ana ombutshi wa dimɛna efula.
Enda woho wakoka ambutshi w’apami nkeketsha diɔtɔnganɛlo diasawɔ l’anawɔ.
“Ngande wakoka ambutshi w’apami ntshikala suke suke l’anawɔ w’apami?” (Tshoto y’Etangelo, Ngɔndɔ ka ntondo 1, 2012)
a Lo Bible, mpokola nembetshiyaka mbetsha, nɔmbɔla, ndo mingola. Vɔ hawohombe pondjo mbishama la djawudi ndo l’esehe.—Tokedi 4:1.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
