WEKELO 53
Sɔna tɔkɛnyɔ tangɛnyangɛnya Jehowa
Jehowa ekɔ “Nzambi k’ɔngɛnɔngɛnɔ.” (1 Timɔte 1:11) Nde nangaka sho monga l’ɔngɛnɔngɛnɔ ndo ngɛnangɛna la lɔsɛnɔ. Nde ngɛnangɛnaka etena kayatshungwɛso etena dia nkɔkɔla demba. Lo wekelo ɔnɛ, tayɛna woho wakokaso nkamba l’ɔkɔkwɛlɔ wa demba lo yoho yatosha ɔngɛnɔngɛnɔ ndo yangɛnyangɛnya Jehowa.
1. Kakɔna kahombaso mbohɔka lo kɛnɛ kendana l’ɔsɔnwɛlɔ aso wa tɔkɛnyɔ?
Kakɔna katoyolangaka nsala etena kakɔkɔlayɛ demba? Amɔtshi kombolaka mbetsha wenya wakɔkɔlawɔ demba la ngelo, lo mbadia dibuku dimɔtshi, lo mpokamɛ mishiki, lo menda filmɛ kɛmɔtshi, kana lo mbɔtɔ l’Ɛtɛrnɛtɛ. Akina ngɛnangɛnaka ntshɔ tosala osale kana tɔkɛnya tɔkɛnyɔ tokina. Oyadi kɛnyɔ yakɔna yalekaso nanga, sho pombaka ndjashikikɛ dia yɔ ‘mbetawɔmaka le Nkumadiɔndjɔ.’ (Ɛfɛsɔ 5:10) Ekɔ ohomba sho nshihodia dikambo sɔ nɛ dia tɔkɛnyɔ efula taleka anto nkɛnya ɛlɔ kɛnɛ tekɔ l’awui wahetsha Jehowa. Ɛnyɛlɔ oko, awui wa ngala, awui wa mindo wa dieyanelo, kana w’ɛdiɛngɛ. (Adia Osambo 11:5.) Kakɔna kayotokimanyiya dia nsɔna tɔkɛnyɔ taso la lomba tshɛ?
Naka sho nsɔna angɛnyi woka Jehowa ngandji, kete vɔ wayonga la shɛngiya ya dimɛna le so ndo l’ɔsɔnwɛlɔ aso wa tɔkɛnyɔ. Oko wakatadiɛnyi lo wekelo wetshi, “ɔnɛ latɛngɔlaka kaamɛ la akanga wa lomba ayonga kanga lomba.” Lo wedi okina, naka sho mongaka mbala la mbala kaamɛ l’anto wahalange atɔndɔ wa Nzambi, kete ‘tayokomɛ lo kɔlɔ.’—Tokedi 13:20.
2. Lande na kele ekɔ ohomba menda wenya engana wetsheso lo tɔkɛnyɔ?
Oyadi kɛnyɔ yɔsɔnyiso yekɔ dimɛna, sho pombaka menda ɔlɔlɔ diaha mbetsha wenya amboleka lo kɛnyɔ yakɔ. Ndo sho mbeyaka ndjonga ko taya bu la wenya efula wa nsala akambo woleki ohomba. Bible tokeketshaka dia ‘nkamba la wenya aso lo yoho yoleki dimɛna.’—Adia Ɛfɛsɔ 5:15, 16.
NYOMOTSHIMOLA
Eka woho wa mbɔsa tɛdikɔ t’amɛna lo kɛnɛ kendana la tɔkɛnyɔ tayɛ.
3. Ewɔ tɔkɛnyɔ ta kɔlɔ
Lande na kahombaso nsɔna tɔkɛnyɔ taso la yambalo tshɛ? Nyende VIDƐO, ndo oma laasɔ, nyɔkɛtshanya ambola wayela anɛ:
-
Ngande wafɔna tɔkɛnyɔ takasalemaka la Rɔmɔ w’edjedja la tɔnɛ tasalema nshi nyɛ?
-
Lo vidɛo yɛnyiso, wetshelo akɔna wakakondja Danny lo kɛnɛ kendana la tɔkɛnyɔ?
Nyadia Rɔmɔ 12:9, ndo oma laasɔ, nyɔkɛtshanya dimbola nɛ:
-
Shɛngiya yakɔna yele la divɛsa nɛ l’ɔsɔnwɛlɔ ayɛ wa tɔkɛnyɔ?
Naa awui amɔtshi wahetsha Jehowa? Nyadia Tokedi 6:16, 17 ndo Ngalatiya 5:19-21. L’ɔkɔngɔ wa mbadia divɛsa tshɛ, nyɔkɛtshanya dimbola nɛ:
-
Naa awui amɔtshi wa l’avɛsa anɛ waleka mɛnama lo tɔkɛnyɔ ta nshi nyɛ?
Woho wa nsɔna tɔkɛnyɔ tayɛ la lomba
Yambola wate:
-
Dikambo diakɔna? Onde yɔ yekɔ la dikambo dimɔtshi diahetsha Jehowa?
-
Etena ka ngande? Onde yɔ mbidjɛkami wekamu l’awui woleki ohomba?
-
Onto akɔna? Onde yɔ konyakami dia mongaka mbala la mbala kaamɛ l’anto wahoke Jehowa ngandji?
Ekɔ dimɛna ndjanganya la waale tshɛ wakoka tokomɛ. Diakɔ diele sho pombaka ndjanganya la kɛnyɔ tshɛ yavɔso tshɔdia
4. Kamba la wenya ayɛ la lomba
Nyende VIDƐO, ndo oma laasɔ, nyɔkɛtshanya dimbola diayela nɛ:
-
Kaanga mbele ɔnangɛso lɛnyiso lo vidɛo komenda awui wa kɔlɔ, naa okakatanu waki la nde?
Nyadia Filipɛ 1:10, ndo oma laasɔ, nyɔkɛtshanya dimbola nɛ:
-
Ngande wakoka divɛsa nɛ tokimanyiya dia nshikikɛ yɛdikɔ ya wenya yahombaso mbetsha l’ɔkɔkwɛlɔ wa demba?
5. Sɔna tɔkɛnyɔ t’amɛna
Kaanga mbele tɔkɛnyɔ tɔmɔtshi hatɔngɛnyangɛnya Jehowa, ekɔ awui efula w’amɛna wahonyangiya. Nyadia Ondaki 8:15 ndo Filipɛ 4:8, ndo oma laasɔ, nyɔkɛtshanya dimbola nɛ:
-
Naa tɔkɛnyɔ tɔmɔtshi t’amɛna talangayɛ?
Wɛ koka ngɛnangɛna la tɔkɛnyɔ t’amɛna
ANTO AMƆTSHI MBUTAKA ƆNE: “Tɔkɛnyɔ tɛnya awui wa ngala, awui wa mindo, kana awui w’ɛdiɛngɛ bu kɔlɔ, naka hasale awui akɔ.”
-
Ngande wayoyokadimola?
LO TSHENA PE
Jehowa nangaka dia sho nsɔna ndo ngɛnangɛna la tɔkɛnyɔ t’amɛna.
Ovuswelo
-
Tɔkɛnyɔ takɔna tahomba Akristo mbewɔ?
-
Lande na kahombaso mbidja yimba efula lo yɛdikɔ ya wenya yetshaso lo tɔkɛnyɔ?
-
Lande na kalangayɛ nsɔna tɔkɛnyɔ tangɛnyangɛnya Jehowa?
SALA EYANGELO
Eya onto akɔna lele l’ɔkɛndɛ lo kɛnɛ kendana l’ɔsɔnwɛlɔ aso wa tɔkɛnyɔ.
“Onde ekɔ filmɛ, abuku kana esambo ɛmɔtshi wakawasekɛ Ɛmɛnyi wa Jehowa?” (Sawo dia l’Ɛtɛrnɛtɛ)
Enda woho wakokayɛ mbɔsa tɛdikɔ t’amɛna lo kɛnɛ kendana la tɔkɛnyɔ ndo l’ɔkɔkwɛlɔ wa demba.
“Onde tɔkɛnyɔ takɛnyayɛ tekɔ amɛna?” (Tshoto y’Etangelo, Ngɔndɔ ka dikumi 15, 2011)
L’ɔkɔndɔ wa lɔsɛnɔ wata ɔnɛ: “Lakayonyaka tɔkɛnyɔ ta kɔlɔ taki lami,” enda lande na kele pami kɛmɔtshi akayotshikitanyaka ɔsɔnwɛlɔ ande wa tɔkɛnyɔ.
“Bible tshikitanyaka nsɛnɔ y’anto” (Tshoto y’Etangelo, Ngɔndɔ k’esambele 1, 2010)
Enda woho wɔsa mama kɛmɔtshi yɛdikɔ ya lomba lo kɛnɛ kendana la tɔkɛnyɔ tɛnya awui w’ɛdiɛngɛ.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
