WEKELO 56
Tolame kaamɛ ka l’etshumanelo
Etena keso kaamɛ l’asekaso ambetawudi, sho ndjaokaka oko nkumekanga Davidɛ lakate ate: “Ande dimɛna ndo ande ɔlɔ dia onto la ɔnango mbidjasɛ kaamɛ lee!” (Osambo 133:1) Kaamɛ kaso haye oyaya. Sho tshɛ mbishaka lonya dia nama kaamɛ kɛsɔ.
1. Naa dui dia diambo diɛnama l’atei w’ekambi wa Nzambi?
Naka wɛ mbɔtɔ lo losanganya lɔmɔtshi la l’etshumanelo ka lo wodja okina, kete mbeyaka monga ko wɛ hatoka ɔtɛkɛta akɔ, koko lo toho efula wɛ ayoyaoka oko onto lele l’etshumanelo kanyu. Lande na? Nɛ dia sho mbekaka Bible lo nkamba l’ekanda akɔ waamɛ dihole tshɛ. Ndo sho salaka la wolo dia mɛnyanya ngandji lam’asaso. Oyadi dihole diakɔna diadjasɛso, sho tshɛ “mbelɛka lokombo la Jehowa kana mbɔtɛmɔlaka lo kaamɛ.”—Zɛfaniya 3:9, nɔtɛ ka l’ɛse ka dikatshi.
2. Kakɔna kakokayɛ nsala dia nama kaamɛ?
“Nyokane ngandji k’efula k’oma k’ɛse otema lam’asanyu.” (1 Petero 1:22) Ngande wakokayɛ nkamba la dako sɔ? Lo dihole dia mbika washo paka lo munga y’anto akina, nka washo lo waonga awɔ w’ɛlɔlɔ. Lo dihole dia mbetsha wenya paka l’anto weyana la yɛ ato, yanga dia mbeya anangɛso l’akadiyɛso woye oma l’ahole akina. Sho pombaka nto nsala la wolo dia minya tokanyi takananɛ kɔlɔ takokaso monga la tɔ.—Adia 1 Petero 2:17. a
3. Kakɔna kayoyosala etena katomba okakatanu ɔmɔtshi lam’asayɛ l’osekayɛ Okristo?
Tekɔ kaamɛ, koko sho bu kokele. Lo ntena dimɔtshi, sho mindjanɛka ndo salanɛka kɔlɔ. Koko, Ɔtɛkɛta wa Nzambi totɛka ɔnɛ: ‘Nyotetemale dimanyiyana lam’asanyu,’ ndo vɔ kotshaka ɔnɛ: “Oko wakanyodimanyiya Jehowa l’otema ɔtɔi, nyu lawɔ pombaka nsala woho akɔ waamɛ.” (Adia Kɔlɔsayi 3:13.) Tekɔ lo salɛ Jehowa kɔlɔ yaheyama mbadia, koko nde todimanyiyaka. Diakɔ diatɔlɔmbande dia sho dimanyiyaka anangɛso l’akadiyɛso. Naka wɛ ambɛna dia wɛ ambosalɛ onto ɔmɔtshi kɔlɔ, kete ɔsa yɛdikɔ ya nkandola dikambo sɔ aha la ntshimbatshimba.—Adia Mateo 5:23, 24. b
NYOMOTSHIMOLA
Yanga toho takokayɛ mbisha lonya dia kaamɛ ndo wɔladi monga l’etshumanelo.
Kakɔna kayoyosala dia mbidja wɔladi?
4. Tshika kanɛ anto kɔlɔ
Sho nangaka mboka anangɛso tshɛ ngandji. Koko sho mbeyaka monga l’okakatanu dia nsala dikambo sɔ otsha le onto lotshikitanyi la so. Ko kakɔna kakoka tokimanyiya? Nyadia Etsha 10:34, 35, ndo oma laasɔ, nyɔkɛtshanya ambola anɛ:
-
Jehowa mbetawɔka dia weho w’anto tshɛ monga Ɛmɛnyi ande. Ngande wahomba dui sɔ monga la shɛngiya lo woho wɔsayɛ anto woye oma l’ahole akina?
-
Naa toho tɔmɔtshi ta kanɛ anto kɔlɔ tambokokanɛ l’ɛtshi kanyu ka nkɛtɛ tahombayɛ mbewɔ?
Nyadia 2 Kɔrɛtɔ 6:11-13, ndo oma laasɔ, nyɔkɛtshanya dimbola nɛ:
-
Oko le yɛ, ngande wakokayɛ ndjasukanya l’anangɛyɛ l’akadiyɛyɛ woye oma l’ahole wotshikitanyi?
5. Dimanyiyaka l’otema ɔtɔi ndo djaka wɔladi
Jehowa todimanyiyaka l’otema ɔtɔi kaanga mbele nde hongaki pondjo l’ohomba wa sho mbodimanyiya. Nyadia Osambo 86:5, ndo oma laasɔ, nyɔkɛtshanya ambola anɛ:
-
Ngande wele woke woke w’edimanyielo ka Jehowa?
-
Lande na keyɛ la lowando l’efula l’edimanyielo kande?
-
Awui akɔna wakoka todjɛ wekamu dia mbidja wɔladi lam’asaso l’anto akina ?
Ngande wakokaso mbokoya Jehowa lo ntetemala monga kaamɛ l’anangɛso l’akadiyɛso? Nyadia Tokedi 19:11, ndo oma laasɔ, nyɔkɛtshanya dimbola nɛ:
-
Etena kakosha onto ɔmɔtshi nkɛlɛ kana kakonyangiyande, kakɔna kakokayɛ nsala dia nkandola dui sɔ?
Lo ntena dimɔtshi, sho salɛka anto akina kɔlɔ. Etena katomba dikambo dia ngasɔ, kakɔna kahombaso nsala? Nyende VIDƐO, ndo oma laasɔ, nyɔkɛtshanya dimbola diayela nɛ:
-
Lo vidɛo yɛnyiso, kakɔna kakasale kadiyɛso kingo dia mbidja wɔladi?
6. Yanga kɛnɛ kele ɔlɔlɔ le anangɛyɛ l’akadiyɛyɛ wa l’etshumanelo
Naka sho ndeka ndjasukanya l’anangɛso l’akadiyɛso, kete tayeya akambo wewɔ wolo ndo wewɔ wɔdu lɔkɔ. Ngande wakokaso mbika washo lo waonga awɔ w’ɛlɔlɔ? Nyende VIDƐO, ndo oma laasɔ, nyɔkɛtshanya dimbola diayela nɛ:
-
Kakɔna kakoka kokimanyiya dia mɛna waonga w’ɛlɔlɔ w’anangɛyɛ l’akadiyɛyɛ?
Jehowa mbikaka washo lo waonga aso w’amɛna. Nyadia 2 Ɛkɔndɔ 16:9a, ndo oma laasɔ, nyɔkɛtshanya dimbola nɛ:
-
Ngande wayaokayɛ lo mbeya dia Jehowa mbikaka washo lo waonga ayɛ w’amɛna?
Kaanga diyama dia dimɛna, mongaka la tɔkɔmɔkɔmɔ, koko diɔ tetemalaka monga la nɛmɔ. Woho akɔ waamɛ mbele, anangɛso l’akadiyɛso keema kokele, koko vɔ wekɔ la nɛmɔ lo washo wa Jehowa
ANTO AMƆTSHI MBUTAKA ƆNƐ: “Paka lambolanga ko dimi dimanyiya onto.”
-
Lande na kahombaso nomɔlomɔ dia dimanyiya anto akina?
LO TSHENA PE
Wɛ koka mbisha lonya dia nama kaamɛ ka l’etshumanelo lo dimanyiyanaka ndo lo mbokaka anangɛyɛ l’akadiyɛyɛ tshɛ ngandji.
Ovuswelo
-
Ngande wakokayɛ ntshika kanɛ anto akina kɔlɔ?
-
Kakɔna kakokayɛ nsala naka wɛ ekɔ l’okakatanu l’osekayɛ Okristo?
-
Lande na kalangayɛ mbokoya ɛnyɛlɔ ka Jehowa lo kɛnɛ kendana la dimanyiya anto akina?
SALA EYANGELO
Enda woho wakoka wɛɛla ɔmɔtshi wa Yeso tokimanyiya dia mbewɔ nombosha anto akina.
Onde sho koka nɔmba edimanyielo naka sho fɔnyaka dia hatosadi dui dimɔtshi dia kɔlɔ?
“Nɔmba edimanyielo ekɔ yoho ya dimɛna efula ya mbidja ki” (Tshoto y’Etangelo, Ngɔndɔ ka dikumi l’ɔtɔi 1, 2002)
Enda woho wakeke anto amɔtshi dia salɛ anto akambo aha la shɔnɔdi.
Enda woho wakokayɛ nkandola dikambo diele lam’asayɛ l’onto ɔmɔtshi la ntondo ka diɔ ndjofukutanya wɔladi wa l’etshumanelo.
“Tokandole ekakatanu la yimba ya ngandji” (Tshoto y’Etangelo, Ngɔndɔ ka tanu 2016)
a Nɔtɛ ka la koma 6 mɛnyaka woho watshutshuya ngandji Akristo dia mbewɔ mbishana hemɔ yasambemɛ.
b Nɔtɛ ka la koma 7 mɛnyaka woho wakokaso nkandola ekakatanu wendana l’awui w’okanda ndo awui wa laka lɛɛta.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
