Onde wɛ ekɔ lo mɛna yana ya yimato yele l’osato ɔnɛ?— Nde ekɔ ɔnaki Jafɛta. Bible hatotɛ lokombo l’ɔnakɔ, koko sho mbeyaka dia nde akangɛnyangɛnya she ndo Jehowa. Ɛsɔ tɔsɛdingole akambo amɔtshi wendana la nde ndo la Jafɛta ka she.

Jafɛta aki pami k’ɔlɔlɔ ndo nde aketshaka wenya efula dia mbetsha ɔnande la womoto ɔsɔ akambo wendana la Jehowa. Nde aki nto pami ka wolo ndo ɔnɔmbɔdi w’oshika. Diakɔ diakɔɔlɔmbɛ ase Isariyɛlɛ dia nde mbalɔmbɔla dia vɔ tɔlɔsha atunyi awɔ.

Jafɛta akalɔmbɛ ekimanyielo kaki Nzambi dia nde tɔlɛndja. Jafɛta akalake Jehowa dia naka nde tɔlɛndja, kete nde ayowosha onto la ntondo layotomba oma lo luudu lande dia ndjoolongola etena kayondokalola. Onto ɔsɔ akahombe todjasɛ  ndo tokambɛ Nzambi lo tabɛrnakɛlɛ lɔsɛnɔ lande l’otondo. Tabɛrnakɛlɛ aki dihole diakatshɔka anto dia tɔtɛmɔla Nzambi. Dui dia diambo ko Jafɛta akatɔlɛndja lo ta sɔ. Onde wɛ mbeyaka onto la ntondo lakatombe oma lo luudu lande dia ndjoolongola etena kakandakalola la ngelo?—

Eelo, ɔnande la womoto. Nde aki tshɔi y’ɔna yaki Jafɛta, koko kakianɛ nde pombaka mbotoma dihole dikina. Dui sɔ diakanyangiya Jafɛta efula. Koko ohɔ dia nde akatshike dɔkɔlɔkɔ la ntondo ka Jehowa. Mbala kakɔ ɔtɔi, ɔnande la womoto akawotɛ ate: ‘Ipa, eya dia wɛ akatshike dɔkɔlɔkɔ la ntondo ka Jehowa ndo wɛ pombaka dikotsha.’

Ɔnaki Jafɛta la womoto nde lawɔ akanyange. Aki ngasɔ nɛ dia lo tabɛrnakɛlɛ, taakandahombe ntshukama kana mbota ana. Koko nde akalangaka nkotsha dɔkɔlɔkɔ diakatshike she ndo ngɛnyangɛnya Jehowa woho w’anyanya. Dui sɔ diaki ohomba efula le nde oleki ntshukama kana mbota ana. Oma lɔkɔ mbele, nde akatshike nkumbo kande ndo akatodjasɛ lo tabɛrnakɛlɛ lɔsɛnɔ lande l’otondo.

Onde wɛ fɔnyaka dia kɛnɛ kakandasale kɛsɔ kakangɛnyangɛnya she ndo Jehowa?— Eelo, ngasɔ mbakidiɔ. Naka wɛ monga l’okitanyiya ndo mboka Jehowa ngandji, kete ndo wɛ lawɔ ayonga oko ɔnaki Jafɛta. Wɛ lawɔ ayɔngɛnyangɛnya ambutshi ayɛ ndo Jehowa.