Ohenda kiɛndakɛnda yele l’osato ɔnɛ. Nde ekɔ lo ndjaoka opoko ndo ekɔ la wɔma, shi mɛtɛ? Onde wɛ atayaokaka ngasɔ?— Onto tshɛ toyaokaka ngasɔ lo tena dimɔtshi. Bible tɛkɛtaka di’angɛnyi amɔtshi wa Jehowa wakayaoke opoko ndo wakonge la wɔma. Ɔmɔtshi la l’atei awɔ ko Elidja. Ɛsɔ tɔsɛdingole akambo amɔtshi wendana la nde.

Elidja akasɛnaka l’Isariyɛlɛ edja efula la ntondo ka Yeso mbotɔ. Ahaba nkumekanga k’Isariyɛlɛ kɔtɛmɔlaka Jehowa Nzambi ka mɛtɛ. Ahaba nde la Jezabɛlɛ ya wadɛnde wakatɛmɔlaka Baala. Ɔnkɔnɛ, ase Isariyɛlɛ efula wakayotatɛka ntɛmɔla Baala. Jezabɛlɛ aki nkumekanga ka womoto ka kɔlɔ efula ndo nde akalangaka ndjaka onto tshɛ lakatɛmɔlaka Jehowa, mbidja ndo Elidja. Onde wɛ mbeyaka kɛnɛ kakasale Elidja?—

Elidja akalawɔ. Nde akatshu etale l’oswe, ko akatoyashɛ lo woko wa dive. Oko  le yɛ, lande na kakandasale ngasɔ?— Nɛ dia nde aki la wɔma. Koko Elidja takandahombe mboka wɔma. Lande na? Nɛ dia nde akeyaka dia Jehowa koka mbokimanyiya. Jehowa akɛnya Elidja wolo ande la ntondo. Ɛnyɛlɔ, mbala kɛmɔtshi, Jehowa akakadimola dɔmbɛlɔ di’Elidja lo ntoma dja oma l’olongo. Diakɔ diele, Elidja akahombe monga l’eshikikelo dia Jehowa ayowokimanyiya.

Etena kaki Elidja lo woko wa dive, Jehowa akawombola ate: ‘Asalayɛ lanɛ?’ Elidja akokadimola ate: ‘Ambotshikala paka dimɛ oto mbakɔtɛmɔla. Lekɔ opoko ndo lekɔ la wɔma wa ndjakema.’ Elidja akafɔnya dia atɛmɔdi akina wa Jehowa tshɛ wambodiakema. Koko Jehowa akatɛ Elidja ate: ‘Ndooko vɔ hawodiakemi. Eke anto akina 7000 waakantɛmɔla. Onga la dihonga. Wɛ eke l’olimu efula wa kambɛmi.’ Onde wɛ fɔnyaka dia Elidja akangɛnangɛna etena kakandoke ɛtɛkɛta ɛsɔ?—

Wetshelo akɔna wakokayɛ nkondja oma lo kɛnɛ kakakomɛ Elidja?— Wɛ hahombe pondjo ndjaoka opoko kana monga la wɔma. Wɛ ekɔ l’angɛnyi woka Jehowa ngandji ndo wakolanga. Ndo nto, Jehowa ekɔ la wolo wa mamba ndo nde ayokokimanyiyaka nshi tshɛ. Onde wɛ ekɔ l’ɔngɛnɔngɛnɔ dia mbeya dia wɛ bu wɛmɛ?—