WEKELO 8
Josiya aki l’angɛnyi w’amɛna
Onde wɛ fɔnyaka di’ekɔ dui dia wɔdu dia nsala kɛnɛ kele ɔlɔlɔ?— Anto efula fɔnyaka di’ekɔ ngasɔ. Bible totɛka dia komonga dui dia wɔdu le Josiya dia nsala kɛnɛ kele ɔlɔlɔ. Koko nde aki l’angɛnyi w’amɛna wakookimanyiya. Ɛsɔ tɔsɛdingole awui amɔtshi wendana la Josiya ndo l’angɛnyi ande.
Amɔna nkumekanga ka Juda mbaki she aki Josiya. Nde aki nkumekanga ka kɔlɔ efula ndo akatɛmɔlaka dikishi. Etena kakavu Amɔna, Josiya akonge nkumekanga ka Juda. Koko nde aki paka l’ɛnɔnyi enanɛi eto. Onde wɛ fɔnyaka dia nde aki kɔlɔ oko she?— Ndooko.
Zɛfaniya akahɛmɔlaka anto diaha vɔ ntɛmɔla dikishi
Kaanga mbakinde dikɛnda, Josiya akalangaka nkitanyiya Jehowa. Diakɔ diakandasɔnɛ dia monga paka l’angɛnyi wakokaka Jehowa ngandji. Ndo nto, angɛnyi asɔ wakakimanyiya Josiya dia nde nsala kɛnɛ kele ɔlɔlɔ. Ko waa na waki angɛnyi ande amɔtshi?
Ɔngɛnyi ande ɔmɔtshi aki Zɛfaniya. Nde aki ɔprɔfɛta wakahɛmɔlaka ase Juda ɔnɛ mpokoso yayowakomɛ naka vɔ ntetemala ntɛmɔla dikishi. Josiya akakitanyiya ɔhɛmwɛlɔ wakasha Zɛfaniya ndo akatɛmɔlaka Jehowa lo dihole dia ntɛmɔla dikishi.
Ɔngɛnyi okina wa Josiya aki Jɛrɛmiya. Nde aki ose lɔlɔnga ɔtɔi la Josiya ndo vɔ akɔ ahende wakayoolaka kaamɛ. Vɔ waki angɛnyi w’amɛna, diakɔ diele lam’akavu Josiya, Jɛrɛmiya akafunde osambo ɔmɔtshi wa laande wakɛnya woho wakandalangaka Josiya. Jɛrɛmiya nde la Josiya wakakimanyiyanaka lam’asawɔ dia nsala kɛnɛ kele ɔlɔlɔ ndo dia nkitanyiya Jehowa.
Josiya nde la Jɛrɛmiya wakakimanyiyanaka lam’asawɔ dia nsala kɛnɛ kele ɔlɔlɔ
Wetshelo akɔna wakokayɛ nkondja oma l’ɛnyɛlɔ ka Josiya?— Kaanga mbakinde dikɛnda, Josiya akalangaka nsala kɛnɛ kele ɔlɔlɔ. Nde akeyaka dia nde pombaka mbɔtɔ lɔngɛnyi la anto woka Jehowa ngandji. Ndo wɛ lawɔ, sala tshɛ dia monga l’angɛnyi woka Jehowa ngandji ndo wakoka kokimanyiya dia wɛ nsala kɛnɛ kele ɔlɔlɔ.
