WEKELO 2
Rɛbɛka akalangaka ngɛnyangɛnya Jehowa
Rɛbɛka aki womoto lakokaka Jehowa ngandji. Lokombo l’omɛnde aki Izaka. Omɛnde lawɔ akokaka Jehowa ngandji. Ko ngande wakayotshukanaka Rɛbɛka nde la Izaka? Ngande wakɛnya Rɛbɛka dia nde akalangaka ngɛnyangɛnya Jehowa? Ɛsɔ tɔsɛdingole akambo amɔtshi wendana la nde.
Ambutshi w’Izaka waki Abrahama nde la Sara. Vɔ wakadjasɛka lo nkɛtɛ ya Kanana, lɛnɛ aki anto kɔtɛmɔlaka Jehowa. Koko Abrahama akalangaka di’ɔnande ntshuka womoto lakatɛmɔlaka Jehowa. Diakɔ diakandatome okambi ande ɔmɔtshi, ondo Eliɛzɛrɛ, dia toyangɛ Izaka wadi lo ngelo kakawelɛka Harana, lɛnɛ akadjasɛka ewotɔ ɛmɔtshi waki Abrahama.
Rɛbɛka aketawɔ dia nkamba olimu wa wolo wa mbisha kamɛlɔ ashi l’ɔngɛnɔngɛnɔ
Eliɛzɛrɛ akande lɔkɛndɔ kaamɛ l’ekambi ekina waki Abrahama. Ɔsɔ aki lɔkɛndɔ l’otale efula. Vɔ wakatshu la kamɛlɔ dikumi yakatɛmbaka diangɔ dia ndɛ ndo weshasha. Ko ngande wakakoke Eliɛzɛrɛ mbeya womoto lakandahombe sɔnɛ Izaka? Etena kakakome Eliɛzɛrɛ nde l’ekambi ekina w’asekande la Harana, vɔ wakemala l’ɛtɛkɔ k’ashi nɛ dia Eliɛzɛrɛ akeyaka dia keema edja, anto wayanga ndja dia ndjotahola ashi. Nde akalɔmbɛ Jehowa ate: ‘Etena kayomɔlɔmba osekaseka ɔmɔtshi ashi wa nnɔ, ko nde mbishami dimi la kamɛlɔ yami, kete layeya nte womoto ɔsɔ mbamboyɔsɔnɛ nkumɛmi.’
Oshimu kele edja, Rɛbɛka akaye dia ndjotahola ashi. Bible mbutaka dia nde aki olangala efula. Eliɛzɛrɛ akɔɔlɔmbɛ ashi wa nnɔ ko nde akate ate: ‘Eelo dimi layanga kosha ashi ndo layosha ndo kamɛlɔ yayɛ.’ Ohokanyiya yema! Kamɛlɔ yele la mposa k’ashi nɔɔka ashi woho w’anyanya, koko Rɛbɛka akakɛlakɛla otsha l’ɛtɛkɔ mbala efula. Onde wɛ ekɔ lo mɛna l’osato ɔnɛ olimu wa wolo wakamba Rɛbɛka?— Eliɛzɛrɛ akaambe efula lo menda woho wakakadimola Jehowa dɔmbɛlɔ diande.
Eliɛzɛrɛ akasha Rɛbɛka weshasha efula w’amɛna. Rɛbɛka akelɛ Eliɛzɛrɛ nde l’ekambi ekina lakawɔ dia vɔ tohanga. Lam’akawakome laka waa Rɛbɛka, Eliɛzɛrɛ akawatɛ lande na kakootome Abrahama ndo woho wakakadimola Jehowa dɔmbɛlɔ diande. Nkumbo kaki Rɛbɛka wakangɛnangɛna dia nde ntshukana la Izaka.
Rɛbɛka akatshu nde la Eliɛzɛrɛ la Kanana ndo akatotshukanaka la Izaka
Ko onde wɛ fɔnyaka dia Rɛbɛka akalange ntshukana la Izaka?— Rɛbɛka akeyaka dia Jehowa mbakatome Eliɛzɛrɛ. Diakɔ diele, lam’akawombola nkumbo kande dia kana nde nangaka ntshɔ la Kanana dia totshukana la Izaka, Rɛbɛka akate ate: ‘Eelo dimi nangaka ntshɔ.’ Aha la ntshimbatshimba, Rɛbɛka akatshu nde la Eliɛzɛrɛ. Etena kakawakome la Kanana, nde akatotshukanaka la Izaka.
Lam’ele Rɛbɛka akangɛnyangɛnya Jehowa, nde akɔɔtshɔkɔla. Ɛnɔnyi efula l’ɔkɔngɔ, Yeso akayotɔka lo ɔlɔndji wa nkumbo kande. Naka wɛ mbokoya Rɛbɛka ndo ngɛnyangɛnya Jehowa, kete nde ayokɔtshɔkɔla ndo wɛ.
