WEKELO 5
Samwɛlɛ akasalaka kɛnɛ kele ɔlɔlɔ
Oma ko kiɛndakɛnda yande, Samwɛlɛ akadjasɛka ndo akakambaka lo tabɛrnakɛlɛ, dihole diakatshɔka anto dia tɔtɛmɔla Jehowa. Onde wɛ mbeyaka ngande wakayokomaka Samwɛlɛ lo tabɛrnakɛlɛ? Ntondotondo, ɛsɔ tɔsɛdingole akambo amɔtshi wendana la Hana ka nyango Samwɛlɛ.
L’edja k’ɛnɔnyi efula, Hana kombota ɔna kaanga mbakandakombolaka. Ɔnkɔnɛ, nde akalɔmbɛ ndo akalelɛ Jehowa dia nde mbokimanyiya. Nde akalake Jehowa dia naka nde mbota ɔna, kete nde ayowoshande dia nde todjasɛ ndo tookambɛka lo tabɛrnakɛlɛ. Jehowa akooke dɔmbɛlɔ diande ndo nde akayoota ɔna. Nde akawɔlɛ Samwɛlɛ. Etena kakakotsha Samwɛlɛ ɛnɔnyi esato kana ɛnɛi, Hana akatshu la nde lo tabɛrnakɛlɛ dia nde tokambɛka Nzambi oko wakandalake.
Eliya mbaki ɔlɔmbɛdi wa laadiko lo tabɛrnakɛlɛ. Anande ahende wakakambaka kaamɛ la nde. Oko weyayɛ, tabɛrnakɛlɛ aki luudu lakawatɛmɔlaka Nzambi ndo anto wakahombaka nsala paka kɛnɛ kele ɔlɔlɔ lɔkɔ. Lonyangu ko ana waki Eliya wakasalaka awui wa kɔlɔ efula lo tabɛrnakɛlɛ. Samwɛlɛ akɛnaka kɛnɛ kakawasalaka. Ko onde nde akasalaka awui wa kɔlɔ oko ana w’Eliya asɔ?— Keema, Samwɛlɛ akasalaka kɛnɛ kele ɔlɔlɔ oko wakawetsha ambutshi ande.
Oko le yɛ, kakɔna kakahombe Eliya salɛ anande ahende asɔ?— Nde akahombe mbasha dilanya ndo mbashimba diaha vɔ nkamba olimu nto lo luudu la Nzambi. Koko Eliya koosala ngasɔ, diakɔ diakawomalɛ Jehowa nde l’anande ahende. Ɔnkɔnɛ, Jehowa akɔshi yɛdikɔ dia mbasha dilanya.
Samwɛlɛ akatɛ Eliya losango l’oma le Jehowa
L’otsho ɔmɔtshi, etena kaki Samwɛlɛ lo djɔ, nde akoke onto ɔmɔtshi awelɛ ate: ‘Samwɛlɛ!’ Ko nde akalawɔ otsha le Eliya, koko Eliya akawotɛ ate: ‘Dimi hakele.’ Dui sɔ diakasalema mbala hiende y’etondo. Mbala ka sato, Eliya akayotɛka Samwɛlɛ dia naka nde amboka dui nto, ko nde mbuta ate: ‘Tɛkɛta lam’alangɛ Jehowa, lekɔ lo kohokamɛ.’ Kɛsɔ mbakasale Samwɛlɛ. Jehowa akatɛ Samwɛlɛ ate: ‘Tɛ Eliya dia dimi layosha nkumbo kande dilanya l’ɔtɛ w’awui wa kɔlɔ wasalawɔ.’ Onde wɛ fɔnyaka dia aki dui dia wɔdu le Samwɛlɛ dia nde mbutɛ Eliya losango lɔsɔ?— Komonga mɛtɛ dui dia wɔdu. Koko kaanga mbaki Samwɛlɛ la wɔma, nde akasale kɛnɛ kakawotɛ Jehowa. Kɛnɛ kakate Jehowa kakayokotshamaka. Ana ahende waki Eliya wakadiakema, ndo Eliya nde lawɔ akavu.
Samwɛlɛ ekɔ ɛnyɛlɔ ka dimɛna efula le so. Nde akasalaka kɛnɛ kele ɔlɔlɔ kaanga mbakandɛnaka awui wa kɔlɔ wakasalaka anto akina. Ko kayotota dikambo diayɛ? Onde wɛ nangaka mbokoya Samwɛlɛ ndo salaka kɛnɛ kele ɔlɔlɔ? Naka wɛ nsala ngasɔ, kete wɛ ayɔngɛnyangɛnya Jehowa ndo ambutshi ayɛ.
