Onde ndooko onto ɔmɔtshi lambookotɛka sheke?— * Bible tɛkɛtaka dikambo dia sheke mɔtshi ya laande yelamɛ ɔnɛ “sheke y’ekila.” Yɔ yekɔ ekila nɛ dia yɔ ndja oma le Nzambi. Ndo nto, yɔ mbelamɛka sheke nɛ di’anto efula kombeyaka akambo wendana la yɔ. Kaanga andjelo wakakombolaka mbeya awui efula wendana la sheke shɔ. Onde wɛ nangaka mbeya sheke yakɔ?—

Aya edja efula kakatonge Nzambi pami ka ntondo la womoto la ntondo. Nkombo yawɔ ko Adama la Eva. Nzambi akawasha edjaselo ka dimɛna efula kakawelɛka ekambɔ k’Ɛdɛna. Otondonga Adama l’Eva wakakitanyiya Nzambi, tshike vɔ l’anawɔ wotokonya nkɛtɛ k’otondo paradiso kotonga oko ekambɔ k’Ɛdɛna. Ndo nto, vɔ wotɔsɛna pondjo pondjo lo Paradiso kɛsɔ. Ko onde wɛ mbeyaka kɛnɛ kakasale Adama l’Eva?—

Adama l’Eva kokitanyiya Nzambi, diakɔ diele sho bu lo paradiso ɛlɔ kɛnɛ. Koko Nzambi akate dia nde ayokadimola nkɛtɛ k’otondo paradiso ka dimɛna efula lɛnɛ ayotɔsɛna onto tshɛ pondjo pondjo ndo l’ɔngɛnɔngɛnɔ. Ko ngande wayondosala dui sɔ? Aya edja efula kaki anto kombeyaka dui sɔ nɛ dia diɔ diaki sheke.

Etena kakaye Yeso la nkɛtɛ, nde aketsha anto akambo efula wendana la sheke shɔ. Nde akawatɛ dia sheke shɔ yakendanaka la Diolelo diaki Nzambi. Yeso akatɛ anto dia vɔ nɔmbaka dia Diolelo sɔ ndja. Diolelo sɔ mbayokadimola nkɛtɛ paradiso ka dimɛna efula.

Shi wɛ nangaka mbeya sheke yakɔ?— Eya dia paka wanɛ wakitanyiya Jehowa mbayoyɔsɛna lo Paradiso. Bible totɛka ɛkɔndɔ efula wendana l’apami ndo la wamato wakakitanyiyaka Jehowa. Onde wɛ nangaka mbeka akambo wendana la wɔ?— Ɛsɔ tende amɔtshi wa l’atei awɔ akiwɔ ndo woho wakokaso mbaokoya.