1-4. a) Ngande wakasale Yeso dia mbetsha womoto l’ose Samariya ndo etombelo akɔna wakayala? b) Kakɔna kakasale apɔstɔlɔ ande?

 YESO nde la apɔstɔlɔ ande waki oma la minda lɔkɛndɔ l’otale efula oma la Judeya otsha lo Ngalileya lo lɛkɛ la nɔrdɛ. Vɔ wakete lo mboka ka hiembola kakahombe mbaɔsɛ nshi shato ya lɔkɛndɔ ndo wakatenyanya Samariya. La midi, vɔ waki suke l’osomba wa tshitshɛ wa Sukara, lɛnɛ akawemala dia momuya yema.

² Etena kakatshu apɔstɔlɔ dia tosomba yangɔ ya ndɛ, Yeso akadjasɛ suke l’ɛtɛkɔ k’ashi kaki l’andja w’osomba. L’etena kɛsɔ, womoto ɔmɔtshi akaye dia ndjotahola ashi. Yeso akakoke nsala oko onto lahawɛnyi nɛ dia nde “akalɛmbɛ la lɔkɛndɔ.” (Joani 4:6) Nde akakoke tsho diha washo ko nde ntshika dia womoto ɔsɔ ntahola ashi ndo kalola aha la mbɔtɛkɛtsha. Oko wakatadiɛnyi lo Tshapita 4 ya dibuku nɛ, aha la taamu womoto ɔsɔ akalongamɛka dia ndooko ose Juda layowɔsa la nɛmɔ. Koko, Yeso akatatɛ nsawola la nde.

³ Nde akatatɛ sawo diande lo nkamba la ɛnyɛlɔ kendana l’akambo wakasalaka womoto ɔsɔ lushi la lushi ndo dikambo diakandasalaka wonya akɔ. Womoto ɔsɔ akaye dia ndjotahola ashi ko Yeso akawotɛ dia mbosha ashi washa lɔsɛnɔ, ashi wakahombe nshidiya mposa kande ka lo nyuma. Lo sawo diawɔ, womoto ɔsɔ akataka akambo efula wakakoke nkonya dia vɔ mana. a Koko la yewo tshɛ, Yeso kombidja yimba  l’awui asɔ, nde akaleke ndjasha l’akambo wa lo nyuma, mbuta ate akambo wendana l’ɔtɛmwɛlɔ wa pudipudi ndo la Jehowa Nzambi. Ɛtɛkɛta ande waki la shɛngiya ya wolo le womoto ɔsɔ nɛ dia nde akatosanyɛka anto waki l’osomba ko vɔ lawɔ wakaye dia ndjohokamɛ Yeso.​—Joani 4:3-42.

⁴ Lam’akawakalola, ngande wakayaoke apɔstɔlɔ etena kakawɛnyi woho wa diambo wakasambisha Yeso ɔsɔ? Vɔ komonga l’ɔngɛnɔngɛnɔ. Vɔ wakambe lo mɛna Yeso atɛkɛta la womoto ɔsɔ ndo ondo vɔ kɔtɛkɛtsha womoto akɔ. L’ɔkɔngɔ wa womoto ɔsɔ ntshɔ, vɔ wakatshutshuya Yeso dia nde ndɛ diangɔ diakawatosombaka. Koko, Yeso akawatɛ ɔnɛ: “Dimi lekɔ la mbo ya ndɛ yahanyeye.” Dui sɔ diakaatshindja wɔɔngɔ nɛ dia vɔ wakɔshi ɛtɛkɛta ɛsɔ lo yoho ya mɛtɛ mɛtɛ. Oma laasɔ nde akalembetshiya ɔnɛ: “Mbo ya ndɛ yami ele nsala lolango la Ɔnɛ lakantome ndo nshidiya olimu ande.” (Joani 4:32, 34) Lo nsala ngasɔ, Yeso akawaetsha dia olimu wakandaye ndjosala mbakaleke ohomba lo lɔsɛnɔ lande oleki mbo ya ndɛ. Nde akakombola dia olimu ɔsɔ monga la nɛmɔ dia ngasɔ ndo le wɔ. Naa olimu akɔ?

5. Olimu akɔna wakaleke ohomba le Yeso ndo kakɔna kayangaso nsɛdingola lo tshapita nyɛ?

⁵ Lo diaaso dimɔtshi, Yeso akate ate: “Dimi pombaka mbewoya lokumu l’ɔlɔlɔ la Diolelo dia Nzambi ndo l’esomba ekina, nɛ dia l’ɔtɛ wa dikambo sɔ mbakamatomama.” (Luka 4:43) Eelo, Yeso akaye dia ndjetsha ndo ndjosambisha lokumu l’ɔlɔlɔ la Diolelo diaki Nzambi. b Olimu akɔ mbakamba ambeki waki Yeso ɛlɔ kɛnɛ. Ekɔ ohomba sho nsɛdingola lande na kakasambishaka Yeso, kɛnɛ kakandasambishaka ndo woho wakandɔsaka olimu ande.

6, 7. Ngande wakakombola Yeso dia “ombetsha tshɛ” ndjaoka lo kɛnɛ kendana la nsambisha anto akina lokumu l’ɔlɔlɔ? Sha ɛnyɛlɔ.

⁶ Nyɛsɔ tɔsɛdingole woho wakɔsaka Yeso akambo wa mɛtɛ wakandetshaka, oma laasɔ tayoyɔtɛkɛta dia woho wakandɔsaka anto wakandetshaka. Dia nembetshiya woho wakandayaokaka lo mbewoya anto akambo wa mɛtɛ wakawetsha Jehowa, Yeso akakambe la ɛnyɛlɔ kasalanganya otema. Nde akate ate: “Ombetsha tshɛ wetsha akambo wendana la Diolelo dia l’olongo, ekɔ oko kanga luudu latondja diangɔ di’eyoyo la di’edjedja oma lo eombelo kande.” (Mateo 13:52) Lande na katondja kanga luudu la l’ɛnyɛlɔ kɛsɔ diangɔ diele lo eombelo kande?

⁷ Kanga luudu hayange tsho dia mɛnya diangɔ diele la nde, woho wakasale nkumekanga Hɛzɛkiya ka lo nshi y’edjedja ndo dui sɔ diakawela etombelo wa kɔlɔ. (2 Nkumi ya dikanga 20:13-20) Ko kakɔna kakatshutshuya kanga luudu dia nsala dui sɔ? Tɔshi ɛnyɛlɔ kɛnɛ: Wɛ ambotshɔ tenda ombetsha ɔmɔtshi wa manamana. Nde ambodihola madimadi ko ambotondja ekanda ehende, ɔmɔtshi weke oyoyo ndo okina waya omusu. Ɔsɔ ekɔ ekanda wakofundɛ she, ɔmɔtshi nshi yakinde eke dikɛnda ndo okina atete edja. La washo woludi l’ɔngɛnɔngɛnɔ, nde ambokotɛ dia nde mbɔsaka ekanda ɛsɔ la nɛmɔ ndo ambokotɛ woho wakatshikitanya alako wele lɔkɔ lɔsɛnɔ lande ndo woho wakokawɔ kokimanyiya. Ombetsha ɔsɔ mbɔsaka ekanda ɛsɔ la nɛmɔ di’efula ndo nde mbangɛnangɛnaka efula. (Luka 6:45) Nde ambokɛnyawɔ aha dia ndjasɛma kana dia nkondja wahɔ ɔmɔtshi koko dia kokimanyiya dia kɛnya nɛmɔ diele la wɔ.

8. Lande na keso l’ɛkɔkɔ w’eshika wa mbɔsa akambo wa mɛtɛ wekaso oma l’Ɔtɛkɛta wa Nzambi la nɛmɔ efula?

⁸ Yeso lele Ombetsha a Woke akayaokaka ngasɔ lo kɛnɛ kendana la nsambisha anto akina akambo wa mɛtɛ wendana la Nzambi. Le nde, akambo wa mɛtɛ waki diangɔ dia nɛmɔ efula. Nde akaalangaka ndo akalomɔlomɔka dia mbatɛ anto  akina. Nde akakombolaka dia ambeki ande tshɛ, mbuta ate “embetsha tshɛ” ndjaoka woho akɔ waamɛ. Onde ngasɔ mbayaokaso? Tekɔ l’ɛkɔkɔ w’eshika watotshutshuya dia sho nanga akambo wa mɛtɛ tshɛ wekaso oma l’Ɔtɛkɛta wa Nzambi. Sho mbɔsaka akambo wa mɛtɛ asɔ la nɛmɔ oyadi wakateke edjedja kana etshikitanu wambosalema nshi nyɛ. Lo sambishaka l’otema ɔtɔi ndo la waasaso tshɛ ndo lo ntetemala nanga kɛnɛ kakatetsha Jehowa, sho sambiyaka anto akina ngandji kɛsɔ oko wakasale Yeso.

9. a) Ngande wakɔsaka Yeso anto wakandetshaka? b) Ngande wakokaso mbokoya dionga diaki la Yeso otsha le anto?

⁹ Yeso akalangaka nto anto wakandetshaka, oko wayotodiɛna l’etenyi 3. Prɔfɛsiya kɛmɔtshi kakatatshi dia Mɛsiya “ayoka mbolambola ndo ose wola kandji.” (Osambo 72:13) Lo mɛtɛ, Yeso akayakiyanyaka dikambo di’anto. Nde akayakiyanyaka dikambo dia tokanyi ndo ekanelo ka yimba kakaatshutshuyaka dia nsala kɛnɛ kakawasalaka; nde akayakiyanyaka dikambo dia ekakatanu waki la wɔ ndo dia kɛnɛ kakaashimbaka dia nshihodia akambo wa mɛtɛ. (Mateo 11:28; 16:13; 23:13, 15) Tohɔ ɛnyɛlɔ ka womoto l’ose Samariya. Aha la taamu, nde akaambe efula lo menda woho wakayasha Yeso le nde. Woho wakandeye lɔsɛnɔ laki womoto ɔsɔ dimɛna akakonya dia womoto ɔsɔ mbɔɔsa oko omvutshi ndo akootshutshuya dia nde tosanya dikambo diande. (Joani 4:16-19, 39) Ekɔ mɛtɛ dia ambeki waki Yeso wa nshi nyɛ bu la dikoka dia mbeya kɛnɛ kele l’etema w’anto wasambishawɔ. Koko, l’ɛnyɛlɔ ka Yeso, sho koka ndjasha le anto, mbaɛnya woho wayakiyanyaso dikambo diawɔ ndo sho koka mbɔtɔnganyiya ɛtɛkɛta aso la akambo wayashawɔ, ekakatanu wele la wɔ ndo ehomba awɔ.

10, 11. a) Kakɔna kakasambishaka Yeso? b) Lande na kakayɛnamaka ohomba wa Diolelo diaki Nzambi?

¹⁰ Kakɔna kakasambishaka Yeso? Naka wɛ nyanga okadimwelo wa dimbola sɔ lo mbidja yimba lo wetshelo wa l’ɛtɛmwɛlɔ efula wayata dia wekɔ Akristo, kete wɛ  mbeyaka ndjokoma lo mbuta dia nde akasalaka yoho mɔtshi y’esambishelo kaki l’oyango wa nshidiya tsho paa yaki l’atshunda w’anto. Kana wɛ mbeyaka mbɔsa dia nde akaye dia ndjosala etshikitanu l’awui wa pɔlitikɛ kana ɔnɛ nde akaleke ntɛtɛ di’ɔnɛ panda k’onto ndamɛ mboleki ohomba. Koko, oko wakatadiɛnyi l’etatelo, Yeso akate ate: “Dimi pombaka mbewoya lokumu l’ɔlɔlɔ la Diolelo dia Nzambi.” Kakɔna kakalembetshiyaka dikambo sɔ mɛtɛ?

¹¹ Tohɔ dia Yeso aki l’olongo etena kakadje Satana taamu mbala ka ntondo ɔnɛ Jehowa halɔmbɔla dimɛna. Yeso mɛtɛ akahombe monga la lonyangu l’efula etena kakandɛnyi wahindɛ ndo wasɔngwɛ She latolangaka losembwe ɔnɛ Nde ekɔ Omboledi wadima ditongami diande diangɔ di’ɛlɔlɔ! Ande kandji kaki la Ɔna Nzambi lo mɛna woho waketawɔ Adama l’Eva kashi kakawatɛ Satana ndo woho wele ɔtɔmbɔkwɛlɔ awɔ akadje nkumbo k’anto k’otondo lo lɔhɔmbɔ la pɛkato la nyɔi lee! (Rɔmɔ 5:12) Koko, nde akahombe mɛtɛ monga l’ɔngɛnɔngɛnɔ lo mbeya ɔnɛ She ayoyoshidiya akambo asɔ tshɛ!

12, 13. Akambo akɔna wayosala Diolelo diaki Nzambi ndo ngande waketɛ Yeso Diolelo ɔtɛ a dui w’esambishelo kande?

¹² Dikambo diakɔna dioleki ohomba diakahombe kandɔma? Lokombo l’ekila laki Jehowa lakahombe kidiama ndo mbɛdiama oma lo sɔnyi tshɛ kakalisha Satana l’anto tshɛ wele lo wedi ande. Lam’ele lokombo la Jehowa nemanɛka la lokumu lele lande oko ɔnɔmbɔdi, lowandji lande la losembwe kana yoho yande ya nɔmbɔla yakahombe nyindjama. Yeso akashihodiaka awui asɔ dimɛna oleki anto akina tshɛ. Lo dɔmbɛlɔ di’ɛnyɛlɔ, nde aketsha ambeki ande dia vɔ nɔmbaka ntondotondo dia lokombo la She kidiama, dia Diolelo dia She ndja ndo dia lolango la Nzambi salema la nkɛtɛ. (Mateo 6:9, 10) Kem’edja Diolelo diaki Nzambi diele Kristo Yeso Nkumekanga kadiɔ diayonya dikongɛ dia kɔlɔ diaki Satana oma la nkɛtɛ ndo diayoshikikɛ lowandji losembwe laki Jehowa lo pondjo.​—Danyɛlɛ 2:44.

¹³ Diolelo sɔ mbaki ɔtɛ a dui w’esambishelo kaki Yeso. Ɛtɛkɛta  ndo etsha ande wakɛnyaka mɛtɛ ele Diolelo ndo ɔkɛndɛ wele la diɔ lo sangwelo diaki Jehowa. Yeso kombetawɔ dia kaanga dui ɔtɔi mbeekola yimba oma l’olimu ande wa nsambisha lokumu l’ɔlɔlɔ la Diolelo diaki Nzambi. Lo nshi yande ekakatanu ndo wɛngiya wakikɔ efula, koko nde akake washo paka lo losango ndo l’olimu ande. Onde laasɔ nde kondjakiyanyaka dikambo di’anto, kɔmɛnaka akambo la sso di’ɔlɔlɔ? Onde sawo diande diaki eshi ndo nde akakalolɛka paka awui akɔ waamɛ ato? Keema!

14, 15. a) Ngande wakɛnya Yeso dia nde ekɔ “onto loleki Sɔlɔmɔna”? b) Ngande wakokaso mbokoya Yeso lo kɛnɛ kendana la losango lasambishaso?

¹⁴ Oko wayotodiɛna l’etenyi kɛnɛ, Yeso akatshikitanyaka wetshelo ande ndo akasalaka dia vɔ ngɛnyangɛnya anto. Lo dikambo sɔ, sho kokaka mbohɔ Sɔlɔmɔna, nkumekanga ka lomba, ɔnɛ lakayange ɛtɛkɛta w’amɛna ndo ɛtɛkɛta w’eshika w’akambo wa mɛtɛ dia mfunda tokanyi takoosambiya Jehowa. (Ondaki 12:10) Jehowa akasha pami kaki komonga kokele kɛsɔ ‘otema wa lomba l’efula’ wakookimanyiya dia ntɛkɛta akambo efula wendana la tofudu, nse, esongo ndo nyama. Anto wakayaka oma l’ahole wa tale dia ndjohokamɛ kɛnɛ kakataka Sɔlɔmɔna. (1 Nkumi ya dikanga 4:29-34) Koko, Yeso aki “onto loleki Sɔlɔmɔna.” (Mateo 12:42) Nde aki la lomba loleki ndo “otema wele la yimba efula” la fwa. Etena kakandetshaka anto, Yeso akakambaka la ewo k’efula kele la nde ka Ɔtɛkɛta wa Nzambi ndo ka tofudu, nyama, nse, dikambɔ, akambo wakasalemaka, ɛkɔndɔ ndo yoho ya lɔsɛnɔ yaki l’anto. L’etena kakɔ kaamɛ, Yeso kokamba la ewo kaki la nde dia mambiya anto akina. Wetshelo ande waki wɔdu ndo wakokɛmaka hwe. Diakɔ diele anto wakangɛnangɛnaka mbohokamɛ!​—Makɔ 12:37; Luka 19:48.

¹⁵ Ɛlɔ kɛnɛ Akristo salaka la wolo dia ndjela ɛnyɛlɔ ka Yeso. Sho keema la lomba ndo la ewo k’efula oko nde, koko sho tshɛ tekɔ la yema y’ewo ndo tambohomanaka l’akambo amɔtshi wakoka nkamba la so etena kewoyaso anto akina akambo wa mɛtɛ wa l’Ɔtɛkɛta wa Nzambi. Ɛnyɛlɔ, ambutshi mbeyaka  nkamba l’akambo wakahomana la wɔ etena kodiawɔ anawɔ dia mɛnya ngandji koka Jehowa Anande. Anto akina mbeyaka nkamba la bɛnyɛlɔ di’oma lɛnɛ akambawɔ olimu, la kalasa kana ewo kele la wɔ dikambo di’anto ndo akambo amɔtshi weke katomba. L’etena kakɔ kaamɛ, sho pombaka monga la yewo diaha akambo asɔ dinyadinya losango laso, mbuta ate lokumu l’ɔlɔlɔ la Diolelo diaki Nzambi.​—1 Timɔte 4:16.

16, 17. a) Ngande wakɔsaka Yeso olimu ande w’esambishelo? b) Ngande wakɛnya Yeso dia esambishelo mbaketaka lo dihole dia ntondo lo lɔsɛnɔ lande?

¹⁶ Yeso akɔsaka olimu w’esambishelo oko ɛngɔ ka nɛmɔ efula. Nde akangɛnangɛnaka nkimanyiya anto dia vɔ mbeya woho wele She lele l’olongo, otshikitanyi la wetshelo ndo mbekelo y’ana w’anto yaki kombetshaka mɛtɛ lo dikambo dia She. Yeso akalangaka nkimanyiya anto dia vɔ monga la diɔtɔnganelo di’ɔlɔlɔ la Jehowa ndo monga l’elongamelo ka lɔsɛnɔ la pondjo. Nde akangɛnangɛnaka mbasamba ndo mbasha ɔngɛnɔngɛnɔ waya oma lo lokumu l’ɔlɔlɔ. Ngande wakandɛnyaka dui sɔ? Tɔsɛdingole toho tosato takandasale dui sɔ.

¹⁷ Ntondotondo, olimu w’esambishelo mbaketaka lo dihole dia ntondo lo lɔsɛnɔ la Yeso. Nsambisha dikambo dia Diolelo mbaki olimu wakaleke ohomba lo lɔsɛnɔ lande ndo olimu wakandayashaka lɔkɔ lɔsɛnɔ lande l’otondo. Diakɔ diele, oko wakatadiɛnyi lo tshapita 5,, Yeso akɔshi yɛdikɔ ya lomba ya nsɛna lɔsɛnɔ l’ɔsɛlɛngɛ. Etena kakandalakaka anto akina, nde akakaka washo ande lo dikambo dioleki ohomba. Nde kombetawɔ dia lokema la diangɔ diakandakoke nsomba, nama ndo nɔngɔsɔla mbekola yimba yande. Nde akasɛnɛ lɔsɛnɔ l’ɔsɛlɛngɛ diaha ndooko dikambo mbeekola yimba oma l’olimu ande w’esambishelo.​—Mateo 6:22; 8:20.

18. Lo toho takɔna takayasha Yeso tshɛ l’olimu ande?

¹⁸ Dui dia hende, Yeso akayasha tshɛ l’olimu w’esambishelo. Nde akakambe olimu ɔsɔ la wolo ande tshɛ, akakɛndakɛnda  nkama ya kilɔmɛtrɛ l’ekolo lo Palɛstinɛ k’otondo dia nyanga anto wakandakoke nsambisha lokumu l’ɔlɔlɔ. Nde akaasambishaka lawakawɔ, l’ahole watanema anto efula, lo waa bingu ndo lo ahole wa lo sɛkɛ. Nde akaasambishaka kaanga etena kakandahombaka momuya, ndɛ, nnɔ kana nkɔkɔla demba kaamɛ l’angɛnyi ande. Kaanga lam’akinde suke la nyɔi, nde akatetemala nsambisha anto akina lokumu l’ɔlɔlɔ la Diolelo diaki Nzambi!​—Luka 23:39-43.

19, 20. Ɛnyɛlɔ kakɔna kakakambe la Yeso dia mɛnya ohomba wa nkamba olimu w’esambishelo la shamanya?

¹⁹ Dui dia sato, Yeso akeyaka dia olimu w’esambishelo pombaka kambema la shamanya. Tohɔ sawo diakasawola Yeso la womoto l’ose Samariya suke la ɛtɛkɔ ka Sukara. Mɛnamaka dia apɔstɔlɔ kɔmɛna ohomba wa nsambisha lokumu l’ɔlɔlɔ la shamanya. Yeso akawatɛ ate: “Onde hanyototaka nyate, ambotshikala ngɔndɔ 4 dia dinela nkoka? Nyolonge, dimi lambonyotɛ nte: Nyedia washo, nyende, dikambɔ diambɛla dia mina.”​—Joani 4:35.

²⁰ Yeso akɔshi ɛnyɛlɔ kɛsɔ oma lo eleko kakiwɔ. Mɛnamaka dia waki lo Ngɔndɔ ka Kislɛvɛ (Ngɔndɔ ka dikumi l’ɔtɔi/Ngɔndɔ ka dikumi l’ahende). Dinela takadiakoke ndjaala la ntondo ka ngɔndɔ nyɛi, mbuta ate lo nshi ya Elekanelo, lo Ngɔndɔ ka Nisana 14. Ɔnkɔnɛ akambi wa dikambɔ kɔmɛna ohomba wa nsala akambo la shamanya nɛ dia vɔ waki la nshi efula la ntondo ka dinela ntatɛ. Kayotota dia dinela diendana l’anto? Anto efula waki suke dia mpokamɛ, mbeka, nkoma ambeki wa Kristo ndo monga l’elongamelo ka diambo kakaakitshɛ Jehowa la ntondo. Aki oko Yeso akakoke menda ekambɔ ka didjidji kɛsɔ ko nde mɛna dia diangɔ diambɛla ndo diambokoka minama. c Ɔsɔ aki mɛtɛ etena ka nsala akambo la shamanya! Diakɔ diele, etena kakayange anto wa l’osomba ɔmɔtshi dia Yeso ntshikala la wɔ edja, nde akaakadimola ate:  “Dimi pombaka mbewoya lokumu l’ɔlɔlɔ la Diolelo dia Nzambi ndo l’esomba ekina, nɛ dia l’ɔtɛ wa dikambo sɔ mbakamatomama.”​—Luka 4:43.

21. Ngande wakokaso mbokoya Yeso?

²¹ Sho kokaka mbokoya Yeso lo toho tosato tambotɔtɛkɛta tɔsɔ. Sho kokaka mbetɛ olimu w’esambishelo lo dihole dia ntondo lo lɔsɛnɔ laso. Kaanga mbakokaso monga l’ɛkɛndɛ wa lo nkumbo ndo ɛkɛndɛ ekina, sho kokaka mɛnya dia esambishelo mbeta lo dihole dia ntondo lo ndjashaka l’ohetoheto tshɛ ndo mbala la mbala l’olimu ɔsɔ oko wakasale Yeso. (Mateo 6:33; 1 Timɔte 5:8) Sho kokaka ndjasha tshɛ l’olimu w’esambishelo lo nkamba la wenya aso, la wolo aso ndo la diangɔ diaso dia nsukɛ olimu akɔ. (Luka 13:24) Ndo sho kokaka mbohɔka dia olimu aso pombaka salema la shamanya. (2 Timɔte 4:2) Sho pombaka nkamba l’oseka diaaso tshɛ dia nsambisha!

22. Kakɔna kayotɔsɛdingola lo tshapita yayela?

²² Yeso akɛnyaka nto dia nde akɛnaka ohomba w’olimu ɔsɔ lo nshikikɛ dia vɔ wayotetemala la kambema l’ɔkɔngɔ wa nyɔi kande. Nde akasha ambeki ande ɔkɛndɛ wa nkamba olimu w’esambishelo ndo wa wetshelo. Dia ɔkɛndɛ ɔsɔ mbayotɔtɛkɛta lo tshapita yayela.