1-3. a) Kakɔna kambosala okambi w’ekambɔ etena kambɛla diangɔ efula ndo kahandakoke dina ndamɛ? b) Okakatanu akɔna wakahomana la Yeso l’eleko kamɔnga akatshi ka lo 33 T.D., ndo ngande wakandakandola okakatanu akɔ?

 OKAMBI wa dikambɔ ekɔ la ntondo k’okakatanu ɔmɔtshi. Ambeta ngɔndɔ ngana yakandakambe ndo yakandonɛ diangɔ l’ekambɔ kande. Nde akendaka woho wakayatombaka diangɔ diande ndo ekɔ l’ɔngɛnɔngɛnɔ lo woho wambodiɛla. Nde ambofutama l’ɔtɛ wa welo wakandadje etena kambɛla diangɔ. Koko, okakatanu wele la nde ele, diangɔ diakangɔnɛ woho w’anyanya ko nde bu l’akoka wa dina ndamɛ. Diaha diangɔ ndjɔhɔnda, nde ambɔsa yɛdikɔ ya mbɔsa ase olimu ndo ambatoma lo dinela.

² L’eleko kamɔnga akatshi ka lo 33 T.D., Yeso lakolwama  akahomana l’okakatanu wa ngasɔ. L’edja kakandakambaka olimu ande la nkɛtɛ, nde akonɛ ntɔngɔ y’akambo wa mɛtɛ. Etena ka mina kakakoke ndo diangɔ dia mina diaki efula. Anto efula waketawɔka losango lande wakahombe tshumanyema oko ambeki. (Joani 4:35-38) Ngande wakakandola Yeso okakatanu ɔsɔ? Yema tshitshɛ la ntondo ka nde mbidɛ l’olongo, lo dikona dimɔtshi dia la Ngalileya, nde akasha ambeki ande ɔkɛndɛ wa nyanga ekambi ekina lo mbatɛ ɔnɛ: “Ɔnkɔnɛ, nyotshu ndo nyetɛ anto wa lo wedja tshɛ ambeki, nyaabatize. . . . Nyowaetshake dia nkitanyiya akambo tshɛ wamomonyodjangɛ.”​—Mateo 28:19, 20.

³ Ɔkɛndɛ ɔsɔ mbele dui dioleki ohomba lo kɛnɛ kalembetshiya ndjela Kristo. Nyɛsɔ tɔsɛdingole ambola asato wayela anɛ: Lande na kakate Yeso dia nyanga ekambi efula? Ngande wakandetsha ambeki ande dia ntana ekambi? Ngande wendanaso l’olimu ɔsɔ?

4, 5. Lande na kaki Yeso koshidiya olimu wakandatatɛ ndo waa na wakahombe ndjokamba olimu ɔsɔ l’ɔkɔngɔ wa nde kalola l’olongo?

⁴ Etena kakatatɛ Yeso olimu w’esambishelo lo 29 T.D., nde akeyaka dia nde ambotatɛ olimu wakinde kokoka nshidiya ndamɛ. Lo menda etena ka tshitshɛ kakotshikalɛ la nkɛtɛ, takinde l’akoka wa nkindjakindja nkɛtɛ k’otondo ndo nsambisha oseka onto tshɛ losango la Diolelo. Lo mɛtɛ, nde akaleke nsambisha ase Juda la ambetawudi w’ase wedja, “ɛkɔkɔ wakashishɔ wa lo luudu l’Isariyɛlɛ.” (Mateo 15:24) “Ɛkɔkɔ wakashishɔ” ɛsɔ wakahandjɔnɛ lo wodja w’Isariyɛlɛ w’otondo lo nunu dia kilɔmɛtrɛ. Koko l’etena kɛmɔtshi, lokumu l’ɔlɔlɔ lakahombe ndjosambishama l’andja w’otondo.​—Mateo 13:38; 24:14.

⁵ Yeso akeyaka dia olimu efula wakahombe ndjokambema l’ɔkɔngɔ wa nyɔi kande. Diakɔ diakandatɛ apɔstɔlɔ ande 11  wa kɔlamelo ate: “Lo mɛtɛ kanyotɛmi nte, onto tshɛ longa la mbetawɔ le mi, nde ayosala akambo wasalami ndo ayosala akambo woleki wanɛ weke, nɛ dia dimi lekɔ lo tatshu le Papa.” (Joani 14:12) Lam’ele Ɔna ɔsɔ akatakalolaka otsha l’olongo, ambeki ande, mbuta ate aha tsho apɔstɔlɔ ande koko ndo anto akina tshɛ wakahombe ndjokoma ambeki, wakahombe nkamba olimu ɔsɔ w’esambishelo ndo wa wetshelo. (Joani 17:20) L’okitshakitsha tshɛ Yeso aketawɔ dia olimu awɔ wakahombe ‘ndjoleka’ wande. Lo woho akɔna? Lo toho tosato.

6, 7. a) Lo toho takɔna takahombe olimu w’ambeki waki Yeso ndeka wande? b) Ngande wakokaso mɛnya dia Yeso kondjaakesa lo woho wakinde la wɛkamu le ambeki ande?

⁶ Ntondotondo, ambeki waki Yeso wakahombe nsambisha l’ɛtshi ka nkɛtɛ koleki woke. Ɛlɔ kɛnɛ, esambishelo kawɔ kambokoma polo lo tokoma ta nkɛtɛ, mbuta ate etale efula ndekana elelo wa wodja wakasambisha Yeso ndamɛ. Yoho ya hende ele, vɔ wakahombe nsambisha anto efula. Djui ya tshitshɛ y’ambeki wakatshike Yeso wakafule esadi eto otsha lo nunu. (Etsha 2:41; 4:4) Ɛlɔ kɛnɛ, vɔ wambokoma polo lo miliyɔ ndo nunu nkama di’ambeki w’eyoyo wekɔ lo batizama ɔnɔnyi tshɛ. Yoho ya sato ele, vɔ wakahombe nsambisha l’etena koleki otale, mbuta ate polo ndo nshi nyɛ, suke l’ɛnɔnyi 2000 l’ɔkɔngɔ wa Yeso nkomiya olimu ande w’esambishelo w’ɛnɔnyi esato l’etenyi.

⁷ Yeso akɛnya wɛkamu waki la nde le ambeki ande etena kakandate dia vɔ wayosala “akambo woleki wanɛ weke.” Nde akawasha olimu waki ohomba efula le nde, mbuta ate nsambisha ndo mbetsha “lokumu l’ɔlɔlɔ la Diolelo dia Nzambi.” (Luka 4:43) Nde aki l’eshikikelo ɔnɛ vɔ wayokamba olimu ɔsɔ la kɔlamelo tshɛ. Kakɔna kalembetshiya dikambo sɔ le so ɛlɔ kɛnɛ? Etena kasambishaso l’ohetoheto ndo l’otema ɔtɔi, sho mɛnyaka dia Yeso kondjaakesa lo woho wakinde la wɛkamu le ambeki ande. Shi ɔsɔ ekɔ diɛsɛ dia woke?​—Luka 13:24.

8, 9. Ɛnyɛlɔ kakɔna kakatshike Yeso lo kɛnɛ kendana l’olimu w’esambishelo ndo ngande wakokaso mbokoya ɛnyɛlɔ kande?

⁸ Yeso akasha ambeki ande olowanyelo woleki tshɛ dimɛna lo kɛnɛ kendana l’esambishelo. Ndo kɛnɛ koleki tshɛ ele, nde akaatshikɛ ɛnyɛlɔ ka kokele. (Luka 6:40) Lo tshapita yetshi, takatɛkɛta dia woho wakandɔsaka olimu w’esambishelo. Tɔshi ɛnyɛlɔ k’ambeki wakatetetaka la Yeso l’olimu w’esambishelo. Vɔ wakɛnyi dia nde akasambishaka dihole tshɛ diakatanemaka anto, mbuta ate l’emamu w’ashi, l’akona, l’esomba, lo bingu ndo lo ngelo yawɔ. (Mateo 5:1, 2; Luka 5:1-3; 8:1; 19:5, 6) Vɔ wakɛnyi nto woho wakandayashaka tshɛ l’olimu ɔsɔ, nde aketɔka k’ɔlɔmɔ ndo akakambaka polo ndo l’otsho. Le nde, olimu w’esambishelo komonga oko dikambo dia mbetsha wenya! (Luka 21:37, 38; Joani 5:17) Aha la taamu, vɔ wakɛnyi dia ngandji k’efula kakandokaka anto mbakootshutshuyaka dia nsambisha. Ondo vɔ wakɛnaka oma l’elungi kande woho wakandokaka anto kɛtshi. (Makɔ 6:34) Lo ndjela kanyi yayɛ, shɛngiya yakɔna yaki l’ɛnyɛlɔ kaki Yeso le ambeki ande? Shɛngiya yakɔna yotonga la dikambo sɔ le yɛ?

⁹ Oko weso ambeki wa Kristo, sho mbokoyaka ɛnyɛlɔ kande l’olimu w’esambishelo. Lo dikambo sɔ, sho salaka tshɛ dia ‘nsambisha dimɛna dimɛna.’ (Etsha 10:42) L’ɛnyɛlɔ ka Yeso, sho tshɔka tenda anto lawakawɔ. (Etsha 5:42) Sho tshikitanyaka ekongelo kaso naka ekɔ ohomba dia sho ntshɔ towaenda etena kakokawɔ monga la ngelo. Sho salaka la wolo nto dia nyanga anto ndo mbasambisha la yewo tshɛ l’ahole watanema anto efula, mbuta ate lo toshinga, lo waa makashinyi, l’ahole w’olimu ndo l’ahole akina. Sho tetemalaka ‘nkamba olimu wa wolo ndo ndjashaka tshɛ’ l’olimu w’esambishelo nɛ dia ɔsɔ ekɔ olimu w’ohomba efula le so. (1 Timɔte 4:10) Ngandji k’oma k’ɛse otema kokaso anto totshutshuyaka dia ntetemala nyanga waaso wa nsambisha lo dihole ndo l’etena tshɛ kakoka anto ntanema.​—1 Tɛsalɔnika 2:8.

10-12. Wetshelo akɔna w’ohomba waketsha Yeso ambeki ande la ntondo ka nde mbatoma dia tosambisha?

 ¹⁰ Yoho kina yakalowanya Yeso ambeki ande ele lo mbasha wetshelo w’ohomba efula. La ntondo ka nde ntoma apɔstɔlɔ 12 ndo l’ɔkɔngɔ ambeki 70 dia tosambisha, Yeso akasangana la wɔ dia mbaetsha woho wa vɔ tosambisha. (Mateo 10:1-15; Luka 10:1-12) Wetshelo ɔsɔ wakatondja etombelo w’ɛlɔlɔ nɛ dia Luka 10:17 mbutaka ɔnɛ: “Ambeki ande 70 wakakalola l’ɔngɛnɔngɛnɔ.” Nyɛsɔ tɔsɛdingole wetshelo ehende w’ohomba waketsha Yeso, aha la mbohɛ ɔnɛ dia nshihodia ɛtɛkɛta ande, sho pombaka mbeya akambo ndo mbekelo y’ase Juda wa lo nshi yakafundamaka Bible.

¹¹ Yeso aketsha ambeki ande dia ndjaɛkɛ le Jehowa. Nde akawatɛ ate: “Tanyɔtɔlake ekenga wa paonyi kana wa mfɛsa kana wa nkonga lo totapatapa tanyu ta falanga, kana mpamba ya talɛka lo mboka, kana ahɔndɔ 2, kana ekolo wa sabata 2, kana danga, nɛ dia ose olimu la dia nongola mbo ya ndɛ yande.” (Mateo 10:9, 10) Lo nshi shɔ, amɛngɔdi waki la mbekelo ka mbetetaka la tapa dia mbidjaka falanga, tapa dia diangɔ dia ndɛ ndo lokolo lokina la sabata. Lo mbutɛ ambeki ande diaha vɔ ndjakiyanya dikambo dia diangɔ sɔ, aki oko Yeso akawatɛka ɔnɛ: “Nyoyaɛkɛ tshɛ le Jehowa nɛ dia nde ayokotsha ehomba anyu.” Jehowa akahombe nkotsha ehomba awɔ lo ntshutshuya anto waketawɔ lokumu l’ɔlɔlɔ dia mbalongola oko waki mbekelo ka l’Isariyɛlɛ.​—Luka 22:35.

¹² Yeso aketsha ambeki ande nto dia mbewɔ awui wekola yimba. Nde akate ate: “Tanyoshake ndooko onto mɔyɔ lo  mboka.” (Luka 10:4) Onde Yeso akawatɛ dia vɔ monga oko mbudi heye onto? Ndooko. Lo nshi yakafundamaka Bible, mɔyɔ akalembetshiyaka akambo efula, koko aha tsho memula onto. Awui efula ndo asawo w’etale wakasalemaka wonya wakashanaka anto mɔyɔ. Nomb’ewo kɛmɔtshi k’awui wa lo Bible akate ate: “Mɔyɔ wakashanaka ase Ehotwelo ka wonya akatshikitana la wɔnɛ washanaso wa kɔlɛ ɔtɛ ndo mbishana mɔyɔ l’anya, koko vɔ wakakumbatanɛka mbala efula, wakakɔlɛka ɔtɛ ndo wakakusamaka polo lo nkɛtɛ. Awui asɔ tshɛ wakɔsaka wenya efula.” Lo mbutɛ ambeki ande diaha vɔ mbishana weho wa mɔyɔ ɛsɔ, aki oko Yeso akawatɛka ɔnɛ: “Nyu pombaka nkamba la wenya anyu dimɛna, nɛ dia losango lanyu lekɔ losango lahomba mbewoyama la shamanya.” a

13. Lo toho takɔna takokaso mɛnya dia sho mbɔsaka alako wakasha Yeso ambeki ande wa lo ntambe ka ntondo la nɛmɔ?

¹³ Sho mbɔsaka alako wakasha Yeso ambeki ande wa lo ntambe ka ntondo la nɛmɔ. Sho ndjaɛkɛka tshɛ le Jehowa etena kakambaso olimu w’esambishelo. (Tokedi 3:5, 6) Sho mbeyaka dia hatotohomba kɛnɛ kele la so ohomba lo lɔsɛnɔ naka sho ‘ntetemala nyanga ntondo Diolelo.’ (Mateo 6:33) Esambisha wa Diolelo wa lo tena tshɛ wa l’andja w’otondo kokaka nshikikɛ dia kaanga lo tena dia wolo, lonya laki Jehowa halongaka mondo pondjo. (Osambo 37:25) Sho mbeyaka nto ohomba wa mbewɔ akambo wekola yimba. Naka hatoyalami, kete dikongɛ di’akambo nɛ kokaka tekola yimba esadi eto. (Luka 21:34-36) Ɔnɛ keema etena ka mbetawɔ  di’akambo amɔtshi tekola yimba. Lam’ele nsɛnɔ y’anto yekɔ lo waale, losango laso pombaka mbewoyama la shamanya. (Rɔmɔ 10:13-15) Mbohɔka dia olimu w’esambishelo pombaka kambema la shamanya ayotokimanyiya diaha sho mbetawɔ di’akambo wekola yimba wa l’andja ɔnɛ tomanɛ wenya ndo wolo wakoka nkamba la so l’esambishelo. Tohɔ dia etena kambotshikala kaya mondo ndo dinela diekɔ woke.​—Mateo 9:37, 38.

14. Kakɔna kɛnya dia ɔkɛndɛ wele lo Mateo 28:18-20 mendanaka la ambeki waki Kristo tshɛ? (Enda ndo nɔtɛ.)

¹⁴ Lo mbuta ɔnɛ: “Nyotshu ndo nyetɛ anto . . . ambeki,” Yeso lakolwama akashaka ambeki ande ɔkɛndɛ ɔmɔtshi wa woke. Aha ambeki ande waki lushi lɔsɔ lo dikona dia la Ngalileya ato mbakandatɛka ɛtɛkɛta ɛsɔ. b Olimu wakandawasha mendanaka la “anto wa lo wedja tshɛ” ndo wayotetemala “polo l’etena k’ekomelo ka dikongɛ di’akambo.” Mbokɛmaka hwe dia olimu ɔsɔ mendanaka la ambeki wa Kristo tshɛ, mbidja ndo sho ɛlɔ kɛnɛ. Nyɛsɔ tɔsɛdingole dimɛna dimɛna ɛtɛkɛta waki Yeso wele lo Mateo 28:18-20.

15. Lande na kele ekɔ dui dia lomba dia nkitanyiya didjango diaki Yeso dia mbetɛ anto ambeki?

¹⁵ La ntondo ka nde mbisha ambeki ande ɔkɛndɛ ɔsɔ, Yeso akate ate: “Wakambisha lowandji tshɛ l’olongo ndo la nkɛtɛ.” (Divɛsa 18) Onde mɛtɛ Yeso ekɔ la lowandji l’efula la ngasɔ? Eelo! Nde ekɔ Arkandjelo walɔmbɔla miliyara la miliyara y’andjelo. (1 Tɛsalɔnika 4:16; Ɛnyɛlɔ 12:7) Oko wende “owandji w’etshumanelo,” nde ekɔ la lowandji laadiko di’ambeki ande wa la nkɛtɛ. (Ɛfɛsɔ 5:23) Tatɛ lo 1914, nde ekɔ lo mbolɛ oko Mɛsiya Nkumekanga l’olongo. (Ɛnyɛlɔ 11:15) Nde ekɔ  la wolo wa mbolola wanɛ wakavu. (Joani 5:26-28) Lo mbuta ntondo dia nde ekɔ la lowandji l’efula, Yeso akɛnya dia ɛtɛkɛta wayangande mbuta keema kanyi, koko wekɔ tshondo ya didjango. Ayonga dui dia lomba dia dikitanyiya nɛ dia aha ndamɛ mbakayasha lowandji lɔsɔ, koko Nzambi mbakawoshalɔ.​—1 Kɔrɛtɔ 15:27.

16. Lo totɛ ɔnɛ “nyotshu,” kakɔna kakatɔlɔmbɛ Yeso dia nsala ndo ngande wakotshaso ɔkɛndɛ ɔsɔ?

¹⁶ Yeso akawaɛnya ɔkɛndɛ watatɛ la tshɛkɛta: “Nyotshu.” (Divɛsa 19) Lo mbasha ɔkɛndɛ ɔsɔ, nde akaalɔmbɛ dia vɔ mbɔsa yɛdikɔ ya ntshɔ dia tosambisha anto akina losango la Diolelo. Vɔ wakahombe nkamba la toho totshikitanyi dia nkotsha ɔkɛndɛ ɔsɔ. Esambishelo ka lo luudu la luudu mbele yoho yoleki tshɛ dimɛna ya mpomana l’anto. (Etsha 20:20) Sho nyangaka nto waaso wa nsambisha lo tshakitudi, talomɔlomɔ dia ntatɛ nsawola l’anto akambo wendana la lokumu l’ɔlɔlɔ etena kasalaso elimu aso wa lushi la lushi. Toho t’esambishelo takamba la so mbeyaka ntshikitana dia mbɔtɔnganyiya la ehomba ndo l’ekakatanu wele l’anto wa l’ɛtshi kaso ka nkɛtɛ. Koko, oyango waamɛ wele la so ele wa ‘ntshɔ’ dia toyanga wanɛ wakoka.​—Mateo 10:11.

17. Ngande ‘wetɛso anto ambeki’?

¹⁷ Oma laasɔ, Yeso akashikikɛ oyango w’olimu aso, mbuta ate ‘mbetɛ anto wa lo wedja tshɛ ambeki.’ (Divɛsa 19) Ngande ‘wetɛso anto ambeki’? Ombeki ekɔ onto leka kana letshawɔ. Koko, mbetɛ anto ambeki halembetshiya tsho nsambiya anto akina diewo dimɔtshi. Etena kekaso Bible l’anto wayasha, oyango wele la so ele wa mbakimanyiya dia vɔ nkoma ambeki wa Kristo. Etena tshɛ kakokaso nsala dui sɔ, sho kotolaka yambalo y’ambeki lo ɛnyɛlɔ ka Yeso dia vɔ mbɔɔsa oko Ɛnyɛlɔ ndo oko Ombetsha ndo dia vɔ nsɛna yoho yakasɛnɛ Yeso ndo nkamba olimu wakandakambe.​—Joani 13:15.

18. Lande na kele batismu ekɔ dui dioleki ohomba lo lɔsɛnɔ l’ombeki?

¹⁸ Dikambo dimɔtshi di’ohomba diendana l’ɔkɛndɛ aso  nembetshiyama l’ɛtɛkɛta wayela ɛnɛ: “Nyaabatize lo lokombo la Papa ndo la Ɔna ndo la nyuma k’ekila.” (Divɛsa 19) Batismu ekɔ dikambo dioleki tshɛ ohomba lo lɔsɛnɔ l’ombeki, nɛ dia tɔ kekɔ djembetelo yɛnya dia nde amboyakimɔ le Nzambi l’otema ɔtɔi. Mbokɛmaka dia batismu kekɔ ohomba di’onto nkondja panda. (1 Petero 3:21) Eelo, etena katetemala ombeki wambobatizama nsala kɛnɛ tshɛ kakokande nsala dia kambɛ Jehowa, nde kokaka nongamɛ ɛtshɔkɔ wa pondjo l’andja w’oyoyo. Onde wɛ ambokimanyiyaka onto ɔmɔtshi dia nde nkoma ombeki waki Kristo wambobatizama? Ɔsɔ mbele dui dialeka mbisha ɔngɛnɔngɛnɔ l’olimu w’Okristo.​—3 Joani 4.

19. Kakɔna ketshaso ambeki w’eyoyo ndo lande na kakoka wetshelo ntetemala l’ɔkɔngɔ wa batismu?

¹⁹ Yeso akɛnya etenyi kekina k’ɔkɛndɛ aso lo mbuta ɔnɛ: “Nyowaetshake dia nkitanyiya akambo tshɛ wamomonyodjangɛ.” (Divɛsa 20) Sho mbetshaka eyoyo dia vɔ nkitanyiya wadjango waki Yeso, mbidja ndo didjango dia nanga Nzambi, nanga wonyaso onto ndo mbetɛ anto ambeki. (Mateo 22:37-39) Sho mbaetshaka yema yema woho wa vɔ nembetshiya akambo wa mɛtɛ wa lo Bible ndo mamɛ mbetawɔ kawɔ k’oyoyo. Etena kakotshawɔ kɛnɛ kalɔmba Afundelo  dia nsambisha, sho kambaka kaamɛ la wɔ ndo mbaetshaka oma l’ɛtɛkɛta ndo oma l’ɛnyɛlɔ woho wakokawɔ nkamba olimu ɔsɔ dimɛna. Wetshelo w’ambeki w’eyoyo hawokomɛ etena kalongolawɔ batismu. Ambeki weke kabatizama mbeyaka monga l’ohomba wa wetshelo ekina dia mbakimanyiya dia vɔ ndɔshana l’ekakatanu wahomana la wɔ etena katawayele Kristo.​—Luka 9:23, 24.

20, 21. a) Lande na kahatahombe mboka wɔma etena kakotshaso ɔkɛndɛ wakatosha Yeso? b) Lande na kele ɔnɛ keema etena ka sho nɛngɔla alemba ndo yɛdikɔ yakɔna yahombaso mbɔsa?

²⁰ Yeso akakomiya ɛtɛkɛta wendana l’ɔkɛndɛ wakandasha ambeki ande lo mbashikikɛ ɔnɛ: “Nyolonge, dimi lekɔ la nyu nshi tshɛ polo l’etena k’ekomelo ka dikongɛ di’akambo.” (Mateo 28:20) Yeso akeyaka dia nde akasha ambeki ande ɔkɛndɛ wa woke. Nde akeyaka nto ɔnɛ lo tena dimɔtshi, vɔ wayohetshama oma le atunyi etena kakotshawɔ ɔkɛndɛ ɔsɔ. (Luka 21:12) Koko, takawahombe mboka wɔma. Ɔnɔmbɔdi aso hatotshike dia sho nkotsha ɔkɛndɛ ɔsɔ oma lo welo aso shoamɛ. Shi ekɔ dui diakeketsha dia mbeya dia Ɔnɛ lele la “lowandji tshɛ l’olongo ndo la nkɛtɛ” ekɔ kaamɛ la so dia tosukɛ etena kakotshaso ɔkɛndɛ ɔsɔ?

²¹ Yeso akashikikɛ ambeki ande dia edja tshɛ kayowokambaka olimu ɔsɔ, nde ayonga kaamɛ la wɔ l’edja k’ɛnɔnyi nkama polo l’etena “k’ekomelo ka dikongɛ di’akambo.” Polo lam’ayoya ekomelo, sho pombaka ntetemala nkotsha ɔkɛndɛ wakatosha Yeso. Ɔnɛ keema etena ka sho nɛngɔla alemba. Dinela dia woke dia lo nyuma diekɔ lo tatetemala salema ndo anto efula wetawɔ losango lakɔ wekɔ lo tshumanyema. Oko weso ambeki waki Kristo, nyɛsɔ toyashikikɛ dia nkotsha ɔkɛndɛ wa woke wakandatosha. Nyɛsɔ tɔshi yɛdikɔ ya nkamba la wenya aso, wolo aso ndo la diangɔ diaso dia nkitanyiya didjango diaki Kristo diata ɔnɛ: “Nyotshu ndo nyetɛ anto . . . Ambeki.”