1, 2. Naa leeta loleki dimɛna lakoka anto tshɛ nongola ndo dimbola diakɔna diakokaso ndjambola?

 LEETA lakɔna loleki dimɛna lakayalongola? Wɛ mbeyaka nkanyiya dikambo dia etena kakawakelɛ lo diaaso dimɔtshi dia laande, ondo lo diwala di’anto amɔtshi ahende wokayɛ ngandji efula. Kana wɛ mbeyaka mbohɔ lushi lakawakelɛ dia ndjotatɛ nkamba olimu ɔmɔtshi wa dimɛna efula. Naka wɛ ambolongolaka ndjeta ya ngasɔ, kete aha la taamu wɛ aki l’ɔngɛnɔngɛnɔ w’efula ndo akɔsama la nɛmɔ lo woho wakawakelɛ. Koko kɛnɛ kele mɛtɛ ele, wɛ akalongola leeta lɔmɔtshi loleki ndjeta tshɛ dimɛna. Sho tshɛ takalongola leeta lɔsɔ. Ndo woho wakadimolaso lo leeta lɔsɔ ekɔ la shɛngiya ya wolo le so. Ɔsɔ ekɔ ɔsɔnwɛlɔ woleki tshɛ dimɛna wasalaso lo lɔsɛnɔ.

² Leeta lakɔna lɔsɔ? Ɔsɔ ekɔ leeta l’oma le Yeso Kristo, Ɔna ɛtɔi laki Jehowa Nzambi Kanga-Wolo-Tshɛ, ndo lɔ tanemaka lo Bible. Lo Makɔ 10:21, sho mbadiaka ɛtɛkɛta waki Yeso ɛnɛ: “Yaka, ondjele.” Lo mɛtɛ, sho tshɛ mbelɛnde. Ayonga dimɛna sho ndjambola ɔnɛ: ‘Ngande wayomokadimola?’ Okadimwelo wa dimbola sɔ mbeyamaka dimɛna. Ndooko onto lakoka ntona leeta la dimɛna lɔsɔ. Dui dia diambo ko, anto efula litonaka. Lande na?

3, 4. a) Akambo akɔna waki la pami kakaye ndjombola Yeso dia lɔsɛnɔ la pondjo wakoka anto nkɔmiya? b) Waonga akɔna w’amɛna wakɛnyi Yeso le owandji w’ɔngɔnyi ɔsɔ?

³ Tɔsɛdingole ɛnyɛlɔ kaki pami kɛmɔtshi kakalongola leeta lɔsɔ oma le Yeso ndamɛ ambeta ɛnɔnyi oko 2000. Pami  kɛsɔ akalɛmiyamaka efula. Nde aki l’akambo asato wakombola anto efula, mbuta ate ɔlɔngɔlɔngɔ, ɔngɔnyi ndo lowandji. Bible mbutaka dia nde aki “ɔlɔngɔ a pami,” aki la “ɔngɔnyi efula,” ndo aki “owandji ɔmɔtshi.” (Mateo 19:20; Luka 18:18, 23) Koko, ɔlɔngɔ a pami ɔsɔ aki la dionga dimɔtshi di’ohomba efula. Nde akoke lokumu la Yeso, Ombetsha a Woke ndo akangɛnangɛnaka kɛnɛ kakandoke.

⁴ Ewandji efula wa lo nshi shɔ kombishaka Yeso nɛmɔ diakandahombaka nongola. (Joani 7:48; 12:42) Koko owandji ɔsɔ akasale akambo lo yoho yotshikitanyi. Bible totɛka ɔnɛ: “Lam’akandatatshɔka, pami kɛmɔtshi akalawɔ, akayokusama la ntondo kande ko akawombola ate: ‘Ombetsha w’ɔlɔlɔ, ahombami nsala dia dimi nkita lɔsɛnɔ la pondjo?’” (Makɔ 10:17) Tolembete woho wakalomɔlomɔka pami kɛsɔ dia ntɛkɛta la Yeso, nde akayalawɔka l’atei w’anto oya le Yeso oko wakoka nsala ose wola kana onto l’anyanya. Laadiko dia laasɔ, nde akakusama la dilɛmiɛlɔ tshɛ la ntondo ka Kristo. Ɔnkɔnɛ, lo yɛdikɔ mɔtshi, nde aki l’okitshakitsha ndo akeyaka ehomba ande wa lo nyuma, waonga wakɔsaka Yeso la nɛmɔ. (Mateo 5:3; 18:4) Mbokɛmaka lande na kele “Yeso akawende, akawoke ngandji.” (Makɔ 10:21) Ngande wakakadimola Yeso lo dimbola diaki ɔlɔngɔ a pami ɔsɔ?

5. Ngande wakakadimola Yeso ɔlɔngɔ a pami w’ɔngɔnyi ndo ngande weyaso dia aha monga ose wola mbaki “dikambo ɔtɔi” diakootshikalɛ? (Enda nɔtɛ.)

⁵ Yeso akɛnya dia She amboshilaka mbuta awui efula w’ohomba wendana la woho wa nkondja lɔsɛnɔ la pondjo. Nde akakambe l’Afundelo ndo ɔlɔngɔ a pami ɔsɔ akate dia nde kitanyiyaka Ɛlɛmbɛ wa Mɔsɛ la kɔlamelo tshɛ. Koko, shɛnɔdi ya wolo yaki la Yeso akokimanyiya dia mɛna kɛnɛ kaki l’otema wa pami kɛsɔ. (Joani 2:25) Nde akɛnyi di’owandji ɔsɔ aki l’okakatanu wa woke wakafukutanyaka diɔtɔnganelo  diasande la Nzambi. Oma laasɔ, Yeso akawotɛ ate: “Dikambo ɔtɔi kambokotshikalɛ.” Naa “dikambo ɔtɔi” diakɔ? Yeso akawotɛ ate: “Tshɔka tosondja diangɔ diayɛ ndo sha ase wola.” (Makɔ 10:21) Onde Yeso akalange mbuta dia paka onto kongi wola ko nde kambɛ Nzambi? Keema. a Kristo akalangaka mbuta dui dimɔtshi di’ohomba efula.

6. Leeta lakɔna lakelɛ Yeso owandji w’ɔngɔnyi ndo kakɔna kɛnya okadimwelo wakasha pami kakɔ lo kɛnɛ kendana la kɛnɛ kaki l’otema ande?

⁶ Dia mɛnya hwe kɛnɛ kakahombamaka le pami kɛsɔ, Yeso akawosha leeta la laande ɔnɛ: “Yaka, ondjele.” Ohokanyiya yema, pami kɛsɔ akalongola leeta oma le Ɔnaki Nzambi Nkum’Olongo ndamɛ dia mboyela! Yeso akolake nto difuto dia woke lo mbotɛ ɔnɛ: “Wɛ ayonga la ɔngɔnyi l’olongo.” Onde owandji w’ɔngɔnyi ɔsɔ aketawɔ leeta lɔsɔ mbala kakɔ ɔtɔi? Ɔkɔndɔ mbutaka ɔnɛ: “Nde akonge ɔkɛtshi ndo akatshu la lonyangu, nɛ dia nde aki la diangɔ efula.” (Makɔ 10:21, 22) Ɔnkɔnɛ, ɛtɛkɛta waki Yeso wakɛnya okakatanu waki l’otema wa pami kɛsɔ. Nde akayaɛkɛka efula lo diangɔ diande ndo djekoleko lo lowandji lande la lokumu lakayaka oma lo diangɔ sɔ. Lonyangu ko, ngandji kakandokaka diangɔ sɔ kakaleke ngandji kakandokaka Kristo. Ɔnkɔnɛ, “dikambo ɔtɔi” diakotshikalɛ ele mboka Yeso nde la Jehowa ngandji ka l’otema ɔtɔi ndo ka ndjahondja. Lam’ele ɔlɔngɔ a pami ɔsɔ komonga la ngandji ka ngasɔ, nde akatone leeta la laande lakawelɛ Yeso. Ko ngande wendanayɛ la dikambo sɔ?

7. Lande na kakokaso ndjashikikɛ dia leeta laki Yeso mendanaka ndo la so ɛlɔ kɛnɛ?

 ⁷ Leeta laki Yeso kokomɛ paka le pami kɛsɔ kana le anto angana ato. Yeso akate ate: “Naka onto nangaka ndjelami, nde . . . atetemale ndjelami.” (Luka 9:23) Tolembete dia “onto” tshɛ kokaka nkoma ombeki waki Kristo naka nde “nangaka.” Nzambi kotolaka anto wele l’etema w’ɛlɔlɔ wa ngasɔ oya le Ɔnande. (Joani 6:44) Aha paka akanga w’ɛngɔnyi kana ase wola, lokoho lɔmɔtshi la demba kana wodja ɔmɔtshi kana anto wasɛna l’etena kɛmɔtshi keto mbakoka mbetawɔ leeta laki Yeso, koko anto tshɛ. Ɔnkɔnɛ, leeta laki Yeso l’ɔnɛ: “Yaka, ondjele” mendanaka ndo la yɛ. Lande na kahombayɛ mbetawɔ dia ndjela Kristo? Ndo kakɔna mɛtɛ kalɔmbama dia ndjela Yeso?

8. Ohomba akɔna wele l’anto tshɛ, ndo lande na?

⁸ Ekɔ dui dimɔtshi dia mɛtɛ diahombaso mbetawɔ: Tekɔ mɛtɛ l’ohomba w’efula w’ɔnɔmbɔdi w’ɔlɔlɔ. Aha anto tshɛ mbetawɔ dia wekɔ l’ohomba ɔsɔ, koko onto tshɛ ekɔ la wɔ. Jɛrɛmiya, omvutshi wa Jehowa akasambiyama dia mfunda dui dia mɛtɛ diayela nɛ: “Jehowa le, dimi mbeyaka dimɛna dia onto bu l’akoka wa ndjalɔmbɔla. Lam’akɛndakɛnda onto, nde bu la lotshungɔ la nɔmbɔla kaanga ekolo ande.” (Jɛrɛmiya 10:23) Lo mɛtɛ, anto keema l’akoka kana la lotshungɔ la ndjalɔmbɔla vɔamɛ oko wadiɛnya ɔkɔndɔ wa lɔsɛnɔ w’ana w’anto. (Ondaki 8:9) Lo nshi ya Yeso, ewandji wakasoyaka, wakahɛnyahɛnyaka ndo wakanganyiyaka anto. Yeso akate mɛtɛ etena kakandate lo dikambo di’anto k’anto ɔnɛ: “Vɔ waki oko ɛkɔkɔ waha la olami.” (Makɔ 6:34) Ngasɔ mbediɔ ndo ɛlɔ kɛnɛ. Oko olui ndo l’onto ndo l’onto, tekɔ l’ohomba w’ɔnɔmbɔdi wakokaso mbɛkɛ otema ndo nɛmiya. Onde Yeso ekɔ woho w’ɔnɔmbɔdi wa ngasɔ? Eelo. Tɔsɛdingole ɛkɔkɔ efula watotshutshuya dia nkadimola ngasɔ.

9. Kakɔna katshikitanya Yeso l’ewandji ekina tshɛ?

 ⁹ Ntondotondo, Yeso akasɔnama oma le Jehowa Nzambi. Ewandji efula w’ana w’anto sɔnamaka oma le asekawɔ anto wele keema kokele, wakesama tena efula ndo wele la wandja. Yeso ntshikitana la weho w’ewandji ɛsɔ. Titrɛ kele la nde shikikɛka dikambo sɔ. Tshɛkɛta “Kristo,” kana “Mɛsiya,” nembetshiyaka “Okitami w’esɔ.” Eelo, Yeso akakitama esɔ, mbuta ate akasɔnama dia monga lo dihole dia laande oma le Nkum’Olongo ndamɛ. Jehowa Nzambi akate lo dikambo dia Ɔnande ate: “Eenda, okambi ami wamomɔsɔna, wokami ngandji ndo wamometawɔ. Dimi layodja nyuma kami le nde.” (Mateo 12:18) Ndooko onto leya woho w’owandji weso l’ohomba oleki Otungi aso. Lam’ele lomba laki Jehowa keema l’elelo, tekɔ l’ɛkɔkɔ w’eshika wa ndjaɛkɛ le owandji wakandasɔnɛ.​—Tokedi 3:5, 6.

10. Lande na kele Yeso ekɔ ɛnyɛlɔ koleki dimɛna k’anto ndjela?

¹⁰ Dui dia hende, Yeso akatotshikɛ ɛnyɛlɔ ka kokele ndo kahombaso ndjela. Owandji woleki tshɛ dimɛna ekɔ la waonga wakoka anto ande ngɛnangɛna ndo mbokoya. Nde nɔmbɔlaka lo mbasha ɛnyɛlɔ ndo kimanyiyaka anto ande dia vɔ ndeka ndowana. Waonga akɔna wayoyoleka nanga di’owandji monga la wɔ? Onde dihonga? Lomba? Kɛtshi? Ko kayotota dia etete kaanga l’atei w’ekakatanu? Naka wɛ mbeka ɔkɔndɔ wa lɔsɛnɔ laki Yeso la la nkɛtɛ, kete wɛ ayɛna dia nde aki la waonga asɔ ndo akina. Yeso akakɛnɛmɔla lo yoho ya kokele waonga tshɛ wele la She lele l’olongo. Nde aki la waonga tshɛ wakakoke monga l’onto la kokele. Ɔnkɔnɛ, oma l’etsha ande, l’ɛtɛkɛta tshɛ wakandate ndo lo nsaki tshɛ yakandakɛnɛmɔla, sho tanaka dui dimɔtshi diakokaso mbokoya. Bible mbutaka dia nde akatotshikɛ ‘ɛnyɛlɔ dia sho mboyela dimɛna dimɛna lo wanya ande.’​—1 Petero 2:21.

11. Ngande wakɛnya Yeso dia nde ekɔ “olami w’ɔlɔlɔ w’ɛkɔkɔ”?

¹¹ Dui dia sato, Kristo akakotsha kɛnɛ kakandayataka ɔnɛ:  “Dimi lekɔ olami w’ɔlɔlɔ w’ɛkɔkɔ.” (Joani 10:14) Anto wa lo nshi yakafundamaka Bible wakeyaka dikambo sɔ dimɛna. Alami w’ɛkɔkɔ wakasalaka tshɛ dia nkokɛ ɛkɔkɔ awɔ. “Olami w’ɔlɔlɔ w’ɛkɔkɔ” mbetawɔka mbidja lɔsɛnɔ lande lo waale dia nkokɛ ɛkɔkɔ ande. Ɛnyɛlɔ, Davidɛ dia tshɛnde la Yeso aki olami w’ɛkɔkɔ lo nshi yakinde dikɛnda ndo lo waaso efula nde akadjaka lɔsɛnɔ lande lo waale lo ndɔshana la nyama ya ngala yakalangaka munda ɛkɔkɔ ande. (1 Samuɛlɛ 17:34-36) Yeso kokomɛ tsho lo mbidja lɔsɛnɔ lande lo waale lo wahɔ w’anto woyela, koko nde akakimɔ lɔsɛnɔ lande lo dikambo diawɔ. (Joani 10:15) Ewandji engana wele la yimba ya ndjahondja ya ngasɔ?

12, 13. a) Lo woho akɔna weya olami w’ɛkɔkɔ ɛkɔkɔ ande ndo lo woho akɔna waweyawɔ? b) Lande na kalangayɛ nɔmbwama oma le Olami w’ɔlɔlɔ w’ɛkɔkɔ?

¹² Yeso aki “olami w’ɔlɔlɔ w’ɛkɔkɔ” lo yoho kina. Nde akate ate: “Dimi mbeyaka ɛkɔkɔ ami ndo ɛkɔkɔ ami mbeyakami.” (Joani 10:14) Ohokanyiya yema kɛnɛ kakalange Yeso mbuta oma l’ɛtɛkɛta ɛsɔ. Le ɔsɛdingodi w’anyanya, olui w’ɛkɔkɔ mbeyaka mɛnama tsho oko lemba la ditongami dimɔtshi. Koko olami w’ɛkɔkɔ mbeyaka ɔkɔkɔ l’ɔkɔkɔ. Nde mbeyaka ɔkɔkɔ akɔna wele l’ohomba w’ekimanyielo kande etena kotawɔ, ɔna ɔkɔkɔ akɔna wele l’ohomba w’ekokelo nɛ dia vɔ watayala la wolo wa nkɛndakɛnda etale vɔamɛ ndo ɛkɔkɔ akɔna weke mala ntata kana mpomɔ. Ɛkɔkɔ vɔ lawɔ mbeyaka olami awɔ dimɛna. Vɔ mbeyaka dui diande ndo hawokoke pondjo difɔnya la dui di’onto okina. Etena kaahɛmɔla olami, vɔ mboyelaka aha la ntshimbatshimba. Lɛnɛ awatɔlande mbatshɔwɔ. Ndo nde mbeyaka lɛnɛ ahombande ntshɔ la wɔ. Nde mbeyaka mbalɔmbɔla lɛnɛ ele adiyo w’ɔmɔngɛla ndo ashi w’amɛna. Etena kawaendande, ɛkɔkɔ ndjaokaka dia wekɔ lo lotui tshitshi.​—Osambo 23.

¹³ Onde wɛ hakombola woho w’owandji wa ngasɔ? Olami  w’ɔlɔlɔ w’ɛkɔkɔ mbeyamaka lo woho wasalɛnde wanɛ woyela akambo lo yoho shɔ. Nde ndakaka dia kosha lɔsɛnɔ l’ɔngɛnɔngɛnɔ ndo lele l’oyango oma ko kakianɛ ndo ndjokosha lɔsɛnɔ la pondjo lo nshi yayaye. (Joani 10:10, 11; Ɛnyɛlɔ 7:16, 17) Ɔnkɔnɛ, sho pombaka mbeya kɛnɛ kalɔmbama dia ndjela Kristo.

14, 15. Dia ndjela Kristo, lande na kele dui sɔ hakomɛ tsho lo ndjafuna ɔnɛ lekɔ Okristo kana lekɔ la diɔtɔnganelo dia ma ma la Yeso?

¹⁴ Ɛlɔ kɛnɛ, miliyɔ y’anto ndjaɔsaka dia waketawɔ leeta laki Kristo. Vɔ ndjaelɛka ɔnɛ Akristo. Ondo vɔ wekɔ l’ɛtɛmwɛlɔ wakaabatiza ambutshi awɔ. Kana vɔ funaka dia wekɔ la diɔtɔnganelo dia ma ma la Kristo ndo mbetawɔka dia nde kele Oshimbedi awɔ. Onde kɛsɔ mbakonyaka mɛtɛ ambeki waki Kristo? Onde kɛsɔ mbakataka Yeso etena kakandatɔlɔmbɛ dia sho mboyela? Keema.

¹⁵ Tɔshi ɛnyɛlɔ ka Lokristokristo, lo wedja efula anto efula funaka dia wekɔ lo ndjela Kristo. Onde Lokristokristo ndjelaka wetshelo waki Yeso Kristo? Shi sho mɛnaka lo wedja ɛsɔ lohetsho, ɔsɔkishelo, diakatanelo ndo diɛngiya oleki l’ahole akina?

16, 17. Mbala efula, kakɔna katshikalɛ anto wayata ɔnɛ Akristo mbewɔ ndo kakɔna katshikitanya l’ambeki wa Kristo wa mɛtɛ?

¹⁶ Yeso akate dia ambeki ande wa mɛtɛ wayeyama aha oma lo kɛnɛ kayatawɔ, koko ntondotondo oma l’etsha awɔ. Ɛnyɛlɔ, nde akate ate: “Aha onto tshɛ latombelɛka ate: ‘Nkumadiɔndjɔ, Nkumadiɔndjɔ’ mbayɔtɔ lo Diolelo dia l’olongo, koko paka ɔnɛ latosalaka lolango la Papa lele l’olongo mbayɔtɔ.” (Mateo 7:21) Lande na kele anto efula welɛ Yeso ɔnɛ Nkumadiɔndjɔ hawosale lolango la She? Tohɔ owandji w’ɔngɔnyi. Tena efula, ‘dikambo ɔtɔi diatshikalɛ’ anto wayata ɔnɛ Akristo mbewɔ ele monga la ngandji ka l’otema ɔtɔi otsha le Yeso ndo otsha le Ɔnɛ lakotome.

 ¹⁷ Ngande wakoka onto nsala dikambo sɔ? Shi miliyɔ y’anto wayata ɔnɛ Akristo mbewɔ funaka dia vɔ mbokaka Kristo ngandji? Kɛsɔ mɛtɛ mbatawɔ. Koko, mboka Yeso ndo Jehowa ngandji hakomɛ tsho l’ɛtɛkɛta. Yeso akate ate: “Naka onto mbokakami ngandji, kete nde ayokitanyiya ɛtɛkɛta ami.” (Joani 14:23) Ndo etena kakandatɛkɛtaka oko olami w’ɛkɔkɔ, nde akate ate: “Ɛkɔkɔ ami pokamɛka dui diami, dimi mbaeyaka ndo vɔ ndjelakami.” (Joani 10:27) Eelo, ngandji ka mɛtɛ kokaso Kristo pombaka mɛnama aha tsho oma l’ɛtɛkɛta kana oma lo nsaki, koko djekoleko oma lo etsha aso.

18, 19. a) Shɛngiya yakɔna yahomba monga la wekelo w’awui wendana la Yeso le so? b) Naa oyango wa dibuku nɛ, ndo ngande wayodiokimanyiya anto wele aya edja efula kayaɔsawɔ dia wekɔ lo ndjela Kristo?

¹⁸ Koko, etsha aso hawoye oyaya. Vɔ kɛnɛmɔlaka lonto laso la l’etei k’otema. Ɔnkɔnɛ, lonto laso la l’etei k’otema kahombaso ntatɛ nɔngɔsɔla. Yeso akate ate: “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ, la Yeso Kristo lakayatome.” (Joani 17:3) Naka sho mbeka ndo nkana yimba la ewo k’oshika kendana la Yeso, kete dui sɔ diayonanda etema aso. Tayoleka mbooka ngandji ndo tayoleka tshutshuyama dia monga la nsaki ka ntetemala mboyela lushi la lushi.

¹⁹ Ɔsɔ mbele oyango wele la dibuku nɛ. Oyango adiɔ bu tsho wa tɛnya lo tshena pe lɔsɛnɔ ndo olimu wakakambe Yeso, koko dia tokimanyiya dia sho ndeka mbeya woho wa mboyela. b Diɔ diakalɔngɔswama dia tokimanyiya dia sho ndjaenda lo talatala k’Afundelo ndo ndjambola ɔnɛ: ‘Onde dimi mɛtɛ lekɔ lo tayele Yeso?’ (Jakɔba 1:23-25) Ondo aya edja kayaɔsayɛ oko ɔkɔkɔ watalɔmbwama oma le Olami w’ɔlɔlɔ  w’ɛkɔkɔ. Ko onde wɛ hetawɔ dia sho kokaka ntana awui amɔtshi wakokaso ndjalowanya? Bible tokeketshaka ɔnɛ: “Nyotetemale ndjasɛdingola dia mbeya kana nyekɔ lo mbetawɔ; nyotetemale mɛnya woho w’anto wenyu.” (2 Kɔrɛtɔ 13:5) Ekɔ mɛtɛ dimɛna dia sho ntetemala ndjasɛdingola dia mbeya kana tekɔ lo nɔmbwama oma le Yeso, Olami w’ɔlɔlɔ w’ɛkɔkɔ wele la ngandji wakasɔnama oma le Jehowa ndamɛ.

20. Kakɔna kayotɔsɛdingola lo tshapita yayela?

²⁰ Wekelo ayɛ wa dibuku nɛ wakokimanyiya dia nkeketsha ngandji kokayɛ Yeso ndo Jehowa. Naka ngandji kɛsɔ kɔlɔmbɔla lo lɔsɛnɔ layɛ, kete wɛ ayonga la wɔladi w’efula ndo ɔngɛnɔngɛnɔ l’andja w’omusu ɔnɛ ndo wɛ ayotombolaka Jehowa pondjo pondjo lo woho wakandatosha Olami w’ɔlɔlɔ w’ɛkɔkɔ. Lo mɛtɛ, wekelo aso wendana la Kristo pombaka mbikama lo ewo k’oshika kendana la ɔkɛndɛ wele la nde lo okotshamelo wa sangwelo diaki Nzambi. Diakɔ diele, lo tshapita 2 tayɔsɛdingola ɔkɛndɛ wele la Yeso lo sangwelo diaki Jehowa diendana l’andja w’otondo.