1-3. a) Polo lo yɛdikɔ yakɔna yaki Yeso la lɔkɔnyɔ l’ekambɔ ka Ngɛtɛsɛmanɛ ndo l’ɔtɛ wa na? b) Kakɔna kakokaso mbuta lo dikambo dia ɛnyɛlɔ ka ekikelo kakatotshikɛ Yeso ndo ambola akɔna wonyiyama?

 WENYA w’ekomelo wa lɔsɛnɔ la Yeso la lanɛ la nkɛtɛ aki etena ka wolo ndo nde aki la lɔkɔnyɔ la mamba lakinde atongaka la lɔ ndooko lushi. Nde akatshu kaamɛ l’apɔstɔlɔ ande l’ekambɔ ka Ngɛtɛsɛmanɛ, lɛnɛ akawatshɔka mbala la mbala. Koko l’otsho ɔsɔ nde aki l’ohomba w’etena ka monga ndamɛ. Ɔnkɔnɛ, nde akatshike apɔstɔlɔ ande ko akatshu tshalola l’atei w’ekambɔ, akake adwe ko akatatɛ nɔmba. Nde akalɔmbɛ l’etete ndo aki la lɔkɔnyɔ l’efula woho ɔnɛ wele “dungu diande diakayala oko apɔpɔ wa dikila mbakɔ la nkɛtɛ.”​—Luka 22:39-44.

² Lande na kaki Yeso la lɔkɔnyɔ la ngasɔ? Lo mɛtɛ, nde akeyaka dia kem’edja, nde ayanga diɛnɛ l’ɛhɛnyɔhɛnyɔ wa lo demba wa wolo, koko aha dui sɔ mbakookiyanyaka. Ekɔ dui dikina dioleki ohomba diakookiyanyaka. Nde akayakiyanyaka efula dikambo dia lokombo la She ndo lo woho wele nshi yayaye y’anto yakalemanɛka la kɔlamelo yande. Yeso akeyaka dia ekikelo kaki ohomba efula. Naka nde hatondoyisha dia mbikikɛ, kete lokombo la Jehowa layoshama sɔnyi ka mamba. Koko Yeso akakikɛ. Yema l’ɔkɔngɔ ko lushi lɔsɔ, la ntondo ka nde nkitshiya, Yeso ɔnɛ lakatshike ɛnyɛlɔ koleki dimɛna ka ekikelo akate la dui dia wolo ate: “Diambokotshama.”​—Joani 19:30.

³ Bible tokeketshaka dia sho ‘nkana yimba dimɛna dikambo dia ɔnɛ lakakikɛ.’ (Hɛbɛru 12:3) Kɛsɔ monyiyaka ambola w’ohomba anɛ: Naa ehemba ɛmɔtshi wakakikɛ Yeso? Kakɔna kakookimanyiya dia mbikikɛ? Ngande wakokaso  mbookoya? Koko la ntondo ka sho nkadimola lo ambola asɔ, nyɛsɔ tɔsɛdingole kɛnɛ kalembetshiya ekikelo.

4, 5. a) “Ekikelo” kɛdikɛdi na? b) Sha ɛnyɛlɔ kɛnya woho wele ekikelo halembetshiya tsho mpomana l’ehemba wahatakoke mbewɔ?

⁴ Mbala la mbala, sho tshɛ pomanaka la “ehemba wa weho la weho.” (1 Petero 1:6) Aha ɔnɛ tambohomana l’ohemba kete laasɔ tekɔ l’ekikelo. Tshɛkɛta ya lo Grɛkɛ yokadimɔmi ɔnɛ “ekikelo” nembetshiyaka “dikoka dia ntshikala nge kana nshika ntanga la ntondo k’ekakatanu.” Lo kɛnɛ kendana la yoho ya ekikelo kakatɛkɛta afundji wa Bible, nomb’ewo kɛmɔtshi akate ate: “Ekikelo ekɔ dionga diakimanyiya onto dia mbetawɔ akambo amɔtshi mbokomɛ aha tsho wetawɔ etawɔ koko la elongamelo ka wolo. . . . Ɔsɔ ekɔ dionga diakimanyiya onto dia nde nshika ekolo etena katetemalande diɛnɛ l’ekakatanu. Ɔsɔ ekɔ dionga di’ɔlɔlɔ diakoka nkadimola ohemba woleki wolo otsha lo lotombo nɛ dia washo w’onto lakikɛ mɛnaka difuto diele la wedi w’ohemba.”

⁵ Ɔnkɔnɛ, mbikikɛ halembetshiya tsho mpomana l’ehemba wahatakoke mbewɔ. Lo ndjela Bible, ekikelo nembetshiyaka ntshikala nge, monga la yimba y’ɔlɔlɔ ndo monga l’elongamelo la ntondo k’ehemba. Tɔsɛdingole ɛnyɛlɔ kɛnɛ: Anto ahende wekɔ lo lokanu lakɔ ɔtɔi koko vɔ wakandama l’ɔtɛ w’ɛkɔkɔ wotshikitanyi. Ɔmɔtshi leyama oko ondjakanyi ekɔ lo nongola dilanya la lonyangu tshɛ lo kɛnɛ kakandasale. Okina ekɔ Okristo wa mɛtɛ wakandama l’ɔtɛ wa kɔlamelo yande. Koko nde ekɔ lo mɛna akambo la sso di’ɔlɔlɔ nɛ dia kɛnɛ kambokomɛ ekɔ diaaso dia nde mɛnya mbetawɔ kande. Ekɔ wolo sho mbuta dia ondjakanyi ɔsɔ ekɔ lo mbikikɛ, koko Okristo ekɔ lo nkɛnɛmɔla dionga dia dimɛna sɔ.​—Jakɔba 1:2-4.

6. Ngande wakokaso monga la ekikelo?

⁶ Ekikelo ekɔ ohomba dia nkondja panda. (Mateo 24:13) Koko sho hatotɔ la dionga dia dimɛna sɔ. Sho pombaka  nsala la wolo dia monga la ekikelo. Lo woho akɔna? Rɔmɔ 5:3 mbutaka ɔnɛ: “Asui mbishaka ekikelo.” Eelo, naka mɛtɛ sho nangaka nkɛnɛmɔla ekikelo, kete hatohombe ndawɔ ehemba tshɛ wendana la mbetawɔ kaso. Sho pombaka mbatokomɛ. Ekikelo ndjaka oma lo woho walɔshanaso ndo watondoyaso weho tshɛ w’ehemba wahomana la so lushi la lushi. Ohemba tshɛ watondoyaso toshaka wolo wa ndjotondoya ohemba okina. Koko hatonge la ekikelo oma lo welo aso hita. Tekɔ l’ohomba wa “wolo washana Nzambi.” (1 Petero 4:11) Dia tokimanyiya dia sho nshika ntanga, Jehowa akatosha ekimanyielo ka dimɛna efula, mbuta ate ɛnyɛlɔ k’Ɔnande. Nyɛsɔ tɔsɛdingole ɛnyɛlɔ ka dimɛna efula ka ekikelo kaki Yeso.

7, 8. Kakɔna kakakikɛ Yeso l’ekomelo ka lɔsɛnɔ lande la lanɛ la nkɛtɛ?

⁷ Oya l’ekomelo ka lɔsɛnɔ lande la lanɛ la nkɛtɛ, Yeso akakikɛ ɛhɛnyɔhɛnyɔ efula. Laadiko dia lɔkɔnyɔ la wolo laki la nde l’otsho w’ekomelo wakinde la nkɛtɛ, tɔsɛdingole ɔkɔmwɛlɔ wakahombe monga la nde ndo sɔnyi kakandashama. Ɔngɛnyi ande w’oshika akoofunge, angɛnyi ande wa suke wakoolawɔ ndo ase tominadi ta laadiko t’ɔtɛmwɛlɔ wakoohindɛ onongo, wakɔsɔkɛ, wakawotɛ sɔyi ndo wakɔkɔmɔla. Koko nde akakikɛ akambo asɔ tshɛ la wɔlamu ndo la kɛnɛmɔ.​—Mateo 26:46-49, 56, 59-68.

⁸ Lo wenya w’ekomelo wa lɔsɛnɔ lande, Yeso akakikɛ asui wa wolo efula wa lo demba. Wakɔkɔmɔla wolo efula, diakɔ diata anto ɔnɛ: “Eshingɔ wakawɔkɔmɔla wakohomuya mpota ya weke ndo yakatondjaka dikila.” Wakohanɛ l’otamba ndo wakodiake nyɔi kakinde “kokoka mvɔ esadi paka ambotasowi edja la ntondo.” Tokanyiya yema lɔkɔnyɔ laki la nde etena kakawohanɛ l’otamba ndo kakawɔkɔkɔla nsɛti ya weke l’anya ndo l’ekolo. (Joani 19:1, 16-18) Tokanyiya nto kandji k’efula kaki la nde etena kakawemadia otamba ko demba  diande tshɛ diɔlɛndalɛnda lo nsɛti ndo ɔkɔngɔ ande wambohokama l’otamba. Nde akakikɛ asui wa lo demba asɔ tshɛ etena kakinde la lɔkɔnyɔ lakatatɛkɛtshi l’etatelo ka tshapita nyɛ.

9. Kakɔna kalembetshiya mɛmba “otamba w’asui” ndo ndjela Yeso?

⁹ Oko weso ambeki waki Kristo, kakɔna kakokaso mbikikɛ? Yeso akate ate: “Naka onto nangaka ndjelami, nde . . . ɛmbɛ otamba ande w’asui ndo atetemale ndjelami.” (Mateo 16:24) Etelo k’ɔnɛ “otamba w’asui” kokambi la wɔ lanɛ nembetshiyaka asui, sɔnyi kana nyɔi. Ndjela Kristo keema dikambo dia wɔdu. Ɛlɛmbɛ aso w’Akristo totshikitanyaka l’anto akina. Andja ɔnɛ tohetshaka l’ɔtɛ weso keema anto wa lɔkɔ. (Joani 15:18-20; 1 Petero 4:4) Koko, tekɔ suke dia mɛmba otamba aso w’asui, mbuta ate tekɔ suke dia nsowa, kaanga mvɔ lo dihole dia sho ntshika dia ndjela Ɛnyɛlɔ kaso.​—2 Timɔte 3:12.

10-12. a) Ngande wakadje munga yaki la ambeki waki Yeso ekikelo kande l’ohemba? b) Naa ehemba ɛmɔtshi wakakikɛ Yeso?

¹⁰ L’etena kakandakambaka olimu ande la nkɛtɛ, Yeso akahomana l’ehemba ekina wakayaka oma lo munga y’anto wakasɛnaka la nde. Tohɔ dia nde aki “okambi wa kɔmba” wele Jehowa akakambe la nde dia ntonga nkɛtɛ la diangɔ tshɛ diele lɔkɔ. (Tokedi 8:22-31) Ɔnkɔnɛ Yeso akeyaka dia sangwelo diaki Jehowa otsha le anto aki dia vɔ nkɛnɛmɔla waonga ande ndo monga la lɔsɛnɔ ndo l’alemba wa kokele. (Etatelo 1:26-28) Etena kakinde la nkɛtɛ, Yeso akɛnyi etombelo wa kɔlɔ w’oma lo pɛkato lo yoho kina, mbuta ate ndamɛ aki onto ndo akayaoke woho wayaoka anto. Nde aki mɛtɛ la lonyangu efula etena kakandɛnyi ndamɛ woho wakatshikitana efula lɔsɛnɔ l’anto la lɔsɛnɔ la kokele laki la Adama la Eva l’etatelo! Lo dikambo sɔ nto, ekikelo kaki Yeso kakɔtɔ l’ohemba. Onde nde akahombe nkɔmɔ ndo mpekɔ l’ɔtɛ w’ɔnɛ welo tshɛ wakandadjaka wayɔtɔ l’ashi?

¹¹ Wendjodi waki la ase Juda lo losango lande akanyangiya Yeso efula woho ɔnɛ wele nde akalele lo sɛkɛ. Onde nde  aketawɔ dia wendjodi awɔ nkitshakitsha ohetoheto ande kana mbokonya dia nde ntshika nsambisha? Keema, “nde aketshaka lushi la lushi lo tɛmpɛlɔ.” (Luka 19:41-44, 47) Nde aki la “lonyangu l’efula” lo menda lonyu l’etema wa Afarisɛ wanɛ wakawendaka dia kana nde ayɔkɔnɔla onto ɔmɔtshi lushi la Sabato. Onde nde akoke atunyi ande asɔ wakayaɔsaka dia wekɔ anto w’ɛlɔlɔ wɔma? Ndooko! Nde komboka wɔma ndo akakɔnɔla onto akɔ k’atei atei wa shinangɔnga!​—Makɔ 3:1-5.

¹² Munga yaki la ambeki ande yakawodje nto l’ohemba. Oko wakatadieke lo tshapita 3, ambeki ande waki la mposa k’efula ka lokumu. (Mateo 20:20-24; Luka 9:46) Yeso akaalake mbala efula lo kɛnɛ kendana la ohomba wa monga l’okitshakitsha. (Mateo 18:1-6; 20:25-28) Koko vɔ komonga suke dia nkitanyiya. Polo ndo l’otsho w’ekomelo wakinde la wɔ, vɔ ‘wakawane wolo’ dia mbeya ɔnɛ loleki woke l’atei awɔ!  (Luka 22:24) Onde Yeso akakɔmɔ lo mɛna dia welo wakandadjaka tshɛ wakɔtɔ l’ashi? Ndooko. Mbala tshɛ nde aki la solo dia lotutsha, akɛnaka akambo la sso di’ɔlɔlɔ, aki la elongamelo ndo akatetemalaka mbika washo lo waonga w’ɛlɔlɔ waki la wɔ. Nde akeyaka dia vɔ wakokaka Jehowa ngandji l’etema awɔ ndo waki la nsaki ka mɛtɛ ka nsala lolango Lande.​—Luka 22:25-27.

13. Ehemba akɔna wakoka mpomana la so wafɔna la wɛnɛ wakakikɛ Yeso?

¹³ Sho mbeyaka mpomana l’ehemba wele oko wɛnɛ wakakikɛ Yeso. Ɛnyɛlɔ etena konga anto la wendjodi kana katonawɔ losango la Diolelo. Onde tayetawɔ dia awui asɔ tɔkɔmɔla kana tayotetemala nsambisha l’ohetoheto? (Tito 2:14) Sho mbeyaka pembama nto l’ɔtɛ wa munga y’anangɛso l’akadiyɛso w’Akristo. Sho mbeyaka monga la lonyangu etena katotondjɛ onto ɛtɛkɛta wa kɔlɔ kana katosalɛnde dui dimɔtshi dia kɔlɔ. (Tokedi 12:18) Onde tayota ɔnɛ asekaso ambetawudi hawokadimɔki lam’ele vɔ wekɔ lo nsala munga, ko kana tayotetemala minya yimba lo munga yawɔ ndo mbika washo lo waonga awɔ w’ɛlɔlɔ?​—Kɔlɔsayi 3:13.

14. Akambo akɔna ahende wakakimanyiya Yeso dia nde mbikikɛ?

¹⁴ Kakɔna kakakimanyiya Yeso dia ntshikala nge ndo dia nama olowanyi ande kaanga mbakawawɔnyɔla, mbakawonyangiya ndo mbakawosoya? Akambo ahende w’ohomba efula mbakookimanyiya. Dikambo dia ntondo ele, nde akendɛka l’olongo, ‘le Nzambi kasha ekikelo.’ (Rɔmɔ 15:5) Dikambo dia hende ele, Yeso akendaka la ntondo, mbuta ate nde akadjaka yimba lo difuto diakokongɛka. Tɔsɛdingole akambo ahende asɔ.

15, 16. a) Kakɔna kɛnya dia Yeso kondjaɛkɛ lo wolo ande hita dia mbikikɛ? b) Eshikikelo kakɔna kaki la Yeso otsha le She ndo lande na?

¹⁵ Kaanga mbakinde Ɔna Nzambi la kokele, Yeso kondjaɛkɛ  le nde ndamɛ dia nkondja wolo wa mbikikɛ. Koko, nde akayangaka ekimanyielo oma le She lele l’olongo. Ɔpɔstɔlɔ Pɔɔlɔ akafunde ate: “Kristo akasalaka alɔmbɛlɔ w’ɔsɛngɔsɛngɔ ndo alɔmbɛlɔ, la ekoko wa wolo ndo la asɔyi lo washo.” (Hɛbɛru 5:7) Tolembete dia Yeso “akasalaka” alɔmbɛlɔ ndo ɛsɛngɔsɛngɔ. Tshɛkɛta ‘ɛsɛngɔsɛngɔ’ mendanaka la alɔmbɛlɔ w’oma k’ɛse otema walɔmba onto dia nkondja ekimanyielo. Okambelo wa la tshɛkɛta ‘ɛsɛngɔsɛngɔ’ mɛnyaka dia Yeso akasɛngasɛnga Jehowa mbala efula. Lo mɛtɛ, l’ekambɔ ka Ngɛtɛsɛmanɛ, Yeso akasale alɔmbɛlɔ w’oma k’ɛse otema mbala ko mbala.​—Mateo 26:36-44.

¹⁶ Yeso aki l’eshikikelo tshɛ ɔnɛ Jehowa ayokadimola ɛsɛngɔsɛngɔ ande nɛ dia nde akeyaka ɔnɛ She ‘atokaka dɔmbɛlɔ.’ (Osambo 65:2) L’edja ka lɔsɛnɔ laki la nde la ntondo ka nde ndja la nkɛtɛ oko onto, Ɔna enondo ɔsɔ akɛnyi woho wakadimola She alɔmbɛlɔ w’atɛmɔdi ande wa kɔlamelo. Ɛnyɛlɔ, lam’akinde l’olongo, Ɔna ɔsɔ akɛnyi la washo ande ndamɛ woho wakatome Jehowa ondjelo dia ndjokadimola dɔmbɛlɔ di’oma k’ɛse otema diaki omvutshi Danyɛlɛ la ntondo ka nde nshidiya la nɔmba. (Danyɛlɛ 9:20, 21) Laasɔ ngande wakakoke She diha atoyi diaha nkadimola etena kakɔkɛnɛmɔlɛ Ɔnande ɛtɔi lakandote otema “la ekoko wa wolo ndo la asɔyi lo washo”? Jehowa akakadimola ɛsɛngɔsɛngɔ w’Ɔnande ndo akatome ondjelo dia ndjokeketsha l’ɔtɛ w’ehemba wa wolo waki la ntondo kande.​—Luka 22:43.

17. Dia mbikikɛ, lande na kahombaso mendɛ l’olongo, ndo ngande wakokaso nsala dui sɔ?

¹⁷ Dia mbikikɛ, sho lawɔ pombaka mendɛ l’olongo, mbuta ate le Nzambi ‘ɔnɛ latotoshaka lokalo.’ (Filipɛ 4:13) Naka Ɔnaki Nzambi la kokele akɛnyi ohomba wa nsɛngasɛnga Jehowa dia mbokimanyiya, kete hoke sho! L’ɛnyɛlɔ ka Yeso, sho mbeyaka mɛna ohomba nsɛngasɛnga Jehowa mbala ko mbala. (Mateo 7:7) Kaanga mbahatahombe nongamɛ dia ondjelo ndja le so, sho kokaka monga l’eshikikelo k’ɔnɛ:  Nzambi kaso ka ngandji ayokadimola ɛsɛngɔsɛngɔ w’Akristo wa kɔlamelo wanɛ “[wato]tetemalaka nsala ɛsɛngɔsɛngɔ ndo alɔmbɛlɔ otsho la yanyi.” (1 Timɔte 5:5) Oyadi ehemba akɔna wakoka tokomɛ, mbuta ate hemɔ, nyɔi ka lakiso la ngandji kana ɔlɔshamelo w’oma le atunyi aso, Jehowa ayoka alɔmbɛlɔ wɔlɔmbaso l’etete dia nkondja lomba, dihonga ndo wolo wa mbikikɛ.​—2 Kɔrɛtɔ 4:7-11; Jakɔba 1:5.

18. Ngande wakendaka Yeso l’edia ka asui waki la ntondo kande?

¹⁸ Dikambo dia hende diakakimanyiya Yeso dia mbikikɛ ele, nde akendaka la ntondo, mbuta ate kɛnɛ kaki l’edia ka asui waki la ntondo kande. Bible mbutaka lo dikambo dia Yeso ɔnɛ: “L’ɔtɛ w’ɔngɛnɔngɛnɔ wakakitshama la ntondo kande, nde akakikɛ otamba w’asui.” (Hɛbɛru 12:2) Ɛnyɛlɔ ka Yeso mɛnyaka woho wokakatanyi elongamelo, ɔngɛnɔngɛnɔ la ekikelo kaamɛ. Sho kokaka mbuta lo tshena pe ɔnɛ: Elongamelo mbishaka ɔngɛnɔngɛnɔ ndo ɔngɛnɔngɛnɔ kimanyiyaka dia mbikikɛ. (Rɔmɔ 15:13; Kɔlɔsayi 1:11) Yeso aki la elongamelo ka diambo efula. Nde akeyaka dia kɔlamelo yande yakahombe nkimanyiya dia nyindja lowandji laki She ndo dia ntshungola anto oma lo pɛkato la nyɔi. Yeso aki nto la elongamelo ka tolɛ oko Nkumekanga ndo nkamba oko Ɔlɔmbɛdi a Laadiko  dia mbela anto wele l’okitanyiya ɛtshɔkɔ efula. (Mateo 20:28; Hɛbɛru 7:23-26) Oko wakandake washo lo elongamelo kaki la ntondo kande, Yeso aki l’ɔngɛnɔngɛnɔ wahakoke mbɛdikama ndo ɔngɛnɔngɛnɔ ɔsɔ wakookimanyiya dia nde mbikikɛ.

19. Etena kahomanaso l’ohemba wa mbetawɔ, ngande wakoka elongamelo, ɔngɛnɔngɛnɔ la ekikelo nkamba kaamɛ dia wahɔ aso?

¹⁹ L’ɛnyɛlɔ ka Yeso, sho pombaka ntshika dia elongamelo, ɔngɛnɔngɛnɔ ndo ekikelo nkamba kaamɛ dia wahɔ aso. Ɔpɔstɔlɔ Pɔɔlɔ akate ate: “Nyɔngɛnɛngɛnɛ lo elongamelo.” Nde akakotsha ate: “Nyokikɛ etena kenyu l’asui.” (Rɔmɔ 12:12) Onde wɛ ekɔ lo mpomana l’ohemba ɔmɔtshi wendana la mbetawɔ? Naka ngasɔ, kete enda la ntondo. Tohɛke dia ekikelo kayɛ kayotombola lokombo laki Jehowa. Tetemala nama elongamelo ka Diolelo lo yimba yayɛ. Ɔsa diele oko wɛ ambɔtɔ l’andja w’oyoyo wayaye waki Nzambi ndo ekɔ lo nkondja ɛtshɔkɔ w’efula lo Paradiso. Onga oko onto lɛna ekotshamelo k’awui wa diambo wakalake Jehowa, mbidja ndo okidiamelo wa lokombo lande, wonyelo w’akambo wa kɔlɔ tshɛ oma la nkɛtɛ, wonyelo wa hemɔ ndo wa nyɔi ayolodia otema ayɛ l’ɔngɛnɔngɛnɔ ndo ɔngɛnɔngɛnɔ ɔsɔ kokaka kokimanyiya dia wɛ mbikikɛ oseka ohemba tshɛ wakoka mpomana la yɛ. Lo mbɛdika la ekotshamelo ka elongamelo ka Diolelo, asui tshɛ wa lo dikongɛ nɛ di’akambo wekɔ mɛtɛ lo “tshanda mɔtshi tsho ndo bu wa wolo.”​—2 Kɔrɛtɔ 4:17.

20, 21. Lo kɛnɛ kendana la ekikelo, kakɔna kalongamɛ Jehowa oma le so ndo kakɔna kahombaso ndjashikikɛ dia nsala?

²⁰ Yeso akeyaka dia ayonga dui dia wolo dia mboyela ndo kɛsɔ ayɔlɔmba dia mbikikɛ. (Joani 15:20) Nde akayalɔngɔsɔla dia mɛnya mboka, eya dia ɛnyɛlɔ kande kayokeketsha anto akina. (Joani 16:33) Kɛnɛ koleki tshɛ ele, Yeso akatotshikɛ ɛnyɛlɔ ka kokele ka ekikelo, koko sho keema kokele.  Kakɔna kalongamɛ Jehowa oma le so? Petero kadimolaka ɔnɛ: “Kristo akanyosowɛ ndo akanyotshikɛ ɛnyɛlɔ dia nyu mboyela dimɛna dimɛna lo wanya ande.” (1 Petero 2:21) Lo woho wakandalɔshana l’ehemba, Yeso akatotshikɛ “ɛnyɛlɔ,” mbuta ate ɛnyɛlɔ ka sho ndjela. a Etsha ande w’ekikelo wekɔ oko “wanya.” Hatokoke ndjela wanya waki Yeso lo yoho ya kokele, koko sho kokaka nsala dikambo sɔ “dimɛna dimɛna.”

²¹ Ɔnkɔnɛ, nyɛsɔ toyashikikɛ dia ndjela ɛnyɛlɔ ka Yeso l’akoka aso tshɛ. Tatohɛke pondjo dia lo yɛdikɔ yayotoyela wanya waki Yeso dimɛna dimɛna mbayotoleka monga l’akoka wa mbikikɛ “polo l’ekomelo,” mbuta ate ekomelo ka dikongɛ di’akambo di’omusu nɛ kana ekomelo ka lɔsɛnɔ laso la kakianɛ. Hateye kɛnɛ kayotokomɛ ntondo, koko kɛnɛ keyaso ele Jehowa ayotosha difuto dia pondjo l’ɔtɛ wa ekikelo kaso.​—Mateo 24:13.