1-3. Ngande wakɔtɔ Yeso la Jɛrusalɛma ndo lande na kakaambe leemba l’anto wakendaka?

 JƐRUSALƐMA yaki l’osukusuku wa mamba nɛ dia onto ɔmɔtshi la woke aki lo ndjaye! L’andja w’osomba, anto wakatshumana l’emamu wa mboka walomɔlomɔ dia nongola onto lakawataka dia nde mbaki okitɔ wa nkumekanga Davidi ndo ɔnɛ laki la lotshungɔ la mbolɛ lo Isariyɛlɛ. Amɔtshi wakakimɛ wanga w’atoko ndo akina wakatalaka ahɔndɔ ndo wanga w’atoko la nkɛtɛ la ntondo kande. (Mateo 21:7, 8; Joani 12:12, 13) Anto efula waki lo ndjambola woho wakahombe monga wɔtwɛlɔ ande l’osomba.

² Anto amɔtshi wakalongamɛka dia nde ayɔtɔ la lokumu la mamba nɛ dia vɔ wakeyaka anto wa weke wakɔtɔ la lokumu la ngasɔ. Ɛnyɛlɔ, etena kakɔtɔ Abisalɔmɔ w’ɔnaki Davidɛ lakayaetɛ nkumekanga, apami 50 wakayalawɔka la ntondo ka pusupusu kande. (2 Samuɛlɛ 15:1, 10) Jules César, nkumekanga ka la Rɔmɔ akɔtɔ mbala kɛmɔtshi la Rɔmɔ polo lo luudu la woke la lɛɛta la leemba l’anto, odingami la ndjɔvu 40 yakayɛmbaka atala! Koko, onto lakakongɛka ase Jɛrusalɛma aki onto l’ohomba mbaleka vɔ tshɛ. Oyadi elui w’anto wakashihodiaka dui sɔ kana bu, onto lakayayaka ɔsɔ aki Mɛsiya, Onto loleki woke lo tena tshɛ. Etena kakawɛnyi onto lakahombe ndjonga Nkumekanga ɔsɔ, anto amɔtshi l’atei awɔ wakaambe.

³ Vɔ kɔmɛna ndooko pusupusu, ndooko anto wayalawɔ, ndooko falasa ndo ndooko kaanga ndjɔvu ɔtɔi. Yeso akahema laadiko dia ɔsɔngɔ wa mponda. a Nde kɔndɔta ahɔndɔ wa  lokumu ndo vɔ kɔnɛnga mponda kande la ahɔndɔ wa lokumu. Vɔ kombokitshɛ ahɔndɔ wa laande laadiko dia mponda, onyake tɔhɔndɔhɔndɔ takawalɛ ambeki ande laadiko dia nyama. Ko lande na kakasɔnɛ Yeso dia mbɔtɔ la Jɛrusalɛma lo yoho shɔ etena kele anto wokandaleke la fwa wakɔtɔka lo yoho ya diambo?

4. Kakɔna kakate Bible lo kɛnɛ kendana la woho wakahombe Mɛsiya Nkumekanga mbɔtɔ la Jɛrusalɛma?

⁴ Lo nsala ngasɔ, Yeso akakotsha prɔfɛsiya kata ɔnɛ: “Ɔna womoto la Siɔna le, ngɛnangɛna efula. Ɔna womoto la Jɛrusalɛma le, da ekoko wa edjelo k’otshumba. Eenda, nkumekanga kayɛ oyaye le yɛ. Nde ekɔ ɔlɔlɔ, ekɔ lo ndjaye la panda, nde ekɔ la okitshakitsha ndo ekɔ lo ndjahema lo mponda.” (Zɛkariya 9:9) Prɔfɛsiya kɛsɔ kakɛnyaka dia Mɛsiya, Okitami waki Nzambi ayoyaɛnya le anto wa la Jɛrusalɛma oko Nkumekanga kakasɔnama oma le Nzambi. Ndo nto, woho wakandasale dikambo sɔ, mbidja ndo nyama kakakambe la nde dia mbɔtɔ la Jɛrusalɛma akahombe mɛnya dionga dimɔtshi dia dimɛna efula diaki l’otema ande, mbuta ate okitshakitsha.

5. Lande na kele okitshakitsha waki la Yeso munandaka otema ndo lande na kele ekɔ ohomba efula dia sho mbeka dia mbookoya lo dikambo sɔ?

⁵ Okitshakitsha waki la Yeso ekɔ l’atei wa waonga ande woleki amɛna ndo waleka munanda otema. Oko wakatadiɛnyi lo tshapita yetshi, Yeso ndamɛ oto mbele “mboka, mɛtɛ ndo lɔsɛnɔ.” (Joani 14:6) Mbokɛmaka hwe dia ndooko onto l’atei wa miliyara y’anto wakasɛnɛ lanɛ la nkɛtɛ laki ohomba efula oko Ɔna Nzambi. Koko, otshikitanyi la anto wele keema kokele, Yeso komonga la lotamanya kana otako kaanga yema tshitshɛ. Dia ndjela Kristo, sho pombaka ndɔshana la yimba ya lotamanya yakoka monga la so. (Jakɔba 4:6) Tohɔ dia Jehowa mpetshaka dionga sɔ. Ɔnkɔnɛ, ekɔ ohomba dia sho mbokoya okitshakitsha waki Yeso.

6. Okitshakitsha kɛdikɛdi na ndo ngande wakeye Jehowa dia Mɛsiya ayonga l’okitshakitsha?

⁶ Okitshakitsha ekɔ eongelo k’onto lele bu la lotamanya kana otako. Okitshakitsha tatɛka l’etei k’otema ndo vɔ mɛnamaka l’ɛtɛkɛta, lo dionga diaki onto ndo lo woho wasalɛnde anto akina akambo. Ngande wakakoke Jehowa mbeya ɔnɛ Mɛsiya ayoyonga l’okitshakitsha? Nde akeyaka dia Ɔnande kɛnɛmɔlaka ɛnyɛlɔ kande ka kokele k’okitshakitsha. (Joani 10:15) Nde akɛnyi nto okitshakitsha waki l’Ɔna l’etsha. Lo waaso akɔna?

7-9. a) Ngande wakakɛnɛmɔla Mikayɛlɛ okitshakitsha l’okakatanu waki lam’asande la Satana? b) Ngande wakoka Akristo mbokoya Mikayɛlɛ lo nkɛnɛmɔla okitshakitsha?

⁷ Dibuku dia Judɛ mɛnyaka diaaso dimɔtshi dia laande diakakɛnɛmɔla Yeso okitshakitsha. Diɔ mbutaka ɔnɛ: “Lam’akawane Mikayɛlɛ arkandjelo nde la Diabolo ndo lam’akawakakatanaka lo dikambo dia odo wa Mɔsɛ, nde kosombɔ mbolombosha la ɛtɛkɛta wa kɔlɔ, koko nde akate ate: ‘Jehowa akohangwe.’” (Judɛ 9) Mikayɛlɛ ekɔ lokombo laki Yeso la ntondo ndo l’ɔkɔngɔ wa nde nsɛna lanɛ la nkɛtɛ lo ɔkɛndɛ wele la nde wa Arkandjelo, mbuta ate owandji wa alembe wa andjelo wa l’olongo waki Jehowa. b (1 Tɛsalɔnika 4:16) Koko, tolembete woho wakakandola Mikayɛlɛ okakatanu waki lam’asande la Satana.

⁸ Ɔkɔndɔ waki Judɛ hawototɛ kɛnɛ kakalange Satana nsala la odo waki Mɔsɛ, koko sho koka monga l’eshikikelo dia Diabolo aki l’oyango ɔmɔtshi wa kɔlɔ lo yimba. Ondo nde akalangaka dia tshutshuya anto dia vɔ nkamba lo yoho ya kɔlɔ la odo waki pami ka kɔlamelo kɛsɔ l’ɔtɛmwɛlɔ wa kashi. Kaanga mbakafukutanya Mikayɛlɛ oyango wa kɔlɔ waki la Satana, nde akakɛnɛmɔla ndo ndjakimɛ ka wolo. Aha la taamu, Satana akahombe pangwemɛ, koko Mikayɛlɛ lakakakatanaka la nde laki l’etena  kɛsɔ atalongola lowandji la “nombosha anto”, akɛnyi dia paka Jehowa Nzambi ndamɛ mbakahombe mbolombosha. (Joani 5:22) Oko wende Arkandjelo, Mikayɛlɛ aki la lowandji la woke la ntondo ka ditongami diaki Jehowa dia lo nyuma. Koko, la okitshakitsha tshɛ, nde akatshikɛ Jehowa dikambo sɔ lo dihole dia nde nyanga dia mamamala lowandji lokina. Laadiko dia okitshakitsha, nde akakɛnɛmɔla ekanelo k’ɔlɔlɔ, mbuta ate nde akeyaka elelo ande.

⁹ Judɛ akasambiyama dia mfunda dikambo sɔ l’ɔtɛ w’ɔkɔkɔ ɔmɔtshi. Lonyangu ko, Akristo amɔtshi wa lo nshi ya Judɛ komonga la okitshakitsha. La otako tshɛ, vɔ wakatatɛ “ntɛkɛta kɔlɔ l’ɔtɛ w’akambo tshɛ wahawamane mfundo.” (Judɛ 10) Sho anto wele keema kokele mbetawɔka mɛtɛ esadi eto dia lotamanya tahemɛ! Naka hatoshihodia woho wasalema dikambo dimɔtshi l’etshumanelo k’Akristo, ondo diendana la yɛdikɔ mɔtshi yakɔshi olui wa dikumanyi, kakɔna kayotosala? Naka sho ntatɛ ntɛkɛta kɔlɔ kana mbaɔnyɔla kaanga mbahateye kiambokambo tshɛ yendana la yɛdikɔ yakɔ, shi laasɔ kete taya bu la okitshakitsha? Lo dihole dia nsala ngasɔ, nyɛsɔ tokoya Mikayɛlɛ Yeso lo mbewɔ dia ndjatambiya l’akambo wele Nzambi kotosha lotshungɔ.

10, 11. a) Kakɔna kakambiya efula lo woho waketawɔ Ɔna Nzambi dia ndja lanɛ la nkɛtɛ? b) Ngande wakokaso mbokoya okitshakitsha waki Yeso?

¹⁰ Ɔna Nzambi akɛnya nto okitshakitsha lo mbetawɔ dia ndja lanɛ la nkɛtɛ. Tende kɛnɛ kakandetawɔ nshisha. Nde aki Arkandjelo. Nde aki nto “Dui,” mbuta ate Yɛmb’awui yaki Jehowa. (Joani 1:1-3) Nde akasɛnaka l’olongo, “lo edjaselo . . . ka la diko k’ekila ndo ka lotombo” kaki Jehowa. (Isaya 63:15) Koko, Ɔna ɔsɔ “akatshike kɛnɛ tshɛ kaki la nde, ko akayaetɛ oko mfumbe ndo akayala onto.” (Filipɛ 2:7) Tokanyiya nto kɛnɛ kakalɔmbama dia nde ndja lanɛ la nkɛtɛ! Lɔsɛnɔ lande lakasangɔma l’otema waki womoto ɔmɔtshi l’emuma l’ose Juda ndo nde akahombe mpama l’otema l’edja ka ngɔndɔ divwa ko ndjotɔ oko ɔna ashashi. Nde akotɔ oko ɔna ashashi laheye ndjakokɛ lo nkumbo ka otshudi w’abaya w’ose wola, akatatɛ  takula, oma lo takula, nde akakome yana ya hiami ndo oma laasɔ nde akakome l’ɛnɔnyi dikumi l’ɛmɔtshi. Kaanga mbakinde onto la kokele, l’edja tshɛ kakinde ɔna dikɛnda, nde aki la okitshakitsha otsha le ambutshi ande waki komonga kokele. (Luka 2:40, 51, 52) Ɔsɔ aki mɛtɛ okitshakitsha wa mamba!

¹¹ Shi sho kokaka mbokoya okitshakitsha waki la Yeso lo mbetawɔ la lolango laso ɛkɛndɛ wɔsama oko anyanya? Ɛnyɛlɔ, ɔkɛndɛ aso wa nsambisha lokumu l’ɔlɔlɔ la Diolelo diaki Nzambi mbeyaka mɛnama oko ɔkɛndɛ w’anyanya etena konga anto la wendjodi, katɔnyɔlawɔ kana katɔlɔshawɔ. (Mateo 28:19, 20) Koko, naka sho ntetemala l’olimu ɔsɔ, kete tayokoka nshimbɛ nsɛnɔ. Oyadi sho nshimbɛ nsɛnɔ y’anto kana bu, olimu ɔsɔ tokimanyiyaka dia monga la okitshakitsha w’efula ndo dia sho ndjela wanya wa Yeso Kristo ɔnɛ lele Owandji aso.

12-14. a) Ngande wakɛnya Yeso okitshakitsha etena kakotombolaka anto? b) Lo toho takɔna takasalɛka Yeso anto akina akambo la okitshakitsha? c) Kakɔna kɛnya dia okitshakitsha waki la Yeso komonga wa laadiko di’ɛlɔmɔ kana w’ɔnɛ wamɛnyi wamɛnyi?

¹² Oma k’etatelo polo l’ekomelo k’olimu ande la nkɛtɛ, Yeso aki la okitshakitsha. Nde akasale dikambo sɔ lo woho wakandɛnyaka dia She mbahomba nongola lotombo. Lo tena dimɔtshi, anto wakatombolaka Yeso l’ɔtɛ w’ɛtɛkɛta ande wa lomba, ahindo wa wolo wakandasalaka ndo lo woho wakinde la dionga di’ɔlɔlɔ. Mbala tshɛ, Yeso akatonaka dia nongola lotombo lɔsɔ ndo akalishaka paka Jehowa.​—Makɔ 10:17, 18; Joani 7:15, 16.

¹³ Yeso akakɛnɛmɔla okitshakitsha lo woho wakandasalɛka anto akambo. Lo mɛtɛ, nde akɛnya hwe dia nde akaye la nkɛtɛ aha di’anto mbokambɛ olimu, koko dia nde kambɛ anto akina. (Mateo 20:28) Nde akɛnya okitshakitsha ande lo woho wakandasalɛka anto akambo la lotutsha ndo la ekanelo k’ɔlɔlɔ. Etena kakonyangiyaka ambeki ande, nde kombahangwɛka, koko akatetemala nsala la wolo dia minanda etema awɔ. (Mateo 26:39-41) Etena kakaye elui w’anto dia ndjoofukutanya  lama’akandalangaka mumuya, nde kombatshanya, koko akatetemala mbaetsha “akambo efula.” (Makɔ 6:30-34) Etena kakatetemala mbɔsɛngasɛnga womoto ɔmɔtshi laki komonga ose Isariyɛlɛ dia nde kɔnɔla ɔnande la womoto, l’etatelo nde kombetawɔ dia nsala dikambo sɔ. Koko, nde akayetawɔka nsala dikambo sɔ lo menda mbetawɔ k’efula kaki la womoto ɔsɔ oko wayotodiɛna lo Tshapita 14.​—Mateo 15:22-28.

¹⁴ Lo toho efula, Yeso akasɛnɛ lo yoho yɔtɔnɛ l’ɛtɛkɛta wakandate lo dikambo diande ɔnɛ: “Dimi lekɔ la memakana ndo la otema w’okitshakitsha.” (Mateo 11:29) Okitshakitsha ande komonga wa laadiko di’ɛlɔmɔ kana w’ɔnɛ wamɛnyi wamɛnyi. Vɔ wakayaka oma l’otema, mbuta ate lonto lande la l’etei. Diakɔ diele lo wetshelo ande, Yeso aketsha ambeki ande dia monga la okitshakitsha!

15, 16. Otshikitanu akɔna wakɛnya Yeso lam’asa dionga diaki la ewandji wa l’andja ɔnɛ la nɛ diakahombe monga l’ambeki ande?

¹⁵ Apɔstɔlɔ waki Yeso komonga suke dia monga la okitshakitsha. Yeso akatshutshuyama mbala ko mbala dia mbaetsha dia vɔ monga la okitshakitsha. Ɛnyɛlɔ, lo diaaso dimɔtshi Jakɔba la Joani wakatome nyangɛwɔ dia tɔlɔmba Yeso dia nde mbalaka dia vɔ ndjonga l’ahole wa laadiko lo Diolelo diaki Nzambi. La okitshakitsha tshɛ, Yeso akakadimola ate: “Aha dimi mbasha onto lotshungɔ la mbidjasɛ lo lonya lami l’omi kana la lɔmɔsɔ, koko ahole asɔ wekɔ dikambo dia wanɛ wele Papa akaalɔngɔsɔlɛ.” Apɔstɔlɔ akina dikumi “wakomalɛ” Jakɔba nde la Joani. (Mateo 20:20-24) Ngande wakakandola Yeso okakatanu ɔsɔ?

¹⁶ L’ɔkɔmi tshɛ, nde akaahangwɛ vɔ tshɛ lo mbuta ate: “Nyu mbeyaka dia emboledi wa wedja mbahemɛka anto awɔ, ndo anto wa weke mongaka la lowandji laadiko di’anto awɔ. Atongake ngasɔ l’atei anyu. Onto tshɛ lalanga monga woke l’atei anyu ayale okambi anyu, ndo onto tshɛ lalanga monga lo  dihole dia ntondo l’atei anyu, ayale ose olimu anyu.” (Mateo 20:25-27) Apɔstɔlɔ wakɛnaka woho wakahemɛka “emboledi wa wedja” anto la lotamanya ndo la lokaki tshɛ. Yeso akɛnya dia ambeki ande pombaka ntshikitana l’anto wa ngala waki la mposa ka lowandji asɔ. Vɔ wakahombe monga la okitshakitsha. Onde apɔstɔlɔ wakashihodia dikambo sɔ?

17-19. a) L’otsho wa la ntondo ka nyɔi kande, lo yoho yakɔna yahohamamɛki yoho yaketsha Yeso apɔstɔlɔ ande wetshelo wendana la okitshakitsha? b) Wetshelo akɔna woleki tshɛ ohomba wendana la okitshakitsha waketsha Yeso oko onto?

¹⁷ Ɔsɔ komonga dikambo dia wɔdu le wɔ. Ndo ɔsɔ komonga mbala ka ntondo kana mbala k’ekomelo ka Yeso mbaetsha dikambo sɔ. Mbala ka ntondo kakawawane dia mbeya ɔnɛ lakaleke woke l’atei awɔ, nde akakitsha ɔna dikɛnda l’atei awɔ ndo akawatɛ dia vɔ mbokoya ana w’akɛnda wele bu la yimba ya lotamanya, otako ndo wahayakiyanya dikambo dia dihole dia laadiko, awui waleka mɛnama le epalanga w’anto. (Mateo 18:1-4) Koko, l’otsho wa la ntondo ka nyɔi kande, otako akatshutshuya nto apɔstɔlɔ ande dia vɔ mana. L’etena kɛsɔ nde akawasha wetshelo wakiwɔ kokoka mbohɛ. Nde akalɔtɛ dihɔndɔ dia nsala olimu wakalɔmbaka dia monga la okitshakitsha w’efula, mbuta ate olimu wakahombaka ose olimu kana onto l’anyanya nsala dikambo di’angɛndangɛnda waki kanga luudu. Yeso akasole apɔstɔlɔ ande tshɛ ekolo, mbidja ndo Judasɛ laki suke la mbofunga!​—Joani 13:1-11.

¹⁸ Yeso akaakimanyiya dia vɔ shihodia ohomba w’okitshakitsha etena kakandawatɛ ate: “Dimi lambonyosha ɛnyɛlɔ.” (Joani 13:15) Onde wetshelo ɔsɔ wakananda etema awɔ? Yema tshitshɛ l’ɔkɔngɔ l’otsho akɔ waamɛ, vɔ wakawane nto dia mbeya ɔnɛ loleki woke l’atei awɔ! (Luka 22:24-27) Koko, la solo dia lotutsha tshɛ, Yeso akatetemala mbaetsha dia vɔ monga la okitshakitsha. Oma laasɔ, nde akawasha wetshelo woleki tshɛ ohomba: “Nde akayakitshakitsha ndo akonge la okitanyiya polo ndo lo nyɔi, ɛɛ, nyɔi ka l’otamba w’asui.” (Filipɛ 2:8) Yeso aketawɔ mvɔ nyɔi ka sɔnyi, aketawɔ manyema oko ondjakanyi ndo ɔtɛnganyi. Lo nsala ngasɔ, Ɔna Nzambi akakɛnɛmɔla  okitshakitsha woleki tshɛ ndo wa kokele l’atei wa ditongami dikina tshɛ diaki Jehowa.

¹⁹ Ondo wetshelo wa komelo ɔsɔ wendana la okitshakitsha wakawasha Yeso mbakakakatɛ lo timba t’apɔstɔlɔ ande wa kɔlamelo. Bible totɛka dia apami asɔ wakayosalaka akambo la okitshakitsha l’edja k’ɛnɔnyi akumi. Kayotota dikambo diaso?

20. Ngande wakokaso mbeya dia kana tekɔ la okitshakitsha?

²⁰ Pɔɔlɔ akatolake sho tshɛ ate: “Nyongake la yimba nyɛ yaki ndo le Kristo Yeso.” (Filipɛ 2:5) L’ɛnyɛlɔ ka Yeso, sho pombaka monga la okitshakitsha. Ngande wakokaso mbeya dia kana tekɔ la okitshakitsha l’etema aso? Pɔɔlɔ akatohola ate: “Tanyotshake ndooko dikambo la yimba y’ewanu kana la lokaki, koko nyosale akambo tshɛ la okitshakitsha, nyɔshi dia anto akina nyoleka.” (Filipɛ 2:3) Ɔnkɔnɛ, okadimwelo wa dimbola sɔ mɛnamaka lo woho wɔsaso anto akina. Sho pombaka mbaɔsa dia vɔ toleka. Onde tayokamba la dako sɔ?

21, 22. a) Lande na kahomba emendji w’Akristo monga la okitshakitsha? b) Ngande wakokaso mɛnya dia tambɔlɔta okitshakitsha?

²¹ Ɛnɔnyi efula l’ɔkɔngɔ wa nyɔi ka Yeso, ɔpɔstɔlɔ Petero akatetemala nkana yimba lo kɛnɛ kendana la ohomba w’okitshakitsha. Petero aketsha emendji w’Akristo dia vɔ nkotsha ɛkɛndɛ awɔ la okitshakitsha aha la mbahemɛ ɛkɔkɔ waki Jehowa. (1 Petero 5:2, 3) Monga l’ɛkɛndɛ hasha onto lotshungɔ la monga la lotamanya. Koko, monga l’ɛkɛndɛ fudiaka ohomba wa monga la okitshakitsha wa mɛtɛ. (Luka 12:48) Lo mɛtɛ, dionga sɔ diekɔ ohomba aha tsho le emendji koko ndo le Akristo tshɛ.

²² Aha la taamu, Petero kombohɛ otsho ɔsɔ wakosole Yeso ekolo kaanga mbakandatone! (Joani 13:6-10) Petero akafundɛ Akristo ɔnɛ: “Nyu tshɛ nyɔlɔtɛ okitshakitsha lam’asanyu.” (1 Petero 5:5) Etelo k’ɔnɛ “nyɔlɔtɛ” mbelaka kanyi ya ose olimu wayalɔngɔsɔla dia nkamba olimu ɔmɔtshi w’anyanya. Ondo etelo kɛsɔ toholaka kɛnɛ kakasale Yeso la ntondo ka nde mbika adwe dia nsola apɔstɔlɔ ande ekolo. Naka sho ndjelaka  ɛnyɛlɔ kaki Yeso, onde tayɔsa olimu ɔmɔtshi wakatosha Nzambi dia wekɔ olimu w’anyanya? Okitshakitsha wele l’etema aso pombaka mɛnama le anto tshɛ, oko sho mbɔlɔta.

23, 24. a) Lande na kahombaso nshika ekolo la ntondo ka yimba ya lotamanya? b) Kanyi yakɔna ya kɔlɔ yele l’anto lo kɛnɛ kendana la okitshakitsha yayotokimanyiya tshapita yayela dia sho minya?

²³ Lotamanya lekɔ oko lɔlɛngɔ ndo lɔ kokaka monga l’etombelo wa kɔlɔ. Dionga sɔ kokaka konya onto lele l’akoka efula dia nde monga onto l’anyanya lo washo wa Nzambi. Lo wedi okina, okitshakitsha koka nkonya kaanga onto l’anyanya dia nde nkoma ohomba efula le Jehowa. Naka sho nkɛnɛmɔla dionga di’ohomba sɔ lushi la lushi lo nsala la wolo dia ndjela wanya wa Kristo, kete tayolongola difuto dia woke. Petero akafunde ɔnɛ: “Nyoyakitshakitsha l’ɛse ka lonya la wolo laki Nzambi dia nde nyodiya l’etena kahombama.” (1 Petero 5:6) Lo mɛtɛ, Jehowa akadiya Yeso l’ɔtɛ wakandayakitshakitsha tshɛ lo tshɛ. Nde ayɔngɛnangɛna tofuta nto l’ɔtɛ w’okitshakitsha aso.

²⁴ Lonyangu ko anto amɔtshi mbɔsaka dia okitshakitsha ekɔ djembetelo y’ɔhɔdu. Ɛnyɛlɔ ka Yeso tokimanyiyaka dia mɛna dia vɔ wekɔ lo ndjakesa efula, nɛ dia anto waki la okitshakitsha efula waki nto la dihonga di’efula. Kɛsɔ mbayotɔsɛdingola lo tshapita yayela.