1, 2. Lande na kele ombutshi ɔmɔtshi wa ngandji l’ɔngɛnɔngɛnɔ lo woho wookitanyiya ɔnande ndo ngande wele woho wayaokande kɛnɛmɔlaka woho wayaoka Jehowa?

 PAPA kɛmɔtshi ekɔ lo nengɛ oma lo didishi woho wakɛnya ɔnande l’asekande. Mponde kakɛnyawɔ kambotokita l’otadimbo. Ɔna ɔsɔ ekɔ lo menda l’olengolengo woho wambɔkɔ mponde l’otadimbo. Osekande ɔmɔtshi ambowotɛ dia nde ndawɔ dia tokitɔngɔna, koko ɔna ɔsɔ ambotshindja ɔtɛ ndo ambota ɔnɛ: “Wakashimbe dia ntomba l’andja wa lokombo.” She ekɔ lo mɔnamɔna ele l’ɔngɛnɔngɛnɔ.

² Lande na kambɔngɛnangɛna she? Nɛ dia nde akashimbe ɔnande dia ntomba l’otadimbo ndamɛ. Etena kakitanyiya ɔna ɔsɔ kaanga mbahandeye dia she ekɔ lo mbolengɛ, she mbeyaka dia ɔnande ekɔ lo mbeka okitanyiya ndo dikambo sɔ diayowokokɛ. Papa kɛsɔ ekɔ lo ndjaoka woho wayaoka Shɛso lele l’olongo Jehowa. Nzambi mbeyaka dia naka sho nangaka ntshikala la kɔlamelo ndo ndjɛna nshi yayaye y’amɛna efula yamondotombɛ, kete sho pombaka mbeka dia ndjaɛkɛ le nde ndo mbokitanyiya. (Tokedi 3:5, 6) Dia tokimanyiya lo dikambo sɔ, nde akatotomɛ ombetsha woleki embetsha w’ana w’anto tshɛ.

3, 4. Ngande ‘wakeke Yeso dia monga l’okitanyiya’ ndo ngande ‘wakandakome kokele’? Sha ɛnyɛlɔ.

³ Bible mbutaka dui dimɔtshi dia diambo lo dikambo dia Yeso ɔnɛ: “Kaanga mbakinde ɔna, nde akeke dia monga la okitanyiya oma lo asui wakandasowe. Ndo l’ɔkɔngɔ wa nde nkoma kokele, nde akayala kiɔkɔ ya panda ka pondjo le wanɛ tshɛ wookitanyiya.” (Hɛbɛru 5:8, 9) Ɔna ɔsɔ akasɛnɛ l’olongo edja kaheyama mbadia. Nde akɛnyi woho wakatɔmbɔkɔ Satana ndo andjelo akina, koko Ɔna enondo ɔsɔ kondjela lokolo lawɔ. Prɔfɛsiya kakasambiyama kambaka l’ɛtɛkɛta ɛnɛ lo dikambo diande: “Dimi  komonga ɔtɔmbɔki.” (Isaya 50:5) Ko laasɔ, lo woho akɔna wakakoke ɛtɛkɛta w’ɔnɛ “nde akeke dia monga la okitanyiya” mendana l’Ɔna laki l’okitanyiya ɔsɔ? Ngande wakakoke etongami ka kokele kɛsɔ “nkoma kokele” nto?

⁴ Tɔsɛdingole ɛnyɛlɔ kɛnɛ: Ɔsɔlayi ɔmɔtshi ekɔ l’okoma. Kaanga mbele nde atakambaka l’okoma akɔ lo ta, mɛnamaka dia vɔ wakasalema dimɛna. Koko, nde ambengɔnya okoma ɔsɔ l’okoma okina woleki wolo, wele wambokambaka la wɔ lo ta. Shi ɔsɔ ekɔ dui dia lomba? Woho akɔ waamɛ mbele, okitanyiya wakakɛnɛmɔlaka Yeso la ntondo ka nde ndja lanɛ la nkɛtɛ aki dui dia dimɛna efula. Koko l’ɔkɔngɔ wa nde ndja lanɛ la nkɛtɛ, okitanyiya ande wakayoleka tshɛ monga dimɛna. Okitanyiya ande wakahembama, wakalowanyema dimɛna ndo wakakeketala oma l’ehemba wele Yeso kokoka pondjo mpomana la wɔ l’olongo.

5. Kakɔna ketɛ okitanyiya waki Yeso dui di’ohomba efula ndo kakɔna kayangaso nsɛdingola lo tshapita nyɛ?

⁵ Okitanyiya aki dui di’ohomba efula lo kɛnɛ kendana l’olimu wakaye Yeso ndjokamba la nkɛtɛ. Oko wende “Adama w’ekomelo,” Yeso akaye la nkɛtɛ dia ndjosala kɛnɛ kaki ambutshi aso wa ntondo kosala, mbuta ate ntetemala nkitanyiya Jehowa Nzambi kaanga l’atei w’ehemba. (1 Kɔrɛtɔ 15:45) Koko, okitanyiya waki Yeso kondjala oyalayala. Yeso akakitanyiyaka la yimba yande tshɛ, l’otema ande tshɛ ndo l’anima ande tshɛ. Ndo nde akasalaka dui sɔ l’ɔngɛnɔngɛnɔ. Nsala lolango la She aki dui di’ohomba efula le nde oleki mbo ya ndɛ! (Joani 4:34) Kakɔna kakoka tokimanyiya dia mbokoya okitanyiya waki la Yeso? Ntondotondo, nyɛsɔ tɔsɛdingole kɛnɛ kakootshutshuya dia monga la dionga sɔ. Monga la woho w’eyango waki la nde ayotokimanyiya dia nshika ntanga la ntondo k’ehemba ndo dia nsala lolango laki Nzambi. Oma laasɔ, tayoyɛna ɛlɔlɔ ɛmɔtshi waya lo monga l’okitanyiya wele oko wa Kristo.

6, 7. Naa akambo amɔtshi wakatshutshuya Yeso dia monga l’okitanyiya?

⁶ Waonga w’amɛna waki la Yeso mbakootshutshuya dia monga l’okitanyiya. Oko wakatadiɛnyi lo Tshapita 3, Kristo aki  l’okitshakitsha wa l’otema. Otako la lotamanya konyaka anto dia vɔ ntona dia nkitanyiya, koko okitshakitsha tokimanyiyaka dia sho nkitanyiya Jehowa la lolango laso. (Etombelo 5:1, 2; 1 Petero 5:5, 6) Laadiko dia laasɔ, okitanyiya waki la Yeso ndja oma lo kɛnɛ kakandalangaka ndo oma lo kɛnɛ kakandahetshaka.

⁷ Kɛnɛ koleki tshɛ ele Yeso akokaka Jehowa She lele l’olongo ngandji. Tayoleka ntɛkɛta dia ngandji kɛsɔ lo tshapita 13. Ngandji kɛsɔ kakatshutshuya Yeso dia mboka Nzambi wɔma. Lo yɛdikɔ y’efula yakinde la ngandji otsha le Jehowa mbakandaleke monga la wɔma wɔsɔhanyemi la dilɛmiɛlɔ, mbuta ate wɔma waha nyangiya She. Nzambi akokaka alɔmbɛlɔ waki Yeso nɛ dia Yeso akawokaka wɔma. (Hɛbɛru 5:7) Wɔma wa Jehowa ayonga dui dimɔtshi dia woke diayɛnama l’ɛlɔmbwɛlɔ ka Yeso oko wende Mɛsiya Nkumekanga.​—Isaya 11:3.

8, 9. Oko akadiatama, ngande wakayaokaka Yeso lo kɛnɛ kendana la ɔlɔlɔ la kɔlɔ ndo ngande wakandɛnyaka woho wakandayaokaka?

 ⁸ Mboka Jehowa ngandji nembetshiyaka nto mpetsha kɛnɛ kahetshande. Ɛnyɛlɔ, prɔfɛsiya kɛnɛ kakate lo dikambo dia Mɛsiya Nkumekanga ɔnɛ: “Wɛ akalange losembwe ndo wɛ akahetsha kɔlɔ. Diakɔ diele Nzambi, ɛɛ, Nzambi kayɛ akakokite esɔ k’ɔngɛnɔngɛnɔ oleki asekayɛ.” (Osambo 45:7) ‘Asekande’ la Yeso asɔ ele nkumi ya dikanga nkina ya l’ɔlɔndji wa nkumekanga Davidɛ. Oleki nkumi ya dikanga nkina tshɛ, Yeso mbakaleke monga l’ɛkɔkɔ wa monga l’ɔngɛnɔngɛnɔ wa mamba l’etena kakandakitama esɔ. Lande na? Nɛ dia difuto diakandahombe nongola diakaleke diawɔ la fwa ndo lowandji lande layoleka mbela anto ɛtshɔkɔ. Nde akafutama lo yoho shɔ l’ɔtɛ wa ngandji kaki la nde k’akambo w’ɛlɔlɔ ndo woho wakandahetshaka akambo wa kɔlɔ akootshutshuya dia nkitanyiya Nzambi l’akambo tshɛ.

⁹ Ngande wakakɛnɛmɔla Yeso woho wayaokande lo kɛnɛ kendana la ɔlɔlɔ la kɔlɔ? Ɛnyɛlɔ, etena kakakitanyiya ambeki ande kɛnɛ kakandalɔmbɛ l’olimu w’esambishelo ndo kakawakondja etombelo w’amɛna, kakɔna kakasale Yeso? Nde akangɛnangɛna lo yɛdikɔ y’efula. (Luka 10:1, 17, 21) Ndo etena kakakɛnɛmɔlaka ase Jɛrusalɛma yimba y’ɔtɔmbɔkwɛlɔ lo ntona kɛnɛ tshɛ kakandasalaka dia mbakimanyiya, ngande wakayaokaka Yeso? Nde akalele l’ɔtɛ wa yimba y’ɔtɔmbɔkwɛlɔ yaki l’ase Jɛrusalɛma. (Luka 19:41, 42) Yeso akayakiyanyaka efula dikambo dia dionga di’ɔlɔlɔ kana dia kɔlɔ.

10. Dionga diakɔna diahomba monga la so lo kɛnɛ kendana la ditshelo di’ɛlɔlɔ la dia kɔlɔ ndo kakɔna kayotokimanyiya dia monga la diɔ?

¹⁰ Nkana yimba lo woho wakayaokaka Yeso tokimanyiyaka dia nsɛdingola kɛnɛ katotshutshuya dia nkitanyiya Jehowa. Kaanga mbeso keema kokele, sho kokaka monga la ngandji k’efula ka kɛnɛ kele ɔlɔlɔ ndo lohetsho la l’otema ɔtɔi la kɛnɛ kele kɔlɔ. Sho pombaka nɔmba Jehowa dia nde tokimanyiya dia sho monga la dionga diele oko diande ndo diele oko di’Ɔnande lo dikambo sɔ. (Osambo 51:10) L’etena kakɔ kaamɛ, sho pombaka mbewɔ tɔsɛngiya takoka ndjolanya dionga sɔ. Ekɔ ohomba efula dia sho nsɔna tɔkɛnyɔ ndo angɛnyi. (Tokedi 13:20; Filipɛ 4:8) Naka sho  monga l’eyango wele oko wa Kristo, kete okitanyiya aso hawotonga wa laadiko di’ɛlɔmɔ. Tayosala kɛnɛ kele ɔlɔlɔ nɛ dia sho nangaka nsala dui sɔ. Tayewɔ nsala kɛnɛ kele kɔlɔ, aha tsho la wɔma w’ɔnɛ wayotɛna koko l’ɔtɛ wahetshaso kɛnɛ kele kɔlɔ.

11, 12. a) Kakɔna kakakomɛ Yeso l’etatelo k’olimu ande? b) Ngande wakahembe Satana Yeso mbala ka ntondo ndo yoho yakɔna ya mayɛlɛ yakakambe la Satana?

¹¹ Lo kɛnɛ kendana la woho wakandahetshaka pɛkato, Yeso akahembama oma k’etatelo k’olimu ande. L’ɔkɔngɔ wa batisimu kande, nde aketsha tanyi 40 ndo etsho 40 l’oswe wa shɛnga aha la ndɛ. L’ekomelo k’etena kɛsɔ, Satana akaye dia ndjohemba. Tende polo lo yɛdikɔ yakɔna yakɛnya Diabolo lokeso lande.​—Mateo 4:1-11.

¹² Ntondotondo, Satana akate ate: “Naka ɔna Nzambi keyɛ, otɛ ave anɛ dia vɔ mpilɔ mbo ya ndɛ.” (Mateo 4:3) Ngande wakayaoke Yeso l’ɔkɔngɔ wa nde mbetsha etena k’otale aha la ndɛ? Bible mbutaka hwe ɔnɛ: “Nde akoke ndjala.” (Mateo 4:2) Ɔnkɔnɛ, Satana akakambe la ndjala kaki la Yeso ndo aha la taamu ndamɛ mbakakongɛka dia Yeso atokonga la wɔdu wa lo demba ɔsɔ. Tende nto etelo ka diɔnyɔ kakakambe la Satana ɔnɛ: “Naka ɔna Nzambi keyɛ.” Satana akeyaka dia Yeso aki “enondo wa diangɔ tshɛ diakatongama.” (Kɔlɔsayi 1:15) Koko, Yeso kombetawɔ dia Satana mbokonya diaha nde monga l’okitanyiya. Yeso akeyaka dia lolango la Nzambi komonga dia nde nkamba la wolo ande l’eyango wa lokaki. Nde akatone dia nsala dikambo sɔ lo mɛnya l’okitshakitsha tshɛ dia nde akayaɛkɛka le Jehowa dia nyanga ekimanyielo ndo ɛlɔmbwɛlɔ.​—Mateo 4:4.

13-15. a) Naa ohemba wa hende ndo wa sato wakahembe Satana Yeso ndo kakɔna kakasale Yeso? b) Ngande weyaso dia Yeso akambalɛka tena tshɛ eya dia Satana kokaka mbohemba?

¹³ L’ohemba ande wa hende, Satana akɛmbɛ Yeso lo tshoto ya tɛmpɛlɔ. Lo mengesola Ɔtɛkɛta wa Nzambi, Satana akahembe Yeso dia nde mɛnya lo sɛkɛ ɔnɛ nde ekɔ ɔna Nzambi lo mfumbɔ oma lo tshoto ya tɛmpɛlɔ dia andjelo mbokokɛ. Otondonga olui w’anto ɔsɔ waki lo tɛmpɛlɔ wakɛnyi dihindo dia ngasɔ, onde ɔmɔtshi  l’atei awɔ otodja taamu ɔnɛ Yeso bu Mɛsiya wakalakema? Ndo otondonga olui w’anto ɔsɔ waketawɔ Yeso oko Mɛsiya l’ɔtɛ wa dihindo dia ngasɔ, shi tshike Yeso otewɔ ɛhɛnyɔhɛnyɔ ndo ekakatanu efula? Ondo ngasɔ. Koko Yeso akeyaka dia lolango laki Jehowa le nde aki dia Mɛsiya nsala lolango la She l’okitshakitsha tshɛ koko aha lo nyanga dia mbetawoya anto oma l’ekimanyielo k’ahindo. (Isaya 42:1, 2) Ndo mbala kɛsɔ nto, Yeso akatetemala nkitanyiya Jehowa. Nde komonga la nsaki ka monga la lokumu.

¹⁴ Ko kayotota dia nsaki ka lowandji? L’ohemba ande wa sato, Satana akatɛ Yeso dia nde ayowosha waolelo wa l’andja tshɛ naka Yeso mbokusamɛ dia mbɔtɛmɔla. Onde nde akakane yimba la kɛnɛ kakalange Satana mbosha kɛsɔ? Nde akokadimola ate: “Satana, mɔ!” Ndo akakotsha ate: “Nɛ dia akafundama ate: ‘Jehowa Nzambi kayɛ kahombayɛ ntɛmɔla ndo paka ndamɛ oto kahombayɛ kambɛ olimu w’ekila.’” (Mateo 4:10) Ndooko dui diakakoke nkonya Yeso dia nde ntɛmɔla jambizambi nkina. Ndooko lowandji lakawakoke mbosha kana lokumu la l’andja ɔnɛ lakakoke mbokonya diaha nde ntetemala monga l’okitanyiya.

¹⁵ Onde Satana akahekɔ? Nde akamɔ oko wakohangwɛ Yeso. Koko, Evanjiliɔ wa Luka mbutaka dia Diabolo “akootshike polo lam’ayondokondja diaaso dikina dia dimɛna.” (Luka 4:13) Lo mɛtɛ, Satana akanyomoyotana waaso akina wa mpemba Yeso polo l’ekomelo. Bible totɛka dia Yeso ‘akahembama l’akambo tshɛ.’ (Hɛbɛru 4:15) Ɔnkɔnɛ, tena tshɛ Yeso akambalɛka ndo kɛsɔ mbahombaso nsala ndo sho.

16. Ngande wahemba Satana ekambi waki Nzambi ɛlɔ kɛnɛ, ndo ngande wakokaso nshika ntanga la ntondo ka welo ande?

¹⁶ Ɛlɔ kɛnɛ, Satana ekɔ lo ntetemala mpemba ekambi waki Nzambi. Lonyangu ko, tena efula wɛɔdu aso todjaka esadi eto l’ehemba. La mayɛlɛ tshɛ, Satana kambaka la lokaki, lotamanya ndo mposa ka lowandji kele la so. Lo nkamba la nsaki ka lomombo la l’emunyi, Satana mbeyaka nkamba l’awui asɔ tshɛ mbala kakɔ ɔtɔi! Ekɔ ohomba efula dia sho tshɛ ndjasɛdingola l’otema ɔtɔi. Sho pombaka nkana yimba la ɛtɛkɛta wele lo 1 Joani 2:15-17. Etena kasalaso dui sɔ, sho mbeyaka ndjambola dia kana nsaki ya demba, nsaki ka lomombo la l’emunyi ndo nsaki ka mambiya anto  akina kambotatɛ nkitshakitsha ngandji kokaso Shɛso lele l’olongo. Sho pombaka mbohɔka dia andja ɔnɛ kaamɛ ndo owandji awɔ Satana wekɔ lo teete. Nyɛsɔ tosale la wolo dia nshika ntanga lo welo wadjande wa tokonya dia nsala pɛkato! Nyɛsɔ tokoyake owandji aso laki “kosala pɛkato.”​—1 Petero 2:22.

17. Ngande wakayaokaka Yeso lo kɛnɛ kendana la nkitanyiya She ndo kakɔna kakoka mbuta anto amɔtshi?

¹⁷ Okitanyiya halembetshiya mbewɔ tsho pɛkato. Kristo akakitanyiyaka wadjango waki She tshɛ. Nde akate ate: “Dimi tosalaka nshi tshɛ kɛnɛ kawɔngɛnyangɛnya.” (Joani 8:29) Okitanyiya ɔsɔ wakashaka Yeso ɔngɛnɔngɛnɔ w’efula. Lo mɛtɛ, anto amɔtshi mbeyaka mbuta dia okitanyiya komonga dikambo dia wolo le Yeso. Vɔ mbeyaka mbɔsa dia nde akahombe kitanyiyaka paka Jehowa onto lele kokele, koko tena efula sho pombaka nkitanyiya ndo anto wele keema kokele wele la yema ya lowandji. Koko, kɛnɛ kele mɛtɛ ele Yeso aki l’okitanyiya otsha le anto wele bu kokele waki la yema ya lowandji.

18. Ɛnyɛlɔ kakɔna k’okitanyiya kakasha Yeso oma ko dikɛnda diande?

¹⁸ Etena kakandayolaka, Yeso aki l’ɛse ka lowandji la Yɔsɛfu la Mariya, ambutshi ande waki komonga kokele. Ondo oleki ana akina tshɛ, nde akɛnaka munga yakasalaka ambutshi ande. Ko onde nde akaatɔmbɔkwɛ lo ntamba elelo ande w’ɔna ndo lo mbaɛnya woho wahombawɔ nɔmbɔla nkumbo? Tolembete kɛnɛ kata Luka 2:51 lo dikambo diaki Yeso etena kakinde l’ɛnɔnyi 12 ɔnɛ: “Nde akakitanyiyaka awui awɔ.” Oma l’okitanyiya ande, nde akatshikɛ Akristo w’akɛnda ɛnyɛlɔ koleki tshɛ dimɛna etena kasalawɔ la wolo dia nkitanyiya ndo nɛmiya ambutshi awɔ.​—Ɛfɛsɔ 6:1, 2.

19, 20. a) Ekakatanu akɔna wa laande wakahomana la Yeso lo kɛnɛ kendana la monga l’okitanyiya le anto wele keema kokele? b) Lande na kahomba Akristo wa mɛtɛ monga l’okitanyiya ɛlɔ kɛnɛ le wanɛ waalɔmbɔla?

¹⁹ Lo kɛnɛ kendana la nkitanyiya anto wele keema kokele, Yeso akahomana l’ekakatanu wahahomanaki la Akristo wa mɛtɛ wa  nshi nyɛ pondjo. Tɔsɛdingole awui wendana l’etena ka laande kakandasɛnaka. Dikongɛ di’akambo di’ɔtɛmwɛlɔ w’ase Juda kaamɛ la tɛmpɛlɔ kadiɔ ka la Jɛrusalɛma ndo dioho diadiɔ di’ɛlɔmbɛdi diaketawɔmaka le Jehowa edja efula diaki suke la ndanyema ndo mpɛnyama la etshumanelo k’Akristo. (Mateo 23:33-38) L’etena kɛsɔ, efula k’ewandji w’ɛtɛmwɛlɔ waketshaka wetshelo wa kashi wakaye oma lo filozofi k’ase Ngirika. Awui wa kɔta mishiko wakasalemaka efula lo tɛmpɛlɔ, diakɔ diele Yeso akakielɛ ɔnɛ “wooko w’apɔtwanyi.” (Makɔ 11:17) Onde Yeso akatone dia ntshɔ lo tɛmpɛlɔ kɛsɔ ndo lo shinangɔnga? Ndooko! Jehowa akatetemalaka nkamba la tɛdikɔ tɔsɔ. L’okitanyiya tshɛ, Yeso akatetemalaka ntshɔ lo tɛmpɛlɔ lo nshi y’afɛstɔ ndo lo shinangɔnga polo ndo l’etena kakahombe Nzambi ntshikitanya akambo.​—Luka 4:16; Joani 5:1.

²⁰ Naka Yeso aki l’okitanyiya lo tena dia ngasɔ, shi kete sho Akristo wa mɛtɛ mbahomba ndeka ntetemala monga l’okitanyiya ɛlɔ kɛnɛ? Tekɔ lo nsɛna l’etena kotshikitanyi efula l’etena kɛsɔ, mbuta ate etena kakatatami la ntondo kahomba ɔtɛmwɛlɔ wa pudipudi shikikɛma. Nzambi toshikikɛka dia nde hetawɔki pondjo dia Satana mbidja ekambi ande wambɛdiama mindo. (Isaya 2:1, 2; 54:17) Ekɔ mɛtɛ dia pɛkato ndo wandja wekekɔ l’atei w’etshumanelo k’Akristo. Ko onde sho pombaka mbɔsa munga y’anto akina  oko yɛkɛ nɛndɛ diaha sho nkitanyiya Jehowa, ondo lo ntona dia mbɔtɔka lo nsanganya y’Akristo kana lo mɔnyɔlaka dikumanyi? Ndooko! Lo dihole dia nsala ngasɔ, sho sukɛka l’otema ɔtɔi wanɛ walɔmbɔla etshumanelo. L’okitanyiya tshɛ, sho mbɔtɔka lo nsanganya ya l’etshumanelo ndo lo nsanganya ya weke y’Akristo ndo sho kambaka la alako w’oma l’Afundelo walongolaso lo nsanganya shɔ.​—Hɛbɛru 10:24, 25; 13:17.

21. Kakɔna kakasale Yeso etena kakɔsɛngiya anto diaha nde nkitanyiya Nzambi ndo ɛnyɛlɔ kakɔna kakandatotshikɛ?

²¹ Ndooko lushi laketawɔ Yeso dia anto, kaanga angɛnyi ande w’eshika mboshimba dia nde nkitanyiya Jehowa. Ɛnyɛlɔ, ɔpɔstɔlɔ Petero akahembe dia mbeetawoya di’ɔnɛ taki ohomba wa nde soyama ndo ndjakema. Koko, Yeso akatone la wolo tshɛ dako diaki Petero diakɔsamaka oko dako dia dimɛna diakandawotɛ ɔnɛ Nzambi ashimbe dikambo sɔ. (Mateo 16:21-23) Ɛlɔ kɛnɛ, tena efula ambeki waki Yeso sɛngiyamaka oma le ewotɔ awɔ wasala la wolo dia mbakonya diaha vɔ nkitanyiya ɛlɛmbɛ la atɔndɔ waki Nzambi. L’ɛnyɛlɔ k’ambeki waki Yeso wa lo ntambe ka ntondo, sho mbɔsaka yɛdikɔ y’ɔnɛ: “Sho pombaka nkitanyiya Nzambi oko wende owandji lo dihole dia nkitanyiya anto.”​—Etsha 5:29.

22. Yeso akasha okadimwelo wa dimbola diakɔna ndo lo woho akɔna?

²² Etena kaki Yeso la ntondo ka nyɔi, okitanyiya ande wakɔtɔ l’ohemba woleki wolo. L’otsho wakandadiakema ɔsɔ, “nde akeke dia monga la okitanyiya” lo yoho yoleki tshɛ. Nde akasale lolango la She, koko aha lande hita. (Luka 22:42) L’etena kakawolomboshaka, nde akakɛnɛmɔla olowanyi lo yoho ya kokele. (1 Timɔte 3:16) Nde akasha okadimwelo lo dimbola diakonyiyama deko aha nɛ diata ɔnɛ: Onde onto la kokele kokaka ntetemala nkitanyiya Jehowa kaanga l’atei w’ehemba? Adama la Eva wakakite tatala dia nsala dikambo sɔ. Koko, Yeso akaye, akasɛnɛ, akavu ndo akalame olowanyi ande. Etongami kaki Jehowa koleki woke kɛsɔ akasha okadimwelo woleki dimɛna. Nde akakitanyiya kaanga etena kaki dui sɔ wolo efula.

23-25. a) Ngande wɔtɔnɛ okitanyiya la olowanyi? Sha ɛnyɛlɔ. b) Kakɔna kayotɔsɛdingola lo tshapita yayela?

 ²³ Okitanyiya ekɔ djembetelo y’onto lele la olowanyi ndo lamamema Jehowa l’otema ande tshɛ. Lam’ele Yeso aki l’okitanyiya, nde akalame olowanyi ande ndo anto tshɛ wakakondja wahɔ oma lo dikambo sɔ. (Rɔmɔ 5:19) Jehowa akafute Yeso efula. Naka sho nkitanyiya Kristo ɔnɛ lele Owandji aso, kete Jehowa ayotofuta ndo sho. Nkitanyiya Kristo konyaka lo “panda ka pondjo”!​—Hɛbɛru 5:9.

²⁴ Ndo nto, olowanyi vɔamɛ wekɔ tshondo ya difuto. Tokedi 10:9 mbutaka ɔnɛ: “Onto lakɛndakɛnda lo olowanyi ayɔkɛndakɛnda lo lotui tshitshi.” Olowanyi ekɔ oko luudu la shaka ndo la dimɛna efula lele tafadi tshɛ diekɔ tshelo y’okitanyiya. Kaanga mbakoka mbɔsama tafadi ɔtɔi oko ɛngɔ k’anyanya, tafadi tshɛ diekɔ la dihole diadiɔ ndo l’ohomba adiɔ. Ndo osanganyelo w’atafadi efula ndjotondjaka luudu la woke la dimɛna. Woho akɔ waamɛ mbele, etsha w’okitanyiya wa lushi la lushi kana ɔnɔnyi l’ɔnɔnyi mbikaka luudu la dimɛna efula, mbuta ate olowanyi.

²⁵ Ɔnkɔnɛ, naka onto monga l’okitanyiya l’etena k’otale, kete nde kokaka ndjonga la dionga dikina, mbuta ate ekikelo. Ɛnyɛlɔ kaki Yeso kendana la dikambo sɔ mbayotɔsɛdingola lo tshapita yayela.