Ombadi aso wa ngandji,

“Yaka, ondjele.” (Makɔ 10:21) Leeta laki Yeso lɔsɔ mendanaka ndo la so ɛlɔ kɛnɛ. Onde wɛ ambetawɔ leeta lakɔ? Mbetawɔ leeta lɔsɔ ayonga la shɛngiya ya wolo lo lɔsɛnɔ layɛ. Lande na?

Jehowa akatome Ɔnande ɛtɔi lakandote la nkɛtɛ dia nde ndjokimɔ lɔsɛnɔ lande oko oshinga w’etshungwelo. (Joani 3:16) Laadiko dia nde tovwɛ, Ɔna ɔsɔ akatotshikɛ ɛnyɛlɔ ka woho wa nsɛna. Lo dikambo tshɛ diakandasalaka, nde akalame olowanyi ande ndo akangɛnyangɛnya otema wa She. Yeso akatɛnya nto woho wakokaso mbokoya She. Oma l’ɛtɛkɛta ndo oma l’etsha ande, Ɔna ɔsɔ akakɛnɛmɔla lolango ndo mboka ya She lo yoho ya kokele.​—Joani 14:9.

Bible mbutaka dia Yeso ekɔ ‘ɛnyɛlɔ kahombaso ndjela dimɛna dimɛna.’ (1 Petero 2:21) Naka sho nangaka ndjasukanya la Jehowa, naka sho nangaka monga la lɔsɛnɔ la dimɛna kakianɛ ndo naka sho nangaka ntshikala lo mboka katɔla otsha lo lɔsɛnɔ la pondjo, kete sho pombaka ndjela wanya wa Kristo dimɛna dimɛna.

Dia nsala dui sɔ, sho pombaka mbeya lɔsɛnɔ laki la Yeso la nkɛtɛ. Ɔnkɔnɛ, sho pombaka mbidja yimba efula lo kɛnɛ kata Bible lo dikambo diande. Nkana yimba lo kɛnɛ kakate ndo kakasale Yeso, lo woho wakokaso mbookoya lo ɛtɛkɛta ndo lo etsha ayotokimanyiya dia sho ndeka mbeya woho wa mboyela.

Dibuku nɛ diakokimanyiya dia wɛ mfudia ngandji kokayɛ Yeso ndo Jehowa. Ndo sho kombolaka dia ngandji kɛsɔ kotshutshuya dia wɛ ndjela wanya wa Kristo dimɛna dimɛna dia wɛ ngɛnyangɛnya otema wa Jehowa oma ko kakianɛ ndo pondjo pondjo.