1, 2. Lande na kahatakoke ndjasukanya la Jehowa lo shoamɛ, ndo kakɔna kakatosalɛ Yeso Kristo lo dikambo sɔ?

 ONDE wɛ atanganɛka ndooko lushi? Wɛ mbeyaka mbohɔ etena kɛmɔtshi kakayatatshɔka dia tenda ɔngɛnyi ayɛ kana owotɔ ayɛ ɔmɔtshi ko wɛ hayeya mboka. Etena kɛsɔ kakayɔtɔ lo mboka kahayeye, shi wɛ akemala dia mimbola onto ɔmɔtshi dia nde kolakanya mboka? Ohokanyiya woho wakayaoke naka lo dihole dia nde kolakanya tsho mboka, la ngandji tshɛ onto ɔsɔ ambokotɛ ate: “Ondjele, layanga kɔtɔla lɛnɛ atayatshu.” Ande ɔngɛnɔngɛnɔ wakonge la yɛ lee!   

² Lo yoho mɔtshi, Yeso Kristo akatosalɛ dikambo dia ngasɔ. Takatakoke monga la diɔtɔnganelo di’ɔlɔlɔ la Nzambi lo shoamɛ. L’ɔtɛ wa pɛkato ndo eongelo kele keema kokele kakatahowɔ, anto wakanganɛ ndo “mangana la lɔsɛnɔ l’oma le Nzambi.” (Ɛfɛsɔ 4:17, 18) Tekɔ l’ohomba w’ekimanyielo dia sho ntana mboka. Yeso lele Ɛnyɛlɔ kaso, hatosha tsho alako ndo ɛlɔmbwɛlɔ. Oko wakatadiɛnyi lo tshapita 1, Yeso kelɛka ɔnɛ: “Yaka, ondjele.” (Makɔ 10:21) Nde toshaka nto ɛkɔkɔ w’eshika wahombaso mbetawɔ leeta lɔsɔ. Lo diaaso dimɔtshi, Yeso akate ate: “Dimi lekɔ mboka, mɛtɛ ndo lɔsɛnɔ. Ndooko onto laya le Papa paka lo tshimbo yami.” (Joani 14:6) Nyɛsɔ tɔsɛdingole ɛkɔkɔ ɛmɔtshi wɛnya lande na kahombaso ndjasukanya la Shɛso paka lo tshimbo y’Ɔna. Oma laasɔ, la ɛkɔkɔ ɛsɔ lo yimba, tayoyɛna lo yoho yakɔna yele Yeso “mboka, mɛtɛ ndo lɔsɛnɔ.”

3. Lande na kele paka lo tshimbo ya Yeso mbakokaso ndjasukanya la Nzambi?

³ Ɔkɔkɔ wa ntondo ndo woleki woke wakokaso ndjasukanya la Nzambi paka lo tshimbo ya Yeso ele nɛ dia Jehowa akɔshi yɛdikɔ ya mbisha Ɔnande ɔkɛndɛ woleki ohomba. a She akawetɛ onto l’ohomba efula l’okotshamelo w’asangwelo Ande. (2 Kɔrɛtɔ 1:20; Kɔlɔsayi 1:18-20) Dia sho nshihodia ɔkɛndɛ w’ohomba wele la Ɔna, sho pombaka nsɛdingola kɛnɛ kakasalema l’ekambɔ k’Ɛdɛna, lɛnɛ akayele atshukanyi wa ntondo lokolo laki Satana dia tɔmbɔkwɛ Jehowa.​—Etatelo 2:16, 17; 3:1-6.

4. Ɔtɔmbɔkwɛlɔ wa lo Ɛdɛna wakonyiya dikambo diakɔna ndo yɛdikɔ yakɔna yakɔshi Jehowa dia nkandola dikambo sɔ?

⁴ Ɔtɔmbɔkwɛlɔ wa lo Ɛdɛna wakonyiya dimbola dimɔtshi di’ohomba efula diendana l’anto wa l’andja w’otondo: Onde ɔnɛ lele lokombo Jehowa ekɔ mɛtɛ ekila, ɔlɔlɔ, losembwe ndo la ngandji lo mboka yande tshɛ? Dia nkandola dikambo sɔ, Jehowa akɔshi yɛdikɔ dia ntoma ɔnande ɔmɔtshi la lo nyuma ndo la kokele la nkɛtɛ. Ɔkɛndɛ wakahombe Ɔna ɔsɔ mɛmba aki ɔkɛndɛ wa woke efula, mbuta ate nkimɔ lɔsɛnɔ lande dia nkidia lokombo laki She ndo monga oko oshinga w’etshungwelo dia nshimbɛ anto. Lo ntshikala la kɔlamelo polo lo nyɔi, Ɔna ɔsɔ akahombe nkandola ekakatanu tshɛ wakaye oma l’ɔtɔmbɔkwɛlɔ waki Satana. (Hɛbɛru 2:14, 15; 1 Joani 3:8) Koko Jehowa aki la miliyara y’ana wa lo nyuma wa kokele. (Danyɛlɛ 7:9, 10) Ɔna akɔna akandasɔnɛ dia ndjɛmba ɔkɛndɛ woleki ohomba ɔsɔ? Jehowa akasɔnɛ “Ɔnande ɛtɔi lakandote,” lakayeyamaka oko Yeso Kristo.​—Joani 3:16.

5, 6. Ngande wakɛnya Jehowa dia nde aki la wɛkamu otsha le Ɔnande ndo lo na akahikama wɛkamu ɔsɔ?

 ⁵ Komonga dui dia diambo dia Jehowa nsala ɔsɔnwɛlɔ ɔsɔ nɛ dia nde aki la wɛkamu w’efula le Ɔnande ɛtɔi lakandote. Ntambe efula la ntondo ka Ɔna ɔsɔ ndja lanɛ la nkɛtɛ, Jehowa akatatshi dia Ɔnande ɔsɔ ayoyohomba ntshikala la kɔlamelo l’atei wa weho tshɛ w’asui. (Isaya 53:3-7, 10-12; Etsha 8:32-35) Tende kɛnɛ kalembetshiya dui sɔ. L’ɛnyɛlɔ ka ditongami dikina tshɛ diele la lomba, Ɔna aki la lotshungɔ la nsɔna kɛnɛ kalangande. Koko Jehowa aki la wɛkamu w’efula le nde, diakɔ diakandatɛkɛta dia kɔlamelo y’Ɔnande. Lo na akahikama wɛkamu ɔsɔ? Lo ewo. Jehowa mbeyaka Ɔnande dimɛna ndo mbeyaka polo lo yɛdikɔ yakɔna yetawɔ Ɔnande mbɔngɛnyangɛnya. (Joani 8:29; 14:31) Ɔna nangaka She ndo She lo wedi ande nangaka Ɔna. (Joani 3:35) Ngandji kele lam’asa Ɔna la She kakakenge dimama diahakoke mpembɔ dia kaamɛ ndo dia wɛkamu.​—Kɔlɔsayi 3:14.   

⁶ Lo menda ohomba wele la ɔkɛndɛ wele la Ɔna, wɛkamu wele la She otsha le nde ndo ngandji kamamatanya Papa la Ɔna, mbokɛmaka lande na kele paka lo tshimbo ya Yeso mbakokaso ndjasukanya la Nzambi. Koko ekɔ ɔkɔkɔ okina nto wɛnya dia paka Ɔna mbakoka tɔlɔmbɔla otsha le She.

7, 8. Lande na kakakoke Yeso mbuta dia ndooko onto leya She dimɛna “paka Ɔna”?

⁷ Dia sho ndjasukanya la Jehowa, sho pombaka nkotsha akambo amɔtshi walɔmbama. (Osambo 15:1-5) Akɔna oleki Ɔna mbeya kɛnɛ kalɔmbama dia nkitanyiya wadjango waki Nzambi ndo dia mbetawɔma le Nde? Yeso akate ate: “Papa akambisha diangɔ tshɛ, ndo ndooko onto leya Ɔna dimɛna paka Papa, ndo ndooko onto leya Papa dimɛna paka Ɔna, ndo onto tshɛ lele Ɔna nangaka mbosholɛnde.” (Mateo 11:27) Nyɛsɔ tende lande na kakakoke Yeso mbuta l’eshikikelo  ndo aha la mbidja oshimu esɔ dia ndooko onto leya Papa dimɛna “paka Ɔna.”

⁸ Oko wende “enondo wa diangɔ tshɛ diakatongama,” Ɔna ekɔ la diɔtɔnganelo dia ma ma la Jehowa. (Kɔlɔsayi 1:15) Ohokanyiya diɔtɔnganelo dia ma ma diakayahamaka lam’asa Papa la Ɔna l’edja k’ɛnɔnyi waheyama mbadia, etena kakiwɔ vɔ ahende ato oma ko lushi lakandatongama polo lam’akayotongamaka ditongami dikina tshɛ dia lo nyuma. (Joani 1:3; Kɔlɔsayi 1:16, 17) Ohokanyiya yema diaaso dia laande diaki l’Ɔna dia monga kaamɛ la She eeka tokanyi ta She, lolango Lande, ɛlɛmbɛ ndo mboka Yande. Lo mɛtɛ, hatodje oshimu esɔ dia mbuta dia Yeso mbeyaka She dimɛna ndeka oseka onto okina tshɛ. Aha la taamu, dimama diaki lam’asawɔ sɔ diakakimanyiya Yeso dia nde nkɛnɛmɔla lonto laki She lo yoho yahakoke onto okina nsala.

9, 10. a) Lo toho takɔna takakɛnɛmɔla Yeso lonto laki She? b) Kakɔna kahombaso nsala dia sho mbetawɔma le Jehowa?

⁹ Wetshelo waki Yeso wakakɛnɛmɔla woho wakandeyaka tokanyi ndo nsaki yaki Jehowa dimɛna ndo kɛnɛ kalɔmbande atɛmɔdi Ande. b Yeso akakɛnɛmɔla lonto laki She lo yoho kina ya diambo. Nde akate ate: “Onto tshɛ lambɔmɛna ambɛna ndo Papa.” (Joani 14:9) Yeso akokoya She lo yoho ya kokele lo dikambo tshɛ diakandate kana diakandasale. Ɔnkɔnɛ, etena kadiaso akambo wendana la Yeso lo Bible, mbuta ate ɛtɛkɛta w’amɛna wakakambaka la nde dia mbetsha, kɛtshi kakotshutshuyaka dia nkɔnɔla anto ndo woho wakandatɛtɛka solo akotshutshuya dia nde ndela, sho kokaka mɛna woho wakakoke Jehowa ndamɛ nsala kana mbuta akambo asɔ. (Mateo 7:28, 29; Makɔ 1:40-42; Joani 11:32-36) Mboka ndo lolango laki She lakakɛnɛmɔma lo yoho ya kokele oma l’ɛtɛkɛta ndo oma lo etsha waki Ɔna. (Joani 5:19; 8:28; 12:49, 50) Ɔnkɔnɛ, dia sho mbetawɔma le Jehowa, sho pombaka  nkitanyiya wetshelo waki Yeso ndo ndjela ɛnyɛlɔ kande.​—Joani 14:23.

¹⁰ Lam’ele Yeso mbeyaka Jehowa dimɛna ndo mbookoyaka lo yoho ya kokele, hatokoke mamba lo woho wakasɔnɔla Jehowa dia Nde monga ehomɔ kakoka anto ndjasukanya la She. Oko wambotoshihodia lande na kakokaso ndja le Jehowa paka lo tshimbo ya Yeso, nyɛsɔ tɔsɛdingole kɛnɛ kalembetshiya ɛtɛkɛta waki Yeso w’ɔnɛ: “Dimi lekɔ mboka, mɛtɛ ndo lɔsɛnɔ. Ndooko onto laya le Papa paka lo tshimbo yami.”​—Joani 14:6.

11. a) Lande na kele paka lo tshimbo ya Yeso mbakokaso monga la diɔtɔnganelo la Nzambi? b) Ngande wɛnya ɛtɛkɛta wele lo Joani 14:6 dia ɔkɛndɛ wele la Yeso wekɔ ɔkɛndɛ wa laande? (Enda nɔtɛ.)

¹¹ Tamboshila mbeya dia ndooko yoho kina yakokaso ndjasukanya la Nzambi naka aha lo tshimbo ya Yeso. Tɔsɛdingolake kakianɛ kɛnɛ kalembetshiya dui sɔ le so. Yeso ekɔ “mboka” lo yoho nyɛ yele paka oma le nde mbakokaso ndjaala la diɔtɔnganelo dia dimɛna la Nzambi. Lande na? Nɛ dia lo ntshikala la kɔlamelo polo lo nyɔi, Yeso akakimɔ lɔsɛnɔ lande oko oshinga w’etshungwelo. (Mateo 20:28) Otondonga aha oshinga w’etshungwelo, tshike tototokoka ndjasukanya la Nzambi. Pɛkato mbidjaka wekamu lam’asa anto la Nzambi nɛ dia Jehowa ekɔ ekila, ɔnkɔnɛ nde hetawɔki pɛkato pondjo. (Isaya 6:3; 59:2) Koko olambo waki Yeso wakanya wekamu ɔsɔ, vɔ wakayala kɛnɛ kaki ohomba dia nkomba pɛkato. (Hɛbɛru 10:12; 1 Joani 1:7) Naka sho monga la mbetawɔ lo yɛdikɔ yakɔshi Nzambi lo tshimbo ya Kristo shɔ, kete tayokoka mbetawɔma le Nzambi. Ndooko yoho kina yakokaso ‘mbokana la Nzambi’ nto laadiko dia yoho shɔ. c​—Rɔmɔ 5:6-11.

12. Lo toho takɔna tele Yeso “mboka”?

 ¹² Yeso ekɔ “mboka” lo kɛnɛ kendana la dɔmbɛlɔ. Paka lo tshimbo ya Yeso mbakokaso nɔmba Jehowa l’eshikikelo ɔnɛ nde ayoka ɛsɛngɔsɛngɔ aso w’oma k’ɛsɛ otema. (1 Joani 5:13, 14) Yeso ndamɛ akate ate: “Ɛngɔ tshɛ kayonyɔlɔmba Papa lo lokombo lami, nde ayonyoshatɔ. . . . Nyɔlɔmbɛ ko nyayolongola, dia ɔngɛnɔngɛnɔ anyu monga efula.” (Joani 16:23, 24) Mbokɛmaka dia lo lokombo la Yeso mbakokaso nɔmba Jehowa ndo mbeelɛ ɔnɛ: “Shɛso.” (Mateo 6:9) Yeso ekɔ “mboka” lo yoho kina nto, mbuta ate oma l’ɛnyɛlɔ kande. Oko wakatadiɛnyi oma l’etatelo, Yeso akokoya She lo yoho ya kokele. Ɔnkɔnɛ, ɛnyɛlɔ kaki Yeso tɛnyaka woho wahombaso nsɛna dia ngɛnyangɛnya Jehowa. Laasɔ, dia sho ndjasukanya la Jehowa, sho pombaka ndjela wanya waki Yeso.​—1 Petero 2:21.

13, 14. a) Lo yoho yakɔna yakataka Yeso mɛtɛ? b) Kakɔna kakahombe Yeso nsala dia nde monga “mɛtɛ” ndo lande na?

¹³ Tena tshɛ, Yeso akatɛkɛtaka akambo wa mɛtɛ wendana l’ɔtɛkɛta wa prɔfɛsiya waki She. (Joani 8:40, 45, 46) Kashi kotanema l’onyɔ ande. (1 Petero 2:22) Kaanga atunyi ande wakasuya dia nde aketshaka anto “mboka ka Nzambi lo mɛtɛ.” (Makɔ 12:13, 14) Koko, etena kakate Yeso ate: “Dimi lekɔ . . . mɛtɛ,” nde kɔtɛkɛtaka tsho dia akambo wa mɛtɛ wakandataka, wakandasambishaka ndo wakandetshaka.

¹⁴ Tohɔ dia ntambe efula la ntondo, Jehowa akasambiya afundji wa Bible dia vɔ mfunda prɔfɛsiya efula yakendanaka la Mɛsiya kana Kristo. Prɔfɛsiya shɔ yakatatshi awui efula wendana la lɔsɛnɔ, olimu ndo nyɔi kande. Ndo nto, Ɛlɛmbɛ wa Mɔsɛ waki didjidji dia kɛnɛ kakendanaka la Mɛsiya. (Hɛbɛru 10:1) Onde Yeso akahombe ndjotshikala la kɔlamelo polo lo nyɔi dia nkotsha prɔfɛsiya tshɛ yendana la nde? Paka lo nsala ngasɔ mbakahombe Jehowa mɛnama dia Nde ekɔ Nzambi kata prɔfɛsiya ya mɛtɛ. Ɔkɛndɛ wa wotsho ɔsɔ waki l’ahɛka  wa Yeso. Oma lo yoho yakandasɛnɛ, mbuta ate ɛtɛkɛta tshɛ wakandatɛkɛta ndo dui tshɛ diakandasale, Yeso akɛnya dia awui wa lo prɔfɛsiya wekɔ mɛtɛ. (2 Kɔrɛtɔ 1:20) Ɔnkɔnɛ, Yeso aki “mɛtɛ.” Aki mɛtɛ lo yoho nyɛ yele ɔtɛkɛta wa prɔfɛsiya waki Jehowa wakakotshama lo oyelo waki Yeso.​—Joani 1:17; Kɔlɔsayi 2:16, 17.

15. Kakɔna kalembetshiya monga la mbetawɔ le Ɔna ndo nsala dui sɔ ekɔ la wahɔ akɔna?

¹⁵ Yeso ekɔ “lɔsɛnɔ” nɛ dia paka lo tshimbo yande mbakokaso nkondja lɔsɛnɔ, mbuta ate “lɔsɛnɔ l’oshika.” (1 Timɔte 6:19) Bible mbutaka ɔnɛ: “Onto tshɛ lele la mbetawɔ le Ɔna ayokondja lɔsɛnɔ la pondjo. Onto tshɛ lahakitanyiya Ɔna hatɛna lɔsɛnɔ, koko odudu wa Nzambi wekɔ le nde.” (Joani 3:36) Kakɔna kalembetshiya monga la mbetawɔ le Ɔna Nzambi? Kɛsɔ nembetshiyaka dia sho pombaka monga l’eshikikelo ɔnɛ hatokoke kondja lɔsɛnɔ naka aha oma le nde. Ndo nto, dui sɔ nembetshiyaka dia sho pombaka mɛnya mbetawɔ kaso l’etsha, ntetemala mbeka oma le Yeso ndo nsala tshɛ kakokaso nsala dia ndjela wetshelo ndo ɛnyɛlɔ kande. (Jakɔba 2:26) Ɔnkɔnɛ, monga la mbetawɔ le Ɔna Nzambi kimanyiyaka dia monga la lɔsɛnɔ la pondjo, mbuta ate lɔsɛnɔ lahavu oko ditongami dia lo nyuma l’olongo le “leemba la tshitshɛ” l’Akristo w’akitami ndo lɔsɛnɔ l’anto wa kokele lo paradiso ka la nkɛtɛ le “olui a woke w’anto” la “ɛkɔkɔ ekina.”​—Luka 12:32; 23:43; Ɛnyɛlɔ 7:9-17; Joani 10:16.   

16, 17. a) Ngande wayɛnya Yeso dia nde ekɔ “lɔsɛnɔ” kaanga le wanɛ wakavu? b) Eshikikelo kakɔna kakoka monga la so?

¹⁶ Ko kayotota dia wanɛ wamboshilaka la mvɔ? Yeso ekɔ “lɔsɛnɔ” ndo le wɔ. Yema tshitshɛ la ntondo ka nde mbolola Lazaro l’ɔngɛnyi ande, Yeso akatɛ Maata ka kadiyɔ aki Lazaro ate: “Dimi lekɔ eolwelo ndo lɔsɛnɔ. Onto longa la mbetawɔ le mi, oyadi kaanga nde kovɔka, nde ayoyala la lɔsɛnɔ nto.”  (Joani 11:25) Jehowa akasha Ɔnande “nsapi ya nyɔi ndo ya Diombo,” mbuta ate nde akawosha wolo wa mbolola anto. (Ɛnyɛlɔ 1:17, 18) La sapi shɔ, Yeso lakatombwama ayodihola nkuke ya diombo ndo ayotshungola wanɛ tshɛ wele lo waombo.​—Joani 5:28, 29.

¹⁷ Lo mbuta ɔnɛ: “Dimi lekɔ mboka, mɛtɛ ndo lɔsɛnɔ,” Yeso akɛnya lo tshena pe oyango wa lɔsɛnɔ ndo wa olimu ande la nkɛtɛ. Ɛtɛkɛta ɛsɔ wekɔ la kitshimudi mɔtshi le so ɛlɔ kɛnɛ. Tohɔ dia Yeso akakotsha ate: “Ndooko onto laya le Papa paka lo tshimbo yami.” (Joani 14:6) Ɛtɛkɛta waki Yeso ɛsɔ wekɔ la nɛmɔ le so ɛlɔ kɛnɛ oko wakiwɔ la nɛmɔ etena kakandawate. Ɔnkɔnɛ, sho koka monga l’eshikikelo dia naka sho ndjela Yeso, kete hatonganɛki pondjo. Paka ndamɛ onto mbayotɛnya mboka k’otsha le “She.”

18. Kakɔna kalembetshiya monga ambeki wa mɛtɛ wa Yeso?

¹⁸ Lo menda ɔkɛndɛ w’ohomba wele la Yeso ndo woho weyande She dimɛna, tekɔ l’ɛkɔkɔ w’eshika wa ndjela Ɔna. Oko wakatadiɛnyi lo tshapita yetshi, monga ambeki wa mɛtɛ waki Yeso mendanaka la etsha aso, koko aha tsho l’ɛtɛkɛta kana nsaki yaso. Ndjela Kristo nembetshiyaka mbɔtɔnganyiya lɔsɛnɔ laso la wetshelo ndo la ɛnyɛlɔ kande. (Joani 13:15) Dibuku diatayadia nɛ kokaka kokimanyiya dia wɛ nkotsha oyango ɔsɔ.

19, 20. Kakɔna kele lo dibuku dia wekelo nɛ kakoka kokimanyiya dia wɛ ndjela Kristo?

¹⁹ Lo totshapita tayela, tayɔsɛdingola la yambalo tshɛ lɔsɛnɔ ndo olimu wa Yeso. Totshapita tɔsɔ kahanyema lo tenyi sato. L’etenyi ka ntondo, tayɔsɛdingola lo tshena pe waonga ndo woho wakasalaka Yeso akambo. L’etenyi ka hende, tayɔsɛdingola ɛnyɛlɔ k’ohetoheto ande l’esambishelo ndo lo wetshelo. L’etenyi ka sato, tayɛna woho wakandɛnya ngandji kande. Tatɛ oma lo tshapita 3, tshapita tshɛ yekɔ la kiombo yele l’ɔtɛ a dui ɔnɛ: “Ngande wakokayɛ ndjela Yeso?” Avɛsa  ndo ambola wele lo kiombo shɔ wakalɔngɔswama dia tokimanyiya woho wakokaso mbokoya Yeso l’ɛtɛkɛta ndo l’etsha.

²⁰ La ekimanyielo ka Jehowa Nzambi, sho hatotonganɛ ndo hatotangana la nde l’ɔtɛ wa pɛkato kakatahowɔ. Jehowa akayahondja lo mbetawɔ la ngandji tshɛ dia ntoma Ɔnande dia nde ndjotɛnya woho wa sho monga la diɔtɔnganelo dia dimɛna la Nde. (1 Joani 4:9, 10) Sho kombolaka di’otema ayɛ kotshutshuya dia wɛ mbetawɔ ndo nsala akambo lo yoho yɔtɔnɛ la leeta laki Yeso loludi la ngandji l’ɔnɛ: “Ondjele.”​—Joani 1:43.