1, 2. Kakɔna kakalembetshiya ɔpɔstɔlɔ Joani lo kɛnɛ kendana la dikɔlɔ di’ekomelo diaketsha Yeso nde la apɔstɔlɔ ande?

 OSOMBE ɔmɔtshi akatatɛ mfunda awui wakandohɔka dimɛna wakasalema ambeta ɛnɔnyi oko 70, awui wakasalema la dikɔlɔ di’ekomelo diakandetsha nde la apɔstɔlɔ akina kaamɛ la Yeso. Lokombo lande Joani, laasɔ ko nde aya l’ɛnɔnyi oko 100. Nyuma k’ekila ka Nzambi kakakimanyiya Joani dia nde mfunda akambo wakete la dikɔlɔ sɔ aha la mbohɛ ndooko dui.

² La dikɔlɔ sɔ, Yeso akatɛkɛta dikambo dia nyɔi kande kaki k’emembe. Joani oto mbakalembetshiya ɔkɔkɔ wakate Yeso dia nde ayovɔ nyɔi ka kɔlɔ lo mbuta ate: “Dia andja mbeya ɔnɛ dimi nangaka Papa, oko wakambidjangɛ Papa dia nsala mbasalami. Nyonee, nyɛsɔ tomɔ oma lanɛ.”​—Joani 14:31.

3. Ngande wakɛnya Yeso dia nde akokaka She ngandji?

³ “Dimi nangaka Papa.” Ɔsɔ mbaki dui diakaleke ohomba le Yeso. Nde kokalolɛ ɛtɛkɛta ɛsɔ mbala la mbala nɛ dia paka lo Joani 14:31 oto mbakate Yeso hwe dia nde nangaka She. Koko, Yeso akasɛnɛ lo yoho yɔtɔnɛ la ɛtɛkɛta ɛsɔ. Ngandji kakandokaka Jehowa kakɛnamaka lushi la lushi l’akambo wakandasalaka. Dihonga diaki la Yeso, okitanyiya ande ndo ekikelo kande aki tolembetelo ta ngandji kakandokaka Nzambi. Ngandji kɛsɔ mbakootshutshuyaka dia nkamba olimu ande.  

4, 5. Bible tɛkɛtaka dia woho akɔna wa ngandji ndo kakɔna kakokaso mbuta lo dikambo dia ngandji koka Yeso Jehowa?

⁴ Ɛlɔ kɛnɛ, anto efula mbeyaka mbɔsa dia anto wokana ngandji wekɔ ɛhɔdu nɛ dia anto kikakatanyaka la poɛmɛ ndo la nkembo ya ngandji kana tena dimɔtshi la ngandji k’anyanya  ka lam’asa pami la womoto. Otshikitanyi l’anto wa nshi nyɛ, Bible tɛkɛtaka dikambo dia ngandji ka lam’asa pami la womoto lo yoho ya nɛmɔ. (Tokedi 5:15-21) Koko, Ɔtɛkɛta wa Nzambi tɛkɛtaka mbala efula dikambo dia woho okina wa ngandji. Ngandji kɛsɔ keema nsaki k’anyanya ka lo tshanda mɔtshi, k’etshitshitshitshi kana ka l’ekanda. Tɔ mendanaka l’otema ndo la yimba. Ngandji kɛsɔ ndjaaka oma lo lonto la l’etei k’otema, tɔ nɔmbwamaka ndo mbɔtɔnɛka la atɔndɔ wa laadiko ndo mɛnamaka oma lo etsha w’ɛlɔlɔ. Tɔ kekɔ ngandji k’ohomba efula, koko aha k’anyanya. Ɔtɛkɛta wa Nzambi mbutaka ɔnɛ: “Ngandji hakomɛ pondjo.”​—1 Kɔrɛtɔ 13:8.

⁵ Yeso mbele onto lakaleke mboka Jehowa ngandji. Ndooko onto lakaleke Yeso lo nsɛna lo yoho yɔtɔnɛ la ɛtɛkɛta wakandate wendana l’ɔlɛmbɛ woleki woke waki Nzambi wata ɔnɛ: “Langa Jehowa Nzambi kayɛ l’otema ayɛ tshɛ, la anima ayɛ tshɛ, la yimba yayɛ tshɛ ndo la wolo ayɛ tshɛ.” (Makɔ 12:30) Kakɔna kakakimanyiya Yeso dia monga la ngandji ka ngasɔ? Ngande wakandatetemala nkeketsha ngandji kakandokaka Nzambi etena kakinde la nkɛtɛ? Ndo ngande wakokaso mbookoya?

6, 7. Ngande weyaso dia Tokedi 8:22-31 tɛkɛtaka dia Ɔna Nzambi koko aha dia dionga dielɛwɔ lomba?

⁶ Onde wɛ atakambaka olimu ɔmɔtshi kaamɛ l’osekayɛ ɔmɔtshi ko wɛ ndjɛna dia lɔngɛnyi lanyu lamboleka nkeketala? Ɛnyɛlɔ ka dimɛna kɛsɔ mbeyaka kokimanyiya dia wɛ nshihodia ngandji kakahame lam’asa Jehowa nde l’Ɔnande ɛtɔi lakandote. Tookɔtɛkɛtaka mbala efula dia Tokedi 8:30, koko nyɛsɔ tɔsɛdingole divɛsa nɛ lo ndjela awui wele l’avɛsa wosukanyi la diɔ. Lo divɛsa 22 polo 31, sho tanaka ɛtɛkɛta wakasambiyama wendana la lomba lɔsama oko onto. Ngande weyaso dia ɛtɛkɛta ɛsɔ mendanaka la Ɔna Nzambi?

⁷ Lo divɛsa 22, lomba lɔsɔ mbutaka ɔnɛ: “Jehowa akantonge  oko etatelo k’olimu ande, bangoo k’elimu ande w’edjedja.” Aha dia dionga dielɛwɔ lomba mbatɛkɛtawɔ lanɛ nɛ dia dionga sɔ ‘kotongama.’ Diɔ komonga l’etatelo nɛ dia Jehowa bu l’etatelo ndo nde okongaka la lomba tena tshɛ. (Osambo 90:2) Koko, Ɔna Nzambi mbele “enondo wa diangɔ tshɛ diakatongama.” Nde akatongama ndo ekɔ etatelo ka etongelo ka Jehowa. (Kɔlɔsayi 1:15) Ɔna ɔsɔ akasɛnɛ edja efula la ntondo ka olongo la nkɛtɛ tongama oko wadilembetshiya dibuku dia Tokedi. Ndo oko wende Dui, mbuta ate Yɛmba awui yaki Nzambi, nde akakɛnɛmɔla lomba laki Nzambi lo yoho ya kokele.​—Joani 1:1.

8. Kakɔna kakasalaka Ɔna la ntondo ka nde ndjotɔ oko onto ndo kakɔna kakokaso mbohɔka etena kangɛnangɛnaso lo menda etongelo? 

⁸ Kakɔna kakasalaka Ɔna ɔsɔ l’edja k’efula kakinde l’olongo la ntondo ka nde ndja la nkɛtɛ? Divɛsa 30 totɛka dia nde aki suke la Nzambi oko “okambi wa kɔmba.” Kakɔna kalembetshiya dui sɔ? Kɔlɔsayi 1:16 nembetshiyaka ɔnɛ: “Lo tshimbo yande mbakatongama diangɔ dikina tshɛ l’olongo ndo la nkɛtɛ . . . Diangɔ dikina tshɛ diakatongama lo tshimbo yande ndo lo dikambo diande.” Ɔnkɔnɛ, Jehowa lele Otungi akakambe kaamɛ l’Ɔnande, Okambi wa kɔmba dia ntonga diangɔ dikina tshɛ, oma lo ditongami dia lo nyuma dia l’olongo polo lo andja wa woke wɛnama ɔnɛ, nkɛtɛ kaamɛ la weho wa tombatomba diotshikitanyi ndo nyama yele la lɔsɛnɔ, mbidja ndo etongami koleki tshɛ diambo la nkɛtɛ, mbuta ate onto. Lo yoho mɔtshi, sho koka mbɛdika woho wakakambe Papa la Ɔna ɔsɔ, la onto lakongɛ woho wahomba luudu mbikama, la ombiki wa mvudu layela la yambalo tshɛ kɛnɛ kakakongɛma. Etena kangɛnangɛnaso lo menda etongelo, Jehowa lele Otungi wa Woke mbatombolaso. (Osambo 19:1) Koko, sho pombaka mbohɔ etena k’otale ndo k’ɔngɛnɔngɛnɔ kakakambe Otungi nde la “okambi [ande] wa kɔmba.”

9, 10. a) Kakɔna kakakeketsha dimama diaki lam’asa Jehowa l’Ɔnande? b) Kakɔna kakoka nkeketsha dimama diele lam’asaso la Shɛso lele l’olongo?

 ⁹ Etena kakamba anto ahende wele keema kokele kaamɛ, tena dimɔtshi vɔ mongaka l’okakatanu dia mbokana lam’asawɔ. Koko aha ngasɔ mbakidiɔ lam’asa Jehowa nde la Ɔnande! Ɔna ɔsɔ akakambe l’edja k’ɛnɔnyi waheyama mbadia nde la She ndo nde mbutaka ate: “Lakangɛnangɛnaka la ntondo kande tena tshɛ.” (Tokedi 8:30) Eelo, vɔ akɔ ahende wakangɛnangɛnaka monga kaamɛ. Mbokɛmaka dia Ɔna ɔsɔ akatalekaka mfɔna la She lo mbokoya waonga Ande. Diakɔ diele dimama dia wolo diakayala lam’asa Ɔna nde la She! Dimama sɔ koka mbelamɛ mɛtɛ ɔnɛ dimama dia ngandji dioleki edja ndo dioleki wolo l’andja w’otondo.

¹⁰ Ko ngande wendanaso la dui sɔ? Wɛ koka mfɔnya dia wɛ hakokaki pondjo monga la dimama dia ngasɔ lam’asayɛ la Jehowa. Ndo nto, ndooko onto l’atei aso lele la dihole dia la diko oko Ɔna ɔsɔ. Koko, tekɔ la diaaso dia dimɛna efula. Tohɔ dia lo nkamba kaamɛ la She mbakayonga Yeso la dimama dia ngasɔ. La ngandji tshɛ, Jehowa ekɔ lo tosha diaaso dia sho monga “ekambi kaamɛ” la nde. (1 Kɔrɛtɔ 3:9) Etena kayelaso ɛnyɛlɔ ka Yeso l’esambishelo, sho pombaka mbohɔka dia tekɔ ekambi kaamɛ la Nzambi. Diakɔ diele dimama dia ngandji diatokakatanya la Jehowa tatetemalaka monga wolo. Ndooko diɛsɛ dioleki sɔ.

11-13. a) Lande na kele ekɔ ohomba dia sho mbɔsa ngandji kaso oko etombatomba ndo etena kakinde dikɛnda, kakɔna kakakimanyiya Yeso dia ntetemala nkeketsha ngandji kakandokaka Jehowa? b) Ngande wakɛnya Ɔna Nzambi nsaki kaki la nde ka mbetshama oma le Jehowa la ntondo kana l’ɔkɔngɔ wa nde mbotɔ oko onto?

¹¹ Lo akambo efula, ayonga dimɛna mbɔsa ngandji kele l’etema aso oko etombatomba. L’ɛnyɛlɔ ka etombatomba, ngandji pombaka ndeshama ndo kokamɛ dia tɔ mpama. Naka  sho kinya yimba ndo ntshika kikokɛ, kete tɔ kayɔla ndo kayoshila. Yeso kɔmbɔsaka ngandji kakandokaka Jehowa oko ɛngɔ k’anyanya. Nde akasalaka tshɛ dia tɔ ntshikala wolo ndo pɛtahɛtaka l’edja tshɛ kakinde la nkɛtɛ. Nyɛsɔ tende woho wakandasale dui sɔ.

¹² Tokanyiya yema nto kɛnɛ kakete etena kaki Yeso eke dikɛnda ndo kakandatɛkɛta la dihonga tshɛ lo tɛmpɛlɔ ka la Jɛrusalɛma. Tohɔ ɛtɛkɛta wakandatɛ ambutshi ande wanɛ wakayakiyanyaka dikambo diande ate: “Lande na katanyanyange? Onde nyu hanyeye dia dimi pombaka monga lo luudu la Papa?” (Luka 2:49) Etena kakinde eke dikɛnda, ondo Yeso kombohɔ akambo wakete lo lɔsɛnɔ lande etena kakinde l’olongo. Koko, nde akokaka Jehowa She ngandji k’efula. Nde akeyaka dia ngandji kɛsɔ kakahombe mɛnama lo mbɔtɛmɔla. Ɔnkɔnɛ, ndooko dihole dikina dia la nkɛtɛ diakaleke Yeso ngɛnangɛna ntanema oko lo luudu la She, mbuta ate l’ɔtɛmwɛlɔ wa pudipudi. Nde akakombolaka ndjaala lɛkɔ ndo konangaka ntomba. Ndo nto, nde komonga lɛkɔ oko onto lenda akambo tsho, koko nde akalomɔlomɔka dia mbeka akambo wendana la Jehowa ndo dia ntɛkɛta kɛnɛ kakandeyaka. Nsaki kɛsɔ kootatɛ ndo kookomɛ etena kakinde l’ɛnɔnyi 12.    

¹³ Etena kakinde l’olongo, Ɔna ɔsɔ akalomɔlomɔka dia mbetshama oma le She. Prɔfɛsiya kele lo Isaya 50:4-6 mɛnyaka dia Jehowa akasha Ɔnande wetshelo wa laande lo kɛnɛ kendana l’ɔkɛndɛ ande wa Mɛsiya. Kaanga mbele wetshelo ɔsɔ wakendanaka ndo la ɛhɛnyɔhɛnyɔ wakahombe ndjohomana la nde oko wende Okitami waki Jehowa, Ɔna ɔsɔ akeke akambo asɔ la waasaso tshɛ. L’ɔkɔngɔ, etena kakaye Yeso la nkɛtɛ ndo kakandakome opalanga, nde akatetemala nomɔlomɔ dia ntshɔ lo luudu la She dia nde tɔtɛmɔla ndo teka akambo wɔtɔnɛ la lolango la Jehowa. Bible mbutaka dia nde akatshɔka mbala la mbala lo tɛmpɛlɔ ndo lo shinangɔnga. (Luka 4:16; 19:47) Naka sho nangaka dia ngandji kokaso Jehowa ntetemala mpɛtahɛta, kete sho pombaka nsala la wolo dia mbɔtɔka lo  nsanganya y’Akristo lɛnɛ atɛmɔlaso Jehowa ndo mpamia ewo ndo lowando laso otsha le nde.

14, 15. a) Lande na kakayangaka Yeso tena dia monga ndamɛ? b) Ngande wakɛnya alɔmbɛlɔ wa Yeso diɔtɔnganelo diaki lam’asande la She ndo dilɛmiɛlɔ di’efula diaki la nde otsha le She?

¹⁴ Yeso akatetemala nto nkeketsha ngandji kakandokaka Jehowa lo mbɔlɔmbaka mbala la mbala. Kaanga mbakandɔtshiyaka anto lo demba, nde akasalaka la wolo dia nkondja etena ka monga ndamɛ. Ɛnyɛlɔ, Luka 5:16 mbutaka ɔnɛ: “Nde akatshɔka mbala la mbala l’ahole waha anto dia tɔlɔmba.” Woho akɔ waamɛ mbele, Mateo 14:23 mbutaka ɔnɛ: “L’ɔkɔngɔ wa nde nkɛndja elui w’anto, nde akatshu lo dikona ndamɛ dia tɔlɔmba. La dikɔlɔ, nde aki lɛkɔ ndamɛ.” Lo waaso asɔ ndo lo waaso akina, Yeso akayangaka dia monga ndamɛ aha l’ɔtɛ w’ɔnɛ nde akatonaka monga l’anto, koko nɛ dia nde akalangaka monga ndamɛ dia nde nsawola la She dimɛna lo dɔmbɛlɔ.

¹⁵ Etena kakandalɔmbaka, tena dimɔtshi Yeso akakambaka l’etelo k’ɔnɛ: “Aba, Papa.” (Makɔ 14:36) Lo nshi ya Yeso, “Aba” aki tshɛkɛta yakakambaka l’ana dia ntɛkɛta dikambo dia shɛwɔ. Tena efula ɔsɔ aki l’atei wa tɔtɛkɛta takeyaka ana ntondo. Koko, yɔ yekɔ tshɛkɛta yɛnya dilɛmiɛlɔ. Kaanga mbɛnyayɔ diɔtɔnganelo diele lam’asa Yeso la She ka ngandji, yɔ mɛnyaka nto woho wakandalɛmiyaka efula lowandji laki Jehowa oko wende ombutshi. Sho tanaka awui asɔ ahende lo alɔmbɛlɔ waki Yeso wakafundama. Ɛnyɛlɔ, lo Joani tshapita 17, tanemaka dɔmbɛlɔ di’oma k’ɛse otema ndo di’otale diakasale Yeso l’otsho w’ekomelo ka lɔsɛnɔ lande. Ekɔ mɛtɛ dui dia dimɛna dia sho mbeka dɔmbɛlɔ sɔ ndo ekɔ ohomba efula dia sho mbokoya Yeso, aha lo kalolɛka ɛtɛkɛta ande, koko lo ntana toho takokaso kɛnɛmɔlɛ Shɛso lele l’olongo etema aso lo dɔmbɛlɔ lo yɛdikɔ yakokaso nsala. Nsala ngasɔ ayotokimanyiya dia sho ntetemala mpɛtshahɛtsha ndo nkeketsha ngandji kawokaso.

16, 17. a) Ngande wakɛnya Yeso ngandji kakandokaka She oma lo ɛtɛkɛta? b) Ngande wakɛnya Yeso lokaho lele la She?

 ¹⁶ Oko wakataditshi, Yeso kombutaka mbala la mbala ɔnɛ: “Dimi nangaka Papa.” Koko, mbala efula ngandji kakandokaka She kakokamaka l’ɛtɛkɛta ande. Lo ngande? Yeso ndamɛ akate ate: “Papa, wɛ Owandji w’olongo la nkɛtɛ, lambokotombola lo sɛkɛ.” (Mateo 11:25) Lam’akateke etenyi ka hende ka dibuku nɛ, takɛnyi dia Yeso akalangaka ntombola She lo nkimanyiya anto akina dia vɔ mbeeya. Ɛnyɛlɔ, nde akɛdika Jehowa la ombutshi wa pami walomɔlomɔ dia dimanyiya ɔnande lakanganɛ, diakɔ diakongande dia ɔna ɔsɔ ndjatshumoya ndo nkalola la ngelo ndo etena kambondowɛna oma l’etale, nde ambolawɔ ndo ambotokumbatɛ. (Luka 15:20) Shi otema w’onto tshɛ minandemaka lo woho wakakambe Yeso l’ɛnyɛlɔ kɛsɔ dia mɛnya woho wele Jehowa la ngandji ndo wadimanyiyande?

¹⁷ Mbala efula Yeso akatombolaka She l’ɔtɛ wa lokaho Lande. Nde akakambe l’ɛnyɛlɔ k’ambutshi wele keema kokele dia mɛnya eshikikelo kakoka monga la so ɔnɛ Shɛso ayotosha sho tshɛ nyuma k’ekila kele laso ohomba. (Luka 11:13) Yeso akatɛkɛta nto dikambo di’elongamelo katosha She lele kanga lokaho. Yeso akatɛkɛta efula dikambo dia elongamelo kande hita ka woho wayondokalola l’olongo dia todjasɛ suke la She. (Joani 14:28; 17:5) Nde akatɛ ambeki ande dikambo dia elongamelo kakasha Jehowa “leemba la tshitshɛ l’ɛkɔkɔ” waki Kristo, mbuta ate elongamelo ka ntshɔ l’olongo ndo tolɛ kaamɛ la nde oko wende Mɛsiya Nkumekanga. (Luka 12:32; Joani 14:2) Nde akasha otshi wa kɔlɔ ɔmɔtshi laki suke la nyɔi elongamelo ka ndjɔsɛna lo Paradiso. (Luka 23:43) Ntɛkɛta dikambo dia lokaho laki She lo toho tɔsɔ akakimanyiya Yeso dia nde ntetemala nkeketsha ngandji kakandokaka Jehowa. Ambeki efula wa Kristo wakɛnyi dia ntɛkɛta awui wendana la Jehowa ndo dia elongamelo kakandasha wanɛ wawoka ngandji mbaki dui diakaleke ohomba diakakoke mbakimanyiya dia nkeketsha ngandji ndo mbetawɔ kaki la wɔ le Jehowa.

18. Naa yoho yoleki dimɛna ya ndjela Yeso ndo lande na?

¹⁸ Yoho yoleki dimɛna ya ndjela Yeso ele, nanga Jehowa l’etema aso tshɛ, la anima aso tshɛ, la yimba yaso tshɛ ndo la wolo aso tshɛ. (Luka 10:27) Yɛdikɔ yokaso Jehowa ngandji yayɛnama oma l’etsha aso koko aha oma lo nsaki kakoka monga l’etema aso. Yeso kokomɛ tsho lo monga la ngandji otsha le She kana lo mbuta tsho ɔnɛ: “Dimi nangaka Papa.” Nde akate ate: “Dia andja mbeya ɔnɛ dimi nangaka Papa, oko wakambidjangɛ Papa dia nsala mbasalami.” (Joani 14:31) Satana akadje tɔfwɛfwɛ ɔnɛ ndooko onto layokambɛ Jehowa la lolango lande hita. (Jɔbɔ 2:4, 5) Dia mbisha okadimwelo woleki tshɛ dimɛna lo tɔfwɛfwɛ taki Satana, la dihonga tshɛ, Yeso akɛnya oma l’etsha ngandji ka l’otema ɔtɔi kakandokaka She. Nde akookitanyiya polo lo mbetawɔ dia ndjakema. Onde wɛ ayoyela Yeso? Onde wɛ ayɛnya andja ɔnɛ dia wɛ mɛtɛ mbokaka Jehowa Nzambi ngandji?

19, 20. a) L’ɔtɛ w’ɛkɔkɔ akɔna w’eshika wahombaso mbɔtɔka lo nsanganya y’Akristo? b) Ngande wahombaso mbɔsa wekelo aso w’onto ndamɛ, okanelo wa yimba ndo dɔmbɛlɔ?

¹⁹ Jehowa mbeyaka dia mbooka ngandji ka ngasɔ ekɔ ohomba w’efula wa lo nyuma wele la so. Ɔnkɔnɛ, Jehowa akɔshi tɛdikɔ dia sho mbɔtɛmɔlaka lo yoho yahɛtshahɛtsha ndo yakeketsha ngandji kawokaso. Etena katshɔso lo nsanganya y’Akristo, katohɔke dia takatshwe dia tɔtɛmɔla Nzambi kaso. Toho tɔmɔtshi tatɛmɔlaso Jehowa ele lo mpokamɛ la yambalo tshɛ etena kasalema dɔmbɛlɔ, memba esambo wa lotombo, ndjelaka nsanganya la yambalo tshɛ ndo mbishaka kɔmatɛrɛ naka kokaka. Nsanganya shɔ toshaka waaso wa nkeketsha asekaso Akristo. (Hɛbɛru 10:24, 25) Tɛmɔlaka Jehowa mbala la mbala lo nsanganya y’Akristo ayotokimanyiya dia sho ndeka nkeketsha ngandji kawokaso.

²⁰ Wekelo w’onto ndamɛ, okanelo wa yimba la kɛnɛ kekaso ndo dɔmbɛlɔ ayotokimanyiya nto dia nkeketsha ngandji kokaso Jehowa. Tɔsake dia waaso asɔ ekɔ tena diongaso sho la  Jehowa ato. Etena kekaso Ɔtɛkɛta wa Nzambi wakafundama ndo kakanaso yimba la wɔ, Jehowa tewoyaka tokanyi tande ndo etena kɔlɔmbaso, sho mbodihwɛka otema. Tohɔ dia dɔmbɛlɔ hakomɛ tsho lo mbutɛ Nzambi ehomba aso. Dɔmbɛlɔ ekɔ nto diaaso dia mboka Jehowa losaka l’ɔtɛ w’ɛtshɔkɔ walongolaso ndo mbotombola l’ɔtɛ w’etsha ande wa diambo. (Osambo 146:1) Ndo nto, ntombola Jehowa lo sɛkɛ l’ɔngɛnɔngɛnɔ ndo la waasaso mbele yoho yoleki dimɛna ya mbooka losaka ndo mbɛɛnya ngandji kawokaso.

21. Lande na kele ekɔ ohomba mboka Jehowa ngandji ndo kakɔna kayotɔsɛdingola lo totshapita tele la ntondo?

²¹ Mboka Nzambi ngandji mbele dikambo dioleki ohomba dia sho monga la ɔngɛnɔngɛnɔ wa pondjo. Kɛsɔ mbaki Adama l’Eva l’ohomba dia vɔ nkitanyiya Nzambi, koko vɔ kosala dui sɔ. Dui sɔ mboleki ohomba le so dia sho ntondoya ohemba tshɛ wendana la mbetawɔ kaso, nshika ntanga la ntondo k’ohemba ndo mbikikɛ ekakatanu tshɛ. Ɔsɔ mbele dikambo dioleki ohomba dia ndjela Yeso. Lo mɛtɛ, ngandji kokaso Jehowa kakatana la ngandji kokaso wonyaso onto. (1 Joani 4:20) Lo totshapita tele la ntondo, tayɔsɛdingola woho wakokaka Yeso anto ngandji. Lo tshapita yayela, tayɔsɛdingola lande na kele anto efula wakɛnaka dia Yeso mbɔtshiyaka anto lo demba.